Despues ku Dios a krea e promé hòmber i muhé, el a uni nan den matrimonio. Dios a instituí matrimonio komo un union spesial entre un hòmber i un muhé, i esei ta forma e fundeshi pa un famia.—Génesis 1:27, 28; 2:18.

 Dios ke pa pareha kasá ta felis. (Proverbionan 5:18) P’esei, Dios a laga skirbi den Beibel vários norma i prinsipio enkuanto matrimonio ku por yuda un pareha tin éksito.

Den e artíkulo akí, nos lo trata lo siguiente

•  Kiko ta Dios su normanan pa matrimonio?

•  Kiko Dios ta pensa tokante separashon i divorsio?

•  Mester registrá un matrimonio pa Dios aprob’é?

•  Kiko Beibel ta ferwagt di esposo i esposa?

•  Dios ta bisa ku pareha kasá mester haña yu?

•  Kon Beibel por yuda mi matrimonio?

•  Teksto di Beibel tokante matrimonio

 For di prinsipio, Dios a krea matrimonio pa e ta un union entre un hòmber i un muhé. (Génesis 2:24) Dios no ta aprobá poligamia, homoseksualidat òf pareha ku ta biba huntu sin kasa. (1 Korintionan 6:9; 1 Tesalonisensenan 4:3) Hesus a siña su siguidónan pa biba segun e normanan di Dios tokante matrimonio.—Marko 10:6-8.

 Den bista di Dios, matrimonio ta un union permanente. Ora un hòmber i un muhé kasa, nan ta primintí di keda leal na otro i pa keda huntu tanten ku nan ta na bida. Dios ta ferwagt ku nan ta kumpli ku e promesa ei.—Marko 10:9.

 Por sosodé ku un esposo i esposa mester separá pa un tempu, por ehèmpel, ora un di nan mester biaha pa un asuntu urgente di famia. Pero Beibel no ta bisa pa separá ora tin problema den matrimonio. Mas bien, Beibel ta animá pareha kasá pa hasi esfuerso pa resolvé nan problemanan.—1 Korintionan 7:10.

 Adulterio ta e úniko motibu bálido ku Beibel ta duna pa divorsio. (Mateo 19:9) Pues, si un esposo i esposa disidí pa separá òf divorsiá pa kualke otro motibu ku no ta adulterio, segun Beibel niun di dos no ta liber pa sali ku otro hende òf pa bolbe kasa.—Mateo 5:32; 1 Korintionan 7:11.

 Dios ta ferwagt pa un kristian obedesé e leinan di gobièrnu relashoná ku matrimonio. (Tito 3:1) Ora un pareha registrá nan matrimonio segun lei, nan ta mustra rèspèt pa e outoridatnan di e pais i pa e normanan di Dios ku ta bisa ku matrimonio ta un union permanente. a

•   Loke nan dos mester hasi. Esposo i esposa mester trata otro ku amor i rèspèt. (Efesionan 5:33) Nan tin ku satisfasé e nesesidatnan seksual di otro na un manera kariñoso i evitá tur tipo di infieldat. (1 Korintionan 7:3; Hebreonan 13:4) Si nan tin yu, tur dos tin e responsabilidat di lanta nan yunan.—Proverbionan 6:20.

   Beibel no ta bisa en detaye kon un pareha kasá mester repartí e responsabilidatnan di trabou sekular i trabou di kas. Nan por disidí huntu kiko ta mas mihó pa nan famia.

•   E papel di un esposo. Beibel ta bisa ku “e esposo ta kabes di su esposa.” (Efesionan 5:23) Esei ta nifiká ku un esposo mester guia su famia i tuma desishon ku lo ta bon pa su esposa i yunan.

   E mester hasi sigur ku e ta perkurá pa e nesesidatnan físiko, emoshonal i spiritual di su famia. (1 Timoteo 5:8) Un esposo ta mustra ku e ta balorá e kualidatnan di su esposa ora e ta traha huntu kuné i ta tene kuenta ku su opinion i sintimentunan na momento ku e ta tuma desishon. (Proverbionan 31:11, 28) Beibel ta bisa ku un esposo mester mustra amor ora e ta kumpli ku su responsabilidatnan.—Kolosensenan 3:19.

•   E papel di un esposa. Beibel ta bisa ku un “esposa mester tin rèspèt profundo pa su esposo.” (Efesionan 5:33) Dios ta keda kontentu ora un esposa ta respetá e papel ku Dios a duna su esposo.

   E papel di un esposa ta pa e yuda su esposo tuma bon desishon i pa apoy’é komo kabes di famia. (Génesis 2:18) Beibel ta papia masha bon di un esposa ku ta kumpli ku su papel importante den matrimonio.—Proverbionan 31:10.

 Nò. Den pasado, Dios a manda algun di su sirbidónan haña yu. (Génesis 1:28; 9:1) Pero un kristian no ta obligá pa sigui e mandamentu ei. Nunka Hesus no a bisa su siguidónan ku nan mester a haña yu. E promé disipelnan di Hesus tampoko no a bisa ku pareha kasá tin ku haña yu. Kada pareha kasá mester disidí pa nan mes si nan ke tin yu òf nò.

 Beibel tin vários prinsipio ku por yuda pareha kasá kuminsá nan matrimonio bon, evitá problema i vense opstákulo.

 Prinsipio di Beibel por yuda pareha kasá . . .

•   mustra amor berdadero.—1 Korintionan 13:4-7; Kolosensenan 3:14.

•   trata ku diferensia.—1 Korintionan 10:24.

•   skucha otro bon.—Santiago 1:19.

•   mustra rèspèt.—Romanonan 12:10.

•   pordoná otro.—1 Pedro 4:8.

•   keda fiel na otro.—Marko 10:9.

•   tene pasenshi ku otro.—Efesionan 4:2, 3.

•   traha komo tim.—Eklesiástes 4:9.

•   fortalesé nan kompromiso matrimonial.—Kantika di Sálomon 8:7.