“AMI por resistí tur kos, pero tentashon si no.” E palabranan akí ta mustra bon kla kon algun hende ta mira tentashon, esta, komo algu ku nan ta anhelá den nan kurason. Sinembargo, tin hende ta konsiderá tentashon komo un enemigu persistente ku nan realmente ke vense. Kiko abo ta pensa di tentashon, bo mester resistié òf no?

Ta klaru ku no ta tur tentashon ta hinka bo den problema grandi. Por ehèmpel, si bo kome un pida bolo ora bo ta riba dieta, probablemente esaki lo no hasi bo hopi daño. Pero si bo entregá na otro tipo di tentashon, esaki por ta desastroso spesialmente ora ta trata di tentashon ku por hiba na inmoralidat seksual. Beibel ta spièrta nos: “Esun ku kometé adulterio . . . ta falta komprondementu; esun ku hasi esaki ta kaba ku su mes.”—Proverbionan 6:32, 33.

Kiko bo mester hasi si diripiente bo haña bo ku e tentashon pa kometé inmoralidat seksual? Beibel ta kontestá: “Esaki ta e boluntat di Dios: pa boso ta santu i pa boso apstené di fornikashon. Kada un di boso mester sa kon pa dominá su mes kurpa den santidat i onor.” (1 Tesalonisensenan 4:3, 4) Kon bo por desaroyá e determinashon, òf ‘willpower,’ ei? Konsiderá tres konseho ku por yuda bo.

Si nos alimentá nos wowo ku kosnan sensual, esaki sigur lo lanta deseo robes den nos. Hesus a mustra ku tin un konekshon entre wak i deseá ora el a spièrta: “Ken ku sigui wak un muhé ku pashon, ya kaba a kometé adulterio kuné den su kurason.” I usando un eksagerashon, el a konsehá: “Awor bon, si bo wowo drechi ta pone bo trompeká, sak’é tira afó.” (Mateo 5:28, 29) Ta kiko Hesus tabata ke siña nos? Pa nos resistí tentashon, nos mester ta determiná pa aktua i no wak kosnan seksualmente provokativo.

 Pa ilustrá esaki: Imaginá ku un lasdó ta las i bo bista kai riba e stralnan. Lo bo keda wak nan? Klaru ku no! Lo bo bira bo kara òf lo bo protehá bo bista. Wèl, meskos bo tin ku hasi si bo bista kai riba algu erótiko, sea imprimí, riba pantaya òf ‘live,’ bo tin ku bira bo kara mesora. Protehá bo mente pa e no ser kontaminá. Huan ta un eks adikto na pornografia. I el a bisa: “Ora mi mira un muhé bunita, hopi biaha mi ta haña gana di keda wak. P’esei mi tin ku fòrsa mi mes pa wak otro kaminda, i mi ta bisa mi mes: ‘Mi tin ku hasi orashon na Yehova! Anto awor!’ Ora ku mi kaba di hasi orashon, e deseo ta kuminsá bai.”—Mateo 6:9, 13; 1 Korintionan 10:13.

Laga nos wak un otro ehèmpel. E hòmber fiel Yòb a bisa: “Mi a sera un pakto ku mi wowonan pa nan no fiha ku deseo riba niun muhé.” (Yòb 31:1, BPK) Bo no ta haña ku nos tambe mester ta determiná pa no kai den tentashon?

Purba esaki: Si bo bista kai riba algu erótiko, bira bo kara mesora. Imitá e eskritor di Beibel ku a pidi Dios den orashon: “Kita mi bista for di banidat.”—Salmo 119:37.

Komo ku nos ta imperfekto, tin biaha nos tin ku lucha kontra mal deseo. Beibel ta bisa: “Kada hende ta ser poné na prueba ora e ser atraí i sedusí pa su mes deseo. Anto ora nutri e deseo, e ta duna lus na piká.” (Santiago 1:14, 15) Kon bo por evitá di kai den e trampa ei ku ta sumamente difísil pa libra di dje?

Ora bo haña un mal deseo, kòrda ku abo tin ku disidí kiko bo ta hasi. Lucha kontra e mal deseo; no aliment’é, esta, no keda pensa riba fantasia inmoral. Sak’é for di bo mente. Troy, kende tabata adikto na pornografia riba Internet, a bisa: “Mi a lucha pa saka mal pensamentu for di mi mente dor di enfoká riba pensamentunan positivo. No tabata fásil. Hopi biaha mi tabata kai bèk den e bisio. Pero ku tempu mi a logra kontrolá mi pensamentunan.” Elsa, kende tabata lucha kontra e tentashon pa kometé inmoralidat seksual ora e tabata tiner, a bisa: “Ora mi ta mantené mi mes okupá i ta hasi orashon  na Yehova, mi ta logra kontrolá mi mal pensamentunan.”

Purba esaki: Ora kosnan inmoral bini na bo mente, hasi orashon mesora. Lucha kontra mal pensamentu dor di yena bo mente ku “tur loke ta berdadero, tur loke ta digno di konsiderashon serio, tur loke ta hustu, tur loke ta puru, tur loke ta promové stimashon, tur loke hende ta papia bon di dje, tur loke tin birtut i tur loke ta digno di elogio.”—Filipensenan 4:8.

Ora un hende haña un mal deseo i na mes momento e hañ’é ku un tentashon i e oportunidat pa satisfasé e deseo, e por kai fásilmente den problema. (Proverbionan 7:6-23) Kon bo por protehá bo mes?

Beibel ta duna e konseho sabí akí: “Un hende prudente ta mira maldat i ta skonde, ma e simpelnan ta sigui bai, i ta haña kastigu pa esei.” (Proverbionan 22:3) Pues, tene kuidou ku loke bo ta hasi. Antisipá situashonnan ku por hinka bo den problema i evitá nan. (Proverbionan 7:25) Filipe, kende a vense su adikshon na pornografia, a bisa: “Mi a pone e kòmpiuter di famia kaminda tur hende por mir’é, i mi a instalá un software pa blòkia sierto informashon indeseabel di Internet. I mi ta bai online solamente ora tin otro hende rònt di mi.” Asina tambe, Troy, kende nos a menshoná kaba den e artíkulo akí, a bisa: “Mi ta evitá di wak pelíkulanan seksualmente provokativo i di anda ku hende ku ta papia di un manera vulgar tokante sèks. Mi no ke hinka mi mes den problema.”

Purba esaki: Onestamente analisá kiko ta bo debilidatnan, i pensa di antemano kon pa evitá situashonnan ku por hinka bo den tentashon.—Mateo 6:13.

Kiko si apesar di bo máksimo esfuerso tòg bo kai den tentashon? No desanimá i no entregá! Beibel ta bisa: “Un hende hustu ta kai shete bes, i ta lanta atrobe.” (Proverbionan 24:16) Sí, nos Tata selestial ta animá nos pa “lanta atrobe.” Abo ta aseptá su yudansa amoroso? Si ta asina, no kansa nunka di aserk’é den orashon, i fortalesé bo fe mediante estudio di Beibel i e reunionnan kristian. I no lubidá Dios su promesa: “Lo mi fortalesé bo, sí, lo mi yuda bo.”—Isaías 41:10.

Carlos, kende nos a menshoná kaba den e artíkulo akí, a bisa: “Mi mester a hasi hopi esfuerso pa vense mi bisio di pornografia. Vários biaha mi a kai bèk den mi bisio, pero Dios a yuda mi, i finalmente mi a logra vens’é.” David, kende tambe nos a menshoná kaba, a bisa: “Fásilmente lo mi por a tene relashon seksual ku mi kolega. Pero, mi a para firme i a bis’é: ‘Nò!’ Bo ta sinti bo hopi bon ora bo tin un konsenshi limpi. I mas importante ainda, mi sa ku Yehova ta orguyoso di mi.”

Ora bo para firme i resistí tentashon, bo por tin sigur ku Dios ta orguyoso di abo tambe!—Proverbionan 27:11.