A Delemedemek el Reng—A Rolel a Llomeserreng
A Toñi a oureor el olengeseu er a remechuodel a mlo er a blai el luluureor er ngii, e a redil er tia el blai a ngiluu a chesimer. Ngika el redil a kmal mle kesib a rengul e mekngit a tekingel el mo er ngii. Ngdilu er ngii el kmo, ngkmal meoud el mong el mo omekerreu er a chudelang el delal. Engdi a Toñi a dimlak lemeoud el mong. Me nguaisei, engdi a Toñi a mle ungil a omelekingel e ullengit a klausubes el kirel tia el blekeradel el mla duubech.
A ONGINGIL el taem er a luut el mo oureor, e ngika el redil a liluut el ngmasech a rengul er a ngii. Me a Toñi a dilu el kmo, “Ngkmal mle meringel el blekeradel a dilubech el mei er ngak. E le ngdimlak a ungil el uchul aika el mekngit el omelekingel el me er ngak.” Me nguaisei engdi a Toñi a liluut el olengit a klausubes er a ngika el redil e dilu er ngii el kmo ngmle ungil el medengelii a meringel el blekeradel el chelebangel er ngii.
A lsekum e ke mle Toñi, omomdasu e ke mo mekerang er a ua tia el blekeradel? Ke mo melasem el olecholt er a delemedemek el reng? Omomdasu e ngmo meringel er kau el omtebechel er a ngesechel a rengum? Ngulterekokl el diak el beot el tekoi a dolecholt er a chelellakl el reng er a chelsel a ua tia el blekeradel el dulsaod er ngii er a uchei. Me sel de ngar er a chelsel a blekeradel el rullid el mo kesib a rengud, e ngmeringel er kid el mo melemolem el olecholt er a delemedemek el reng.
Me nguaisei a Biblia a melisiich er a Rekristiano el mo oba delemedemek el reng. Me a Tekingel a Dios a mesaod er tia el blekeradel el obengkel a llomeserreng. A Jakobus a melekoi el kmo: “Ngiil chad bo loeak a ungil blekerdelel lochotii chomerellel a delemedemek el rodemii a llomeserreng.” (Jakobus 3:13, BT) Me ngmekerang a delemedemek el reng e ochotii el kmo, kede oba llomeserreng el mla er a Jehovah? Kede mekerang e mo olecholt er tia el blekerdelel a Jehovah?
A LLOMESERRENG EL MEI EL OKIU A DELEMEDEMEK EL RENG
A delemedemek el reng a cholleklii a rengud. “A medemedemek el nger a cholleklii a ngasechereng, e ngdi medecherecher el nger a olengasechereng.” —Osisechakl 15:1.
A ngasecherreng a sebechel el mo uchul a meringel el blekeradel el di ua dolsiu er a ngau el lolab a idungel. (Osisechakl 26:21) Engdi a delemedemek el nger a olleklii a ngasechereng. Ngdirrek el sebechel el cholleklii a chad el kmal kesib a rengul.
A Toñi a mle medengei el kmo tiang a mo duubech. Ngika el redil er sera bo lolechesuar a ungil el cheldechedechal a Toñi e nglilangel e ouchais er ngii el kmo, ngmle chelebangel er a di mondai er ngii me a dirrek a mondai er a telungalek er ngii. Tiang a mlo uchul me a Toñi a mlo ousioning el mo er ngii, e miluchelii a omesubel a Biblia el obengkel. Me aika el tekoi a mileketmokl el okiu a delemedemek el omeruul me a olechotel a budech.
A delemedemek a rullid el mo dmeu a rengud. “Te ngeltengat ar medemedemek, le te mo oudiukes ra belulechad.” (Mateus 5:5, BT)
Ngera uchul me a rechad el olecholt er a delemedemek el reng a dmeu a rengrir? A rebetok el chad er sera bo lolecholt er a delemedemek, e ngmlo dmeu a rengrir e dikea le bekongesengasech a rengrir. A klengar er tir a milengodech el mo ungil me te medengei el kmo ngar er ngii a mengasireng el klengar el kirir er a ngar mederir. (Kolose 3:12) A Adolfo el odam el oldingel a ongdibel er a Sebangiol a ouchais el kirel a blekerdelel a klengar er ngii er a uchei er a lemei er a klemerang.
Ngmelekoi el kmo: “A klengar er ngak a dimlak a mera el belkul. Ngmle bek el sils el di le kesib a renguk. Tia el blekerdelek a uchul me a rebebil el sechelik a mlo medakt er ngak e le ak di omecheracheb e mekngit a omerellek el mo er tir. Tia el blekerdelek a mlo uchul me ngkilo kmad e le kulekoad e te ruskak el elolem el taem.”
Chelecha el taem, e a Adolfo a olisechakl er a rebebil el mo oba delemedemek el okiu a omelekingel me a omerellel. Te betok a beot er tir el mo kmeed er ngii lokiu a bltikerreng me a ungil el omerellel. Ngmelekoi el kmo ngkmal dmeu a rengul er a omeldechel a klengar er ngii. E obang a omereng el saul el kirel a ngelseuil a Jehovah el mo er ngii el mlo uchul me ngmilekurulii tia el blekeradel el delemedemek.
A delemedemek a odeuir a rengul a Jehovah. “Bo le mellomes a rengum e rungalek, e mrellii a renguk el mo ungil, me le bor ngii a nger er ngak el mor a chad el mekngit a uldesuel el kirek.”—Osisechakl 27: 11
Me a Jehovah a di ua bla lemotuub er a kot el ngarbab el cherrouel el Diabelong. Me a Dios a ngar er ngii a ungil uchul a ngesechel a rengul el kirel tia el bleketakl el ultok el mlo er ngii. Me nguaisei a Biblia a mesaod er a Jehovah el “diak le mereched el ngmasech” a rengul. (Exodus 34:6) Me sel doukerebai er a blekerdelel a Dios el meoud el ngmasech a rengul e medemedemek, e kede mo merael er a rolel a llomeserreng el kmal odeuir a rengul a Jehovah.—Efesus 5:1.
A blekerdelir a rechad er tia el beluulechad a diak lolecholt er a delemedemek el reng. Me kede teloi er a rechad el di “oumead er tir e ngarbab a rengrir; [e] mo mekngit a ngerir el mor a re chad, . . . toltuub er a re chad, e mekngit a blekerdelir, e bekeu el sorir el omekcharm er a re chad.” (2 Timothy 3: 2, 3) Me nguaisei, engdi aika el omeruul a diak el kirel el mo uchul me a Rekristiano bo lak lolecholt er a delemedemek el reng. A Tekingel a Dios a omeklatk er kid el kmo a “llomeserreng el ngar bab [a] . . . chelellakl, e medemedemek.” (Jakobus 3:17) Me a dolecholt er a budech me a delemedemek el reng e ngolechotel a kmo kede obang a llomeserreng el mla er bab el mei. Tiakid el llomeserreng a mo uchul e kede mo olecholt er a delemedemek er a chelsel a taem el bo lekesib a rengud. A bo deuaisei e kede lmuut el okedid er ngikel el uchul a diak a telkelel el llomeserreng el Jehovah el Dios.
