Riba 23 di mei 2023, un funshonario haltu di salubridat na Merka a spièrta e públiko ku ret sosial tin un efekto negativo riba hopi hóben.

•   “Ta bèrdat ku ret sosial por tin benefisio pa algun mucha i tiner, pero tin hopi evidensia tambe ku ta mustra ku ret sosial por tin un efekto negativo riba e salú físiko i mental di mucha i tiner.”—Social Media and Youth Mental Health: The U.S. Surgeon General’s Advisory, 2023.

 E deklarashon públiko di e funshonario di salubridat a referí na vários investigashon ku ta mustra dikon e tópiko akí ta algu serio ku mester presta atenshon na dje.

•   Tiner entre 12 pa 15 aña di edat “ku ta pasa mas ku 3 ora pa dia riba ret sosial tin dos biaha mas tantu chèns di haña nan ku problema di salú mental ku ta inkluí síntoma di depreshon i ansiedat.”

•   Ora tiner di 14 aña di edat “pasa mas tantu tempu riba ret sosial, hopi bes nan no ta drumi bon, nan ta haña nan ku tèrmentu online, nan tin un punto di bista negativo di nan aparensia, nan ta sinti ku nan no ta bal nada, i nan tin mas síntoma di depreshon. Anto ta parse ku esaki ta afektá mucha muhé mas tantu ku e ta afektá mucha hòmber.”

 Kon mayornan por protehá nan yunan for di e peligernan ei? Beibel ta duna konseho práktiko.

 Keda atento. Un mayor mester analisá e rísikonan i disidí si su yu por usa ret sosial sí òf nò.

•   Prinsipio di Beibel: “Siña un mucha kana den e kaminda ku e mester kana.”—Proverbionan 22:6.

•   Pa haña sa mas, lesa e artíkulo “Ta Bon Idea pa Mi Yunan Usa Ret Sosial?”

 Si bo disidí di laga bo yu usa ret sosial, sea konsiente di e posibel peligernan i keda atento di loke bo yu ta hasi online. Kon bo por hasi esei?

 Protehá bo yu di kos online ku por hasié daño. Entrená bo yu pa identifiká i evitá tur kos online ku por hasié daño.

•   Prinsipio di Beibel: “No menshoná fornikashon ni ningun sorto di impuresa ni golosidat mes meimei di boso . . . ni komportashon bergonsoso ni papiamentu di disparate ni chansanan vulgar.”—Efesionan 5:3, 4.

•   Pa konseho práktiko, lesa e artíkulo “Siña Bo Yunan Tiner Tokante e Peligernan di Ret Sosial.”

 Pone límite. Por ehèmpel, pone regla pa asina bo yu por sa ki ora e por subi ret sosial i kon largu e por keda riba dje.

•   Prinsipio di Beibel: “Paga bon tinu pa e manera ku boso ta kana [ta] . . . manera hende sabí, usando boso tempu di e mihó manera.”—Efesionan 5:15, 16.

•   Usa e vidio di pintamentu riba bòrchi Usa Ret Sosial na un Manera Sabí pa yuda bo yu komprondé dikon mester pone límite ora di usa ret sosial.