1, 2. Te rua techang a lulemes er tir a Jehovah el kmo te sechelil?

NGUA ngera el chad a soam el mo sechelil? Ke ulterekokl el soam a chad el losisiu a osengiu er a tekoi, me a tekoi el msemeriar er ngii, me aike el momdasu el kmo ngmeklou a ultutelel. Ke locha dirrek el soam el mo kmeed er a chad el melemalt e bekokeuii.

² Ngar er a reksi er a klechad, e te ngar er ngii a rebebil er a rechad el mlo kmeed el sechelil a Dios. El uai tiang, a Jehovah a millekoi el kmo a Abraham a sechelil. (Monguiu er a Isaia 41:8; Jakobus 2:23.) E millekoi el kirel a David el kmo ‘ngsoal el chad’ e le ngmle soal a blekerdelel. (Rellir 13:22) E mle “betik a rengul” er a profet el Daniel.​—Daniel 9:23.

3. Ngera uchul me ngdiak el rokui el chad a mo sechelil a Jehovah?

³ Ngera uchul me a Jehovah a ulemes er a Abraham, me a David, me a Daniel el kmo te sechelil? Ngdilu er a Abraham el kmo: “Kullengesenges a tekingek.”  (Genesis 22:18) Me a Jehovah a olekeed er ngii er tirke el ngariou a rengrir e olengesenges er ngii. Ngdilu er a rengalek er a Israel el kmo: ‘Kom mo olengesenges er ngak, mak mo Dios er kemiu me kemiu a mo chedak.’ (Jeremia 7:23) Me a omolengesenges er a Jehovah, e ngdirrek el sebechem el mo sechelil!

4, 5. Ngmekerang a Jehovah a lomesterir a rechedal a klisichir?

⁴ Ka molebedebek er a belkul a bo desechelil a Dios. A Biblia a kmo a Jehovah a osiik a techall el mo “omesterir a klisichir tirkel blak a rengrir er ngii.” (2 Kronika 16:9) Ngmekera Jehovah a loruul er tiang? A ta er a rolel a debetik er ngii er a Psalm 32:8 el kmo: “Ak [Jehovah] mo osisecheklau er a rael el kirem el merael er ngii; ak mo osisecheklau e meskau a ngesou er a ungil uldasu.”

⁵ Aika el tekoi a kmal rutechii a rengud! Me a Jehovah a mo meskau a ulekrael el mousbech e mo omekerreu er kau sel bo moltaut. Ngsoal el olengeseu er kau el mo outekangel a ringel me a omelsemai el omchelebangel. (Monguiu er a Psalm 55:22.) Me a lsekum e ke ngiltii el mo mesiou er Ngii el oba rengum el rokir, e ngsebechel el mo ulterekokl a rengum el ua milluches er a psalm el dilu el kmo: “Ak di blechoel el medengei el kmo a RUBAK a obengkek; ng di kmeed, me ng diak a ngeral simesmengak.” (Psalm 16:8; 63:8) A Jehovah a sebechel el ngosukau el mo kiei el odeuir a rengul. Me nguaisei, engdi ngngar er ngii a cherrouel el soal el merrob er kau me lak moruul er tiang.

6. Ngera mle uldesuel a Satan el kirir a rechad?

⁶ A 11 el Bliongel a milsaod er a Satan el Diabelong er a lolasem er a llemeltel a Dios el mengedereder. A Satan a millekoi el kmo a Dios a omulak e diak el melemalt a omerellel e le ngdimlak el becherei a Adam me a Eva me di el tir el melilt a ungil me a mekngit. Me a uriul er a lerebet er a klengit a Adam me a Eva me a beluulechad a lobekeek er a rechad, e a Satan a mlo melasem er a moktek er a rechad el mesiou er a Dios. Me ngua ledilu el kmo, ‘A rechad a diak losiou er a Dios e le ngbetik a rengrir er ngii. Me a obeskak a techall e ngsebechek el meltii a ngii di el chad el mo omtok er a Dios.’ A tekoi el dilubech el mo er a Job a ochotii el kmo a Satan a uluumerang er tia el tekoi. Ngtechang a Job, e milekerang e mlo uldimukl er a omelsemai er a Satan?

7, 8. (a) Ngera rirellii a Job el mo ileakl er a rechad er a taem er ngii? (b) Ngmilekerang a Satan e uluumededenger er a moktek er a Job el mesiou er a Dios?

⁷ A Job a kiliei er a bekord el 3,600 el rak er a mla me mong. Ngkmal mle ungil el chad, e le Jehovah a dilu el kmo: “Ng diak a ngar a beluulchad el blak a rengul e ungil el ua ingii. Ng meluu er ngak e kerekikl el diak a ngeral le rellii el mekngit.” (Job 1:8) Me a Job a kmal uleldeu er a rengul a Dios.

⁸ A Satan a uluumededenger er a moktek er a Job el mesiou er a Dios. Me ngdilu er a Jehovah el kmo: “Ke milengkar er ngii ma telungalek er ngii ma bek el kloklel. Kulemekngeltengat a bek el tekoi el loruul, e mla msa kmal betok el kerbou el mekekii a beluu el rokir. Chomko ke ngmai er ngii a ikel bek el lolab, e ng di mo ngar medam e siuesau.”​—Job 1:10, 11.

9. Ngmilekerang a Jehovah er a longer er a omelsemai er a Satan, e ngera uchul?

 ⁹ A Satan a uleltelechakl el kmo a Job a di milsiou er a Dios e le ngulemekngeltengat er ngii. Ngdirrek el millekoi el kmo a lsekum a Job a measem, e ngulterekokl el mo ikrii a Dios. Me ngmilekerang a Jehovah er a longer er tia el omelsemai? A moktek er a Job el mesiou er a Jehovah el mle uldimukl er tiang, a uchul me a Jehovah a milecherei a Satan me ngmlo melasem er ngii. Ngoeak tiang, e a bltikerreng er a Job el mo er a Dios a mle sebechel el obeketakl.

10. Ngera el ringel a blo lecharm a Job, me ngmilekerang?

¹⁰ A Satan a di mle mereched el mo melasem er a Job. A bebil er a chermel a mlerechorech me a bebil a mlokoad. E a ruumesingd er a remesiungel a lulekodeterir. Tia rirellii a Job el mo meringel er ngii a mesiou er a telungalek er ngii. Nglmuut el klou el chelebuul a mlo er a Job er a lemad a reteruich el ngelekel er a eolt. Me alta ngmlo chelebangel a betok el chelebuul, engdi “a Job a dimlak le bor a klengit el oltelechakl er a Dios.”​—Job 1:22.

11. (a) A Satan ngdirrek el uleltelechakl er a Job er a ngerang, e milekera longer er ngii a Jehovah? (b) Ngmilekerang a Job er a lebo lsecher er a mekngit el rakt?

¹¹ A Satan a dimlak bo lemesubed a rengul. Nglocha ulemdasu el kmo alta e a Job a sebechel el outekangel a bo lak a kloklel me a remesiungel me a rengelekel, engdi a bo el secher e ngmo omtok er a Dios. Me a Jehovah a milecherei a Satan me ngulsecherii a Job er a kmal mekngit el rakt. Engdi ngmo lmuut er tiang me ngdimlak bo luchul me a Job a loridii a klaumerang er ngii er a Dios. Ngbai “kmal mlo  chebuul a Job e ngdi dimlak a tal ngeral le delii el omtok er a Dios!”​—Job 2:10.

12. Ngmilekera Job e onger er a omelsemai er a Diabelong?

¹² A Job a dimlak lodengei el kmo a Satan a mle uchul aika el mondai el lechelebangel. Me nguleltelechakl er a Dios e le ngdimlak lodengei el kmo a Diabelong a melasem er a omengederederel a Jehovah. (Job 6:4; 16:11-14) Me nguaisei, engdi ngdi millemolem el blak a rengul. Me a blakerreng er a Job a mileketeklii el kmo, a ultelecheklel a Satan el kirel a mle moktek er ngii el mesiou er a Dios a kmal klsuul.

13. A blakerreng er a Job ngmlo uchul a ngerang?

¹³ A blakerreng er a Job a milsa Jehovah a mesisiich el nger el kirel a omelsemai er a Satan. Me a Job a mera el mle sechelil a Jehovah, me a Dios a ulemekngeltengat er ngii el kirel a blakerreng er ngii.​—Job 42:12-17.

14, 15. Ngera me ngsebeched el melekoi el kmo a omelsemai er a Satan el kirel a Job a mo er a rokui el chad?

¹⁴ A Satan a dimlak di lolasem er a blakerreng er a Job. Ke dirrek el uldimukl er ngii. E tiang a sebeched el bleketakl el mesang er a Osisechakl 27:11 el ngii a melekoi el kmo: “Bo le mellomes a rengum e rungalek, e mrellii a renguk el mo ungil, me le bor ngii a nger er ngak el mor a chad el mekngit a uldesuel el kirek.” Me aika el tekoi el milluches er a betok el dart el rak er a uriul er a kodellel a Job a olecholt el kmo, a Satan a ngike el mekngit a uldesuel el kirel a Dios e oumededenger er a blakerreng er a remesiungel. Me a dekiei el odeuir er a rengul a Dios e ngsebeched el olengeseu el onger er tia el klsuul el ultekengel a Satan.  Ke dirrek el mo rullii a Dios el mo ungil a rengul. Kau ngngera uldesuem el kirel tiang? Me alta ngmo kirem el melodech a bebil er a tekoi er a klengar er kau, engdi tia ngdiak el sal chetengakl el tekoi el sebeched el olengeseu el onger er a blulekngel a Satan?

¹⁵ Momtab aika el tekingel a Satan: “A chad a mo meiubet a rengul er a bek el tekoi el kirel a klengar er ngii me lak le mad.” (Job 2:4) Me a lolekoi el kmo “a chad,” e ngmileketeklii el kmo a ultekengel a dimlak di el kirel a Job e ngbai mle kirir a rokui el chad. Tiang a kmal utebengall el tekoi e le Satan a dirrek el oumededenger er a blakerreng er kau el mo er a Dios. Ngkmal soal a bo lak molengesenges er a Dios e bo lak el blak a rengum sel bo mchebangel a ringel. Me ngmekerang a lolasem el meruul er tiang?

16. (a) Ngoeak a ngera el rolel e a Satan a melasem el mengeroid er a rechad er a Dios? (b) Ngmekerang a Diabelong a lousbech aika el osisiu el tekoi el omtok er kau?

¹⁶ Ngua dulsaod er a 10 el Bliongel, a Satan a ousbech a kakerous el rolel e mengeroid er a rechad er a Dios. Ngorrouk er a rechad el ua “ongumk el laion el osiik er a bo lomerkakl er ngii.” (1 Petrus 5:8) Me ngsebechel el meues a urerel a Satan loeak sel sekum a resechelim me a rechedam me a rekuk bebil a mo omtok er kau e le ke melasem el mesuub e oltaut a tekoi el ngar er a Biblia. * (Johanes 15:19, 20) A Satan a dirrek el “oudeluus er a kmo ng anghel er a llomes.” (2 Korinth 11:14) Me ngsebechel el ousbech  a tekoi el diak el mekngit e mekekokil el mengesuseu er kau el mo cheroid er a rolel a klengar el lekengei er ngii a Dios. Ngdirrek el sebechel el ousbech a tekoi el mengitechut er a rengum, el ua sel lerellau el mo omdasu el kmo ke kmal mekngit el chad el diak el sebechem el odeuir a rengul a Dios. (Osisechakl 24:10) Me a Satan a leua “ongumk el laion” me a lechub e leua “anghel er a llomes,” me ngii a di oba osisiu el omelsemai el kmo: Sel bo measem me a bo mchebangel a ringel, e ngmo diak mosiou er a Dios. Me ngmekera omonger er tia el omelsemai e beketeklii a blakerreng er kau el mo er a Dios el ua Job?

17. Ngera sel kot el klou el uchul me kede olengesenges a llechul a Jehovah?

¹⁷ Ngsebechem el onger er a omelsemai er a Satan sel omkiei el oldeu er a rengul a Dios. Ngera uldimukl er tiang? A Biblia a onger el kmo: “Bo le betik a rengum er a RUBAK el Dios er kau er a rengum el rokir ma klengar er kau el rokir ma klisichem el rokir.” (Duteronomi 6:5) Sel lorael el mo klou a bltkil a rengum el mo er a Dios, e a urungulem el mo meruul a soal a lmuut el mo mesisiich. A apostol el Johanes a milluches el kmo: “Tial tekoi el kmo, ngbetik a rengud ra Dios, a melekoi ra bo dolab a llechul.” Me a lebetik a rengum er a Jehovah er a rengum el rokir, e ke mo metik el kmo a “llechul a diak le meringel.”​—1 Johanes 5:3, BT.

18, 19. (a) Ngera bebil er a llechul a Jehovah? (Momes er a baks el dai er ngii a kmo, “ Mongeroid er Kau er Aike el Louketui a Jehovah.”) (b) Kede mekera e medengei el kmo a Dios a diak longerechir a tekoi el engelakl er aike el sebeched?

¹⁸ Ngerang aika el llechul a Jehovah? A bebil er ngii  a mesaod a tekoi el kired el mengeroid er kid er ngii. El uai tiang, ka momes er a baks el dai er ngii a kmo “ Mongeroid er Kau er Aike el Louketui a Jehovah.” Ngbeldukl er ngii a tekoi el Biblia a bleketakl el ouchais el kmo ngmekngit. Sel dekot el omes er ngii, e a bebil er a omeruul el lomasech a kora diak el mekngit. Engdi obo mkerekikl el melebedebek aike el bades, e ke ulterekokl el mesa klungiolel a llechul a Jehovah. A omolodech a blekerdelem e nglocha mo  kot el meringel el omelsemai el bo mchelebangel er ngii. Me nguaisei, engdi a dekiei el odeuir a rengul a Dios e ngmo uchul a klou el deurreng. (Isaia 48:17, 18) E tiang a tekoi el kmal sebechem el rullii. Kede mekera e medengei?

¹⁹ A Jehovah a diak longerechir a tekoi el engelakl er aike el sebeched. (Monguiu er a Duteronomi 30:11-14.) Ngkmal ungil medengei aike el sebeched me a ngelsengesed. (Psalm 103:14) A Jehovah a dirrek el  sebechel el meskid a klisiched el mo olengesenges er ngii. A apostol el Paulus a milluches el kmo: “Ma Dios a diak lechoit a telbilel, me ng diak le bechikemiu me bor ongarm el mo engelakl er a klisichiu. Me sel le mer kemiu ongarm, e ng mo meskemiu a klisiich el mtekengelii, e dirrek el meskemiu a rolel e kom tuobed er ngii.” (1 Korinth 10:13) Me a Jehovah a sebechel el meskid a “klou el klisiich” el ngosukid el mo outekangel.​—2 Korinth 4:7

20. Ngera el blekerdelel a Dios a kirem el omekeroul, e ngera me ngklou a ultutelel?

²⁰ Kede medengei el kmo a bo dodeuir a rengul a Jehovah, e ngdiak di dongeroid er kid er a tekoi el ouketui e lemerekong. Ngdirrek el kired el mo betik a rengud er aike el lebetik a rengul er ngii a Jehovah. (Rom 12:9) Kau ngdiak el soam el mo kmeed er a rechad el ta osengiu, me a klemeriarreng er kemiu, me a uldesuiu el kirel a tekoi? A Jehovah me ngdirrek el uaisei. Me mosuub el mo betik a rengum er aike el tekoi el mekreos er a rengul. A bebil er ngii a losaod a Psalm 15. Ngar tiang e kede menguiu el kirir a rechad el lomes er tir a Dios el kmo te sechelil. (Monguiu er a Psalm 15:1-5.) A resechelil a Jehovah a olecholt a blekeradel el lolekoi a Biblia el kmo ng “rodech ra Reng” el uldimukl er ngii a “bltikerreng, ma deourreng, ma budech, ma kllourreng, ma blekokuii, ma ungilreng, ma blakerreng, ma delemedemek, ma chomengerem.”​—Galatia 5:22, 23, BT.

21. Ngera mo ngosukau el mo omekeroul a blekerdelel a Dios?

²¹ Me sel bo blechoel el menguiu e mesuub er a Biblia  e ngmo ngosukau el mo omekeroul a blekerdelel a Dios. E sel bo modengei a soal a Dios e ngmo sebechem el meruul a uldesuem el mo oltirakl a uldesuel. (Isaia 30:20, 21) Me a lorael el mo mesisiich a bltikerreng er kau el mo er a Jehovah, e ngmengal mo soam el kiei el meruul a soal.

22. Ngera sebechem el mo kutmeklii a omkiei el odeuir a rengul a Dios?

²² Kede ousbech a ducherreng el mo sebeched el kiei el odeuir a rengul a Jehovah. A Biblia a omekesiu er a omeldechel a blekerdeled el ua domedobed a mechut el bail e domail er kid er a beches. (Kolose 3:9, 10) Me nguaisei, a milluches er a psalm a millekoi el kirel a llechul a Jehovah el kmo: “[Ak] nguu omeksullek a kulengesenges.” (Psalm 19:11) Kau me ke dirrek el mo metik el kmo a omkiei el odeuir a rengul a Dios, e ngmo uchul a betok el omeksaul. E a omoruul el uaisei, e ke mo onger er a omelsemai er a Satan e odeuir a rengul a Jehovah!