Armagedon ta referí na e guera final entre e gobièrnunan humano i Dios. E gobièrnunan akí i hende ku ta apoyá nan ta oponé Dios pasobra nan ta nenga di someté nan mes na Dios su gobernashon. (Salmo 2:2) E guera di Armagedon lo kaba ku tur gobièrnu humano.—Daniel 2:44.

 E palabra “Armagedon” ta aparesé un biaha so den Beibel na Revelashon 16:16. Un profesia den e buki di Revelashon ta bisa ku na “e lugá ku na hebreo yama Armagedon,” “e reinan di henter e tera habitá” lo reuní “huntu pa e guera ku lo tuma lugá riba e gran dia di Dios, e Todopoderoso.”—Revelashon 16:14.

 Ken lo bringa den e guera di Armagedon? Hesukristu lo dirigí un ehérsito di angel ku lo derotá e enemigunan di Dios. (Revelashon 19:11-16, 19-21) E enemigunan di Dios ta esnan ku ta bai kontra su outoridat i ku ta falt’é rèspèt.—Ezekiel 39:7.

 Armagedon lo tuma lugá literalmente na Medio Oriente? Nò. E guera di Armagedon lo no tuma lugá na un sitio spesífiko, mas bien lo e abarká henter tera.—Yeremías 25:32-34; Ezekiel 39:17-20.

 Armagedon (na hebreo Har Meghiddohnʹ) ta nifiká “Seru di Meguido.” Meguido tabata un stat na Israel di antigwedat. Historia ta revelá ku diferente gueranan desisivo a tuma lugá den bisindario di Meguido, i Beibel ta papia di algun di e gueranan ei. (Huesnan 5:19, 20; 2 Reinan 9:27; 23:29) Pero, Armagedon no por ta referí na e área literal den bisindario di Meguido di antigwedat. Dikon? Pasobra einan no tin un seru grandi, i e Vaye di Jezreel no ta sufisiente grandi pa akapará tur esnan ku lo bringa kontra Dios. Pues, Armagedon ta mas bien un situashon den kua e nashonnan ta sera kabes pa hiba un guera final kontra Dios su gobièrnu.

 Kiko lo sosodé durante Armagedon? Nos no sa kon Dios lo usa su poder pa bringa e guera. Pero e por usa e armanan ku el a yega di usa den pasado, manera hagel, temblor, yobida fuerte ku inundashon, kandela i suafel, werlek i enfermedat. (Yòb 38:22, 23; Ezekiel 38:19, 22; Habakuk 3:10, 11; Zakarías 14:12) Ademas, e konfushon ku lo reina e tempu ei lo por pone algun di Dios su enemigunan mata otro. Pero finalmente nan lo realisá ku ta Dios ta bringa kontra nan.—Ezekiel 38:21, 23; Zakarías 14:13.

 Armagedon lo ta fin di mundu? Armagedon lo no kaba ku nos planeta, ya ku hende lo biba pa semper riba tera. (Salmo 37:29; 96:10; Eklesiástes 1:4) Pues, en bes di kaba ku humanidat, Armagedon lo salb’é, pasobra “un multitut grandi” ku ta sirbi Dios lo sobrebibí.—Revelashon 7:9, 14; Salmo 37:34.

 Tin biaha, ora Beibel usa e palabra “mundu,” e ta referí na e sosiedat di hende malbado ku ta kontra Dios. (1 Huan 2:15-17) Pues, ta e mundu ei Armagedon lo kaba kuné.—Mateo 24:3.

 Na ki tempu Armagedon lo tuma lugá? Ora Hesus a papia di e “tribulashon grandi” ku lo kulminá den Armagedon, el a bisa: “Pa loke ta e dia i ora ei, ningun hende no sa, ni e angelnan di shelu ni e Yu, sino e Tata so.” (Mateo 24:21, 36) Sinembargo, Beibel ta mustra ku Armagedon lo tuma lugá durante Hesus su presensia invisibel ku a kuminsá na 1914.—Mateo 24:37-39.