1 DI FEBRÜARI 2023
RUSIA

“No Ta Mi Sirkunstansianan Mester A Kambia”

TOKA NA

Korte di e stat Kovrovskiy, na region Vladimir pronto lo anunsiá su veredikto den un kaso penal kontra Ruman Boris Simonenko. Fiskal no a bisa ainda ki sentensia lo e pidi pa Ruman Simonenko.

Informashon Personal

Boris Simonenko

Nasí na: 1955 (Ukrania)

Background: Tabata minero

El a kasa ku Ida na aña 1978. Nan tin un yu hòmber, Aleksey

Ida a kuminsá studia Beibel ku Testigunan di Yehova promé. Ku tempu, Boris tambe a kuminsá studia Beibel, pasobra el a mira e benefisionan di apliká prinsipio di Beibel den su famia. Ida a batisá na aña 1996; Aleksey a batisá na aña 1998, i Boris a batisá na aña 2000

Loke Nos Ruman A Bisa

Kon bo ta keda positivo apesar di e difikultatnan ku bo ta pasando aden?

Na un kongreso regional, mi a tende un diskurso ku a animá mi mashá. E ruman a bisa: “Ta mihó pa bo ta den prizòn i bo ta bon ku Dios, na lugá di ta pafó di prizòn sin Dios.” Esei a yuda mi komprondé algu importante: No ta mi sirkunstansianan mester a kambia pa mi ta felis, pero mi manera di mira e sirkunstansianan ei mester a kambia. Semper mi ta keda kòrda riba loke e ruman a bisa. E palabranan ei ta animá mi pa mi no entregá. Esei ta kòrda mi riba e teksto di Salmo 27:13. E ta bisa: “Kiko lo a para di mi si mi no tabatin fe ku lo mi mira Yehova su bondat tanten ku mi ta na bida?” Mi tin 20 aña kaba ta sirbi Yehova. Pero loke mi ta pasando aden aworakí a yuda mi ta mas serka di Yehova.

Nos tin sigur ku Yehova lo sigui duna Boris i su famia forsa tanten ku nan ta keda serka di dje.—1 Krónikanan 16:27.

Algun Suseso Ku A Tuma Lugá

8 di febrüari 2021

Sin ku Boris tabata sa, e outoridatnan tabata graba su kòmbersashonnan na telefòn pa por kuminsá un kaso penal kontra dje
17 di febrüari 2021

E outoridatnan a listra su kas. Despues, nan a interogá Boris i deten’é temporalmente
18 febrüari 2021

Kaso penal a kuminsá. E outoridatnan a akusá Boris di dirigí reunion di Testigu di Yehova via Internet. Nan a pone Boris bou di aresto preventivo
13 di yüli 2021

E outoridatnan a kita Boris su aresto preventivo i pon’é bou di aresto na kas
17 di febrüari 2022

E outoridatnan a kita Boris su detenshon na kas, i nan a dun’é òrdu pa e no biaha
15 di sèptèmber 2022

A kuminsá trata e kaso penal den korte

KOMUNIKADO