Un hòmber di Eritrea a bai Noruega na 2011 komo refugiado. Ora ku Testigunan di Yehova a bishit’é, el a bisa nan ku el a yega di papia ku e Testigunan den su pais. E hòmber a bisa ku ora e tabata militar na su pais, el a mira kon e Testigunan ku a ser enkarselá pa motibu di nan fe, tabata nenga di djòin guera, aunke nan lo a ser maltratá.

 Pero diripiente debí di algun kambio di sirkunstansia, e hòmber akí mes a ser enkarselá. Den prizòn el a topa tres Testigu—Paulos Eyasu, Negede Teklemariam, i Isaac Mogos—ku tabata enkarselá pa motibu di nan fe for di 1994.

 E hòmber akí por a mira ku su propio wowonan kon Testigunan di Yehova ta kumpli ku loke nan ta prediká. El a ripará ku nan tabata onesto i ku nan tabata asta kompartí nan kuminda ku e otro prizoneronan. E por a mira kon e Testigunan tabata studia Beibel huntu tur dia i tabata invitá otro hende pa djòin nan. Ora ku a ofresé e Testigunan nan libertat a kambio di nan fe, nan tabata nenga esei.

 E eksperensia akí a impreshoná e hòmber sinsero akí asina tantu ku, ora el a stabilisá su mes na Noruega, e kier a haña sa ta dikon Testigunan di Yehova tin un fe asina fuerte. Pues, ora e Testigunan a bishit’é, mesora el a kuminsá un estudio di Beibel ku nan i a bishitá nan reunionnan.

 Na sèptèmber 2018, el a batisá komo un Testigu di Yehova. Awor e ta probechá di kada oportunidat pa papia ku hende di Eritrea i Sudan, pa animá nan pa studia Beibel i desaroyá un fe fuerte.