“Hende lo . . . sufri di malesa teribel.”​—LUKAS 21:11, Contemporary English Version.

● Bonzali ta biba na un pais afrikano ku a keda seriamente afektá pa motibu di guera sivil. Komo un funshonario di salubridat públiko, e ta hasi tur loke e por pa yuda e mineronan di su pueblo ku ta muriendo debí na e vírus di Marburg. * El a roga funshonarionan di un siudat mas grandi pa yudansa, pero nan no a reakshoná. Ta te despues di kuater luna numa nan a manda yudansa, pero Bonzali mes a muri kaba. Den su intento pa salba e mineronan, el a haña e vírus di Marburg.

KIKO ECHONAN TA MUSTRA? Infekshon respiratorio manera pulmonia, malesa ku ta kousa diarea, HIV/AIDS, tuberkulósis i malaria ta entre e malesanan mas destruktivo ku ta afektá humanidat. Den un aña resien, alrededor di 10,7 mion persona a muri pa motibu di e sinku tipo di malesanan ei. Ku otro palabra, durante henter un aña, ún persona tabata muri kada tres sekònde pa motibu di e malesanan ei.

KIKO TA UN OPHESHON KOMUN? E poblashon mundial ta sigui krese, pues, ta opvio ku tin mas kaso di malesa. Tin mas hende ku por keda infektá.

E OPHESHON EI TIN BASE? E poblashon mundial a krese drástikamente. Pero hende su abilidat pa diagnostiká, kontrolá i trata malesa tambe a mehorá. Pues, no ta lógiko ku malesa i e manera ku e ta afektá e famia humano lo mester a bira ménos? Sinembargo, nèt lo kontrario ta pasando.

KIKO ABO TA PENSA? Ta bèrdat ku hende ta sufri di malesanan teribel manera Beibel a profetisá?

Temblor, hamber i malesa ta kousa basta sufrimentu pa miónes di hende. Pero tin miónes di hende mas ku ta sufri na man di nan próhimo; hopi di nan ta bira víktima di esnan ku supuestamente mester protehá nan. Wak kiko Beibel a profetisá ku lo sosodé.

[Nota]

[Komentario na página 6]

“Ta teribel si un leon òf un otro bestia salbahe mester kome bo, pero ta mesun teribel ora ku malesa ta kome bo di paden i ku bo ta mira kon esei ta afektá mas hende rònt di bo.”​—EPIDEMIÓLOGO MICHAEL OSTERHOLM.

[Rekonosementu pa Potrèt na página 6]

© William Daniels/Panos Pictures