TÓPIKO PRINSIPAL
Kiko Dios Ta Pensa di Guera?
Kon abo lo kontestá e pregunta ei? Hopi hende ta pensa ku Dios ta apoyá guera. Nan ta bisa ku, den pasado, Dios mes a manda algun di su sirbidónan bai bringa den guera, i Beibel mes ta konfirmá esei. Pero otronan ta bisa ku Dios su Yu, Hesus, a siña su siguidónan pa stima nan enemigunan. (Mateo 5:43, 44) Pues, nan a yega na e konklushon ku Dios lo mester a kambia di opinion i ku awor e ta kondená guera.
Kiko abo ta pensa? Dios ta apoyá guera? Si ta asina, pa ken e ta tuma parti awe? Kontesta riba e preguntanan akí por kambia bo opinion tokante guera. Por ehèmpel, si bo haña sa ku Dios ta apoyá guera i ku asta e ta tuma parti pa e banda ku abo ta faboresé, e ora ei bo tambe lo pensa meskos i lo bo tin sigur ku bo banda lo sali viktorioso. Di otro banda, kon lo bo sinti bo si bo haña sa ku Dios ta apoyá e kontra partido? Probablemente, lo bo kambia di opinion tokante guera.
Pero algu mas importante ta den wega. Loke Dios ta pensa di guera por influensiá bo punto di bista tokante Dios. Kon asina? Wèl, si bo ta entre e miónes di hendenan ku a sufri pa motibu di guera, sin duda lo bo ke sa si ta Dios mes ta instigá guera, si ta e ta permití e sufrimentu ku guera ta trese kuné òf si ta e ta kous’é, manera algun hende ta pensa. Òf kisas bo ta puntra bo mes si e no tin kunes ku e víktimanan i no ta hasi nada pa nan, manera algun ta pretendé.
Lo bo keda sorprendí di sa ku loke Beibel ta bisa ta hopi diferente for di e opinionnan ei. Ademas, loke Dios ta pensa di guera semper a keda meskos. Ban analisá kiko Beibel ta bisa tokante Dios su punto di bista di e gueranan den antigwedat i den e promé siglo, tempu ku Hesus tabata riba tera. Esei lo yuda nos haña sa kiko Dios ta pensa di guera awe i si lo tin guera den futuro.
