Nínive tabata e kapital di e Imperio Asirio. E stat poderoso akí tabatin palasio- i tèmpelnan impreshonante, kayanan hanchu i murayanan inmenso. Sinembargo, e profeta hebreo Nahum a deskribié komo “e stat tur na sanger.”—Nahum 3:1.

E deskripshon ei ta kuadra ku realidat! E relievenan den e palasio di Senakerib na Nínive ta konfirmá ku en bèrdat e asirionan tabata hopi kruel. Un di nan ta mustra kon nan ta tene un prezu abou na suela pa ranka su lenga kita afó. Inskripshonnan ta konta ku nan tabata pasa hak mará na kabuya den nanishi i lep di e prezunan di guera pa asina kontrolá nan. Anto si e prezunan tabatin kualke funshon haltu, e asirionan tabata kologá kabesnan dekapitá di e reinan manera un kadena rònt di nan garganta, lokual tabata un bista masha spantoso.

Archibald Henry Sayce, kende a studia arkeologia asirio, a deskribí e kosnan horibel ku tabata tuma lugá despues ku e asirionan a kapturá un stat: “Tur kaminda ku nan a pasa, nan a laga seru di kabes dekapitá; nan tabata kima mucha hòmber i mucha muhé bibu òf reservá nan pa kosnan mas pió; nan tabata klaba hende hòmber na staka, soya nan na bida, saka nan wowo afó òf kap sea nan man ku pia òf orea i nanishi kita afó.”

Na Deuteronomio 22:8, Dios a duna e hudiunan e siguiente instrukshon: “Ora bo traha un kas nobo, traha un rant [òf, muraya] na bo dak, pa bo no trese kulpa di sanger riba bo kas, si un hende kai for di dje.” Esaki tabata un medida di siguridat pa e famianan hudiu ya ku nan tabata usa nan dak di kas hopi.

Mayoria di kas na Israel tabatin dak plat. Ei riba tabata un bon lugá pa sinta kue solo un ratu, disfrutá di aire fresku òf hasi algun trabou di kas. Den zomer, e tabata un dushi lugá pa drumi. (1 Samuel 9:26) Kunukero tabata usa nan dak pa seka lino, figu, drùif òf grano promé ku mul’é.—Hosue 2:6.

Nan tabata usa nan dak tambe pa adorá sea e Dios berdadero òf dios falsu. (Nehemías 8:16-18; Yeremías 19:13) Apòstel Pedro a subi riba dak 12 or di mèrdia pa hasi orashon. (Echonan 10:9-16) Si riba e dak tabatin un pida afdak kubrí ku mata di wendrùif òf rama di palma, lo e tabata un lugá trankil i agradabel pa sosegá un ratu.

E publikashon The Land and the Book ta bisa ku e trapi ku e hudiunan tabata usa pa subi bai riba dak di nan kas tabata “parti pafó di e kas, pero den kurá.” Pues un doño di kas por a baha for di su dak sin tabatin nodi di drenta kas. Esaki ta yuda nos komprondé e spièrtamentu ku Hesus a duna tokante e urgensia pa hui for di un stat kondená na destrukshon: “E hòmber ku ta riba dak no mester baha abou pa saka e kosnan ku ta den su kas.”—Mateo 24:17.