Ke mla menguiu aike el dirk mlo merek el suobel er a Ongkerongel? Me ka molasem, nglocha sebechem el onger aika el ker el beldukl er iou:

Ngera el klengit a lulsaod er ngii a Jesus el ngar er a Mateus 18:15-17?

Ngmilsaod er a tekoi el sebechel el meketmokl el mo er tirke el ngar er a klengit. Engdi a lsekum e ngdiak el meketmokl e rirellii a kmal oberaod el klengit e ngmesuld a ngklel. El ua omelaes me a cheleblad el omeruul.​—w16.05, 12 el llel.

Ke mekerang e rullii a omengiuel a Biblia el mo er ngii a usbechellel?

Ngsebechem el meruul aikang: Menguiu el diak a mengesang er a uldesuem, e osiik a tekoi el ngar er a Biblia el sebechem el oltaut er ngii, e di kau el oker kau el kmo, ‘Ngmekerang a kuusbech er tiang el olengeseu er a rebebil?’; e dirrek el ousbech aike el ngar er ngii el klekedall el merriter er a babier el mulenguiu er ngii.​—w16.05, 29-31 el llel.

Ngmekngit a langel a Kristiano a lsekum e ngoumerang er a okiis?

A klaumerang er kid er a okiis, a diak lerellid el mo diak el mekngit a rengud sel lemad a betik er a rengud. A Abraham a kmal mle mekngit a rengul er a lemad a Sara. (Genesis 23:2) Engdi a omerollel a taem, e ngmo mechelaod a rengud.​—w16.05, 4 el llel.

Ngtecha ngike el chad el olab a klekedellel er omeluches me tirke el telolem el chad el olab a klekedellir er a mekemad el ngar er a etiu el bliongel er a Esekiel?

Kede medengei el kmo tirkang a omtechei er a klou el klisiich el ngar er a eanged el mlo melemall er a Jerusalem, e dirrek el mo olekngemed er tia el mekngit el beluulechad er a Satan. Me ngike el chad el olab a klekedellel er omeluches a melutk er a Jesus Kristus el ngike el melilt er a remo suobel.​—w16.06, 16-17 el llel.

A Biblia, ngmlukerreu er a ngera el tellemall?

Ngmlukerreu er a (1) telemellel a klekedall el ousbech el meluches el ua papyrus me a parchment; me a (2) ultekengir a rebetok el chad er a balatiks me a remengeteklel a klechelid el millasem el melemall er ngii; me a (3) omeldechel a klumech er a chelsel.​—w16.07 4-7 el llel.

Ngera bebil el rolel e a Kristiano a omekbeot er a klengar er ngii?

Ngkirel a Kristiano el lemuches aike el lousbech e diak lomechar a klalo el diak lousbech. Ngmelatk aike el lousbech er a bek el sandei me a lechub e ngbek el buil, me a ildisel a udoud el longoit. Ngkirel el loterau e remous me a lechub e ngchemoit aike el klalo el dial el lousbech, e ngmengkad a rokui el blsel er sel kot el mereched el taem. Ngdirrek el osiik a rolel e ngmereched el mo merek el oureor, e dirrek el omdasu er a rolel e ngsebechel el lmuut el menglou er a omesiungel.​—w16.07, 12 el llel.

A Biblia ngochotii el kmo, ngera lmuut el klou a ultutelel er a kolt me a silber?

A Job 28:12, 15 a ochotii el kmo, a llomeserreng a lmuut el ungil er a kolt me a silber. Me sel mosiik er ngii, e molasem el mo ngariou a rengum e molisiich er a klaumerang er kau.​—w16.08, 18-19 el llel.

Ngdi ungilbesul a lengar ngii a chesemir a rudam?

A siukang er a bebil el beluu a kongei er a mekedeb el chesemel a odam, e diak a letemellii er a klumech er a Renged el lomerk er ngii. Engdi te ngar er ngii a rebebil el rudam el diak el kengei me lengar ngii a chesemir. (1 Ko. 8:9) Engdi siukang er a bebil er a beluu, e ngdiak el kirel a Kristiano el odam el ngar er ngii a chesemel.​—w16.09, 21 el llel.

Ngera el blekeradel a sebechel el mo uchul e kede mo omtok a omellach el mla er a Jehovah?

Ngkired el omekerreu er a rengud er a blekeradel el sebechel el mo uchul e ngmo medecherecher a rengud. E tiang a uldimukl er a blekeradel el ua kldidairreng me a mekngit el omeruul me a beot el reng. Me a lsekum e ngdiak dekerekikl e aika el tekoi a sebechel el rullid el mo diak dolengesenges er a Dios e mo omtok er Ngii.​—w16.06, 13 el llel.

Ngerang a klekakerous er a klemedengei me a klaodengei me a llomeserreng?

A chad el oba klemedengei a suub a betok el tekoi e diak lobes. E a chad el ngar er ngii a klaodengei er ngii a sebechel el mtab a omesodel a kakerous el tekoi me a belkul. E a chad el mellomes a rengul a sebechel el ousbech er a klemedengei er ngii me aike el lodengei el tekoi el mo uchul a klungiolel.​—w16.10, 18 el llel.