Tin algun kos ku bo por hasi pa yuda bo sinti mihó.

•  Kiko abo lo hasi?

•  Kiko si mi mester di tratamentu médiko?

•  Kon mi por sinti mi mas mihó?

•  Teksto di Beibel ku por yuda

 Imaginá bo e siguiente esena:

 Nada no ta hasi Jennifer felis mas. Tur dia e ta yora masha tantu mes, sin motibu. E no ke atendé ku niun hende i kasi e no ta kome. E ta drumi malu i ta difísil pa e konsentrá. Jennifer no ta komprondé ta kiko ta pasando kuné i ta puntra su mes si un dia e lo ta su mes atrobe manera ántes.

 Mark tabata un studiante ehemplar, ma awor e tin rabia riba skol i ta haña mal punto. Mark tabata gusta hasi deporte, pero awor e no tin gana di hasi esei mas. Su amigunan no ta komprondé. I su mayornan ta preokupá. Nan ta puntra nan mes si esaki lo pasa pronto òf si ta un problema mas serio.

 Abo sa sinti manera Jennifer òf Mark? Si ta asina, kiko bo por hasi? Tin dos opshon:

1.   Purba solushoná e problema riba bo mes

2.   Papia ku un adulto ku bo ta konfia

 Kisas ta parse mas fásil pa bo skohe opshon A, foral si bo no ke papia tokante e asuntu. Pero, esei ta e opshon di mas sabí? Beibel ta bisa: “Dos ta mihó ku un . . . Pasobra si un di nan kai, esun lo lanta su kompañero. Ma ai di esun ku kai ora no tin ningun hende pa lant’é.”—Eklesiástes 4:9, 10, Beibel Santu.

 Wak e ehèmpel akí: Suponé ku bo a pèrdè kaminda den un bario peligroso. Ta sukú i tin yen hende straño tur kaminda. Kiko abo lo hasi? Bo por purba haña e kaminda riba bo mes. Pero, lo no ta mas sabí si bo puntra un hende ku bo por konfia?

 Depreshon por ta manera e bario peligroso ei. Ta klaru ku de bes en kuando bo por sinti bo down i e lo pasa di mes. Pero si bo tin e sintimentunan ei pa un periodo mas largu, ta mihó pa bo buska yudansa.

 PRINSIPIO DI BEIBEL: “Esun ku isolá su mes . . . ta lanta kontra tur sabiduria sano.”—Proverbionan 18:1, Beibel Santu.

 E bentaha di opshon B (papia ku un di bo mayornan òf ku un adulto ku bo ta konfia) ta ku bo por benefisiá di eksperensia di un hende ku a lucha kontra sintimentunan paresido.

 Kisas bo ta pensa ku bo mayornan no tin un idea kon bo ta sinti. Pero, bo ta sigur di esei? Asta si ora nan tabata hóben nan situashon tabata diferente, kisas nan tabatin e mesun sintimentunan ku bo. I kisas nan sa kon pa yuda bo.

 PRINSIPIO DI BEIBEL: “Sabiduria ta wòrdu hañá serka e ansianonan, i den bida largu tin komprondementu.”—Yòb 12:12, Beibel Santu.

 E punto ta ku si bo papia ku bo mayor òf un adulto ku bo ta konfia, lo bo tin mas chèns di haña konseho ku por yuda bo.

 Si bo ta sinti bo deprimí tur dia, kisas bo tin depreshon grave òf un otro problema médiko ku mester di tratamentu.

 Ta masha fásil pa pensa ku e síntomanan di depreshon grave ta djis mal beis di tiner. Pero, e síntomanan di depreshon grave ta mas intenso i ta dura mas largu. Pues, si bo tristesa ta severo i no ke kita, papia ku bo mayornan pa bo por bai dòkter.

 PRINSIPIO DI BEIBEL: “Hende bon di salú no tin mester di dòkter, ma hende malu sí.”—Mateo 9:12.

 Bo no tin nodi sinti bèrgwensa si bo haña sa ku bo tin depreshon grave. Hopi hóben ta sufri di depreshon i tin tratamentu p’e. Bo por tin sigur ku bo bon amigunan lo no pensa malu di bo.

 Tep: Tene pasenshi. Ta tuma tempu pa sali for di depreshon i ta normal ku bo por tin dianan bon i dianan malu. a

 Sea ku bo mester di yudansa médiko òf nò, tin algun kos ku bo por hasi pa trata ku e tristesa ku ta persistí. Por ehèmpel, kome bon, drumi sufisiente i hasi ehersisio por yuda bo tene bo emoshonnan bou di kontrol. (Eklesiástes 4:6; 1 Timoteo 4:8) Loke por yuda tambe ta si bo tin un dagboek pa skirbi bo sintimentunan, bo metanan, rekaida i logronan.

 Sea ku bo ta sufriendo di depreshon grave òf bo ta djis pasando den un periodo difísil, no lubidá esaki: Si bo aseptá yudansa di otro hende i tuma medida pa sinti bo mihó, bo por dil ku depreshon.

•  “SEÑOR ta serka di e hende di kurason kibrá, i ta salba esnan di spiritu abatí.”—Salmo 34:18, Beibel Santu.

•  “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.”—Salmo 55:22, Beibel Santu.

•  “Pasobra ami ta SEÑOR bo Dios, Kende ta sostené bo man drechi, Kende ta bisa bo: ‘No tene miedu, lo mi yuda bo.’”—Isaías 41:13, Beibel Santu.

•  “No sea nunka anshá pa e dia di mañan.”—Mateo 6:34.

•  “Laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason.”—Filipensenan 4:6, 7.