Yehova Dios ta e Fuente di bida. (Salmo 36:9) Pues, no ta lógiko ku e mesun Dios ei por duna hende ku a muri bida atrobe? Beibel ta sigurá nos ku ta yùist esei lo e bai hasi den futuro. (Lesa Echonan 24:15) Pero dikon lo e hasi esei?

For di prinsipio, nos Kreador su propósito tabata pa hende biba pa semper riba tera. (Génesis 1:31; 2:15-17) I su propósito no a kambia. Ta duel e di mira e kosnan ku hende ta pasa aden aworakí, esta, ku hende tin un bida kòrtiku i yen di problema.—Lesa Yòb 14:1, 14, 15.

Akaso Dios a krea hende pa biba den shelu? Nò. Dios a krea angel pa biba den shelu i hende pa biba aki riba tera. (Génesis 1:28; Yòb 38:4, 7) Ku esei na mente, pensa un ratu riba e resurekshonnan ku Hesus a hasi. El a resusitá hende pa biba aki riba tera mes. Asina tambe, mayoria di hende ku resusitá den futuro lo lanta pa biba riba tera.—Lesa Huan 5:28, 29; 11:44.

Sinembargo, Dios a skohe un grupito di hende ku lo resusitá pa bai biba den shelu, kaminda nan lo tin un kurpa spiritual. (Lukas 12:32; 1 Korintionan 15:49, 50) Esnan ku resusitá pa biba den shelu lo goberná tera komo rei huntu ku Kristu.—Lesa Revelashon 5:9, 10.