•  Pakiko hasi bon uso di bo tempu?

•  Loke bo por hasi

•  Loke otro hóbennan ta bisa

•   Tempu ta manera plaka. Si bo malgast’é, lo bo no tin e ora bo mester di dje. Di otro banda, si bo parti bo tempu bon, lo bo sobra tempu pa hasi loke bo ta gusta!

   Beibel ta bisa: “Alma di e hende floho ta antohá i no ta haña nada, ma alma di e hende balente ta keda satisfecho.”​—Proverbionan 13:4.

   Konklushon: Si bo ta hasi bon uso di bo tempu, lo bo tin mas libertat, no ménos.

•   Si bo siña usa bo tempu bon, lo bo desaroyá un abilidat ku por yuda bo ora bo bira adulto. E por asta nifiká e diferensia entre mantené un trabou òf pèrd’é. Ban ser sinsero, si abo tin un negoshi, lo bo keda ku un trahadó ku kada bes ta yega trabou lat?

   Beibel ta bisa: “E persona fiel den e kos di mas chikitu ta fiel tambe den hopi kos.”​—Lukas 16:10.

   Konklushon: E manera ku bo ta usa bo tempu ta bisa algu di e klase di persona ku bo ta.

 E bèrdat ta ku no ta fásil pa logra hasi bon uso di bo tempu. Konsiderá algun opstákulo.

 Opstákulo 1: Amigunan

 “Ora mi amigunan pidi mi pa sali ku nan, semper mi ta bai, apesar ku mi realmente no tin tempu. Mi ta pensa ku ora mi yega kas bèk mi por hasi e kosnan lihé lihé. No ta semper esei ta funshoná, i tin biaha kos a bai hopi robes.”​—Cynthia.

 Opstákulo 2: Distraishon

 “Televishon ta manera un ‘stofzuiger’. E ta trèk bo ku su shownan i pelíkulanan, ku ta difísil pa resistí.”​—Ivy.

 “Mi por pèrdè masha hopi tempu ku mi tablet. Mi ta sinti mi kulpabel ora ku e úniko kos ku a stòp mi ta ora e bateria baha.”​—Marie.

 Opstákulo 3: Posponementu

 “Mi ta posponé mi tareanan di skol i tur otro kos ku mi mester hasi. Mi ta pèrdè mi tempu ku otro kos te ora ku a keda nèt tempu pa mi hasi mi tareanan. Esaki no te mihó manera pa usa tempu.”​—Beth.

1.   Traha un lista di e kosnan ku bo tin ku hasi. Por ehèmpel skirbi e trabounan i hùiswèrk ku bo tin ku hasi. Skirbi kuantu tempu bo mester pa siman pa kada tarea.

    Beibel ta bisa: “Hasi sigur kiko ta e kosnan mas importante.”​—Filipensenan 1:​10.

2.   Traha un lista di e kosnan ku bo kier hasi den bo tempu liber. Esei por inkluí aktividatnan di ret sosial i wak televishon. Bolbe skirbi kuantu tempu bo ke dediká na kada aktividat durante un siman.

    Beibel ta bisa: “Sigui kana den sabiduria . . . , i usa boso tempu di e mihó manera.”​— Kolosensenan 4:5.

3.   Traha un plan. Wak e dos listanan ku bo a traha. Bo a apartá sufisiente tempu pa e kosnan importante? Bo tin ku kita tempu for di bo rekreo?

    Tep: traha un lista pa kada kos di hasi, i marka kada bes kiko bo a hasi kaba.

    Beibel ta bisa: “E plannan di hende balente siguramente ta kondusí na abundansia.”​—Proverbionan 21:5.

4.   Kumpli ku nan. Ta bèrdat ku bo tin ku nenga algun invitashon pa aktividat sosial pa por kumpli ku e kosnan mas importante. Sinembargo, lo bo ripará ku bo tin mas tempu liber i ku bo por disfrutá mas di esei.

    Beibel ta bisa: “Sea ferviente i no floho.”​— Romanonan 12:11, nota na pia di página.

5.   Rekompensá bo mes, pero no muchu lihé. Un hóben ku yama Tara a bisa: “Tin biaha mi ta kaba ku dos kos riba mi lista i mi ta pensa, laga mi wak televishon 15 minüt i despues mi ta sigui ku sobrá trabou. Wèl, 15 minüt ta bira 30, anto 30 minüt ta bira un ora, i promé ku mi realisá, mi a pèrdè dos ora ta wak televishon!

    E solushon? Mira rekreo komo un rekompensa pa ora bo kaba ku bo trabounan, no komo un rutina diario.

    Beibel ta bisa: “No tin nada mihó pa un hende ku kome i bebe i bisa su mes ku su trabou ta bon.”​—Eklesiástes 2:​24.