•  Kon bon bo ta den multitasking?

•  Di bèrdat multitasking ta posibel?

•  Un mihó manera pa hasi kos

•  Loke otro hóben ta bisa

 Bo gusta hasi hopi kos pareu? Nan ta yama esei multitasking. Hopi hende ta pensa ku hende ku a lanta den e era teknológiko por hasi esei mihó ku hende ku no a lanta ku teknologia i ku a siña traha ku teknologia na grandi. Pero esei ta bèrdat?

 KOREKTO òf INKOREKTO?

•   Multitasking ta yuda bo gana tempu.

•   Mas bo multitask, mas mihó lo bo bira den dje.

•   E hóbennan por multitask mihó ku hende grandi.

 Si bo ta pensa ku loke un òf mas di e frasenan ei ta bisa ta “korekto,” bo a kai den e trampa di kere ku multitasking ta posibel.

 Bo ta kere ku bo por hasi dos kos pareu? Kisas tin algun kos ku bo por hasi pareu sin ser distraí. Por ehèmpel, si bo ta skucha muzik miéntras bo ta limpia bo kamber, probablemente bo kamber lo keda limpi.

 Pero si bo ta purba di hasi dos kos ku ta eksigí pa bo konsentrá bon, probablemente lo bo no hasi niun di dos bon. Kisas ta p’esei un mucha muhé ku yama Katherine a definí multitasking di e manera akí: “E ta e abilidat di daña tur kos na e mesun momento.”

 “Mi tabata papia ku un hende, pero durante e kòmbersashon, mi a haña un mensahe ku mi mester a kontestá. Mi a purba di sigui kòmbersá ku e persona i kontestá e mensahe, pero mi no a tende kasi nada ku e persona tabata konta mi, i riba esei, mi a spèl kasi tur e palabranan den mi mensahe robes.”—Caleb.

 Sherry Turkle, un eksperto riba tereno di teknologia, a splika ku ‘nos ta pensa ku nos ta multitask, pero kada biaha ku nos agregá un kos di hasi, nos produktividat ta baha. Ora nos ta hasi hopi kos pareu, nos selebro ta produsí un reakshon kímiko ku ta konvensé nos ku nos ta hasiendo nos kosnan bon pero en realidat nos ta hasiendo e kosnan mas i mas malu.’ a

 “Tin biaha, mi ta kòmbersá ku un hende i na mes momento mi ta manda un mensahe pa un otro hende. Anto segun mi, mi ta hasiendo tur dos bon. Pero despues mi ta ripará ku mi a bisa loke mi kier a skirbi, i mi a skirbi loke mi kier a bisa.”—Tamara.

 Hende ku ta purba di hasi hopi kos pareu ta hasi nan bida mas kompliká. Por ehèmpel, nan ta tarda pa kaba nan hùiswèrk. Òf kisas nan tin ku bolbe hasi algu ku nan a pensa ku nan a kaba kuné kaba. Na final di kuenta, hende ku ta multitask ta keda ku ménos tempu liber pa hasi algu ku nan tin gana di hasi.

 Thomas Kersting, un sikoterapeuta i dekano di skol, a bisa: “Suponé ku nos selebro ta manera un kashi di fail ku tin informashon wardá na un manera organisá. Wèl, selebro di un hende ku ta multitask hopi ta manera un kashi tur bruá.” b

 “Mas kos bo hasi pareu, mas detaye lo faya bo. Anto na final di kuenta, bo ta duna bo mes mas trabou, i bo a pèrdè e tempu ku bo a pensa ku lo bo a skapa.”—Teresa.

•   Siña enfoká riba un kos so. Kisas esei no ta fásil, foral si bo a kustumbrá di hasi vários kos pareu, manera traha hùiswèrk i manda mensahe pareu. Pero Beibel ta bisa nos pa “hasi sigur kiko ta e kosnan mas importante. (Filipensenan 1:10) No ta tur e kosnan ku nos tin ku hasi ta mes importante. P’esei, wak kua di nan ta mas importante, i enfoká riba esei te ora bo kaba kuné.

   “Un mente ku no ta enfoká riba loke e tin ku hasi ta manera un mucha chikitu; tin biaha bo tin ku bis’é “nò,” maske por parse mas fásil pa lag’é hasi loke e ke.”—Maria.

•   Evitá tur loke por distraí bo. Bo sa wak bo telefòn miéntras bo ta siña òf hasi hùiswèrk? Si ta asina, pone bo telefòn den un otro kamber. Paga televishon, i no pensa mes di subi riba ret sosial! Beibel ta bisa: “Usa boso tempu di e mihó manera.”—Kolosensenan 4:5.

   “Mi a ripará ku ta muchu mas mihó pa mi enfoká riba un kos so. Ora mi kaba ku algu, mi ta skrap e for di mi lista i pasa pa e siguiente kos. Mi ta sinti mi masha bon mes ora mi hasi esei.”—Onya.

•   No hasi otro kos miéntras ku un hende ta papia ku bo. Si bo ta riba bo telefòn miéntras ku un hende ta papia ku bo, boso lo no tin un bon kòmbersashon. Ademas, esei no ta nèchi; e ta mal manera. Beibel ta bisa ku nos tin ku trata hende manera nos ke pa nan trata nos.—Mateo 7:12.

   “Tin biaha, miéntras mi ta papia ku mi ruman muhé, e ta riba su telefòn ta manda mensahe òf ta hasi otro kos riba telefòn. Mi no por wanta e kos ei! Pero pa ta sinsero, tin biaha mi mes tambe ta hasi esei.”—David.