PRINSIPIO BÍBLIKO: “Sigui . . . pordoná otro libremente, asta si un di boso tin motibu pa keha un otro. Meskos ku Yehova a pordoná boso libremente, boso tambe mester hasi meskos.”—Kolosensenan 3:13.

Kiko esei ta nifiká? Beibel ta kompará piká ku debe, i e ta kompará pordonamentu di un hende ku kanselashon di un debe. (Lukas 11:4) Un buki di referensia ta bisa ku den e Skritura e palabra griego pa “pordoná” ta nifiká “pasa por haltu di un debe dor di kansel’é i no eksigí un pago bèk.” Pues, ora nos pordoná un hende ku a hasi algu kontra nos, nos no ta ferwagt di haña nada a kambio. Pero, e echo ku nos ta dispuesto pa pordoná no ta nifiká ku nos ta keda kontentu ku e mal komportashon di un hende òf hasi manera e no a hùrt nos. Mas bien, nos ta disidí pa no warda renkor maske nos tin “motibu pa keha.”

E ta práktiko awe? Komo hende imperfekto, nos tur ta peka. (Romanonan 3:23) P’esei ta sabí pa nos pordoná otronan, pasobra tardi òf trempan, otronan tambe lo tin ku pordoná nos. Fuera di esei, ora nos pordoná otro hende, esei ta bon pa nos mes tambe. Kon asina?

Ora nos karga renkor i keda sin pordoná, nos ta hasi nos mes daño. E emoshonnan negativo akí ta desanimá nos, kita nos goso den bida i laga nos ku un mal sintimentu. E emoshonnan akí por asta kousa daño na nos salú. Un rapòrt den e Journal of the American College of Cardiology, skirbí pa Dr. Yoichi Chida i profèser di sikologia Andrew Steptoe, a bisa: “Estudionan resien ta indiká ku tin un konekshon peligroso entre rabia i enemistat i problema di kurason.”

Di otro banda, pensa riba e benefisionan ku nos ta haña ora nos pordoná otro hende. Ora nos pordoná libremente, nos ta keda uní i na pas ku otronan, loke na su turno ta yuda nos mantené nos bon relashon ku nan. Mas importante ainda, ora nos pordoná otronan, nos ta imitá Dios, kende ta pordoná libremente tur pekadó ku arepentí, i e ta ferwagt ku nos ta hasi meskos.—Marko 11:25; Efesionan 4:32; 5:1.