Kita Bo Bista for di Banidat

“Kita mi bista for di banidat; i rebibá mi den bo kamindanan.”​—SAL. 119:37.

1. Kon importante nos bista ta?

NOS bista ta masha presioso! Kuné nos por kapta instantáneamente loke tin rònt di nos, den tur dimenshon i na koló. E ta yuda nos mira nos amigunan stimá òf mira peliger di antemano. Ademas, nos por mira kosnan bunita i apresiá e maravianan di kreashon, ku ta evidensia di Dios su eksistensia i gloria. (Sal. 8:​3, 4; 19:​1, 2; 104:24; Rom. 1:20) Es mas, nos wowonan ta un kanal di komunikashon masha importante ku ta hiba informashon na nos mente. P’esei, nos bista ta esensial pa nos por atkerí konosementu di Yehova i edifiká fe den dje.​—Jos. 1:8; Sal. 1:​2, 3.

2. (a) Dikon nos tin ku tene kuidou ku loke nos ta wak? (b) Kiko nos por siña for di e petishon sinsero di e salmista?

² Sinembargo, loke nos ta wak por hasi nos daño tambe, pasobra nos bista i nos mente tin un relashon masha estrecho ku otro. P’esei, loke nos ta wak por lanta deseo i krea ambishon den nos kurason òf hasi esnan ku nos tin kaba mas fuerte. I debí ku nos ta biba den un mundu degradá i egoista ku Satanas e Diabel ta goberná, nos ta ser bombardiá ku imágen i propaganda ku fásilmente por desviá nos, asta si nos djis tira un bista riba nan. (1 Juan 5:19) P’esei, no ta nada straño ku e salmista a roga Dios: “Kita mi bista for di banidat; i rebibá mi den bo kamindanan.”​—Sal. 119:37.

Kon Nos Wowonan Por Desviá Nos?

3-5. Ki relatonan bíbliko ta ilustrá e peliger di laga nos wowonan desviá nos?

³ Konsiderá loke a pasa ku Eva, e promé hende muhé. Satanas a lag’é komprondé ku si e kome di “e palu di konosementu di bon i malu,” su wowonan lo “habri.” I e idea ku su wowonan lo “habri” so kaba lo mester a lanta Eva su kuriosidat. P’esei, ora el a mira ku “e palu tabata bon pa kuminda, i ku e tabata un delisia pa bista,” el a haña mas gana di kome di e fruta prohibí. Pues, e echo ku Eva a keda wak e palu ku anhelo a pon’é desobedesé e mandamentu di Dios. Su esposo, Adam, tambe a desobedesé Dios, lokual a hiba na konsekuensianan desastroso pa humanidat kompletu.​—Gén. 2:17; 3:​2-6; Rom. 5:12; Sant. 1:​14, 15.

⁴ Den tempu di Noe tabatin algun angel ku tambe a ser influensiá pa loke nan a mira. Refiriendo na nan, Génesis 6:2 ta bisa: “E yu hòmbernan di Dios a mira ku e yu muhénan di hende tabata bunita; i nan a tuma esposanan pa nan mes, esun ku nan tabata kier a skohe.” Sí, debí ku e angelnan rebelde akí a keda wak e yu muhénan di hende ku pashon, nan a haña un deseo innatural di tene relashon seksual ku nan. I kumpliendo ku e deseo ei, nan a prokreá yunan violento. Den e tempu ei, maldat a abundá asina tantu ku Yehova a destruí tur hende, ku eksepshon di Noe i su famia.​—Gén. 6:​4-7, 11, 12.

⁵ Algun siglo despues, e israelita Akan su bista a pon’é hòrta algun artíkulo for di e stat Jeriko. Anteriormente, Dios a duna e israelitanan e mandato pa, ora nan kapturá e stat ei, nan destruí tur kos ku eksepshon di sierto kosnan ku nan mester a hiba na e lugá di warda tesoro di Yehova. E israelitanan a haña e siguiente spièrtamentu: “Warda boso di e kosnan ku ta bou di maldishon,  pa boso no kudishá nan” i kohe algun kos for di e stat. Pero Akan a desobedesé Dios, i esei a pone ku e pueblo di Israel a sufri derota na e stat Ai, i vários hòmber a muri. Apesar di esei, Akan no a atmití su fayo. Ta te ora ku nan a desenmaskar’é, el a bisa, “ora mi a mira” e artíkulonan, “mi a kudishá nan i a kohe nan.” Su deseo di wowo a kousa su destrukshon i di “tur loke tabata pertenesé na dje.” (Jos. 6:​18, 19; 7:​1-26) Sí, Akan su kurason a deseá loke tabata prohibí.

Nos Mester Dominá Nos Mes

6, 7. Ki ‘triki’ Satanas ta usa hopi bes pa kohe nos den trampa, i kon diseñadónan di propaganda komersial ta hasi uso di dje?

⁶ Meskos ku tabata den e kaso di Eva, e angelnan desobediente i Akan, awendia tambe hende ta ser tentá pa nan deseo di wowo. Di tur e “trikinan” ku Satanas ta usa pa gaña hende, esnan ku ta enbolbé “e deseo di wowo” a resultá di ta mas efikas. (2 Kor. 2:11; 1 Juan 2:16) I diseñadónan di propaganda komersial djawe ta bon konsiente ku e deseo di wowo semper a ehersé hopi influensia riba hende. Un europeo kende ta un eksperto eksitoso riba e tereno di merkadeo a bisa: “Bista ta e sentido ku tin mas poder pa sedusí hende. Hopi bes e ta dominá tur e otro sentidonan, i e tin e poder pa konvensé nos pa bai kontra tur lógika.”

⁷ P’esei, no ta nada straño ku hopi propaganda ta kontené imágennan ku ta ingeniosamente diseñá pa hasi gran impakto visual riba nos i stimulá nos deseo pa hasi uso di e produkto- òf servisionan ku nan ta presentá. Un investigadó na Merka, kende a analisá e efekto ku propaganda tin riba hende, a deklará ku propaganda “no ta diseñá solamente pa transmití informashon pa e mente, sino mas importante ainda, pa produsí sierto emoshon i akshon serka e persona ku ta wak e.” Ta p’esei, hopi propaganda ta kontené imágennan seksualmente provokativo. Pues anto, ta masha importante pa nos kontrolá loke nos ta mira i loke nos ta permití drenta nos mente i baha den nos kurason!

8. Kon Beibel ta enfatisá ku nos tin ku kontrolá loke nos ta wak?

⁸ Kristiannan berdadero no ta imün pa deseo di wowo ni di karni. P’esei, e Palabra di Dios ta animá nos pa dominá nos deseonan i kontrolá loke nos ta wak. (1 Kor. 9:​25 i 27; lesa 1 Juan 2:​15-17.) Un persona ku a rekonosé ku tin un relashon estrecho entre loke nos ta mira i loke nos ta deseá tabata e hòmber rekto Jòb. El a deklará: “Mi a sera un aliansa ku mi wowonan; kon anto mi por a wak un bírgen?” (Jòb 31:1) Jòb no solamente a nenga di “mishi” ku un hende muhé na un manera inmoral, e tabata determiná tambe pa ni pensa un kos asina. Hesus a enfatisá ku nos mester mantené nos mente limpi, esta liber di pensamentunan inmoral, ora el a bisa: “Ken ku [“sigui,” NW] wak un muhé pa dese’é, ya kaba el a kometé adulterio kuné den su kurason.”​—Mat. 5:28.

Kosnan Bano Ku Nos Mester Evitá

9. (a) Dikon bo mester ta masha kouteloso ora di usa Internet? (b) Kiko por ta e resultado di asta un bistaso breve di pornografia?

⁹ Awendia, mas i mas hende ta “sigui wak” pornografia, foral riba Internet. En realidat, bo no tin nodi di buska e sitenan ei; ta komo si fuera nan mes ta buska bo! Kon asina? Ora bo ta riba Internet, diripiente bo por haña bo ku imágennan seduktivo ku ta aparesé riba bo pantaya. Òf bo por haña un e-mail ku ta parse inosente, pero ora bo habrié, bo ta haña bo ku imágennan pornográfiko diseñá na un manera ku ta difísil pa deshasí di nan. Asta si bo delete e imágennan akí mesora, ya kaba e poko ku bo a mira a hasi un impreshon riba bo mente. Sí, asta un bistaso aksidental di pornografia por tin konsekuensianan lamentabel. E por laga bo ku un konsenshi ku ta molestia bo i ku un  lucha pa saka esenanan inmoral for di bo mente. Pero, e konsekuensianan pa un persona ku deliberadamente ta “sigui wak” ta pió. P’esei, e tin ku mata su mal deseonan.​—Lesa Efesionan 5:​3, 4 i 12; Kol. 3:​5, 6.

10. (a) Dikon foral mucha ta vulnerabel pa pornografia? (b) Kiko lo por ta e resultado si nan wak pornografia?

¹⁰ Di naturalesa mucha ta kurioso, i esei por pone ku nan ta bai wak pornografia. Si esei sosodé, e por tin efekto duradero riba nan punto di bista di seksualidat. Segun un informe, e efektonan akí por varia di un sentido trosí di normanan seksual te na “difikultat pa mantené un relashon saludabel i amoroso; un punto di bista trosí di hende muhé i posiblemente adikshon na pornografia, ku por stroba nan den nan estudio na skol i den nan relashon ku nan amigu- i famianan.” I e konsekuensianan por ta asta mas devastador despues, ora nan ta kasá.

11. Duna un ehèmpel ku ta ilustrá e peliger di wak pornografia.

¹¹ Un ruman hòmber a skirbi: “Promé ku mi a bira Testigu, mi tabata adikto na vários kos. Pero esun di mas duru pa kita for di dje tabata pornografia. De bes en kuando, ainda mi ta mira e imágennan ei; nan ta aparesé diripiente, por ehèmpel, ora mi sinti un sierto holó, tende un sierto muzik, mira algu òf asta ora mi pensamentunan desviá un ratu. E ta un lucha konstante i diario.” Un otro ruman hòmber ta konta ku tempu e tabata mucha, ora su mayornan no tabata na kas, e tabata wak revista pornográfiko di su tata, kende no tabata Testigu. El a skirbi: “E plachinan ei tabatin un efekto masha horibel riba mi mente di mucha. Te awor, 25 aña despues, ainda algun di e imágennan ei ta grabá den mi mente. Maske kon duru mi ta lucha pa lubidá nan, nan t’ei ketu bai. Esaki ta laga mi sinti mi kulpabel ounke mi ta evitá di pensa riba nan.” Pues, ta sabí pa nos no wak kosnan bano! Asina nos ta evitá e sintimentunan angustioso ei. Kon un persona por logra esei? E tin ku hasi esfuerso pa ‘hiba den koutiverio tur pensamentu, pa hasi nan obedesidu na Kristu.’​—2 Kor. 10:5.

12, 13. Kiko ta algun kos bano ku kristiannan mester evitá di wak i dikon?

¹² Un otro kos bano, òf “ku no ta sirbi pa nada,” ku nos tin ku evitá ta entretenimentu ku sea ta promové materialismo, kosnan sobrenatural òf ku ta presentá esenanan violento, dramamentu di sanger i morto. (Lesa Salmo 101:3. *) Yehova a duna mayornan kristian e responsabilidat di eduká nan yunan. Pues, mayornan mester ta selektivo den loke nan ta permití nan yunan wak na kas. Ta klaru ku ningun kristian berdadero no ta enbolbé nan mes deliberadamente ku spiritismo. Apesar di esei, mayornan tin ku tene kuidou ku pelíkula, programanan di televishon, wega di vidio i asta programa- i bukinan pa mucha ku ta presentá kosnan sobrenatural na un manera direkto òf kamuflá.​—Pro. 22:5.

¹³ Sea ku nos ta yòn òf di mas edat, nos wowonan no mester haña plaser den weganan di vidio i pelíkula ku ta presentá violensia i esenanan di matamentu kruel. (Lesa Salmo 11:5.) Nos mester nenga di enfoká nos mente riba kualke aktividat ku Yehova ta kondená. Kòrda ku Satanas ta mek riba nos mente. (2 Kor. 11:3) Asta ora ta trata di entretenimentu ku por ser konsiderá komo aseptabel, nos tin ku paga tinu. Pasobra, si nos ta dediká demasiado tempu na dje, esei por bai a kosto di nos adorashon komo famia, nos lesamentu di Beibel tur dia i nos preparashon pa e reunionnan.​—Fil. 1:​9, 10.

 Sigui Hesus Su Ehèmpel

14, 15. Kiko ta remarkabel di e di tres biaha ku Satanas a tenta Kristu, i kon bin Hesus por a resistié?

¹⁴ Lamentablemente, den e mundu malbado akí, nos no por evitá di mira sierto kosnan bano. Hesus tampoko no por a evitá esei. Den Satanas su di tres intento pa stroba Hesus di hasi Dios su boluntat, e “Diabel a hib’é riba un seru masha haltu mes, i a mustr’é tur e reinonan di mundu i nan gloria.” (Mat. 4:8) Dikon Satanas a hasi esei? No tin duda! E kier a probechá di e influensia poderoso di wowo. Probablemente, el a pensa ku ora Hesus mira e splendor di tur e reinonan di mundu lo e sukumbí na deseo pa prominensia. Pero kon Hesus a reakshoná?

¹⁵ Hesus no a konsentrá riba e oferta tentador akí. E no a permití mal deseo lanta den su kurason. Ademas, e no tabatin ku pensa mes pa rechasá e oferta di Diabel. El a reakshoná mesora i a bisa Diabel: “Bai for di akinan, Satanas!” (Mat. 4:10) Hesus a keda enfoká riba su relashon ku Yehova, i su kontesta a demostrá ku su propósito den bida ta pa hasi e boluntat di Dios. (Heb. 10:7) Asina Hesus a logra stroba Satanas di kumpli ku su kòmplòt malisioso.

16. Ki lès nos por saka for di echo ku Hesus a resistí e tentashonnan di Satanas?

¹⁶ Nos por siña hopi kos for di Hesus su ehèmpel. Di promé, ningun hende no ta imün pa e trikinan di Satanas. (Mat. 24:24) Di dos, loke nos fiha nos bista riba dje por fortifiká e deseonan di nos kurason, sea pa bon òf pa malu. Di tres, den Satanas su intento pa distraí nos, e ta probechá mas tantu posibel di “e deseo di wowo.” (1 Ped. 5:8) Di kuater, nos tambe por resistí Satanas, basta nos aktua sin tarda.​—Sant. 4:7; 1 Ped. 2:21.

Mantené Bo Wowo “Simpel”

17. Dikon no ta sabí pa warda te ora nos haña nos konfrontá ku kosnan bano pa disidí kiko nos lo hasi?

¹⁷ Ora nos a dediká nos mes na Yehova, nos a hasi un promesa solèm ku a enserá ku nos ta kita nos bista for di banidat. Pues, nos a primintí di hasi Dios su boluntat. Asina nos a uni nos mes ku e salmista, kende a bisa: “Mi a detené mi pianan for di tur mal  kaminda, pa mi por warda bo palabra.” (Sal. 119:101) Pero ta sabí pa warda te ora nos haña nos konfrontá ku kosnan bano pa disidí kiko nos lo hasi? Nò. Pasobra, nos ta bon konsiente di loke e Skritura ta kondená, i Satanas su trikinan no ta deskonosí pa nos. Pensa un ratu: Ki ora Satanas a tenta Hesus p’e laga piedra bira pan? Despues ku Hesus a yuna 40 dia i anochi i “a haña hamber.” (Mat. 4:​1-4) Pues, Satanas por diserní ki ora nos ta débil i tin mas chèns di kai den tentashon. P’esei, awor ta tempu pa nos pensa kuidadosamente riba e asuntunan ei. No warda pa mañan! Si diariamente nos ta tene nos promesa di dedikashon na mente, nos lo ta determiná pa keda leu for di banidat.​—Pro. 1:5; 19:20.

18, 19. (a) Kiko ta e diferensia entre un wowo “simpel” i un wowo “malbado”? (b) Dikon ta importante pa nos sigui konsiderá kosnan balioso, i ki konseho Filipensenan 4:8 ta duna relashoná ku esei?

¹⁸ Tur dia, nos ta haña nos ku un abundansia di distraishon ku por atraé nos bista, i esakinan ta oumentá mas i mas. P’esei, awor mas ku nunka ta importante pa nos sigui Hesus su konseho pa mantené nos wowo “simpel.” (Mat. 6:​22, 23, NW) Un wowo “simpel” ta enfoká riba un solo propósito, esta, hasimentu di e boluntat di Dios. Na kontraste ku esei, un wowo “malbado,” ta un wowo mañoso i envidioso ku ta ser atraí na banidat.

¹⁹ Kòrda, loke nos ta wak tin efekto riba nos mente, i nos mente tin efekto riba nos kurason. P’esei, ta masha importante pa nos sigui konsiderá loke ta balioso. (Lesa Filipensenan 4:8.) Sí, laga nos sigui hasi orashon meskos ku e salmista, kende a pidi Dios: “Kita mi bista for di banidat.” E ora ei, segun ku nos ta hasi esfuerso pa aktua na armonia ku e orashon ei, nos por tin e konfiansa ku Yehova lo preservá nos, òf ‘rebibá nos den su kamindanan.’​—Sal. 119:37; Heb. 10:36.

[Nota]

Kiko Nos Tin Ku Kòrda Tokante

• e relashon ku tin entre nos wowonan, nos mente i nos kurason?

• e peligernan di wak pornografia?

• e importansia di mantené nos wowo “simpel”?

[Preguntanan di Estudio]

[Plachinan na página 26]

Kiko ta e kosnan bano ku kristiannan mester evitá di wak?