1-2. (a) Ngmle uangerang a blekeradel er a Judea er a llechesii a babier a apostol Paulus el mora Rekristiano el chad er a Hebru? (b) Ngmekera mlukreng el babilengel a Paulus e kmal mle melemalt a temel?

 REKRISTIANO el chad er a Hebru el kiliei er a Jerusalem me a Judea a mlo chobangel a betok el ringel er uriul er a kodellel a Jesus. Ngdi milteketek a ongdibel er a Rekristiano e te mlo meringel el oldechelakl er tir. (Rel. 8:1) E a bekord el 20 el rak er uriul e a rultirakl er a Kristus a mlo chuarm er a chelebuul me a bosech er a kall. (Rel. 11:​27-30) Me nguaisei engdi ngar er a bekord el 61 C.E., e a Rekristiano mlo omelechesiu er a telkib el budech a lsekum kede omekesiu er ngii er a tekoi el merael el mei. Tiakid el taem e te ngiluu a mlukreng el babilengel a apostol Paulus, el ngii a mlo er tir er a kmal melemalt el taem.

² A babier el mlora Rekristiano el chad er a Hebru a kmal mle melemalt a temel e le budech lulemelechesiu er ngii a diak bo lolemolem. A Paulus a milsterir a ulekrael el mo ngosuterir el loutekangel er a ringel el di kmedung e te mo chobengelii. A telemellel a Jerusalem me a templo el lulemlaoch el kirel a Jesus a merekung. (Lk. 21:20) Me nguaisei a Paulus me a Rekristiano el ngar er a Judea dimlak lodengelii sel sils el bo lemetemall. Engdi tirka el Kristiano a sebechir el lousbech er a taem el medechel el prepare er tir loeak a lomekeroul a blekeradel el ua klaumerang me a ducherreng.—Heb. 10:25; 12:​1, 2, BT.

3. Ngera uchul me a Rekristiano er chelecha el taem a ngar ngii a klou el klemeriarreng er tir er a babier er a Hebru?

³ Kid a di kmedung e kede mo chobengelii a ringel el lmuut el kmal meringel er sel blo lechebengelii a Rekristiano el chad er a Hebru. (Mt. 24:​21, BT; Och. 16:​14, 16) Me dorriter a bebil er  a ulekrael el Jehovah milsterir tirka el Kristiano el ngii a dirrek el kmal mo ngosukid.

“DE NGESECHEKL EL [MO] . . . ULTEBECHEL EL CHAD”

4. Ngera el omelsemai a blo lechebangel a Rechijudea el Kristiano? (Dirrek el momes er a siasing.)

⁴ Rechijudea el mla mo Kristiano a mlo chelebangel er a klou el omelsemai. A ta el taem e te mle ngellitel el chedal a Jehovah. A Jerusalem a mle kingall er omerreder er a Rengedel a Dios me a templo a mle chaidirengul a bliochel el omengull. Me a rokui el Rechijudea el uleba blakerreng a uleltirakl er a Llach er a Moses el lullisechakl a remengeteklel a klechelid. Aika el osisechakl ulemekrael a kall longang, osengir el kirel a botk, me a omerellir el bedul a Rechisentael. Me nguaisei engdi uriul er a kodellel a Jesus e a Jehovah mlo diak lekengei a tenget el loruul er a templo. Tia mle omelsemai el mora Rechijudea el Kristiano el tir a smau el loltirakl er a Llach. (Heb. 10:​1, 4, 10, BT) Mo lmuut er a Rekristiano el mla mukeroul el mo meklou el chad er a tekoi er a klereng el ua apostol Petrus me ngmle meringel er ngii a bebil er aika el omelodech. (Rel. 10:​9-14; Gal. 2:​11-14) Aika el beches el klaumerang er tir a uchul me a remengeteklel a klechelid er a Rechijudea uleldechelakl er a Rekristiano.

5. Ngera mle kirir el klekar er ngii a Rekristiano?

⁵ Ngmla er ngii a eru el bliongel er a rechad el lulemtok er a Rekristiano el chad er a Hebru. A ta er ngii a remengeteklel a klechelid er a Rechijudea el tir ulemes er a Rekristiano el kmo te omtok a mera el osisechakl. Me a lmuut kung a rebebil el millekoi el kmo te Kristiano a millisiich er a rultirakl er a Kristus el mo melemolem el oltirakl a bebil er a telengtengil a Llach er a Moses, e le tir el locha dimlak el sorir el modechelakl. (Gal. 6:12) Ngera mo ngosuterir a Rekristiano el melemolem el ngar er a klemerang?

6. A Paulus ngerang ngmillisiich er a rekldemel er a klemerang el mo meruul er ngii? (Hebru 5:14–6:1)

⁶ Ngar er a babilengel a Paulus el mora Rekristiano el chad er a Hebru e ngmillisiich er a rekldemel er a klemerang el mo dmolech el  merriter er a Tekingel a Dios. (Monguiu er a Hebru 5:14–6:1.) A Paulus uluusbech aike el Bades el tekoi er a Hebru el lolengeseu er a rudam er ngii el kmo a rolel e a Rekristiano milengull er a Dios a lmuut el ngarbab er a rolel e a Rechijudea milengull er ngii. a Ngmle medengei el kmo a lolechel er a klemedengei er tir e bo ledmolech omerriter er tir er a klemerang a mo ngosuterir el mtab e otngakl a klsuul el osisechakl me ngdiak lemechetikaik el mo cheroid.

7. Ngera el omelsemai a dechelebangel er chelecha el taem?

⁷ Ngdi ua Rekristiano el chad er a Hebru, kid me kede dirrek el mo chobengelterir a rechad el omerk a tekoi me a lechub e nguldasu el omtok a llechul a Jehovah el kirel a ungil me a mekngit. A rumtok a blechoel el omtok a klaumerang er kid el mengai er a Biblia el kirel a tekoi er a cheliuaiu, e melekoi el kmo ngkmal chedelekelek a rengud e blutek a uldesued. A rolel a lomdasu a rechad er a beluulechad a di merael el lmuut el mo omtok er a uldesuel a Dios. (Osi. 17:15) Me ngkmal klou a ultutelel a desisichii a duch er kid el mo meduch el omtab e oltngakl a uldasu, el lousbech a rumtok el mengitechut er kid me a lechub e ngmengetikaik er kid el mo cheroid er a klemerang.—Heb. 13:9.

8. Ngera mo ngosukid el mo melemolem el lolengesechekl er a tekoi er a klereng?

⁸ Ngkmal lungil a delia er a rengud a ulekrael el Paulus a milsterir a Rekristiano el chad er a Hebru el kmo, bo dengosechekl el mo ultebechel el chad er a klemerang. Tia uldimukl er ngii a mo dmolech a klemedengei er kid er a klemerang e mo oba uldesuel a Jehovah. Tia dolemolem el meruul er ngii er a uriul er a telbilel a reng me a techolb. A bla dengar er a klemerang el kemanget el taem me a lak me kid a kired el blechoel el menguiu e mesuub er a Tekingel a Dios. (Psa. 1:2) A ungil schedule er kid er omesubed el di kid el tang a mo ngosukid el smisichii a blekeradel el Paulus a millisiich er ngii er a babilengel mora rechad er a Hebru: klaumerang.—Heb. 11:​1, 6, BT.

‘MOBA KLOUMERANG E MNGUU A KLENGAR’

9. Ngera uchul me a Rekristiano el chad er a Hebru uluusbech er a mesisiich el klaumerang?

⁹ A Rekristiano el chad er a Hebru uluusbech er a mesisiich el klaumerang a lsekum e ngsorir el suobel er a ringel el mo er ngii er a Judea. (Heb. 10:​37-39, BT) A Jesus uluuchais er a rultirakl er ngii el kmo sel lesterir a resoldau el iliueklii a Jerusalem e ngkirir el chemiis el mora rois. Tia el ulekrael er ngii a mle kirir a rokui el Kristiano er a Judea el oltirakl er ngii, a lekiei er a chelsel a mats me a lekiei er a ikrel a beluu. (Lk. 21:​20-24) A rechad er tiakid el taem sel bo loldechelakl er tir a resoldau e te blechoel el chemiis el mora chelsel a mats loucheuatel el ua Jerusalem. Ngdimlak el lungil uldasu omchiis el mora rois. Me te uluusbech er a klou el klaumerang el mo olengesenges a tekingel a Jesus.

10. A mesisiich el klaumerang ngmo odbecheterir a Rekristiano el mo mekerang? (Hebru 13:​17, NW)

¹⁰ A Rekristiano el chad er a Hebru a dirrek el mle kirir el mo oumerang er tirke el Jesus a mla tutketerir el mo omekrael. Tirke el ulemekrael a locha milsterir a komakai el ulekrael el lolengeseu er a rokui el chedal ongdibel el mo oltirakl a ulekrael er a Jesus er a melemalt el taem e ngar er a chelderoder el rolel. (Monguiu er a Hebru 13:​17, NW. b) A tekoi er a  Grik el lousbech er ngii a Hebru 13:17 (NW) el moiuid el “molengesenges” a belkul a kmo, a chad a olengesenges lengii loumerang er a chad el lomsang a ulekrael. Ngdiak di lolengesenges er a chad lengii el kirel. Me a Rekristiano el chad er a Hebru a mle kirir el toketek a klaumerang er tir er tirke el omekrael er a uchei er a lemei a ringel. A lsekum a taem er a budech e a Rekristiano mle olengesenges a ulekrael er a rumekrael, e ngmo beot er tir a olengesenges er tir er a chelsel a meringel el taem.

11. Ngera uchul me a Rekristiano er chelecha el taem a kmal ousbech er a mesisiich el klaumerang?

¹¹ Kid me ke dousbech er a klaumerang el uai tirke el mle kot el nguu a babilengel a Paulus. Kede kiei er a taem el ruumesingd er a rechad a oltngakl e melenguul a uleklatk er a Biblia el kirel a ulebongel er tia el mekngit el blekeradel. (2 Pe. 3:​3, 4) Me a lmuut kung, alta Biblia ouchais a bebil er a tekoi el mo duubech er a temel a kloul ringel, me nguaisei ngbetok a diak dodengei. Ke dousbech er a mesisiich el klaumerang el kmo a ulebongel er tia el mekngit el blekeradel a mei er sel telutk el temel me a Jehovah mo omekerreu er kid.—Hab. 2:3.

12. Ngera mo ngosukid el suobel er a kloul ringel?

¹² Ngdirrek el kired el smisichii a klaumerang er kid el kmo a Jehovah ousbech er a “blak a rengul e mellomes a rengul el mesiou” el omekrael er kid er chelecha el taem. (Mt. 24:45) Sel lomuchel a kloul ringel e kede locha mo ngmai a komakai el ulekrael el ua Rekristiano el chad er a Hebru er a lebong a resoldau er a Rom. Chelechang e ngtaem el desisichii a klaumerang er kid er a ulekrael el dolai er tirke el omekrael er a cheldebechelel a Jehovah. Ngkmal diak el sebeched el lomdasu el kmo kede mo olengesenges er tir er a temel a kloul ringel a lsekum ngmeringel er kid a meruul el uaisei er chelechang.

13. Ngera uchul me ngmle usbechall a ulekrael er a Hebru 13:5 (BT)?

¹³ A rechad er a Hebru er a longiil er a olangch el lochotii el kmo ngmla mo kirir el chemiis, e ngmle kirir el melemolem el omekbeot er a klengar er tir e mengeroid er tir er a “ngibes ra udoud.” (Monguiu er a Hebru 13:​5, BT. c) A rebebil er tir a mlo chelebangel a bosech er a kall me a chelebuul. (Heb. 10:​32-34) Alta ta el taem e te mle kongei loutekangel a chelebuul el kirel a ungil chais, me nguaisei a rebebil a locha mlo omes a kerruul el uchul osebecheklir. Engdi udoud a diak bo losobel a klengar er tir sel lemetemall a Jerusalem. (Jak. 5:3) Ngbai ngike el betik a rengul er a kerruul a locha kmal mo meringel er ngii a choitii a blil me a kloklel e chemiis.

14. Ngera ngrullii a mesisiich el klaumerang er a omelilt er kid el kirel a kerruul?

¹⁴ A lsekum e ngmesisiich a klaumerang er kid el kmo a ulebongel a kmal kmedang e kede mo oltngakl a ngibes er a kerruul. Temel a kloul ringel e a rechad a mo “mengoit a kolt ma silber er tir er a rael” e le te mo mtebengii el kmo a “kolt ma silber a diak el sebechel el sobecheklterir sel loietii a ngesechel a rengul a RUBAK.” (Ese. 7:19) Me ngdiak dolturk osenged er a mengereker a betok el udoud, kede bai meruul omelilt el ngii a ngosukid el mo omekbeot e tabesul a klengar er kid. Tia uldimukl er ngii a diak domals er kid er a diak a ultutelel el tekoi me a lechub e bo dongoit er a klou el temed el omekerreu a klokled. Kede dirrek el mo kerekikl me ngdiak leiuul a rengud el mora klalo el dolab. (Mt. 6:​19, 24) Sel lluut el kmal mo kmeed a ulebongel e ngmo measem a klaumerang er kid el kmo, kede mo oumerang er a Jehovah me a lechub e ngklokled.

 “DUCHERRENG CHO MOUSBECH ER NGII”

15. Ngera uchul me a rechad er a Hebru el Kristiano kmal uluusbech er a ducherreng?

¹⁵ A Rekristiano el chad er a Hebru a mle kirir loutekangel el ngar omesiungir le blekeradel er a Judea di mirrael el mo mekngit. (Heb. 10:​36, BT) Alta rebebil er a rechad er a Hebru el Kristiano mlo chobangel a meringel el odechelakl, a rebetok er tir a mlei er a klemerang er a temel a budech. A Paulus a dilu el kmo alta te uluutekangel omeasem er a klaumerang er tir engdi ngdirkak bo lechuarm el ua Jesus el luluutekangel el mo lmuut er a kodall. (Heb. 12:4) A rumtok el Chijudea a kmal mle kesib a rengrir e sorir el melemall e le te betok er a Rechijudea a mla mo Kristiano. A sesei el rak er uchei e a Paulus a mla er a Jerusalem e te cholebedii. Rebetok er a 40 el Chijudea a “mlo dmak e melib er a tar a tekoi. Te rirellii a tar a mesisiich el telbiil . . . el kmo ng diak bo longang ma lechub e lolim el dimerkmo lokodir a Paulus.” (Rel. 22:22; 23:​12-14) Me alta rechad a dirk mo ouketui e oldechelakl er a Rekristiano, ngdirk mle kirir el mo kldibel e mengull, omerk er a ungil chais, e melemolem el mesisiich a klaumerang er tir.

16. Ngmekera babier el mora rechad er a Hebru e ngosukid el mo oba melemalt el uldasu el kirel odechelakl? (Hebru 12:​7, BT)

¹⁶ Ngera mo ngosuterir a Rekristiano el chad er a Hebru el mo outekangel a ultok el bo lechebangel? A Paulus a mle medengei el kmo ngkirir el mo oba melemalt el uldasu el kirel a ringel el lechebangel. Ngsilodii el kmo sel lechebangel a ringel e a Dios a locha mo ousbech er ngii el train er tir. (Monguiu er a Hebru 12:​7, BT. d) Chouaika el training a sebechel ngosuir a chad el mekeroul e duorem a blekeradel lodeuir a rengul a Jehovah. Sel bo lolturk osengir tirka el Kristiano el chad er a Hebru er a ungil tuobed er a ringel el lechebangel, e ngmo beot er tir el loutekangel.—Heb. 12:11.

17. Ngera ngmlo medengelii a Paulus el kirel a doutekangel a ringel?

 ¹⁷ A Paulus a millisiich er a Rekristiano el chad er a Hebru me bo loba blekeu e lak el give up loutekangel a ringel. Ngmle sebechel el meluches el mo er tir el kirel tiang. Ngika ta el taem e ngmle meringel loldechelakl er a Rekristiano, me ngmle medengei el kmo ngera te mo chobangel. Ngdirrek el medengelii a rolel e ngsebeched el loutekangel a odechelakl. Ngmlo chobangel a kakerous el ultok er a uriul er a lebo le Kristiano. (2 Ko. 11:​23-25) Me a Paulus a mle sebechel mengedecheduch el lulterekokl a rengul el melekoi aike el dousbech el mo outekangel. Ngulemeklatk er tirka el Kristiano el kmo sel loutekangel a ringel e ngkirir lultuil er a Jehovah el diak el ultuil er a di tir. A Paulus a mle sebechel ulterekokl a rengul el melekoi el kmo: “A Jehovah ngelsuik; ngdiak bo kmedakt.”—Heb. 13:​6, NW.

18. Ngera sel bo dodengelii el kirel a ngar medad e ngmo ngosukid loutekangel a odechelakl?

¹⁸ A rebebil er a rudam er kid a outekangel a odechelakl er chelechang. Ngkmal sebeched el support er tir loeak a nglunguched e a lebebil e ngsebeched el ngosuterir er aike el lousbech. (Heb. 10:33) Me nguaisei engdi Biblia a bleketakl el melekoi el kmo “tirke el rokui el oltirakl er a Kristus Jesus e sorir el meluu er a Dios er a chelsel a klengar er tir a mo modechelakl.” (2 Ti. 3:​12, NW) Tiakid a uchul me kid el rokui a kired el prepare er kid el kirel a merael mei. Mada dolemolem el cherrungel loumera el ulsirs er a Jehovah el ulterekokl a rengud el kmo ngmo ngosukid loutekangel a ngii di el ringel el bo dechebangel. E ngar sel telutk el temel e ngmo okngemed aike el rokui el luchul a ringel el mora reblak a rengrir el mesiungel.—2 Th. 1:​7, 8.

19. Ngera sebeched el meruul el ngosukid el prepare er kid el kirel a kloul ringel? (Dirrek el momes er a siasing.)

¹⁹ A babilengel a Paulus el mora rechad er a Hebru a ngilsuterir a rekot el Kristiano el prepare er tir el kirel a ringel el di kmedung e te mo chobangel. A Paulus a millisiich er a rudam er ngii me lluut el mo dmolech a klemedengei er tir er a Bades e lorriter. Sel loruul el uaisei e ngmo ngosuterir el mtab e otngakl osisechakl el ngii a mo choitechetur a klaumerang er tir. Ngmillisiich er tir me lesisichii a klaumerang er tir me bo lsebechir el mereched el mo oltirakl a ulekrael er a Jesus me tirke el omekrael er a ongdibel. Ngdirrek el ngilsuterir a Rekristiano el mekurulii a ducherreng loeak a bo lemelemalt osengir el kirel a ringel, e lomes a ringel el techall el Demerir a sebechel train er tir. Kid me ngdirrek el kired el oltaut er tia el mlukreng el ulekrael. Seikid e ngmo sebeched loutekangel el mora ulebongel.—Heb. 3:​14, BT.