Bo ta pasando great den bo fakansi, i bo ke konta bo amigunan tur kos! Pero kon? Lo bo

1.   manda kada un di nan un karta òf pòstkart?

2.   manda un e-mail pa tur bo amigunan?

3.   post potrèt online?

 Ora bo mayornan tabatin bo edat, kisas “A” tabata e úniko opshon.

 Un par di aña despues, lo bo por a skohe opshon “B.”

 Sinembargo, awendia hopi hóben ku mag di post potrèt online ta preferá opshon “C.” Abo tambe? Si ta asina, e artíkulo akí por yuda bo evitá algun trampa.

•  Kiko ta e benefisionan?

•  Kiko ta e peligernan?

•  Loke abo por hasi

•  Loke otro hóbennan ta bisa

 Bo por post potrèt den un fregá di wowo. “Ora mi fakansi ta bayendo dushi òf mi a pasa great ku mi amigunan, mi por kompartí potrèt di e momentonan ei miéntras ku ainda mi ta super kontentu tokante dje.”—Melanie.

 E ta kumbiniente. “Ta hopi mas fásil pa wak potrèt ku mi amigunan ta post regularmente ku usa e-mail pa haña sa kiko ta pasando ku nan.”—Jordan.

 E ta yuda bo keda den kontakto ku famia- i amigunan. “Algun di mi famia- i amigunan ta biba leu. Si nan post potrèt regularmente i ami chèk regularmente, ta komo si fuera mi ta mira nan tur dia!”—Karen.

 Bo siguridat por ta na peliger. Si bo kámara tin ‘geotag,’ e potrètnan ku bo post por revelá mas di loke tabata bo intenshon. Segun e website Digital Trends: “Si bo post potrèt i otro informashon ku ta kontené dato tokante unda bo ta, bo ta duna kualke hende ku tin e software korekto i mal motivashon e posibilidat pa haña sa presis unda bo ta.”

 Pero algun kriminal ta mas interesá pa sa na unda bo no ta. Digital Trends a relatá un kaso kaminda tres ladron a kibra drenta den 18 kas kaminda niun hende no tabata na kas. Kon nan por tabata sa ku no tabatin hende na kas? Nan a bai online i a buska pa sa unda e habitantenan ta. Nan a usa un téknika ku yama “cybercasing.” Nan a logra hòrta kos na balor di mas ku 100.000 dòler (merikano).

 Bo por haña bo ku kosnan ofensivo. Algun hende no tin niun tiki bèrgwensa pa post potrèt pa henter mundu mira. Un tiner ku yama Sarah ta bisa: “No ta bon pa wak account di hende ku bo no konosé bon. Ta manera kos ku bo ta kanando den un stat deskonosí sin un mapa. Bo por tin sigur ku lo bo yega na un lugá ku bo no kier a bai.”

 Tempu ta bula bai laga bo. Segun un tiner ku yama Yolanda: “Ta fásil pa bo djis pasa tur bo tempu ta wak potrèt i lesa tur komentario ku hende a pone. Ta yega un momento ku kada ratu, kada sekònde, bo ta keda chèk bo telefòn pa mira kiko nobo tin.”

 Un tiner ku yama Samantha ta eens ku esei. E di: “Mi tin ku wak bon kon mi ta usa mi tempu riba e websitenan akí. Si bo ke habri un account pa kompartí potrèt online, bo mester tin ègt hopi dominio propio.”

•   Sea determiná pa evitá tur kontenido inapropiá. Beibel ta bisa: “Lo mi no pone nada malu dilanti di mi wowo.”​—Salmo 101:3, Beibel Santu.

   “Regularmente mi ta chèk post di hende ku mi ta sigui, i mi ta stòp di sigui nan si mi sinti ku nan kontenido ta inapropiá.”—Steven.

•   Evitá di asosiá ku hende ku no tin e mesun norma- i balornan ku bo, ya ku nan por hasié difísil pa bo mantené bo mes na bo prinsipionan moral. Beibel ta bisa: “No laga hende gaña boso. Mal kompania ta daña bon kustumber.”—1 Korintionan 15:33.

   “Tin account ku potrèt hopi popular, pero no ta pasobra tur hende ta wak nan esei ke men ku abo mester hasi meskos. Hopi bes, e accountnan ei ta kontené redu, potrèt sunú i otro kosnan ofensivo.”—Jessica.

•   Pone un límite na e kantidat di tempu ku lo bo pasa na wak i post potrèt. Beibel ta bisa: “Paga bon tinu pa e manera ku boso ta kana no ta manera hende imprudente sino manera hende sabí, usando boso tempu di e mihó manera.”​—Efesionan 5:​15, 16.

   “Ami a stòp di sigui hende ku ta keda post potrèt henter dia. Por ehèmpel, tin di nan ta bai laman anto post 20 potrèt di e mesun kokolishi. Ai nò! Ta pèrdèmentu di tempu e kos ei ta!”—Rebekah.

•   Hasi sigur ku e potrètnan ku bo ta post no ta duna e impreshon ku bo ta kere ku tur kos ta drei rònt di abo. Apòstel Pablo a bisa: “Mi ta bisa kada un di boso pa no pensa mas di su mes di loke ta nesesario.” (Romanonan 12:3) No asumí ku bo amigunan lo disfrutá di tur e potrètnan ku bo ta post tokante bo mes i loke bo ta hasiendo.

   “Algun hende ta keda post selfie kada ratu. Si nos ta amigu di otro, mi sa kaba kon bo kara ta. Bo no tin nodi di keda rekordá mi kada ratu!”—Allison.