▪ Beibel ta duna e speransa di biba pa semper den Paradeis riba tera. (Salmo 37:29; Lukas 23:43) Pero, bida eterno den un ambiente perfekto lo bira laf?

Esei ta un bon pregunta. Investigadónan a deskubrí ku hende ku konstantemente ta sinti nan laf por bira nèrvioso, deprimí i ta asta inkliná na tuma riesgo. Hende ku no tin propósito den bida òf ku ta kansá di hasi meskos tur dia por kuminsá haña bida laf. Pero bida den Paradeis lo ta sin propósito? Hende su rutina di tur dia lo ta laf?

Di promé, kòrda ku ta Yehova Dios, e Outor di Beibel, a hasi bida eterno posibel. (Juan 3:16; 2 Timoteo 3:16) Dios su kualidat prinsipal ta amor. (1 Juan 4:8) Yehova stima nos masha hopi mes i el a duna nos tur e kosnan bon ku nos ta disfrutá di dje awe.​—Santiago 1:17.

Nos Kreador sa ku pa nos por ta felis, nos mester di trabou ku propósito. (Salmo 139:​14-16; Eklesiastés 3:12) Den Paradeis, hende lo no sinti nan manera robòt. Tur loke ku nan hasi lo benefisiá nan i nan sernan kerí. (Isaias 65:​22-24) Si bo tin un trabou fultaim, interesante i plasentero, lo bo sinti ku bida ta laf?

Kòrda tambe ku Yehova Dios lo no permití kualke hende biba den Paradeis. E ta duna e regalo di bida eterno solamente na esnan ku ta imitá su Yu, Hesus. (Juan 17:3) Ora Hesus tabata riba tera, el a hasi e boluntat di su Tata ku goso. El a siña su siguidónan, ku echo i palabra, ku felisidat duradero ta bin di duna i no di risibí. (Echonan 20:35) Den Paradeis, tur hende lo biba di akuerdo ku e dos mandamentunan di mas grandi akí: stima Dios i stima nan próhimo. (Mateo 22:​36-40) Djis imaginá bo: biba rondoná pa hende generoso ku ta stima bo i ku ta stima nan trabou! Bo ta kere ku bo lo sinti bo laf den kompania di hende asina?

Kiko mas nos lo hasi den Paradeis? Tur dia nos lo siña algu nobo enkuanto nos Kreador. For di aworakí mes nos ta mira kuantu kos sientífikonan a deskubrí enkuanto e kreashon di Yehova. (Romanonan 1:20) Pero en realidat, nos tin un komprondementu masha limitá di Yehova su kreashon. Míles di aña pasá, despues di a sinta meditá riba e kreashon di Dios, e hòmber fiel Jòb a yega na un konklushon ku te awe ta bèrdat. El a bisa: “Esakinan ta djis un parti minimal di [Dios] su obranan; i ta un palabra suave asina nos ta tende for di dje! Ma ken por komprondé su strena poderoso?”​—Jòb 26:14.

Ni maske kon largu nos biba, nunka nos lo no yega na komprondé tur kos tokante Yehova Dios i su obranan. Beibel ta bisa ku Dios a pone e deseo di biba pa semper den nos kurason. Pero Beibel ta bisa tambe ku ‘hende nunka por haña sa e trabou ku Dios a hasi for di prinsipio te na fin.’ (Eklesiastés 3:​10, 11) Bo ta kere ku lo bo sinti bo laf si tur dia bo ta siña algu nobo tokante bo Kreador?

Asta for di aworakí kaba, tin hende ku kasi nunka no ta sinti nan laf. Dikon? Pasobra nan ta hasiendo un trabou ku ta duna gloria na Dios i ku ta benefisiá otro hende. Nos por ta sigur ku si nos keda okupá ku un trabou asina, nunka nos lo sinti nos laf—asta si nos biba pa semper.

[Rekonosementu pa Potrèt na página 22]

Tera: Image Science and Analysis Laboratory, NASA-Johnson Space Center; Galaksia: The Hubble Heritage Team (AURA/STScI/NASA)