Pa Haña Bida i Pas, Kana Segun Spiritu
“Kana, no segun karni, ma segun spiritu.” —ROM. 8:4, nota.
1, 2. (a) Ki peliger sa surgi ora hende ta kore outo ku mente distraí? (b) Ki peliger por surgi si nos ser distraí for di nos adorashon di Yehova?
“KOREMENTU di outo ku mente distraí ta un epidemia i ta parse ku tur aña esei ta bira pió.” Asina e minister di transporte di Merka a bisa. Telefòn selular ta un di e kosnan ku por kita un shofùr su mente for di loke e ta supose di hasi, esta, kore outo. Mas ku un tersera parti di e hendenan ku nan a entrevistá den un enkuesta a bisa ku outo a yega di dal nan òf kasi a dal nan pasobra e shofùr tabata na telefòn. Tin hende kisas ta pensa ku ora nan ta kore outo nan por spar tempu si nan por hasi vários kos pareu, pero e resultado por ta desastroso.
2 Hopi biaha un shofùr kende su mente ta ser distraí no ta ripará e señalnan di peliger. Algu similar por sosodé ku nos relashon ku Dios. Un persona ku ta ser distraí pa kosnan ku ta alehá hende for di Dios por hañ’é fásilmente den problema. Nos fe por noufragá si nos permití kosnan desviá nos for di e kaminda i aktividatnan kristian. (1 Tim. 1:18, 19) Apòstel Pablo a spièrta pa e peliger akí ora el a skirbi e rumannan na Roma: “Mente fihá riba karni ta nifiká morto, ma mente fihá riba spiritu ta nifiká bida i pas.” (Rom. 8:6) Kiko Pablo tabata ke men ku esei? Kon nos por evitá di tin un “mente fihá riba karni,” i kon nos por traha duru pa tene nos “mente fihá riba spiritu”?
Nan “No Tin Kondenashon”
3, 4. (a) Pablo a skirbi tokante ki lucha ku e tabatin? (b) Dikon nos mester ta interesá den e situashon di Pablo?
3 Pablo a skirbi den su karta na e romanonan tokante e lucha ku e mes tabatin: un konflikto entre su kurpa i su mente. (Lesa Romanonan 7:21-23.) Pablo no a papia tokante esaki pa hustifiká su mes òf pasobra e tabatin duele di su mes, komo si fuera e tabata asina kargá ku piká ku e no por a yuda ku e ta peka. No lubidá ku e tabata un kristian maduro i ungí, skohé pa “ta un apòstel mandá na e nashonnan.” (Rom. 1:1; 11:13) Dikon Pablo a skirbi anto tokante e lucha ku e tabatin?
4 Pablo simplemente a rekonosé ku riba su mes e no por a hasi e boluntat di Dios te na e grado ku e tabata deseá. Dikon nò? El a bisa: “Pasobra tur a peka i no por reflehá e gloria di Dios.” (Rom. 3:23) Komo un desendiente di Adam, Pablo tambe tabata imperfekto i a sufri di e efektonan di piká. Nos por komprondé kon el a sintié, pasobra nos tambe ta imperfekto i tur dia nos tin kasi e mesun lucha kuné. Ademas, tin hopi distraishon ku lo por kita nos atenshon i desviá nos for di ‘e kaminda pèrtá ku ta hiba na bida.’ (Mat. 7:14) Ma e situashon di Pablo no tabata sin speransa, i di nos tampoko.
5. Unda Pablo a haña yudansa i alivio?
5 Pablo a skirbi: “Ken lo libra mi . . . ? Mi ta gradisí Dios ku lo e hasi esaki pa medio di Hesukristu, nos Señor!” (Rom. 7:24, 25) Despues, el a dirigí su mes na esnan ku ta “den union ku Kristu Hesus,” esta, kristiannan ungí. (Lesa Romanonan 8:1 i 2.) Yehova a adoptá nan komo yu pa medio di su spiritu santu, i el a hasi nan “heredero huntu ku Kristu.” (Rom. 8:14-17) E spiritu di Dios, huntu ku nan fe den e sakrifisio di reskate di Kristu, a yuda nan sali viktorioso den e lucha ku Pablo a deskribí. Pues, Dios no ta kondená nan mas pa nan imperfekshon. Nan a ser librá “di e lei di piká i di morto.”
6. Dikon tur sirbidó di Dios mester tuma nota di e palabranan di Pablo?
6 E palabranan di Pablo tabata dirigí na kristiannan ungí, pero loke el a bisa tokante e spiritu di Dios i e sakrifisio di reskate di Kristu por benefisiá tur sirbidó di Yehova, sea ku nan speransa ta di biba den shelu òf riba tera. Aunke Dios a inspirá Pablo pa duna e konseho ei na kristiannan ungí, ta masha importante pa tur sirbidó di Dios komprondé kiko el a skirbi i hasi esfuerso pa benefisiá for di dje.
Kon Dios “A Kondená Piká den Karni”?
7, 8. (a) Den ki sentido e Lei tabata “débil pa medio di karni”? (b) Kiko Dios a logra pa medio di su spiritu i e reskate?
7 Den kapítulo 7 di Romanonan, Pablo a rekonosé e poder ku piká tin riba hende imperfekto. Den kapítulo 8, e apòstel a papia tokante e poder di spiritu santu. El a splika kon e spiritu di Dios por yuda kristiannan den nan lucha kontra e poder di piká di manera ku nan por biba na armonia ku e boluntat di Yehova i haña su aprobashon. Pablo a mustra ku Dios a usa su spiritu santu i e sakrifisio di reskate di su Yu pa logra algu ku e Lei di Moises no por a hasi.
8 E Lei, ku su tantísimo mandamentunan, a kondená pekadó. Ademas, e sumo saserdotenan di Israel ku tabata sirbi bou di e Lei tabata imperfekto, i nan no por a ofresé un sakrifisio adekuá pa piká. Pues, den e sentido ei e Lei tabata “débil pa medio di karni.” Pero ora Dios “a manda su mes Yu den un forma ku a parse esun di hende pekaminoso” i a ofres’é komo un reskate, “Dios a kondená piká den karni,” i asina a superá “loke Lei no por a hasi.” Komo resultado, Yehova ta konsiderá kristiannan ungí hustu a base di nan fe den e sakrifisio di reskate di Hesus. Pablo su konseho ta animá nan pa biba, òf kana, “no segun karni, ma segun spiritu.” (Lesa Romanonan 8:3 i 4, wak nota.) Anto nan mester hasi esei fielmente te na fin di nan bida riba tera pa nan por haña “e korona di bida.”—Rev. 2:10.
9. Kiko e palabra “lei” manera Pablo a us’é na Romanonan 8:2 ta nifiká?
9 Banda di “e Lei,” Pablo ta menshoná “e lei di e spiritu” i “e lei di piká i di morto.” (Rom. 8:2) Kiko e leinan akí ta? Akinan e palabra “lei” no ta referí na sierto reglanan, manera esnan ku tabatin den e Lei di Moises. Un buki di komentario bíbliko ta bisa ku e palabra griego pa “lei” den e versíkulo akí ta nifiká e kosnan bon òf malu ku hende ta hasi i ku ta kontrolá nan manera un lei. Tambe e por nifiká e normanan ku nan ta skohe pa sigui den nan bida.
10. Kon e lei di piká i di morto ta kontrolá nos?
10 Apòstel Pablo a skirbi: “Pa medio di ún hende piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Rom. 5:12) Komo desendiente di Adam, nos tur ta bou di e lei di piká i di morto. Nos karni pekaminoso konstantemente ta pone preshon riba nos pa hasi kosnan ku no ta agradá Dios, kosnan ku lo hiba nos na morto. Den Pablo su karta na e galationan, el a yama e echonan pekaminoso ei “obranan di karni.” Anto el a agregá: “Esnan ku ta práktika e tipo di kosnan ei lo no risibí e Reino di Dios.” (Gal. 5:19-21) Hende ku ta hasi e tipo di kosnan ei ta meskos ku esnan ku ta kana segun karni. (Rom. 8:4) Nan ta laga nan karni imperfekto guia nan i bisa nan kiko pa hasi. Pero, akaso ta hende ku ta kometé fornikashon, partisipá den idolatria, praktiká spiritismo òf enbolbé nan mes den otro pikánan serio ta e únikonan ku ta kana segun karni? Nò, pasobra e obranan di karni ta inkluí tambe kosnan ku algun hende kisas ta konsiderá simplemente komo un debilidat personal, entre otro, yalursheit, atake di rabia, pleitamentu i envidia. Pues, nunka nos no mester pensa ku nos no tin nodi di lucha mas kontra nos karni imperfekto.
11, 12. Kiko Yehova a hasi pa yuda nos vense e lei di piká i di morto, i kiko nos mester hasi pa nos por tin e aprobashon di Dios?
11 Nos por ta masha felis anto ku Yehova a hasi posibel pa nos vense e lei di piká i di morto! Hesus a bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” Si nos aseptá e amor di Dios i pone fe den e sakrifisio di reskate di Hesukristu, nos por ser librá di e kondena ku ta bini di piká heredá. (Huan 3:16-18) E ora ei nos lo por bisa meskos ku Pablo: “Mi ta gradisí Dios ku lo e hasi esaki pa medio di Hesukristu, nos Señor!”—Rom. 7:25.
12 Nos situashon ta meskos ku ora nos kura di un malesa grave. Si nos ke kura kompletamente, nos tin ku hasi loke dòkter bisa nos. Aunke nos fe den e reskate por libra nos for di e lei di piká i di morto, ainda nos ta imperfekto i pekadó. Pa nos por tin un bon salú spiritual i tambe e aprobashon i bendishon di Dios, nos tin ku hasi mas kos. Pablo ta bisa nos ku nos tin ku kana segun spiritu si nos ke rekuperá kompletamente di e malesa di imperfekshon.
Kon Nos Por Kana Segun Spiritu?
13. Kiko kana segun spiritu ta nifiká?
13 Ora nos ta kana, nos ta bai progresivamente den direkshon di un sierto destinashon òf meta. Pues, pa nos kana segun spiritu, nos tin ku progresá kontinuamente den e bèrdat; esei no ke men ku nunka nos lo no kometé un fayo. (1 Tim. 4:15) Ma tur dia, i na e mihó manera ku nos por, nos tin ku hasi esfuerso pa kana, òf biba, segun e guia di e spiritu di Dios. “Kana pa medio di spiritu” ta hiba na e aprobashon di Dios.—Gal. 5:16.
14. Kon hende ku “ta biba segun karni” ta pensa i aktua?
14 Den e karta ku Pablo a skirbi na e romanonan, el a papia di dos tipo di hende kende nan manera di pensa ta kontrali di otro. (Lesa Romanonan 8:5.) Akinan e palabra “karni” no ta djis e kurpa físiko. Den Beibel, e palabra “karni” tin biaha por referí na e naturalesa pekaminoso i imperfekto di nos karni. Nos imperfekshonnan ta loke ta kousa e konflikto ku Pablo a menshoná anteriormente entre e karni i e mente. Pablo a lucha kontra su imperfekshonnan, ma e hendenan ku “ta biba segun karni” ni sikiera ta purba di lucha kontra nan mal deseonan. En bes di pensa riba loke Dios ta rekerí di nan i aseptá e yudansa ku el a perkurá, nan ta inkliná na “fiha nan mente riba e kosnan di karni.” Hopi biaha nan ta konsentrá riba satisfasé nan deseonan karnal i komodidatnan físiko. Na kontraste, e inklinashon di esnan ku ta “biba segun spiritu” ta pa fiha nan mente “riba e kosnan di spiritu,” esta, riba loke Yehova a perkurá pa nan por tin un bon relashon kuné i tambe riba nan aktividatnan kristian.
15, 16. (a) Kon e loke nos ta fiha nos mente ariba ta influensiá nos aktitut mental? (b) Riba kiko mayoria di hende ta fiha nan mente awe?
15 Lesa Romanonan 8:6. Kiko ku nos ke hasi, sea bon òf malu, nos tin ku fiha nos mente riba dje pa hasié. Hende ku konstantemente ta fiha nan mente riba kosnan di karni lo desaroyá un aktitut mental ku ta kompletamente fihá riba kosnan di karni. Por lo general, ta e kosnan di karni ei so lo okupá nan pensamentu-, interes- i sintimentunan.
16 Kiko ta e kosnan ku mayoria di hende awe ta okupá nan mes kuné? Apòstel Huan a skirbi: “Tur loke tin den mundu—deseo di karni, deseo di wowo i kana broma ku loke bo tin—no ta bini di e Tata, sino di mundu.” (1 Huan 2:16) E deseonan akí ta enserá kosnan manera inmoralidat, e deseo di ta importante i bon konosí, i e deseo pa mas kos material. Buki, revista, korant, pelíkula, programa di televishon i Internet ta promové e deseonan akí konstantemente, pasobra esaki ta e kosnan ku mayoria di hende ta fiha nan mente riba dje i realmente ta deseá. Sinembargo, “mente fihá riba karni ta nifiká morto.” E por pone nos pèrdè nos amistat ku Dios awor, i den futuro nos lo por pèrdè nos bida. Dikon? “Pasobra mente fihá riba karni ta nifiká enemistat ku Dios, ya ku karni no ta sumiso na e lei di Dios, loke, de echo, e no por ta tampoko. Di manera ku esnan ku ta biba segun karni no por agradá Dios.”—Rom. 8:7, 8.
17, 18. Kon nos por laga e spiritu di Dios guia nos, i kiko lo ta e resultado si nos hasi esei?
17 Di otro banda, “mente fihá riba spiritu ta nifiká bida i pas,” sí, bida eterno den futuro, i awor akí, pas mental i pas ku Dios. Kon nos por mustra ku nos “mente ta fihá riba spiritu”? Esei ta ora nos semper ta sigui e guia di Dios i di su spiritu santu, i asina nos lo desaroyá un manera di pensa ku ta na armonia ku su manera di pensa. Segun ku nos ta hasi esei, nos mente lo bira “sumiso na e lei di Dios.” Ora nos haña nos ku un tentashon, nos lo no tin duda di kiko nos tin ku hasi. Nos lo tin e deseo di tuma e desishon korekto, un desishon guiá pa e spiritu di Dios.
18 P’esei ta masha importante pa nos fiha nos mente riba e kosnan di spiritu. Nos ta hasi esaki ora nos ‘faha nos mente pa aktividat,’ es desir, hasi aktividatnan kristian e parti mas importante di nos bida. Esei ta inkluí hasi orashon regularmente, lesa i studia Beibel, asistí na reunion i partisipá den e sirbishi kristian. (1 Ped. 1:13) En bes di laga e kosnan di karni kita nos atenshon, laga nos fiha nos mente riba e kosnan di spiritu i laga e spiritu di Dios guia nos. Si nos hasi esaki, nos lo haña hopi bendishon, bida eterno i pas.—Gal. 6:7, 8.
Bo Por Splika?
• Kiko e Lei di Moises no por a hasi, i kon Dios a superá esaki?
• Kiko ta “e lei di piká i di morto,” i kon nos por ser librá for di dje?
• Kiko nos tin ku hasi pa desaroyá un “mente fihá riba spiritu”?
[Preguntanan di Estudio]
[Plachinan na página 16, 17]
Bo ta kana segun karni òf segun spiritu?
