Rònt mundu, tin masha hopi kaso di violensia polítiko ta tumando lugá.

•   Na México, durante e temporada di elekshon 2023-2024, hende a asesiná 39 polítiko ku a postulá nan mes komo kandidato; esei tabata algu nunka bisto. Fuera di asesinato, tabatin otro forma di violensia polítiko. Tur e kasonan ei di violensia a shòk e pueblo mehikano i kita nan atenshon for di elekshon.

•   Na Europa, tambe tabatin hopi kaso di violensia polítiko resientemente. Entre otro, tabatin un di intento di asesinato ku a tuma lugá dia 15 di mei 2024 riba e promé minister di Slovakia.

•   Na Merka, dia 15 di sèptèmber 2024, tabatin un di dos posibel intento di asesinato riba eks presidente Donald Trump. Esei a shòk e pueblo merikano.

 Dikon tin asina tantu violensia polítiko? E violensia ei lo kaba un dia? Kiko Beibel ta bisa?

 Beibel ta yama nos tempu “e último dianan.” I Beibel a pronostiká ku den e tempu ei hopi hende lo tin sierto aktitut ku ta fomentá violensia i desakuerdo.

•   Beibel ta bisa ku ‘den e último dianan lo bini tempunan krítiko, difísil pa trata kuné. Pasobra hende lo ta malagradesí, desleal; nan lo no ta dispuesto pa sera ningun akuerdo; nan lo ta feros, traidor, kabesura, hinchá di orguyo.’—2 Timoteo 3:1-4.

 Beibel a bisa tambe di antemano ku disturbio manera “rebelion” kontra gobièrnu i intrankilidat polítiko lo ta un rasgo di e periodo akí ku nos ta den. (Lukas 21:9, Beibel na papiamentu koriente) Sinembargo, violensia i divishon pa motibu di polítika lo no dura pa semper.

 Beibel ta bisa ku Dios lo trese su propio gobièrnu ku el a establesé den shelu. E gobièrnu ei lo remplasá tur gobièrnu humano.

•   “Dios di shelu lo lanta un reino ku . . . lo destruí i pone un fin na tur [otro reino], i e reino akí so lo keda pa semper.”—Dánièl 2:44.

 E Reino di Dios lo trese berdadero union entre hende, i e Reino lo sòru pa rònt mundu tin pas.

•   Hesukristu ta e gobernante di e Reino ei, i e ta ser yamá “Prens di Pas.” Hesukristu lo sòru pa “no tin fin na pas.”—Isaías 9:6, 7.

•   For di awor, e hendenan ku ta bou di gobernashon di e Reino ei ta siña kon pa biba na pas ku otro. Beibel ta bisa ku komo resultado di esei: “Nan lo bati nan spadanan i traha plug ku nan; ku nan spernan, nan lo traha kuchú pa snui mata. Nashon lo no hisa spada pa bringa kontra otro nashon, ni nan lo no siña pa bringa den guera mas.”—Isaías 2:3, 4.

 Si bo ke sa mas, lesa e artíkulo “Kiko e Reino di Dios Lo Hasi?” i wak e vidio Kiko e Reino di Dios Ta?