E echo ku Dios mes a bringa kontra e egipsionan ta demostrá ku e no ta kontra di tur guera. Na algun okashon, el a outorisá su pueblo Israel pa bai bringa kontra otro nashon. Por ehèmpel, el a manda nan bai bringa kontra e kananeonan, un nashon sumamente malbado. (Deuteronomio 9:5; 20:17, 18) Tambe el a manda Rei David di Israel bai bringa kontra e filisteonan kruel i a asta bis’é kiko e mester a hasi pa derotá nan.—2 Samuel 5:17-25.

E relatonan di Beibel akí ta mustra ku ora e nashonnan tabata oprimí òf maltratá e israelitanan, Dios a manda nan bringa kontra nan enemigunan pa protehá nan mes i pa konserbá adorashon berdadero. Pero tuma nota di e siguiente tres puntonan klave relashoná ku e gueranan ku Dios a outorisá.

1. TA DIOS SO TABATA DISIDÍ KEN LO A BAI GUERA. Na un okashon, Dios a bisa e israelitanan: “Boso no tin mester di bringa den e bataya akí.” Dikon? Pasobra Dios mes lo a bringa pa nan. (2 Krónikanan 20:17; 32:7, 8) El a hasi esei hopi biaha, manera ora el a bringa kontra e egipsionan. Na otro okashon, Dios a manda su pueblo di Israel di antigwedat pa bringa den gueranan ku é a outorisá, esta, gueranan pa nan konkistá i defendé e Tera Primintí.—Deuteronomio 7:1, 2; Hosue 10:40.

2. TA DIOS SO TABATA DISIDÍ KI ORA UN GUERA LO A TUMA LUGÁ. E sirbidónan di Dios mester a warda ku pasenshi te ora Dios a duna nan òrdu pa bringa kontra e nashonnan malbado ku tabata  oprimí nan. Nan no tabatin mag di tuma e asuntu den nan mes man i bai guera. Ora nan a hasi esei tòg, Dios no a yuda nan. De echo, Beibel ta mustra ku ora e israelitanan a bai guera sin outorisashon di Dios, e resultado tabata desastroso. *

3. DIOS NO KE PA NIUN HENDE MURI, NI E MALBADONAN. Yehova Dios ta e Fuente di bida i e Kreador di hende. (Salmo 36:9) P’esei, e no ke mira hende muri. Pero lamentablemente, tin hende ta pone otro sufri pa malu i asta mata nan. (Salmo 37:12, 14) Na algun okashon, Dios a permití e israelitanan bringa kontra e malbadonan pa kaba ku maldat. Apesar di esei, durante tur e añanan ku el a manda nan bai guera, e tabatin kompashon i a tene pasenshi ku nan enemigunan. (Salmo 86:15) Por ehèmpel, promé ku el a manda e israelitanan deklará guera kontra un stat, nan mester a ‘ofresé pas’ na e habitantenan pa nan por a haña oportunidat pa hasi kambio i evitá e guera. (Deuteronomio 20:10-13) Asina Dios a mustra ku e “no tin plaser den e morto di e malbado, ma mas bien ku e malbado bira for di su kaminda i biba.”—Ezekiel 33:11, 14-16. *

Pues, nos a mira ku, den antigwedat, Dios a mira guera komo un medio legítimo pa kaba ku opreshon i maldat. Pero ta Dios, i no hende, tabatin e derecho di determiná ki ora lo mester a bringa un guera i ken lo a bai guera. Ma Dios no a manda hende bai guera pa drama sanger den un forma kruel. Al kontrario, e ta odia violensia. (Salmo 11:5) Akaso Dios su punto di bista a kambia ora su Yu, Hesukristu, a kuminsá su sirbishi riba tera den e promé siglo?