A DIOS ngmo meskau a betok el kerruul a lsekum ngblak a rengum el mo er ngii? Ngsebechel el mo uaisei, engdi nglocha diak el aike el kerruul el molatk el mo ngmai. Ka molatk er a kerebil a delal a Jesus, el Maria. A anghel el Gabriel a mlo duum er ngii e dilu el kmo, ke mo mechellii a Ngelekel a Dios e le “kau el mler kau a grazia.” (Lukas 1:28, 30-32) Me nguaisei, engdi ngii a mle chebuul. Sera bo lolenget er a uriul er a lemechell a Jesus, engdi mle sebechel el melenget a “teblol belochel er a ked ma lechub e ng teblong el ulekeroul el ngelekel a belochel,” e aikang a mle tengetengir a remechebuul el mo er a Jehovah.​—Lukas 2:24; Levitikus 12:8.

Me a chelebulel a Maria ngbelkul a kmo ngdimlak el nguu a klengeltengat er a Dios? Ngkmal diak, e le sera bo loldingel er a chedal el Elisabeth, e ngmle dmeu a rengul el melekoi el kmo: “Ke [Maria] ngeltengat ra delongelir ar dil, ma rodech ra delem me ngngeltengat!” (Lukas 1:41, 42) Me a Maria a uleba ileakl el techall el mo oungalek er a Ngelekel a Dios.

A Jesus a dirrek el mle chebuul. Ngdimlak di el mechell el ngelekir a remechebuul, e ngdirrek el mle chebuul er a klemengetel a klengar er ngii. A ta el taem e ngdilu er a chad el mle soal el mo oltirakl er ngii el kmo: “A kitsune a ngarngii a blil el chiechab, ma suebek el charm ra milidiul a ngarngii a lukel; e ngdi Ngelekel a chad a diak a bo lotilii a bdelul er ngii.” (Lukas 9:57, 58) Me nguaisei, a Jesus a mlei er tia el beluulechad el mlo uchul e ngmlo sebechir a rultirakl er ngii el mo ngmai a betok el kerruul. A apostol el Paulus a milluches el kmo: “E mlo chebuul el kemiu a uchul, el kirel me kemiu moeak a chelebulel el mo meteet.” (2 Korinth 8:9) A Jesus ngmilsterir a rultirakl er ngii a ngera el kerruul? E ngera el kerruul a ngar er ngii er kid er a chelechang?

Ngera el Bedengel a Kerruul?

A kerruul er a beluulechad a sebechel el mo mengitechut er a klaumerang, e le a merau el chad a sebechel el mo ultuil a klaumerang er ngii er a kerruul er a bai bo el oumerang er a Dios. A Jesus a dilu el kmo: “Ngkmal meringel rar ngarngii a daisang er tir el mo soiseb ra rengedel a Dios!” (Markus 10:23) Me ngbleketakl el kmo a Jesus a dimlak el omesterir a rultirakl er ngii a kerruul er tia el beluulechad.

A rebetok el Kristiano er a kot el dart el rak a dirrek el mle chebuul. A chad el mlechell el chitechut er a lolengit a udoud, e a Petrus a dilu el kmo: “A silber ma kolt a diak er ngak, ak di meskau a ikel ngarngii er ngak; ma kdmu er kau loba ngklel a Jesus Kristus ra Nazareth el kmo, morael, me morael.”​—Rellir 3:6.

A tekingel a Jakobus a dirrek el olecholt el kmo oumesingd er a rechedal a ongdibel er a Rekristiano a mle mechebuul. Ngmilluches el kmo: “Betik ra renguk lodam er ngak, morrenges. A Dios ngdiak bai bla lolilt er tirikel mechebuul er tial belulechad el omekmerau er tir ra kloumerang, e rulleterir ar betik a rengrir er ngii el mo oudiukes er sel le tilbir el rengedel a king?” (Jakobus 2:5) A Paulus a dirrek el dilu el kmo ngdiak el betok “ar mellomes a rengrir ra klechad” me a lechub “ar ngarngii a klisichir” me “ar meteet” el mlo chedal a ongdibel er a Rekristiano.​—1 Korinth 1:26.

A Jesus ngulemesterir a ngera el kerruul a ruleltirakl er ngii a lsekum ngdimlak el kerruul er a klechad? Ngar er a babilengel el mo er a ongdibel er a Smirna, e ngdilu el kmo: “Ak medenge ikel mcharm er ngii ma chelebulem (e ngdi kau a merau).” (Chocholt 2:8, 9) A Rekristiano er a Smirna alta e te mle chebuul er a silber me a kolt, engdi te mle merau er a tekoi er a klereng, e le ngklaumerang me a blakerreng er tir el mo er a Dios a uchul. A klaumerang a mekreos “ele ngdiak le rokuil  chad a ngar ngii a kloumera er tir.” (2 Thesalonika 3:2) Ngar er a osengel a Dios e tirke el diak a klaumerang er tir a chebuul.​—Chocholt 3:17, 18.

A Kerruul a Mo er Ngii el Klaumerang a Uchul

A klaumerang ngklou a ultutelel el okiu a ngera el rolel? Tirke el ngar er ngii a klaumerang er tir er a Dios a ngmai a klungiolir er a “obdois el klechubechub ma ducherreng ma kllourreng er ngii.” (Rom 2:4) E dirrek el okiu a klaumerang er tir er a olubet el tengetengel a Jesus, e te nguu a klausubes el kirel a telucheklir. (Efesus 1:7) Me a lmuut el tang, a llomeserreng el okiu a “tikingel a Kristus” a mo er tirke el oba klaumerang. (Kolose 3:16) Me sel loluluuch el mo er a Dios el oba klaumerang, e a ‘diak le metuk ra klemedengei rar chad el budech ra Dios a mo kokar a rengrir ma chomelebedebekir’ el mo uchul a deurreng.​—Filipi 4:7.

Uldekial aika el rokui, e tirke el oumerang er a Dios el okiu a Ngelekel el Jesus Kristus, a oba omelatk er a diak a ulebengelel el klengar. Ngkmal merael a chisel sel tekingel a Jesus el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirkel rokui loumera er ngii a diak bo lriid, e bai mo oba diak a ullebengelel klengar.” (Johanes 3:16) Tia el omelatk a mo mesisiich a lsekum a chad a nguu a melemalt el klemedengei er a Chedam me a Ngalek, e le Jesus a dilu el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.”​—Johanes 17:3.

Me a klengeltengat er a Dios a mo er ngii el okiu a ungil el deluill er kid el obengkel, e dirrek el mo uchul a klisichel a bedenged me a rengud. El ua tiang, a uchei er a bo lodengelii a melemalt el moktek er a Dios, e a Dalidio er a beluu er a Brazil a mle smecher er a omelim el  rrom. A omelmil er a rrom a kmal mle klou a letemellii er a chelsel a telungalek er ngii, e dirrek el mlo uchul e ngblechoel el diak a ududel. Ngmlo omuchel el mesuub a Biblia el obengterir a Resioning er a Jehovah e ngildechii a klengar er ngii.

A tekoi el lesiluub er a Biblia a mlo uchul e ngchiloit aike el mekngit el blekerdelel. E ngildechii a klengar er ngii el mo oltirakl er a Biblia e dilu el kmo: “Ak mle blechoel el milil er a bar engdi chelechang e ak di blechoel el oldingel a obliil.” Me chelechang e ngmla mo mesiou er a Dios el mui el taem, me a choua itia el omelodech a dimlak di blo el uchul a klisichel a bedengel, e ngdirrek el mlo uchul e ngngar er ngii a ududel. Me ngmelekoi el kmo: “Chelechang e a kuusbech a ududek el olengeseu er a rebebil e dirrek el omechar aike el kuusbech.” Ngmla mo er ngii a rungil el sechelil el tir a oba osengel a Dios el kirel a tekoi. Me chelechang e ngngar er ngii a budech er a uldesuel, el tekoi el dimlak a ta el lolatk er ngii er a uchei er a bo lodengelii a Dios.

Ngar er ngii a lmuut el ta er a tekoi el dilubech el mlo er a chad el milekurulii a klaumerang er ngii el mo er a Jehovah el Dios, el Renato. Chelechang e ngmeringel er kau el mo oumerang el kmo ngkmal mle chetituokel a klengar er ngii, e le sel momes er ngii e ngblechoel el di dmeu a rengul. A delal a di milechellii e nguu el choitii. Me a reteru el redil a mlo metik er ngii el ngar er a eungel a kingall er a tkul a rael, el telebtabd a bedengel e di doall e dirkak lemedebes a udesel e seluk er a tutuu. Te ulemdasu el kmo ngngelekel a katuu, engdi sera bo lodengei el kmo ngtolechoi e te di mle mereched el nguu el mo er a osbitar.

A ta er tirka el redil a Sioning er a Jehovah, me nguluuchais er a Rita el ta er a Sioning el kirel ngika el tolechoi. Ngika el Rita a ngar er ngii a di ta el ngelekel el redil e kmal soal a lebo er ngii a ngelekel el sechal, me ngmillasem er a ngar er a mong el lmuut el mo dioll e di mengai. Me ngkilengei el rodelii a Renato.

A Rita a silbedii a Renato el kmo ngdimlak lochelii, engdi nguluubltikerreng el mo er ngii e ulsisecheklii er a tekoi er a klereng. Ngmerrael el mo klou e mlo semeriar a tekoi el ngar er a Biblia me ngkmal oba omereng el saul el kirel a omeruul el mlo uchul e ngsilobel. Ngmengedengader a iuechel a medal er a bek el taem sel longuiu a tekingel a David el ngar er a psalm el kmo: “A demak ma delak a bo le chitak, e a RUBAK a mo omekerreu er ngak.”​—Psalm 27:10.

Ngulechotii a omereng el saul er ngii el mo er a Jehovah er a tekoi el leriruul er a bo el metecholb er a rak er a 2002, e bo el omuchel el ngar er a mui el taem el omesiou er sel ongingil el rak. Ngdirkak bo lodengelii a mera el demal me a delal, engdi ngmelechesuar a kot el ngar er a bab el sengk el bla lenguu el mlo medengelii e mlo oumerang er a Jehovah, el ua betik a rengul el Chedam.

Ke locha dirrek el oureng el mo er ngii a kmes e ungil el deluill er kau me a Dios, el ngii a sebechel el toketekii a ungil el klengar. Tia el techall el mo nguu a ungil el deluill el obengkel a Jehovah el Dios me a Ngelekel el Jesus Kristus a mo er a rokui el chad, el merau me a remechebuul. Alta e ngdiak el bo el uchul a kerruul er a klechad engdi ngsebechel el mo uchul a budech er a rengud, el ngii a diak el sebechel a rokui el udoud er tia el beluulechad el mecherar. Ngkmal klemerang a tekoi el kmo: “A klengeltengat er a Jehovah a rullau el mo merau, e diak a ringel el obengkel.”​—Osisechakl 10:22, NW.

A Jehovah el Dios a kmal semeriar er tirke el chad el sorir el mo er ngii. Me ngmelekoi el kmo: “Ulekum me kom rirenges a tekingek! Seikid e a budech er kemiu a omaoch el ua omoachel ma llemeltiu a ua chedesaoch er a daob.” (Isaia 48:18) Ngdirrek el tibir el mo er tirke el mo er ngii el oba melemalt el uldasu me a ungil el blekeradel el kmo ngmo omekngeltengat er tir e dmu el kmo: “Moluu er a RUBAK, e le bor iou a rengum, me bo meteet, e mkuoll, e le kemanget a klengar er kau.”​—Osisechakl 22:4.

[Siasing er a 5 el llel]

Me alta e a Jesus me a telungalek er ngii er tia el beluulechad a mle chebuul engdi te mlukngeltengat er a Dios