Nos Lektornan Ta Puntra . . .

Unda e Paraiso Ku Beibel Ta Papia di Dje Ta?

▪ Hesus a primintí un hòmber muribundo kende yen di kurashi a ekspresá fe den dje: “Lo bo ta serka mi den Paraiso.” (Lukas 23:43) Na unda e homber lo ta? I na unda Paraiso lo ta, den shelu, riba tera òf kisas na un lugá kaminda hende lo warda huisio?

Un tempu nos antepasadonan a biba den Paraiso. Beibel ta bisa nos: “SEÑOR Dios a planta un hòfi parti pariba, na Edén; i ayanan el a pone e hòmber ku el a forma. E ora ei SEÑOR Dios a kohe e hòmber i a pon’é den e hòfi di Edén pa kultiv’é i kuid’é.” (Génesis 2:​8, 15) Ora a tradusí e palabranan ei na griego, a tradusí e palabra “hòfi” komo parádeisos. For di e término ei e palabra “paraiso” a bini.

Meskos ku un pareha ta rèk nan kas ora nan haña mas yu, asina nos promé mayornan lo mester a ekspandé Paraiso segun ku e famia humano a krese. Dios a bisa nan: “Yena e tera i hasi esaki someté na bo.”​—Génesis 1:28.

Pues, e propósito di nos Kreador tabata pa hende biba i haña yu den Paraiso aki riba tera. Nan lo a biba pa semper den un hardin terenal i santana lo no tabata nesesario. Tera lo a bira e hogar permanente pa henter humanidat. No ta nada straño anto ku nos ta disfrutá asina tantu di naturalesa di nos planeta! Dios a krea nos pa biba riba un tera bunita.

Dios su propósito a kambia? Nò, pasobra Yehova ta sigurá nos: “Asina mi palabra ku ta sali for di mi boka lo ta; e lo no bolbe bashí serka mi, sin kumpli ku loke mi ta deseá.” (Isaias 55:11) Mas ku tres mil aña despues di kreashon di hende, Beibel a bisa tokante “e Dios, Kende a forma tera i a trah’é,” ku e “no a krea esaki pa e keda bashí,” pero el “a form’é pa e wòrdu habitá.” (Isaias 45:18) Dios su propósito no a kambia. Mundu lo bira un paraiso.

Ta interesante ku hopi pasashi di Beibel tokante Paraiso ta simplemente deskripshonnan di bida riba tera. Por ehèmpel, un profesia di Isaias ta bisa: “Nan lo traha kas i biba den nan; tambe nan lo planta kunukunan di wendrùif i kome nan fruta.” (Isaias 65:21) Ta na unda sa traha kas i planta kunuku? Ta na unda sa kome fruta? No ta riba tera? Proverbionan 2:21 ta bisa klaramente: “E rektonan lo biba den e tera.”

Hesus tambe a papia tokante un paraiso riba tera. Ta bèrdat ku el a primintí un paraiso selestial, pero esei tabata pa un grupito selektá. (Lukas 12:32) Despues di morto, nan ta haña resurekshon pa biba den e Paraiso selestial i reina ku Kristu riba e Paraiso terenal. (Revelashon 5:10; 14:​1-3) E ko-gobernantenan selestial akí lo sòru pa goberná i mantené e Paraiso riba tera segun Dios su normanan.

Hesus tabata sa ku esaki tabata Dios su propósito pa tera. Al fin i al kabo, tempu ku a krea e hòfi di Edén, Hesus tabata den shelu ku su Tata. Awe tur hende ku pone fe den Hesus lo tin oportunidat pa biba den un futuro paraiso riba tera. (Juan 3:16) Hesus ta primintí nan: ‘Boso lo ta serka mi den Paraiso.’​—Lukas 23:43.