Kiko Ta Boutismo?
E kontesta ku Beibel ta duna
Boutismo ta ora hinka un hende kompletamente bou di awa i sak’é bèk. a Beibel ta konta ku hopi boutismo a tuma lugá. (Echonan 2:41) Un di nan tabata e boutismo di Hesus. Hesus a ser batisá den riu Yordan. (Mateo 3:13, 16) Algun aña despues, un hòmber di Etiopia a pidi p’e ser batisá ora el a pasa banda di “un lugá ku tabatin awa.”—Echonan 8:36-40.
Hesus a siña su siguidónan ku pa bira su disipel un hende mester batisá. (Mateo 28:19, 20) Apòstel Pedro a konfirmá ku esei ta asina.—1 Pedro 3:21.
Den e artíkulo akí
Nifikashon di boutismo
Un hende ta batisá pa demostrá públikamente ku el a arepentí di su pikánan i ku el a primintí Dios ku lo e hasi Dios su boluntat pase loke pase. Esei ta nifiká ku e persona semper lo obedesé Dios i Hesus den tur aspekto di su bida. Hende ku batisá ta kuminsá hiba nan bida manera Dios ke pa nan biba pa nan por haña bida eterno.
Boutismo ta un bon símbolo pa e kambio ku un persona ta hasi den su bida. Den ki sentido? Beibel ta kompará boutismo ku un entiero. (Romanonan 6:4; Kolosensenan 2:12) Ora un persona bai bou di awa na momento di boutismo, esei ta simbolisá ku e persona su manera di biba di ántes a muri. Anto ora e persona bini ariba bèk for di awa, e ta mustra ku el a kuminsá su bida nobo komo un kristian.
Kiko Beibel ta bisa tokante boutismo di bebi?
Niun kaminda den Beibel tin pará ku mester batisá bebi. b Beibel ta bisa ku un hende ku ke batisá mester kumpli ku sierto rekisito. Por ehèmpel, e persona mester ta komprondé por lo ménos e siñansanan básiko di Beibel, i e mester ta biba di akuerdo ku e siñansanan ei. E mester a arepentí di su pikánan. I e persona ei mester a primintí Dios den un orashon spesial ku e ta dediká su bida na Dios. (Echonan 2:38, 41; 8:12) Bebi no por hasi e kosnan ei.
Kiko ke men batisá den nòmber di e Tata, di e Yu i di spiritu santu?
Hesus a duna su disipelnan instrukshon pa hasi hende disipel i “batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso.” (Mateo 28:19, 20) “Den nòmber di” ke men ku e persona ku ta ser batisá ta komprondé i aseptá outoridat i posishon di e Tata i di e Yu; e ta komprondé i aseptá tambe e papel ku Dios su spiritu santu ta hunga. Ata un ehèmpel di esei: Apòstel Pedro a bisa un hòmber ku a nase lam: “Den nòmber di Hesukristu di Názarèt, lanta kana!” (Echonan 3:6) Ta bisto kiko esei a nifiká: Pedro a komprondé i aseptá Kristu su outoridat, i el a mustra ku ta Kristu ta hasi e kurashon milagroso.
“E Tata” ta referí na Yehova c Dios. Yehova su outoridat ta apsoluto pasobra e ta e Kreador, e Dios Ku Ta Duna Bida i e Dios Todopoderoso.—Génesis 17:1; Revelashon 4:11.
“E Yu” ta Hesukristu, kende a duna su bida pa nos. (Romanonan 6:23) Nos no por haña salbashon a ménos ku nos ta komprondé i aseptá e papel importante di Hesus den Dios su propósito pa humanidat.—Huan 14:6; 20:31; Echonan 4:8-12.
“Spiritu santu” ta Dios su forsa aktivo, esta, Dios su poder den akshon. d Dios a usa su spiritu santu pa krea, pa duna bida, pa transmití mensahe na su profetanan i na otro hende i pa duna nan e poder nesesario pa hasi su boluntat. (Génesis 1:2; Yòb 33:4; Romanonan 15:18, 19) Dios a usa spiritu santu tambe pa inspirá e eskritornan di Beibel pa skirbi Dios su pensamentunan.—2 Pedro 1:21.
Ta un piká si un hende bolbe batisá?
Hopi hende sa disidí di kambia di religion. Pero kiko si nan a ser batisá kaba den nan religion anterior? Ta un piká nan ta kometé si nan bolbe batisá den nan religion nobo? Tin hende ta bisa ku sí, kisas pasobra Efesionan 4:5 ta bisa: “Ún Señor, ún fe, ún boutismo.” Pero e versíkulo ei no ta bisa ku un hende no por bolbe batisá. Dikon nos ta bisa esei?
Konteksto. E versíkulonan promé ku Efesionan 4:5 ta mustra ku Apòstel Pablo tabata enfatisá ku e kristiannan berdadero mester ta uní den loke nan ta kere. (Efesionan 4:1-3, 16) Úniko manera ku nan por ta uní asina ta si nan tur ta adorá mesun Dios; si nan tur tin mesun fe, òf komprondementu, di loke Beibel ta siña, i si nan tur a kumpli ku e mesun rekisitonan basá riba Beibel pa nan ser batisá.
Apòstel Pablo a animá algun hende ku tabata batisá kaba pa nan bolbe batisá. Dikon? Pasobra nan a ser batisá sin ku nan tabatin un komprondementu kompleto di siñansa kristian.—Echonan 19:1-5.
Un base korekto pa boutismo. Pa un hende su boutismo ta aseptabel pa Dios, e boutismo mester ta basá riba konosementu eksakto di Beibel. (1 Timoteo 2:3, 4) Si un persona a batisá a base di siñansa religioso ku ta kontrali na loke Beibel ta bisa, e boutismo di e persona ei no ta aseptabel pa Dios. (Huan 4:23, 24) E persona kisas tabata sinsero, pero e no a ser batisá na armonia ku “konosementu eksakto.” (Romanonan 10:2) Pa e persona por haña Dios su aprobashon, e tin ku siña e bèrdatnan ku tin den Beibel i pone na práktika loke el a siña. Tambe e tin ku dediká su bida na Dios i ser batisá di nobo. Den tal kaso, e echo ku el a bolbe batisá lo no ta un piká. Al kontrario, esei lo ta e kos korekto pa hasi.
Otro boutismo ku Beibel ta papia di dje
Beibel ta papia di otro boutismo ku tabatin otro nifikashon for di e boutismo den awa di e siguidónan di Kristu. Wak algun ehèmpel.
Boutismo ku Huan Boutista tabata hasi. e Huan a batisá hende hudiu i hende ku a kombertí bira hudiu. Nan boutismo a simbolisá ku nan a arepentí di e pikánan ku nan a kometé kontra Lei di Moises. Lei di Moises tabata e leinan ku Dios a duna e israelitanan mediante Moises. E boutismonan ku Huan a hasi a yuda prepará e hendenan pa rekonosé i aseptá e Mesías, esta, Hesus di Názarèt.—Lukas 1:13-17; 3:2, 3; Echonan 19:4.
Hesus su propio boutismo. Huan Boutista a batisá Hesus, i esei tabata un boutismo úniko. Dikon? Pasobra Hesus tabata un hende perfekto, i e no a kometé niun piká. (1 Pedro 2:21, 22) Pues, Hesus su boutismo no a nifiká ku el a arepentí ni ku el a hasi “un petishon na Dios pa un konsenshi limpi.” (1 Pedro 3:21) Mas bien, su boutismo a indiká ku el a presentá su mes na Dios pa hasi Dios su boluntat komo e Mesías primintí, òf Kristu. Anto un di e kosnan ku esei a enserá ta ku Hesus mester a entregá su bida pa nos.—Hebreonan 10:7-10.
Boutismo ku spiritu santu. Tantu Huan Boutista komo Hesukristu a papia tokante batisá hende ku spiritu santu. (Mateo 3:11; Lukas 3:16; Echonan 1:1-5) E boutismo ei no ta meskos ku batisá den nòmber di spiritu santu. (Mateo 28:19) Dikon ta asina?
Ta un kantidat relativamente chikitu di siguidó di Hesus ta ser batisá ku spiritu santu. E hendenan ku batisá ku spiritu santu ta ser ungí ku spiritu santu pasobra Dios a skohe nan pa sirbi den shelu huntu ku Kristu komo rei i saserdote pa tera. f (1 Pedro 1:3, 4; Revelashon 5:9, 10) Nan lo goberná riba e miónes di siguidónan di Hesus ku tin e speransa di biba pa semper den Paradeis riba tera.—Mateo 5:5; Lukas 23:43.
Boutismo den union ku Kristu Hesus i den union ku su morto. E personanan batisá ku spiritu santu ta ser batisá tambe “den union ku Kristu Hesus.” (Romanonan 6:3) Pues, e boutismo akí ta konta pa e siguidónan ungí di Hesus, esta, pa e personanan ku lo goberná huntu kuné den shelu. Nan ta bira miembro di Hesus su kongregashon ungí ora nan ser batisá den union ku Hesus. Hesus ta kabes di e kongregashon, i nan ta forma e kurpa.—1 Korintionan 12:12, 13, 27; Kolosensenan 1:18.
E kristiannan ungí ta ser batisá tambe “den union ku [Hesus] su morto.” (Romanonan 6:3, 4) E boutismo ei ta nifiká ku nan ta imitá Hesus: nan ta hiba un bida ku ta enfoká riba obedesé Dios en bes di agradá nan mes. Anto meskos ku Hesus, nan ta entregá nan speransa di biba pa semper riba tera. Nan boutismo den union ku Hesus su morto ta ser kompletá ora nan muri i ser resusitá pa biba den shelu komo kriatura spiritual.—Romanonan 6:5; 1 Korintionan 15:42-44.
Batisá ku kandela. Huan Boutista a bisa e hendenan ku tabata skuch’é: “[Hesus] lo batisá boso ku spiritu santu i ku kandela. E skòp pa separá trigu for di bagas ta den su man, i lo e hasi su plenchi di bati trigu limpi limpi. I lo e rekohé su trigu i pon’é den mangasina, ma e bagas lo e kima ku kandela ku no por paga.” (Mateo 3:11, 12) Tuma nota ku tin diferensia entre batisá ku kandela i batisá ku spiritu santu. Kiko Huan tabata ke men ku e ilustrashon ei?
E trigu ta representá hende ku lo skucha Hesus i obedes’é. E hendenan ei lo ser batisá ku spiritu santu. E bagas ta simbolisá hende ku lo no skucha Hesus. Nan lo ser batisá ku kandela, i esei ta nifiká ku nan lo ser destruí pa semper.—Mateo 3:7-12; Lukas 3:16, 17.
a E palabra griego tradusí komo “boutismo” ta nifiká “drenta awa, ser tapá kompletamente ku awa i despues sali for di awa.” E definishon ei ta segun e dikshonario Vine’s Complete Expository Dictionary of Old and New Testament Words.
b Den algun iglesia, nan ta tene un seremonia pa duna un bebi nòmber. Despues, nan ta batisá e bebi. Nan ta sprengu òf basha awa riba kabes di e bebi pa asina “batis’é.”
c Yehova ta Dios su nòmber personal. (Salmo 83:18) Wak e artíkulo “Ken Ta Yehova?”
d Wak e artíkulo na spañó “Kiko spiritu santu ta?”
e Wak e artíkulo “Ken Huan Boutista Tabata?”
f Wak e artíkulo “Ken Ta Bai Shelu?”
g Beibel ta usa e palabra “boutismo” tambe pa deskribí algun manera pa purifiká artíkulo di uso relashoná ku adorashon, por ehèmpel, bashando awa riba nan. (Marko 7:4; Hebreonan 9:10) Klaru ku esei ta algu kompletamente otro for di e boutismo di Hesus i di su siguidónan, kendenan tabata bai kompletamente bou di awa.
Otro Artíkulo Interesante
PREGUNTA KU BEIBEL TA KONTESTÁ
Tur Religion Ta Yuda Nos Hala Serka Dios?
Beibel ta enfatisá dos faktor ku ta duna e kontesta.
PREGUNTA KU BEIBEL TA KONTESTÁ
Kon Mi Por Haña Sa Kua Ta e Religion Berdadero?
Esaki ta e religion pa mi djis pasobra e ta hasi mi sinti bon?
SIÑANSA DI BEIBEL
Nos Ta Animá Bo pa Sigui un Kurso di Beibel ku Nos
Sigui un kurso di Beibel interaktivo grátis ku un maestro.