1-3. (a) Te mekerang a Rekristiano e ochotii el kmo te semeriar el mo dmak el ngar er a miting? (Momes er a siasing er a uchelel a suobel.) (b) Ngera kede mo mesaod er tia el suobel?

 SERA dirk el 17 a rekil a Corinna, e a delal a mludechem e mlodurokl el mo kelebus er a ta el cheroid el labor camp. E a uriul e ngii el Corinna a milengai el mo er a Siberia el beluu el kmal cheroid er a belual. Ngmlo meringel el oureor el chad er a sers el di ua sibai. Me a lebebil er a taem e ngmlorimel el mo oureor er rikl el di mengard er a kelekolt el diak a ungil el bilel er a kelekolt. Me nguaisei, engdi a Corinna me a ta er a odos a tilbir er a ta el taem el di chemoit a rokui el tekoi e mo er a miting.

² Me a Corinna a dilu el kmo: “Aki tilobed er a mocha kebesengei e mirrael el 15 el mael el mo er a train station. E a train a tilobed er a 2 el klok er a mochu tutau, e mirrael el 6 el sikang e aki mlo kmerd e merael el 6 el mael el mo er a miting.” Me ngkmal mle dmeu a rengul e le ngmlo sebechel el rolii tia el omerael, me ngdilu el kmo: “Ngar er a miting e aki milsuub er a Ongkerongel e mengitakl a chelitakl er a Renged. Ngkmal millisiich er kemam.” Me tirka el teru el  odos a liluut el mo er a sers er a uriul er a edei el klebesei, engdi ngike el chad er a sers a dimlak a ta el bo lodengei el kmo te mle dibus el betok el klebesei.

³ A rechedal a Jehovah a blechoel el semeriar el mo dmak. Te di ua tirke el mle kot el Kristiano el mle semeriar el mo dmak e mengull er a Jehovah e dirrek el mesuub el kirel. (Rel. 2:42) Me kau me ke locha dirrek el semeriar el mo er a bek el miting. Engdi ke di ua rudam me a rudos er kau, el locha mo meringel er kau el mo er a bek el miting. Nglocha mo kirem el oureor el betok el sikang me a lechub e ngkmal betok a kirem el meruul me a lechub e ngkuk di blechoel el mesaul a bedengem. Me ngera sebechel el melisiich er kid el melasem el mo er a bek el miting er kid? ^[1] Kede mekerang e melisiich er a rechad el dosuub el obengterir me a relmuut el bebil el mo sebechir el mei er a bek el miting? Tia el suobel a mo smodii sel uchul me kede mo er a miting. Me a (1) ngmo uchul a klungioled, (2) e ngosuterir a relmuut el bebil, e dirrek el (3) mo odeuir a rengul a Jehovah. ^[2]

4. Ngmekerang a miting er kid e ngosukid el mesuub el kirel a Jehovah?

⁴ Ngolisechakl er kid. A bek el miting a ngosukid el mesuub a lmuut el betok el kirel a Jehovah. Ngmo uangera uldesuem sel dosaod aike el blekerdelel a Jehovah me sel kuk bo modengei a uldesuir a rudam er kau el kirel ngii el Jehovah? Ngulterekokl el rullau el lmuut el mo betik a rengum er Ngii. Ngdirrek el ngar er aika el miting e kede suub a lmuut el betok el tekoi sel dorrenges aike el cheldecheduch me a demonstration me a dirrek el omengiuel a Biblia. (Neh. 8:3, 8) E ka di molatk aike el betok el tekoi el desuub er a bek el sandei el oeak sel dongetmokl er kid el kirel a omengiuel a Biblia e kuk derenges a uldesuir a rebebil el kirel.

5. Ngmekerang aika el miting er kid e mla ngosukau el mo meduch el oltaut a omellach er a Biblia e dirrek el omerk er a klumech?

⁵ A miting er kid a osisecheklid el mo oltaut er a klengar er kid aike el tekoi el desuub er a Biblia. (1 Th. 4:9, 10) El ua tiang, ngmla ta el mteloi er a Omesubel a Ongkerongel e kmal mlo soam el lmuut el kilungii a omesiungem el mo er a Jehovah, e lmuut el mo ungil el meluluuch, me a lechub e ke ousubes er a odam me a lechub e ngodos er kau? E aike el miting el kirel a Klengar er Kid a Rekristiano me a Omesiunged, a sebechel el osisecheklid er a rolel a domerk er a klumech, me a rolel e kede ngosuterir a rebebil el mo medengei a klemerang er a Biblia.​—Mt. 28:19, 20.

6. Ngmekerang a bek el miting el melisiich er kid?

⁶ Ngmelisiich er kid. A beluulechad er a Satan a di melasem el mengitechut a klaumerang er kid e dirrek el mengitechut a rengud. Engdi a miting er kid a melisiich er kid e dirrek el meskid a klisiched me ngsebeched el melemolem el mesiou er a Jehovah. (Monguiu er a Rellir 15:30-32.) Ngbetok el taem el dosaod a otutel a ulaoch el medung er a Biblia. E tiang a ngosukid el lmuut el mo ulterekokl a rengud el kmo a telbilel a Jehovah el kirel a ngar medad a mo tmaut. Me a rudam me a rudos er kid a dirrek el melisiich er kid el oeak sel loltobed a cheldecheduch me a dirrek el sel longer er a temel a miting e leblak a rengrir el mengitakl. (1 Ko. 14:26) Me sel dongedecheduch er tir er a uchei me a uriul er a miting e ngmera el mo mesisiich a rengud, e le te ngar er ngii a rebetok el sechelid el tir a betik a rengrir er kid.​—1 Ko. 16:17, 18.

7. Ngera uchul me ngklou a ultutelel el debo er a bek el miting?

⁷ Ngar er a miting e kede nguu a ngelsuil a chedaol reng er a Dios. A Jesus a ousbech er a chedaol reng er a Dios el omekrael a ongdibel. Ngdilu el kmo, ngkired “lorrenges a lolekoi a  Reng” el mo er a ongdibel. (Och. 2:7) A chedaol reng a ngosukid me ngsebeched el oltngakl a omengesuseu e mo bekeu el omerk er a klumech. Ngdirrek el ngosukid el mo ungil el melilt a tekoi el doruul. Seikid a uchul me ngkmal kired el mo er a bek el miting me bo el sebeched el ngmai a ngeso el okiu a chedaol reng.

8. Ngmekerang e mo sebeched el ngosuterir a rudam er kid sel debo er a miting e donger e dongitakl? (Dirrek el momes er a baks el “Sel Lorael el Mo Remei e Ngkmal Ungil a Rengul.”)

⁸ Ngtechelled el ochotii el mo er a rudam me a rudos er kid el kmo ngbetik a rengud er tir. A rebetok el ngar er a ongdibel a meringel el outekangel a mondai er tir. Me a apostol el Paulus a milluches el kmo: “Bo de kaukerreu” el rokui. (Heb. 10:24, 25) Me ngsebeched el ochotii a ulekerreuid el mo er a rudam er kid el okiu sel bo dedak el kasisiich er a temel a miting. Tiang a dirrek el techelled el ochotii el mo er tir el kmo, ngsoad el teloi er tir e mengedecheduch er tir e kede dirrek el semeriar el mo medengei el kmo te ua ngerang. Kede dirrek el melisiich er tir sel lorrenges a nger er kid me sel dongitakl.​—Kol. 3:16.

9, 10. (a) Ngmekerang a Johanes 10:16 e melisiich er kid el mo dmak el ngar er a miting? (b) Kede mekerang e ngosuterir tirke el mla motngakl er a telungalek er tir sel deblechoel el mo er a miting?

⁹ Ngar er aika el miting e kede olekes er a deleuill er kid el rokui. (Monguiu er a Johanes 10:16.) A Jesus a ulemekesiu er ngii el ua klekerengel a sib e tirke el oltirakl er ngii a ua delebechel el sib er ngii. Me ka molatk er tiang: A lsekum a teblo el sib a ngar bebul a bukl, e a teblong a ngar er a dellas, e a chimong a kuk ngar er a ta er a basio, e ngbelkul a kmo aika el sib a ta el delebechel? Ngdiak leuaisei, e le delebechel el sib a dmak el rokui e oltirakl er a klekerengel. Me ngdi osisiu, ngkmal diak el kired el mo cheroid er a rudam er kid el belkul a kmo ngdiak dengar er a miting. Ngkmal kired el mo dmak el rokui me bo deua “tal delebechel el obengkel a tal mengkerengel a sib.”

¹⁰ A miting a ngosukid el mo oba kltarreng el ua ta el telungalek. (Psa. 133:1) A rebebil el ngar er a ongdibel a bla loltngakl er tir a rechederir, el ua rederrir me a redemerir me a lechub e te bebil er tir. Engdi a Jesus a tibir el kmo ngmo mesterir a telungalek er tir, el tir a betik a rengrir er tir e omekerreu er tir. (Mk. 10:29, 30) Me sel lak dongoit a miting, e ngmo sebeched el ua chedam me a lechub e kede chedil me a lechub e kede odam me a lechub e kede odos el mo er tirka el chad. Me a lsekum kede melatk er tia el tekoi, e ngkmal mo soad el melemolem el ngar er a bek el miting.

11. Ngmekerang a miting er kid e ngosukid el mo msang a Jehovah aike el kirel el mo er ngii?

¹¹ Ngar er a miting e kede mo msang a Jehovah aike el kirel el mo er ngii. Ngii el Ulemeob er kid a uchul me ngkired el mereng a sulel e mengebkall er ngii e dirrek el oldanges er ngii. (Monguiu er a Ocholt 7:12.) Me ngsebeched el meruul er tiang sel dengar er a miting, e dongitakl e donger e doluluuch el mo er a Jehovah. Me ngkmal ileakl a techall el dobang el mo sebeched el ngar er a miting er a bek el taem e dmak el mengull er a Jehovah!

12. Ngua ngera uldesuel a Jehovah sel dolengesenges er ngii e debo er a miting?

¹² A Jehovah a ngike el Ulemeob er kid, me ngkmal kired el olengesenges er ngii. Ngmengelechel er kid el mo dmak el ngar er a miting el ileakl er chelecha el lolekedang a ulebongel. Me sel dolengesenges er ngii e ngkmal mo dmeu a rengul. (1 Jn. 3:22) Ngmedengei el kmo ngkmal soad el ngar er a miting, e dirrek el omes er a blakerreng er kid el mo er a miting el kmal mekreos.​—Heb. 6:10.

13, 14. Kede mekerang e mo kmeed er a Jehovah me a Jesus sel dengar er a miting?

¹³ Sel debo er a miting e kede ochotii el mo er a Jehovah el kmo ngsoad el mo kmeed er ngii me a Ngelekel. Ngar er a miting e kede mesuub er a Biblia me a Jehovah me aike el tekoi el kired el meruul me sel rolel a klengar el soal. (Isa. 30:20, 21) Me a rebebil el diak losiou er a Jehovah sel lemei er a miting e te dirrek el mo mesang el kmo a Dios a mera el omekrael er kid. (1 Ko. 14:23-25) A Jehovah a omekrael a miting er kid el ousbech er a chedaol reng er ngii, me a tekoi el desuub a mla er ngii el mei. Me sel debo er a miting, e kede mo melechesuar a bltkil a rengul el me er kid e dirrek el mo olekeed er kid er ngii.

¹⁴ A Jesus el Bdelul a ongdibel a dilu el kmo: “Ele re teru ma lechub e te tedei a bo le dak el oba ngklek, e ak ngar a delongelir.” (Mt. 18:20) Me a Biblia a dirrek el mesaod er a Jesus el kmo, ngomes e omekrael a ongdibel er ngii. (Och. 1:20–2:1) Me ngkmal bleketakl el kmo a Jehovah me a Jesus a obengked e melisiich er kid sel dengar er a miting. Me a omomdasu, ngmo ua ngera uldesuel a Jehovah sel lomes er kau el blak a rengum el olekeed er kau er Ngii me a Ngelekel?

15. Kede mekerang e ochotii el kmo ngsoad el olengesenges er a Dios sel debo er a miting?

¹⁵ Sel debo er a miting e kede ochotii el mo er a Jehovah el kmo ngsoad el olengesenges er ngii. A Jehovah a kmal diak lorrimel er kid el mo meruul a soal. (Isa. 43:23) Me sel dekengei el olengesenges a llechul e dengar er a miting e kede ochotii el kmo ngbetik a rengud er ngii e dirrek el oumerang el kmo a omengederederel a kot el ungil. (Rom 6:17) El ua tiang, ke mo mekerang a lsekum a merredelem a soal a di moureor er a bek el taem me ngmo diak a temem el mo er a bek el miting? Me a lechub e a kabelment er a beluu a otebedii a tekoi el kmo, a Resioning er a Jehovah a mo obals me a lechub e te mo kelebus me a lechub e te mo mukringel a lsekum te mo dmak el mengull er a Dios er tir? Me a lechub e ke kongei el mo milil e diak ko bo er a miting? Me ngar er a chelsel a chouaika el blekeradel, e ngkmal kired el di kid el melilt a tekoi el bo doruul. (Rel. 5:29) Me a bek el taem el dolilt el mo olengesenges er Ngii, e ngkmal mo dmeu a rengul el kired.​—Osi. 27:11.

16, 17. (a) Kede mekerang e mo medengei el kmo a miting a kmal mle klou a ultutelel er a rekot el Kristiano? (b) Ngmle ua ngera uldesuel a Brother George Gangas el kirel a miting?

¹⁶ A uriul er a Pentekost er a rak er a 33 e a Rekristiano a mle blechoel el kldibel e mengull er a Jehovah. Te “mle blak a rengrir el  mesuub osisecheklir a re apostol, e ngar ongdibel.” (Rel. 2:42) Ngdimlak bo lak lekldibel el mo lmuut er a taem el kabelment er a Rom me a remengeteklel a klechelid er a Judea a uleldechelakl er tir. Te bai millemolem el mo dmak el kldibel, alta ngdimlak lebeot er tir el meruul el uaisei.

¹⁷ A rechedal a Jehovah er chelechang a dirrek el oba klou el omereng el saul el kirel a miting. A George Gangas el mle betok er a 22 el rak el lechedal a Chelechad er a Ruungerachel a dilu el kmo: “Ngkot el soak el tekoi sel bo kteloi er a rudam er ngak el ngar er a miting. Ngkmal soak el mereched el mong er a uchei er a miting, e dirrek el soak el mo meoud el merael a lsekum ngsebechek. Ngkmal dmeu a renguk sel kungedecheduch er a rechedal a Dios. Sel kteloi er tir e ngkmal di ua kteloi er a rechad er a blik.” Ngdirrek el dilu el kmo: “Ak kmal di blechoel el oureng el mo er a miting.”

18. Ngua ngera uldesuem el kirel a miting er kid, e ke mla tibir el mo mekerang?

¹⁸ Me kau, ngdirrek el uaisei a uldesuem? A lsekum nguaisei, e molemolem el blak a rengum el ngar er a miting, el mo lmuut er a taem el meringel er kau el mong. Sel moruul el uaisei e ke ochotii el kmo ke di ua uldesuel a King el David el dilu el kmo: “RUBAK, ng soak a blil a delengcheklem.”​—Psa. 26:8.