KAU NGNGAR NGII A CHOICE ER KAU EL KIREL A KMO NGMO UANGERA KLENGAR ER KAU ER A NGAR MEDAD? A rebebil er a rechad oumerang el kmo ngmla moterekokl a klengar er tir. Sel lak el sebechir lotaut a turrekong er tir e te kmo, “Nglocha kuk mlo kirel uaisei!”

A rebebil a mo mechitechut a rengrir sel lak el sebechir el mesa rolel e ngmo ungil tia el mekngit el beluulechad el dekiei er ngii. Te locha melasem el meruul er a klengar er tir el mo ungil engdi te di olsiuekl a mekemad, delengerenger, telemellel a beluu, me a secher. Te locha mo melatk el kmo, ‘Ngera uchul me kede bother.’

Ngmera el uaisei el blekeradel er a klengar a sebechel tomall a urunguled. (Olisechakl 9:11) Me nguaisei engdi ngngar ngii a choice er kau el kirel a klengar er kau er a ngar medad. A Biblia melekoi el kmo a klengar er kau er a ngar medad ultuil er a choice er kau. Ka molatk aike el lolekoi a Biblia.

A Moses el mle mengeteklel a renged er a Israel er a irechar a dilu er a rechad er uchei er a lesiseb er a Beluu er a Nglat el kmo: “Ngak er chelechang a omeskemiu omelilt er a delongelel a klengar ma kodall, ma delongelel a klengeltengetel a Dios ma dellebeklel a Dios, e ak umekedong er a eanged ma chutem el me sioning er sel cho mngiltii. Mngiltii a klengar. Bo le betik a rengmiu er a RUBAK el Dios er kemiu e molengesenges er ngii e bo le blak a rengmiu er ngii.”​—Duteronomi 30:15, 19, 20.

“Ngak er chelechang a omeskemiu omelilt er a delongelel a klengar ma kodall, ma delongelel a klengeltengetel a Dios ma dellebeklel a Dios, e ak umekedong er a eanged ma chutem el me sioning er sel cho mngiltii. Mngiltii a klengar.”​—Duteronomi 30:19

Nguaisei a Dios ulsebelterir a rechad er a Israel er a klsibai er a Ekipten e milsterir a omelilt el mo kiei el mimokl e dmeu a rengrir er a Beluu er a Nglat. Me nguaisei engdi ngmla er ngii a kirir el meruul. Ngmle kirir el ‘ngiltii a klengar.’ Ngmekera loruul el uaisei? “Bo le betik a rengmiu er a RUBAK el Dios er kemiu e molengesenges er ngii e bo le blak a rengmiu er ngii.”

A osisiu el choice a mo er kau er chelecha el taem. Sel molilt el mo betik a rengum er a Dios, olengesenges er ngii, e mo blak a rengum el mo er ngii, e ngua omngiltii a klengar, el ngii a klengar er a baradis er tia el chutem. Engdi ngera belkul a bo doruul a derta er aika el tekoi?

A bltikerreng sel kot el ngaruchei el blekerdelel a Dios. A apostol Johanes a mlukreng el mo meluches el kmo: “Dios a bltikerreng.” (1 Johanes 4:8) Tiakid a uchul me sera loker er a Jesus el kmo ngngera sel kot el ngarbab el llach e ngdilu el kmo: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” (Mateus 22:37) A mera el deleuill lobengkel a Jehovah el Dios a kirel mengai a uchetemel er a bltikerreng, el diak el dakt me a lechub e kede di lmuk e olengesenges. Ngera uchul me ngkired el melilt el mo betik a rengud er ngii?

A bltkil a rengul a Jehovah el mei er kid a rechad a di ua bltkil a rengul a chedam me a chedil el mora rengelekir. Alta rechad a diak el perfect engdi ruungalek a betik a rengrir er a rengelekir me te olisechakl, support, chemat, e mesmechokl er a rengelekir le ngsorir a bo ledeu a rengrir e bo le successful. E ngera sorir a ruungalek er a rengelekir? Ngsorir a rengelekir a bo lebetik a rengrir er tir e lengai a tekingir el locha er a rengrir me bo luchul a klungiolir. Me a demad el ngar er a eanged ngdiak el subed a le expect er kid el mo olecholt omereng el saul el kirel aike el rokui el bla leruul el kired?

Sera lekot el meluches a Biblia e a tekoi el luluusbech er ngii el moiuid er chelechang el “molengesenges” a mesaod el kirel “orrenges.” Tiakid ngdiak el soad sel dedu er a ngalek el kmo, “Morrenges er a delam me a demam”? Me a bo dolengesenges er a Dios e ngkired el mo medengei e orrenges a tekingel. Kid a diak el sebeched lorrenges er a Dios el ngar er a osisiu el rolel e kede orrenges er a chad, me ngbelkul a kmo ngkired el menguiu e oltaut aike el ngar er a Tekingel el Biblia.​—1 Johanes 5:3.

Klungel a ultutelel a dolengesenges er a Dios a desa er a tekingel a Jesus. Ngdilu el kmo: “A klengar er a chad a diak di lultuil er a kall e le merekong; ng dirrek el ultuil er a bek el tekoi el tuobed er a ngerel a Dios.” (Mateus 4:4) Ngdi ua kall el kmal klou a ultutelel, a bo dodengelii a Dios a lmuut el klou a ultutelel. E ngerang? A King Salomon a dilu el kmo: “A llomeserreng a sobecheklid el di ua udoud el mesebechakl er kid. A llomeserreng a kudmeklid me ng diak de mekesakl; tiaikid a klungiolel a klemedengei.” (Olisechakl 7:12) A klemedengei me a llomeserreng el denguu er a Dios a sebechel sobecheklid er chelecha el taem e ngosukid el rullii a mellomes el omelilt, el ngii a mekrolid el mo nguu a diak a ulebengelel el klengar er a ngar medad.

Molatk er sel okesiu er a Jesus el dulsaod er ngii er sel uleak uchei el suobel er a ledu el kmo: “Siseball el mor a klengar a obutek e meringel a rael el mor ngii, me te di kesai el chad a metik er ngii.” (Mateus 7:13, 14) A lsekum e ngsoad el merael er tia el rael e ngmo uchul a klungioled a dobengkel a guide el ungil medengelii tia el rael me bo lsebeched el mo er sel klengar el diak a ulebengelel. Me ngngar ngii a ungil luchul e ngsoad el kmeed er a Dios. (Psalm 16:8) Engdi ngmekera doruul er tiang?

Bek el sils el betok a kired el meruul e lmuut el betok a soad el meruul. Aika el tekoi a sebechel mo uchul me kede di mechesang me ngdiak a temed el melatk aike el soal a Dios a doruul. Sei a uchul me a Biblia mengelechel er kid el kmo: “Me bo mkerekikl a omerellem. Lak bo mua re mekebelung el chad, e bai bo mua re mellomes a rengrir el chad. Bo mungil el ousbech a bek el techelliu, ele ng mekngit el taem er chelechang.” (Efesus 5:15, 16) Kede melemolem el kmeed er a Jehovah sel derellii a deleuill er kid me ngii el mo kot el klou a ultutelel el tekoi er a klengar er kid.​—Mateus 6:33.

Me alta ngdiak a ngera el sebechem el rullii el ngmodech a tekoi el dilubech er a ngar er a mong, engdi ngsebechem el choose el oterekeklii a ungil klengar er a ngar medad el kirem kau me a rebetik er a rengum. A Biblia ouchais el kmo a Demad el ngar er a eanged el Jehovah el Dios a kmal betik a rengul er kid e ngii ouchais er kid aike el soal a doruul. Molatk a tekingel a profet el Mika:

“A RUBAK a mla subedid el kmo ng ngera ungil. Tiakid a longerechir er ngii er kid: mo meruul a melemalt, e mo olecholt er a diak le mengodech el bltikerreng, e mo oba ngariourreng el olengesenges er a Dios er kid.”​—Mika 6:8.

Ke mo kongei er a invitation er a Jehovah el mo merael lobengkel e ngmai aike el diak a ulebengelel el klengeltengat el bla letib el kirir tirke el merael el obengkel? A choice a kmal di ngar kau!