Manera e artíkulo anterior a mustra, Hesus su bida tabata drei rònt di su mishon pa ‘prediká i anunsiá e bon notisia di e Reino di Dios.’ (Lukas 8:1) El a hasi hopi esfuerso pa kana sientos di kilometer den henter Israel pa prediká tokante e Reino di Dios. Hesus su sirbishi a keda registrá den e kuater Evangelionan, ku ta hasi referensia na e Reino mas ku 100 biaha. Mayoria di e referensianan akí ta palabranan ku Hesus mes a papia i tòg nan ta djis un parti chikitu di tur loke el a bisa tokante e Reino di Dios!—Huan 21:25.

Dikon Hesus tabatin asina tantu interes den e Reino tempu e tabata riba tera? Pa kuminsá, Hesus tabata sa ku Dios a skohe pa é bira gobernante di e Reino ei. (Isaías 9:6; Lukas 22:28-30) Pero Hesus no tabata buska poder òf gloria pa su mes. (Mateo 11:29; Marko 10:17, 18) E no a promové e Reino pa motibunan egoista. Hesus tabata i te ainda ta interesá prinsipalmente den e Reino di Dios * pa motibu di tur e kosnan bon ku e Reino lo hasi pa esnan ku e ta stima, esta, su Tata selestial i su fiel siguidónan.

Hesus tin un kariño profundo pa su Tata selestial. (Proverbionan 8:30; Huan 14:31) E ta atmirá e kualidatnan bunita di su Tata, manera Su amor, Su kompashon i Su hustisia. (Deuteronomio 32:4; Isaías 49:15; 1 Huan 4:8) P’esei, Hesus lo mester ta odia tur e mentiranan ku ta ser plamá tokante su Tata, entre otro, ku Dios no ta interesá den e sufrimentu di hende i ku ta e mes por ke ku nos ta sufri. Esaki ta un di e motibunan pakiko Hesus tabata ansioso pa prediká “e bon notisia di Reino.” E tabata sa ku pronto e Reino lo limpia e nòmber di su Tata. (Mateo 4:23; 6:9, 10) Kon lo e hasi esei?

Mediante e Reino, Yehova lo hasi kambionan drástiko ku lo benefisiá e famia humano. “Lo e seka tur lágrima” for di wowo di hende fiel. Yehova lo eliminá e kousa di e lágrimanan ei i asina hasi sigur ku ‘lo no tin morto mas, ni lamento, ni yoramentu, ni doló.’ (Revelashon 21:3, 4) Pa medio di e Reino, Dios lo kaba ku tur sufrimentu di hende. *

 No ta nada straño anto ku Hesus tabata asina ansioso pa konta hende tokante e Reino! E tabata sa ku e Reino lo demostrá kon poderoso i kompasivo su Tata realmente ta. (Santiago 5:11) Hesus tabata sa tambe ku e Reino lo benefisiá otro personanan ku e stima, esta, hende obediente.

Hopi promé ku Hesus a bini na tera, e tabata biba den shelu huntu ku su Tata. E Tata a usa e Yu pa krea tur kos; for di e strea- i galaksianan inkontabel i inkreiblemente asombroso huntu ku nos bunita planeta tera i su naturalesa. (Kolosensenan 1:15, 16) Di tur esakinan, Hesus a bisa ku su ‘delisia tabata den’ humanidat.—Proverbionan 8:31.

Loke a resaltá den Hesus su sirbishi tabata su amor pa hende. For di prinsipio, el a bisa bon kla ku el a bini na tera pa “deklará bon notisia” na tur esnan den nesesidat. (Lukas 4:18) Pero Hesus a hasi mas ku djis papia tokante yuda hende. Bes tras bes el a mustra ku e ta stima hende. Por ehèmpel, ora ku un grupo grandi di hende a bini huntu pa skuch’é, el “a haña duele di nan i a kura nan hendenan malu.” (Mateo 14:14) Na un otro okashon, ora un hòmber ku tabata sufri di un enfermedat doloroso a bisa ku e tabatin fe ku Hesus lo por a kur’é basta e tabata ke, Hesus a sinti kompashon p’e. Motivá pa su amor pa e hòmber, el a kur’é, bisando: “Mi ke. Sea kurá.” (Lukas 5:12, 13) Ora Hesus a mira ku Maria tabata lamentá morto di su ruman hòmber, Lázaro, Hesus “a suspirá profundamente,” “a keda masha konmoví” i “awa tabata basha for di su wowo.” (Huan 11:32-36) Anto e ora ei el a hasi algu ku niun hende no por a kere. Hesus a resusitá Lázaro maske e tabatin kuater dia morto kaba!—Huan 11:38-44.

Klaru ku Hesus tabata sa ku e alivio ku el a duna nan tabata temporal. El a realisá ku tardi òf trempan tur hende ku el a kura lo a bira malu atrobe i ku tur esnan ku el a resusitá lo a bolbe muri. Sinembargo, Hesus tabata sa tambe ku e Reino di Dios lo trese un solushon permanente pa e problemanan ei. P’esei Hesus no a djis hasi milager so, sino tabata anunsiá “e bon notisia di Reino” ku entusiasmo. (Mateo 9:35) Su milagernan tabata un muestra chikitu di loke e Reino di Dios lo hasi pronto na un eskala mundial. Laga nos wak kiko Beibel ta primintí pa e tempu ei.

•  Lo no tin problema di salú mas.

  “E ora ei wowo di e siegunan lo mira, i orea di e surdunan lo tende. Anto e kohonan lo bula manera biná, i lenga di e muda lo grita di alegria.” Ademas, “ningun habitante lo no bisa: ‘Mi ta malu.’”—Isaías 33:24; 35:5, 6.

• Lo no tin morto mas.

  “E hustunan lo heredá e tera, i lo biba den dje pa semper.”—Salmo 37:29.

  “E lo traga morto pa semper, i SEÑOR Dios lo seka awa di wowo for di tur kara.”—Isaías 25:8.

• E mortonan lo resusitá.

  “Tur esnan ku ta den graf lo tende su stèm i lo sali afó.”—Huan 5:28, 29.

  “Lo bai tin un resurekshon.”—Echonan 24:15.

• Lo no tin falta di bibienda ni desempleo mas.

  “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome . . . Nan lo disfrutá di e obra di nan mannan pa hopi tempu.”—Isaías 65:21, 22.

•  Lo no tin guera mas.

  “E ta hasi gueranan stòp te na e fin di tera.”—Salmo 46:9.

  “Nashon lo no lanta spada kontra nashon, i nunka mas nan lo train pa guera.”—Isaías 2:4.

• Lo no tin skarsedat di kuminda mas.

  “Tera a duna su fruta; Dios, nos Dios, ta bendishoná nos.”—Salmo 67:6.

  “Lo tin abundansia di maishi den e tera, riba kabes di e serunan.”—Salmo 72:16.

• Lo no tin pobresa mas.

  “Esun den nesesidat lo no keda lubidá pa semper.”—Salmo 9:18.

  “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat.”—Salmo 72:12, 13.

Ora bo pensa riba e promesanan akí tokante e Reino di Dios, bo por komprondé dikon e Reino ta asina importante pa Hesus? Tempu e tabata riba tera, e tabata ansioso pa papia tokante e Reino di Dios ku ken ku tabata dispuesto pa skuch’é pasobra e tabata sa ku e Reino lo bai kaba ku tur e problemanan ku ta afligí hende awe.

E promesanan di Beibel ta atraé bo? Si ta asina, kon bo por siña mas tokante e Reino? I kiko abo mes por hasi pa hasi sigur ku bo tambe lo por benefisiá di tur su bendishonnan? E último artíkulo di e seri akí lo kontestá e preguntanan akí.