1, 2. (a) Ngera el omelsemai a lechelebangel a rechad er a ngodech el beluu er chelechang? (b) Ngera el uleklatk a ledillii a apostol el Paulus, e ngera el ker a bo dosaod? (Momes er a siasing er a uchelel a suobel.)

 NGBETOK er a 30 el rak er a uchei, e a Osei el dimlak el Sioning er a Jehovah a chilitii a belual er a Ghana e mlo kiei er a beluu er a Europe. ^[1] Ngdilu el kmo: “Ak mlo melechesuar el kmo a ruumesingd el chad a dimlak lomekerreu er ngak, e a eltel me a kelekeltel a beluu a kmal mle ngodech, me sera ktobed er a skozio e ak mera el mlo mekerasem me ak di lilangel.” Ngkmal mle meringel er ngii el mesuub a tekoi er tia el beluu a uchul me ngmlo betok er a ta el rak e ngmlo sebechel el metik er a ungil el urerel. Engdi ngii el kmal cheridang er a belual a uchul me ngdi oureng er a rechad er a blil.

² Ka di molatk, ngua ngera el omeruul a soam oleko ke chelebangel er a osisiu el blekeradel? Ngulterekokl el kmal soam a lsekum a rechad er a ongdibel a kmal ngoikau er a tmuil, e le ngbetik a rengrir er kau el diak lultuil er a kmo ke chad er ker, e uangera chiro er a bedengem. E a Biblia a mengelechel er a remera el Kristiano el kmo: ‘Lako mobes  lomtechakl rar ngar chomerael.’ (Heb. 13:2, BT) Mada me bo dosaod aika el ker el kmo: Ngua ngera uldesuel a Jehovah el kirir a rechad er a ngodech el beluu? Kid, ngkired el ngodechii a uldesued el bedul a chad er a ngodech el beluu? Kede mekerang e rullii a chad er a ngodech el beluu el mo soal teloi er a ongdibel er kid?

3, 4. A doltirakl er a Exodus 23:9, e a Dios ngmle soal a rechad er a Israel a bo le uangera omerellir el bedul a rengodech el chad? E ngera uchul?

³ A uriul er a Jehovah er a lotebedeterir a rechedal er a klsibai er a beluu er a Ekipten, e ngmilsterir a llach el ulsisecheklterir el mo olecholt a ungil el omeruul el bedul a rechad er a ngodech el beluu el ulebengterir. (Exo. 12:38, 49; 22:21) Me alta e ngdiak lebeot a klengar er a rechad er a ngodech el beluu, engdi a Jehovah a kmal omekerreu er tir. El ua tiang, ngmle sebechir el merridm a kall el bilechei a rechad el ousers.​—Lev. 19:9, 10.

⁴ A Jehovah a dimlak di lollach er a rechad er a Israel el mo olecholt a omengull er tir el mo er a rechad er a ngodech el beluu, e ngdirrek el mle soal a lak lobes er a ringelel sel dechad er a ngodech el beluu. (Monguiu er a Exodus 23:9.) A uchei er a bo el sibai a rechad er a Israel er a beluu er a Ekipten, e a rechad er a Ekipten a dimlak el sorir tir e le tir el mle ngodech. (Gen. 43:32; 46:34; Exo. 1:11-14) Me ngkmal mle meringel a klengar er tir er a lengar er a Ekipten. Me a Jehovah a mle soal a lak lobes er sel blekeradel, e bai bo lungil a omerellir el bedul a rechad er a ngodech el beluu.​—Lev. 19:33, 34.

5. Ngera ngosukid el mo olecholt a ungil lomeruul el mo er a rechad er a ngodech el beluu el ua omerellel a Jehovah?

⁵ A Jehovah a kmal dirkak lemengodech. Me a lsekum e ngar er ngii a ngodech el chad el mei er a ongdibel er kid, e ngkmal diak el kired el obes el kmo a Jehovah a dirrek el dirk olecholt a ungil el omeruul el mo er tirka el chad. (Dut. 10:17-19; Mal. 3:5, 6) Molatk aike el omelsemai el lechelebangel a rechad er a ngodech el beluu. Nglocha diak lodengelii a beches el omelekoi, e dirrek el locha mo mekngit a omeruul el mo er tir. Me bo leblak a rengud el olengeseu er tir e bo lungil a omerelled el bedul tir.​—1 Pe. 3:8.

6, 7. Ngera ochotii el kmo a Rekristiano er a irechar a milsuub el mo diak longetukel er a rechad?

⁶ A Rekristiano er a irechar a mle kirir el mesuub el mo diak longetukel er a rechad el ngii a mle omerellir a rechad er a Judea. Sera Pentekost er a rak er a 33, e a Rekristiano el chad er a Judea el kiliei er a Jerusalem a ullecholt a ungil el omeruul me a bltikerreng el mo er a rengodech el chad el mlei el mla er a kakerous el beluu. (Rel. 2:5, 44-47) Me tiang a ochotii el kmo, tirka el Kristiano er a Judea a mle ungil medengelii a belkul a ‘domtechakl’ er a rechad er a ngodech el beluu.

⁷ Seikid el taem e ngar er ngii a tekoi el dilubech. Tirke el chad er a Judea el millekoi a tekoi er a Grik a milengeremrum, e le remelakl dil a dikea ruklir er a omerusel a kall. (Rel. 6:1) Me a rechapostol a millilt er a reteuid el chad el mo mesmechokl er tia el tekoi el mo ungil el kutmeklii a omerusel a kall el mo tabesul el mo er a rechad el rokui. Me a rechapostol a millilt er a rechad el oungakl a ngakl er a Grik me bo lungil a rengrir a remelakl dil el diak el medakt.​—Rel. 6:2-6.

8, 9. (a) Ngera me ngkired el merriter er kid el kirel a omengetukel? (b) Ngera el tekoi a kired el oureor el choitii? (1 Pe. 1:22)

⁸ Me kid a kmal smau aike el siukang er a beluad a lechetid me a lsoad. (Rom 12:2) Kede dirrek el locha orrenges er a rechad er a beluad me a urered me a skuled el melekoi a mekngit el kirir a rechad er a ngodech el beluu el ngodech a bedengir me a kleblillir. Me ngua ngera uldesued el kirel aika el mekngit el uldasu? Me a lechub, e kede mo mekerang a lsekum a chad a  melenguul er kid me a lechub e ngsiukang er a beluad?

⁹ Ngmla er ngii a taem el apostol el Petrus a milengetukel er a rechad el dimlak el chad er a Judea. Engdi cherengel a taem e ngmilsuub el mo ngodechii tia el mekngit el uldesuel. (Rel. 10:28, 34, 35; Gal. 2:11-14) Me ngdi osisiu, a lsekum kede melechesukid el ngar er ngii a omengetukel er a uldesued e ngkmal kired el mo blak a rengud el oureor el ngubetii el mo diak. (Monguiu er a 1 Petrus 1:22.) Me ngera sebechel el ngosukid? Lak mobes, kid el rokui a diak demecherrungel me kede rokui el diak derredemelel a osobel. (Rom 3:9, 10, 21-24) Me ngkmal diak el kired el mo omdasu el kmo kede kuk ungil er a rebebil! (1 Ko. 4:7) Ngkired el mo ua uldesuel a Paulus er a ledu er a rekldemel el Kristiano el kmo, “ko mla mo diak mchad ra ngodech el beluu” e ko bai mla mo chedal a “telungalek ra Dios.” (Efe. 2:19, BT) Me ngkired el mo blak a rengud el oureor el choitii a omengetukel er a rengud me bo el sebeched el ngodechii a blekerdeled el mo diak dongetukel.​—Kol. 3:10, 11.

10, 11. Ngmilekerang a Boas e oukerebai er a osengel a Jehovah el bedul a rechad er a ngodech el beluu?

¹⁰ A blak a rengul el Boas a uluukerebai er a Jehovah el kirel a uldesuel el bedul a rebebil. Ngmilekerang? Sera bo loldingel er a sersel er a temel a omeridm e ngmilsa Ruth el redil er a Moab el ngar er a sersel. Ngkmal mle blak a rengul el oureor el mengudel a rdechel a dellomel. E a doltirakl er a Llach er a Moses, e tiang a mle llemeltel a Ruth el meruul er ngii. Engdi sera bo lodengei a Boas el kmo ngulelturk er a uchei er a bo longudel a rdechel a dellomel, e ngkmal chilat er ngii e kilengei er ngii me ngmlo meruu er a chelsel a sers.​—Monguiu er a Ruth 2:5-7, 15, 16.

¹¹ Me a tekoi el dilubech er a uriul a ochotii el kmo, a Boas a kmal mle kerekikl er a Ruth el ngii a mle chad er a ngodech el beluu. Ngmilengemedaol er ngii el mo teloi er a remekekerei el redil el chedal, me lak bo longesang er ngii tirke el sechal loureor er a sersel. Ngdirrek el mle kerekikl el mesang, me ngsebechel el ngmai a ungilbesul el ildisel a kall me a ilumel el ralm el di ua rechad er a ureor. Me a Boas a ulechotii a omengull er ngii el mo er ngika el redil er a ngodech el beluu e millisiich er ngii.​—Rut 2:8-10, 13, 14.

12. A ungil el omeruul, ngera ngrullii el mo er a rechad er a ngodech el beluu?

¹² A Boas a dimlak el di loruul a ungil el mo er a Ruth e le ngii el mle betik a rengul er a delal a bechil el Naomi, e ngdirrek el mla mo mesiou er a Jehovah e mo er Ngii el kirel a ulekerreu. A Boas a uluukerebai er a diak el mengodech el bltkil a rengul a Jehovah el mo er ngika el redil me ngmle ungil a omerellel el mo er ngii. (Rut 2:12, 20; Osi. 19:17) Me ngdi osisiu er chelechang, a lsekum e kede omtechakl er a rechad, e ngmo sebeched el lolengeseu er a “rokui el chad” el mo medengelii a klemerang e mo mesa el kmo a Jehovah a betik a rengul er a rokui el chad.​—1 Ti. 2:3, 4.

13, 14. (a) Ngera me ngkired el outkeu er a rengodech el chad el mei er a Blil a Ongdibel? (b) Ngera sebechel el ngosukau el mo beot er kau el mengedecheduch er a chad er a ngodech el beluu?

¹³ Ngdirrek el sebeched el olecholt a ungil lomeruul el mo er a rengodech el chad el oeak sel doutkeu er tir sel lemei er a Blil a Ongdibel. A rechad er a ngodech el beluu el melukl el mo er a ta er a beluu a locha telkib el merur me te di mengeroid er tir er a rechad. Ngoeak a siukang me a blekerdelel a klengar er tir e nglocha rulleterir el mo omdasu el kmo te kuk ngodech er a rebebil. Me ngkmal kired el mereched el outkeu er tir e ochotii el kmo kede semeriar er tir. Me a lsekum e ngar er ngii a JW Language app e ngsebeched mesuub a tekingir me bo demeduch el outkeu er tir el ousbech a tekingir.​—Monguiu er a Filipi 2:3, 4.

¹⁴ Nglocha telkib el meringel er kau el mengedecheduch er a chad er a ngodech el beluu. Me  ngsebechem lomuchel el ouchais er ngii a bebil el tekoi el kirem. Seikid e ke locha mo medengei el kmo ngar er ngii a tekoi el kau me ngii a osisiu a uldesuiu el kirel. E lak mobes, a derta el beluu a ngar er ngii a tekoi el lemesisiich er ngii me a dirrek el lemechitechut er ngii.

15. Ngera ngosukid el mo melemalt a uldesued el bedul tirke el chad er a ngodech el beluu el kiei er a beluad?

¹⁵ A lsoad el rulleterir a rebebil el mo sorir el teloi er kid, e ngkired el melatk el kmo, ‘Oleko ak ngar er a ngodech el beluu, e ngua ngera el blekeradel a soak a bo el blekerdelir a rechad el bedul ngak?’ (Mt. 7:12) Me bo leklou a rengum el bedul tirke el dirk melasem el mo meduch el kiei er a beluam. Nglocha mo diak dungil medengelii sel rolel a lomdasu e loruul a tekoi. Engdi ngungil a bo leklou a rengud el kirel a blekerdelir, er a bai di domdasu e dongerechir er tir el mo meruul a tekoi el uai kid me a lechub e bo lemeduch el oltirakl a siukang er a beluad.​—Monguiu er a Rom 15:7.

16, 17. (a) Ngera sebechel el rullid el lmuut el mo kmeed er tirke el chad er a ngodech el beluu el ngar er a ongdibel er kid? (b) E ngera sebeched el remuul el ngosuterir?

¹⁶ Ngmo beot er kid el mo medengelterir tirke el chad er a ngodech el beluu el ngar er a ongdibel er kid, a lsekum kede mesuub el kirel a belurir me a siukang er tir. Me ngar er a temel a omengull el telungalek er kid, e ngsebeched el merriter a tekoi el kirir tirka el chad el ngar er a ongdibel me a dirrek el basio el doldingel er ngii. A ta er a rolel, a sel domekedong er tir el mei er a blid e domengur el obengterir. A Jehovah a “mla mekengii a rael el kirir” me bo loumerang, me ngsoad el oukerebai er Ngii el mekengii a blid el mo er a rechad er a ngodech el beluu el “tirkel bebil er kid el oumerang.”​—Rel. 14:27; Gal. 6:10; Job 31:32.

¹⁷ Me sel dobengterir tirke el telungalek el millukl el mei er a beluad, e ngdirrek el ngosukid el mo ungil medengelterir e mo oba omereng el saul el kirel a blakerreng er tir el melasem el melodech  a rolel a klengar er tir. Kede locha mo medengei el kmo te ousbech a ngeso el mo mesuub er a omelekinged. Ngdirrek el locha sebeched el ngosuterir el mo smiik a blirir me a ungil el urerir. Me a chouaika el tekoi a ngosuterir tirka el rudam me a rudos er kid er a kmal klou el tekoi.​—Osi. 3:27.

18. Ngera el kerebai el kirel a omengull me a omereng el saul a sebechir a rechad er a ngodech el beluu el mo oukerebai er chelechang?

¹⁸ Me nguaisei, engdi tirka el millukl a kmal sorir el mo melodech a uldesuir el mo kongei el oltirakl a siukang er a beluu el lekiei er ngii. E a Ruth a ulechotii a ungil kerebai el kirel tiang. A kot, e ngulechotii a omengull el kirel a siukang er a beluu el leblo er ngii el okiu sera lolturk el mo mengudel a rodech. (Rut 2:7) Ngdimlak bo lemeterekakl er tia el techellel me a lechub e lulemdasu el kmo a rechad a blsel er a kmung ngerang. E a ongerung, ngdi mle mereched el mereng a sulir a rebebil el ullecholt a ungil el omeruul el bedul ngii. (Rut 2:13) Me a lsekum a rechad er a ngodech el beluu a olecholt a osisiu el ungil lomeruul, e a rudam me a rudos er tir er tia el beluu me a dirrek el rechad er a beluu a mo oba omengull el bedul tir.

19. Ngera bebil el uchul e ngkirel el mo ungil a blekerdeled el mo er a rechad er a ngodech el beluu?

¹⁹ Me ngkmal dmeu a rengud e le Jehovah a mla ochotii a diak lemekimd el bltkil a rengul, e mesterir a techellir a rokui el chad el mo rongesii a ungil chais. Me ngar er a belurir e a rebebil a locha mo diak el sebechir el mesuub a Biblia, me a lechub e te mo er a miting lobengterir a rechedal a Jehovah. Engdi chelechang e ngmla mo er ngii a techellir el me teloi er kid, me ngkired el ngosuterir me bo lolechesuar el kmo te bebil er kid el diak lengodech el chad. Alta e ngdiak lebetok a ududed me a lechub e ngmeringel er kid el ngosuterir er a klou, engdi sel bo lungil a blekerdeled el bedul tir e kede oukerebai er a Jehovah el betik a rengul er tir. Mada debo er a tkurrebab el sebeched el oukerebai er a Dios e doltuchakl er a rechad er a ngodech el beluu el teloi er kid!​—Efe. 5:1, 2.