E ingenieronan ku ta traha robòt ta trahando riba algun aparato pa yuda e dòkternan operá e partinan di kurpa di hende ku ta difisíl pa yega na dje, sin ku tin ku kòrta e kurpa muchu. Loke a inspirá nan pa traha un di e aparatonan ei ta e brasanan fleksibel di un sekat.

 Pensa riba esaki: Un sekat su ocho brasanan ta fleksibel i por rèk fásilmente. Ku e brasanan ei e por gara, tene i primi un opheto, asta den espasionan masha pèrtá. No solamente e por dobla su brasanan den kualke direkshon sino tambe e por hasi sierto parti di su brasanan steif ora ta nesesario.

 Algun investigadó ta pensa ku si nan traha un man di robòt suave i fleksibel manera e brasanan di sekat, esei lo ta di gran yudansa ora di hasi operashon kompliká. Un aparato asina por hasi posibel ku un pashènt ku tin ku hasi un operashon difísil por operá sin muchu komplikashon.

 Wak kon e brasanan di un sekat ta funshoná

 Nan a traha un man di robòt asina kaba, i e ta ser usá pa demostrá kon un operashon ta bai. Un parti di e man akí di 135 milimeter (13,5 cm) por hisa e órganonan delikado den e kurpa òf hala nan un banda sin hasi daño na nan, miéntras ku e otro parti ta hasi e operashon. Dr. Tommaso Ranzani, un miembro di e tim ku a diseñá e aparato ei, a bisa: “Nos ta kere ku e sistema ei ta djis e komienso pa yega na un vershon mas avansá i ku mas posibilidat.”

 Kiko abo ta pensa? E brasa di un sekat ta kasualidat òf diseño?