NA AÑA 1991, Testigunan di Yehova na Rusia tabata masha kontentu mes! Nan religion a ser rekonosé ofisialmente pa gobièrnu despues di hopi aña di prohibishon. Ta ken por a imaginá e tempu ei ku e kantidat di Testigu di Yehova na Rusia lo a bira 10 biaha mas tantu i ku awe nan ta rònt di 170.000 publikadó! Entre e grupo grandi akí di predikadó diligente tin rumannan ku a bini djafó pa yuda den e trabou di kosecha spiritual. (Mat. 9:37, 38) Laga nos sera konosí ku algun di nan.

Matthew di Gran Bretaña tabatin 28 aña dia ku nan a kita e prohibishon na Rusia. Na un kongreso ku el a bai e aña ei, el a tende den un diskurso ku e kongregashonnan na Ost Europa tabatin mester di yudansa urgente. E oradó a papia di un kongregashon na St. Petersburg, Rusia, kaminda e publikadónan tabatin sientos di estudio, pero solamente un sirbidó ministerial i niun ansiano! Matthew a konta: “Despues di e diskurso ei, mi no por a stòp di pensa riba Rusia. Pues, m’a papia ku Yehova tokante mi deseo di bai biba einan.” El a spar poko plaka, bende mayoria di su kosnan, i na 1992 el a bai biba na Rusia. Kon a bai kuné einan?

Matthew a bisa: “E idioma tabata un reto. Mi no por a hiba un kòmbersashon tokante Beibel ku e hendenan.” Un otro reto grandi tabata pa haña un lugá di biba. E di: “Mi no ta ni kòrda mas kuantu biaha mi tabatin ku muda di un dia pa otro.” Apesar di e opstákulonan inisial ei, Matthew ta bisa: “E mihó desishon di mi bida tabata di muda pa Rusia.” Dikon? E di: “Akinan m’a siña konfia mas den Yehova i m’a mira kon el a guia mi den hopi manera.” Ku tempu Matthew a bira ansiano i pionero spesial, i awor e ta traha na sukursal, serka di St. Petersburg.

Na 1999, Hiroo, di 25 aña, a gradua di e Skol di Entrenamentu Ministerial na Hapon. Un di e instruktornan a anim’é pa bai sirbi den eksterior. Hiroo a tende ku tabatin hopi mester di predikadó na Rusia, i el a disidí di kuminsá siña ruso. Pero el a hasi un kos mas. El a konta: “M’a bai biba na Rusia pa seis luna. Komo ku einan wenter ta masha pisá, m’a bai den novèmber pa wak si mi tabata por ku e friu.”  Despues di a pasa e wenter ei, el a regresá Hapon i a hiba un bida masha simpel pa e por a spar sufisiente plaka p’e bai biba bèk na Rusia, pero e biaha akí permanentemente.

Hiroo tin awor 12 aña na Rusia, i el a sirbi den vários kongregashon. Den algun di nan, e tabata e úniko ansiano pa atendé mas ku 100 publikadó. Den un kongregashon, tur siman e tabatin ku dirigí e Skol di Ministerio Teokrátiko, e Estudio di Toren di Vigilansia, sinku Estudio di Buki di Kongregashon i tambe hasi mayoria di e partinan den Reunion di Sirbishi. Ademas, e tabatin ku hasi hopi bishita di pastoreo. Kòrdando riba e tempu ei, Hiroo a bisa: “Mi ta sinti mi masha felis di por a yuda e rumannan bira spiritualmente mas fuerte.” Kon el a benefisiá di sirbi kaminda tin mas nesesidat di predikadó? E di: “Promé ku m’a bai Rusia, mi tabata ansiano i pionero. Pero fo’i dia ku mi ta akinan, mi ta sinti komo si fuera m’a sera un amistat kompletamente nobo ku Yehova. M’a siña konfia mas den dje den tur aspekto di mi bida.” Na 2005, Hiroo a kasa ku Svetlana, i nan dos ta traha pionero ketu bai.

Matthew, di 34 aña, ku su ruman hòmber Michael, di 28 aña, ta di Canada. Nan a bishitá Rusia i a keda sorprendí ora nan a mira masha hopi hende interesá na reunion pero masha tiki ruman hòmber pa dirigí reunion. Matthew a bisa: “E kongregashon ku m’a bishitá tabatin un asistensia di 200 hende, pero ta ún ansiano di edat avansá i ún sirbidó ministerial yòn tabata dirigí tur e reunionnan. Mesora m’a haña gana di bai biba einan pa yuda e rumannan.” Na 2002, el a muda pa Rusia.

Kuater aña despues, Michael tambe a bin biba na Rusia, i el a ripará ku ainda tabatin mester di mas ruman hòmber. Komo ku e tabata sirbidó ministerial, nan a enkarg’é ku kuenta, literatura i teritorio. Pero tambe nan a pidié duna diskurso públiko, hasi trabou ku normalmente e sekretario di kongregashon ta hasi i yuda organisá asamblea i traha Salòn di Reino. Awe, ainda tin mester di hopi yudansa den e kongregashonnan. Awor Michael ta ansiano i maske e tin masha hopi kos di hasi, e ta bisa: “Mi ta sinti un gran satisfakshon di por yuda e rumannan. Esaki ta e mihó manera pa usa mi bida!”

Entretantu, Matthew a kasa ku Marina, i Michael a kasa ku Olga. Nan kuater ta sigui apoyá e kongregashonnan, huntu ku hopi otro ruman ku a bin pa yuda.

Na 1994, tempu ku Tatyana tabatin 16 aña, seis pionero spesial di Polonia, Repúblika Cheko i Slovakia a kuminsá sirbi den su kongregashon na Ukrania. Tatyana ta kòrda nan ku kariño i a bisa: “E pioneronan akí tabata diligente i amabel; semper bo por a papia ku nan i nan tabata konosé Beibel hopi bon.” El a mira kon Yehova a bendishoná nan spiritu di sakrifisio propio i a pensa: ‘Mi ke ta manera nan.’

E ehèmpel di e pioneronan a animá Tatyana pa usa su fakansi di skol pa bai traha huntu ku otro rumannan den e teritorionan aislá di Ukrania i Belarus kaminda nunka Testigunan di Yehova a yega di prediká. E tabata gusta e biahenan ei di predikashon asina tantu ku el a kuminsá traha plan pa bai biba na Rusia pa prediká. Promé, Tatyana a bai einan pa un tempu kòrtiku pa bishitá un ruman muhé ku tambe a bini di eksterior i pa buska trabou p’e por a mantené su mes. Despues, na aña 2000, el a muda definitivamente pa Rusia. E kambio tabata difísil?

Tatyana a kontestá: “Komo ku mi so no por a paga un apartamento, mi mester a hür un kuarto. Mi tin  ku bisa ku no tabata fásil pa biba den kas di otro hende. Tabatin momentonan ku mi kier a bai mi pais bèk. Pero bes tras bes Yehova a yuda mi mira e bentahanan di sigui padilanti den mi sirbishi.” Awe, Tatyana ta sirbi komo misionero na Rusia. El a konkluí: “Tur e añanan ku mi a pasa pafó di mi pais a permití mi biba eksperensianan inolvidabel i m’a sera hopi amistat. Pero riba tur kos, e añanan akí a hasi mi fe mas fuerte.”

Masako, di Hapon, ta un ruman muhé di 50 i piku aña. Semper el a soña di bira misionero, pero el a kere ku nunka lo e por a logra esei pasobra e tabatin hopi problema di salú. Sinembargo, ora ku su salú a drecha un poko, el a disidí di bai biba na Rusia pa apoyá e trabou di prediká. Aunke no tabata fásil p’e haña un lugá adekuá pa biba i un trabou stabil, el a logra mantené su mes den e trabou di pionero dunando lès di hapones i hasiendo trabou di limpiesa. Kiko a dun’é e forsa pa sigui padilanti den su sirbishi?

Despues di a pasa 14 aña na Rusia, Masako a bisa: “E goso ku mi ta haña den e trabou di prediká ta kompensá e difikultatnan ku mi ta pasa aden. Ta masha emoshonante pa prediká den lugánan kaminda tin mester di publikadónan di Reino.” I el a agregá: “Den transkurso di añanan, Yehova a duna mi tur loke mi tabatin mester: kuminda, paña i un dak riba mi kabes. Pa mi, esei tabata manera un milager.” Fuera di apoyá e kongregashonnan na Rusia, Masako a prediká tambe na Kirgizstan i a yuda gruponan di abla ingles, chines i uigur. Aktualmente, e ta sirbi komo pionero na St. Petersburg.

Debí na insiguridat ekonómiko, hopi famia ta bai biba den eksterior pa subi nan nivel di bida. Pero tin famia ta muda pa nan por sirbi Yehova mihó, manera Abraham ku Sara a hasi den pasado. (Gén. 12:1-9) Esei ta e kaso di Mikhail ku Inga, un pareha  kasá di Ukrania ku a bai biba na Rusia na aña 2003. No a tarda mashá ku nan a haña vários hende ku tabata buska e bèrdat.

Mikhail a konta: “Un biaha nos a bai prediká den un region kaminda niun Testigu di Yehova no a yega di prediká. Un hòmber di edat a habri porta i puntra nos: ‘Predikadó boso ta?’ Ora nos a kontest’é ku sí, e di: ‘Mi tabata sa ku un dia boso lo bini. Ta imposibel pa e palabranan di Hesus keda sin kumpli.’ Anto e hòmber a sita Mateo 24:14.” Mikhail a agregá: “Den e region ei nos a topa tambe un grupo di mas o ménos 10 muhé boutista, hende sinsero ku set pa e bèrdat. Nan tabatin e buki Biba Semper, i nan tabata us’é tur wikènt pa studia Beibel. Nos a keda hopi ora serka nan i a kontestá nan preguntanan, kanta kantikanan di Reino ku nan i asta kome huntu ku nan. E bishita ei ta un di e rekuerdonan di mas bunita ku mi tin.” Segun Mikhail ku Inga, e echo ku nan a bai sirbi na Rusia—kaminda tin mas nesesidat di publikadó di Reino—a hala nan mas serka di Yehova, a laga nan sinti mas amor pa hende i a duna nan gran satisfakshon den bida. Awor nan ta den e trabou di sirkuito.

Na 2007, Yury ku Oksana, un pareha yòn di Ukrania, a bishitá e sukursal di Rusia huntu ku nan yu hòmber Aleksey, ku awor tin 13 aña. Einan, nan a mira un mapa di Rusia ku tabata indiká áreanan grandi kaminda no tin niun kongregashon asigná pa prediká. Oksana a bisa: “Ora nos a mira e mapa ei, nos a realisá mas ku nunka kon grandi e nesesidat di predikadó tabata. Esei a yuda nos tuma e desishon di muda pa Rusia.” Kiko mas a yuda nan? Yury a bisa: “Tambe nos a lesa e artíkulo ‘Abo Por Sirbi den un Kampo Estranhero?’ i otro artíkulonan similar. * Nos a bishitá e zona na Rusia ku sukursal a rekomendá nos komo un bon lugá pa bai sirbi, i nos a buska trabou i kas einan.” Na 2008 nan a bai biba na Rusia.

Na kuminsamentu, no tabata fásil pa nan haña trabou. Tambe nan mester a kambia vários biaha di apartamento. Yury a konta: “Bes tras bes nos tabata pidi Yehova den orashon pa no laga e situashon ei desanimá nos, anto nos tabata sigui prediká. Nos a konfia ku Yehova lo yuda nos, i e no a laga nos na kaya. Nos a mira ku nos mes wowo kon Yehova ta kuida su sirbidónan ora nan ta pone e interesnan di Reino na promé lugá. E sirbishi akí a fortalesé nos famia spiritualmente i a hasi nos mas uní.” (Mat. 6:22, 33) I ki efekto e trabou di prediká akí—kaminda tin mas nesesidat di publikadó—tabatin riba nan yu Aleksey? Segun Oksana: “Esaki a yud’é masha hopi. El a dediká su mes na Yehova i a batisá ku nuebe aña. Awor e ta traha pionero ousiliar ki ora ku e tin fakansi di skol, ya ku e ta mira e gran nesesidat ku tin akinan. Su amor i entusiasmo pa sirbishi ta hasi nos masha felis.” Awe, Yury ku Oksana, kendenan tin rònt di 35 aña, ta sirbi komo pionero spesial.

Manera e komentarionan di e rumannan akí ta mustra, ora bo muda pa un otro zona òf pais pa prediká, bo mester tin pleno konfiansa den Yehova. Ta bèrdat ku e rumannan ku a dal e paso ei a topa ku opstákulo den kaminda, pero tambe nan a sinti e gran alegria di hiba e bon notisia di Reino na hende di kurason sinsero. Abo lo por bai biba kaminda tin mester di mas publikadó di Reino pa yuda den e trabou di kosecha? Si bo disidí di hasi esei, sigur lo bo sinti meskos ku Yury, kende a bisa lo siguiente tokante e desishon ku el a tuma di bai sirbi kaminda tin mester di yudansa: “Un kos so ta duel mi, i esei ta ku mi no a hasié mas promé.”