E PALABRANAN di e mucha muhé sitá na man drechi ta revelá un realidat tristu: na tur parti di mundu hende muhé, grandi i chikí, ta víktima di violensia i diskriminashon. At’akí algun echo.

• Diskriminá pasobra nan ta hende muhé. Na Asia, mayoria di hende ta preferá yu hòmber; nan no ke yu muhé. Un informe di Nashonnan Uní publiká na aña 2011 ta kalkulá ku e poblashon den e parti di mundu ei tin kasi 134 mion hende muhé ménos debí na aborto, matamentu di bebi i negligensia.

• Edukashon. Dos tersera parti di e poblashon mundial ku no tin skol òf ku a haña ménos di kuater aña di skol ta konsistí di hende muhé, grandi i chikí.

• Intimidashon seksual. Mas ku 2.600 mion hende muhé ta biba den paisnan kaminda no ta kastigá un hòmber ku violá su kasá.

• Atenshon médiko. Den paisnan den desaroyo, un muhé ta muri kada dos minüt debí na komplikashon di embaraso òf di parto pa falta di kuido médiko básiko.

• Derecho di propiedat. Den hopi pais hende muhé no tin derecho di tin propiedat òf di heredá tereno, apesar ku ta nan ta kultivá mas ku mitar di e produkshon mundial.

Dikon hende muhé no tin e derechonan básiko akí? Pasobra algun kultura tin kreensia- i práktikanan religioso ku ta fomentá òf asta hustifiká maltrato i abusu di hende muhé. Un korant franses a sita un abogado di India, Chandra Rami Chopra, kende a bisa: “Tur lei religioso tin un kos en komun: Nan ta apoyá diskriminashon kontra hende muhé.”

Abo tambe ta pensa asina? Bo tambe ta kere ku Beibel ta rebahá hende muhé, meskos ku hopi otro buki religioso? Tin hende ta haña ku algun versíkulo di Beibel ta duna e impreshon ei. Pero kiko e Dios di Beibel ta pensa di hende muhé? Aunke esaki ta un tema delikado, un análisis franko i profundo di loke Beibel ta bisa lo yuda nos haña e kontesta.