Miónes di hende rònt mundu ta selebrá Pasku di Nasementu pa diferente motibu. Pa algun hende, e ta un tempu pa disfrutá di kompania di nan famia- i amigunan; pa otronan, e ta un okashon pa pensa riba Dios òf pa yuda esnan den nesesidat. Riba nan mes e motibunan akí no tin nada malu ku nan. Pero Pasku tin su aspektonan negativo.

Pa di promé, hopi hende ta kere ku riba dia di Pasku nan ta selebrando e nasementu di Hesus. Pero mayoria di historiadó ta bisa ku niun hende no sa e fecha ku Hesus a nase. E buki The Christian Book of Why ta bisa ku “e promé kristiannan no kier a marka un fecha pa e nasementu di Hesus,” pasobra nan kier a “keda leu for di tur kustumber pagano.” Ta interesante ku niun kaminda den Beibel no ta pará ku Hesus a selebrá su mes kumpleaño ni tampoko di otro hende. E úniko kos ku Hesus a manda su siguidónan konmemorá tabata su morto.—Lukas 22:19.

Na di dos lugá, hopi investigadó ta bisa ku mayoria di tradishon i personahe di Pasku ta bini di orígen pagano. Esaki ta inkluí Papa Pasku, ponementu di kèrstbom, dunamentu di regalo, sendementu di bela, krans di Pasku na porta i kantikanan di Pasku. Relashoná ku algun di e kustumbernan akí, un buki tokante religion katóliko a bisa: “Kuantu di nos probablemente sa ku ora nos ta duna i haña regalo di Pasku i kologá krans bèrdè den nos kas i na misa, nos ta siguiendo kustumbernan pagano?”—The Externals of the Catholic Church.

Pero kisas bo ta pensa: ‘Kiko tin di malu den sigui e kustumbernan akí? Nan no ta hasi niun hende daño.’ Wèl, pa kontestá esei, konsiderá e di tres motibu akí: Dios no ta aseptá pa hende meskla adorashon puru ku kustumbernan pagano. Na Ámos 5:21 i 23, nos ta lesa ku Yehova a bisa e adoradónan infiel di Israel di antigwedat: “Mi ta odia, mi ta rechasá boso fiestanan . . . Kita for di mi e boroto di boso kantikanan.”

Dikon Yehova a papia asina fuerte ku nan? Wèl, wak kiko e reino di nort di Israel di antigwedat tabata hasi. Jeroboam, e promé rei di e reino ei, a pone un bisé di oro den e stat di Dan i unu na Bètel. El a bisa e pueblo pa usa e bisénan ei pa adorá Yehova en bes di bai te na e tèmpel na Herúsalèm manera mester ta. Tambe e rei a introdusí fiestanan nobo i a nombra saserdotenan pa yuda e pueblo selebrá nan.—1 Reinan 12:26-33.

Loke e israelitanan ei a hasi por a parse bon. Al fin i al kabo, nan intenshon tabata pa adorá i agradá Yehova, tòg? Pero Yehova su palabranan fuerte via Ámos i otro profetanan a mustra bon kla kon malu el a konsiderá e práktikanan ei. Siglonan despues, Yehova a bisa e Israel: ‘Ami, Yehova, no ta kambia.’ (Malakías 3:6) Pues, kiko bo ta kere Dios ta pensa di e kustumbernan di Pasku?

Despues di a konsiderá e motibunan menshoná ariba, miónes di hende a disidí di stòp di selebrá Pasku. Na lugá di esei, nan ta pasa tempu ku nan famia i yuda esnan den nesesidat ki ora ku nan ke durante henter aña. I esei ta hasi nan mas felis.