A SONIA a mlechell er a beluu er a Spain. Ngulebengkel a delal el mo er a miting er a Resioning er a Jehovah er a dirk lekekerei. Engdi ngmillukl el mo er a beluu er a London, el ngar er a England, er a leklunga el redil, e mlo oureor er a kombalii el kirel el oungerachel a ududir a rechad el ngii a oureor el mo er tir.

Ngkmal mle imis el soal a urerel e le ngmle klou a ududel e dirrek el uluungerachel a ududir a rechad el ngii a uluureor el mo er tir. Ngkmal mle ungil el ureor e ngii a kmal mle meduch el meruul er ngii. Nguluureor el 18 el sikang er a ta el sils me a lebebil er a taem, e ngdi erung el mo bedul a edei el sikang el lemechiuaiu. A klengar er ngii a di mle ultuil er tia el urerel. Engdi, a klengar er ngii a kmal di mle mereched el mengodech. Tia el klengar er ngii el kmal mle mechesang a mlo uchul me a 30 a rekil el Sonia a milloched.

Ngmlo chitechut, me a retoktang a ulemdasu el kmo ngdikea el sebechel el lmuut el mo ungil el mengedecheduch. A delal a di mle mereched el mo er a England el mo olengeseu er ngii. Sera bocha el sebechel el merael, e a delal a dilu er ngii el kmo: “Ak mo er a miting er a ongdibel, engdi kau a kirem el obengkek el mong, e le ngdiak el sebechem el di kau el tang el ngar er a blai.” Me ngkilengei a Sonia el obengkel. Me ngera mlo rsel?

Ngmelekoi el kmo: “A rokui el tekoi el krirenges a kmal mle soak e dirrek el klemerang. Ngkmal mle dmeu a renguk el kongei er a omesubel a Biblia el obengkel a ta er tirka el betok el chad el mle ouetkeu er ngak er a kot el taem el kbo er a Kingdom Hall. Tirke el chad er a urerek a mla choitak, engdi tirka el beches el sechelik a kmal oubltikerreng e omekerreu er ngak.”

Omerolel a taem, e ngliluut el mo ungil el mengedecheduch e ulengeriakl er a tekoi er a klereng e dirrek el mlo metecholb. A rebetok el beches el sechelil a teloi er a mui el taem el ureor, me ngmle sebechel el mesang a deurreng er tir. Me ngmelekoi el kmo: “Ngkmal soak el mo uai tir, ngkmal soak el msang a Jehovah el Dios aike el kot el ungil er ngak!” Me chelecha el taem, e a Sonia a teloi er a mui el taem el ureor.

Ngerang silubii a Sonia er a tekoi el dilubech el mo er ngii? Ngmelekoi el kmo: “Alta e ak milengereker a betok el udoud, engdi a meringel el uldasu me a diak el ulterekokl el tekoi er a ureor a rirellak me ngblechoel el di suebek a renguk e diak a deurreng er a klengar er ngak. Chelechang, e ak mla mo melechesuar el kmo a kot el klou a ultutelel el tekoi er a klengar er ngak a sel ungil el deluill er ngak el obengkel a Demak el ngar er a eanged, el Jehovah. Me chelechang, e ngmera el dmeu a renguk.”

A apostol el Paulus a milluches el kmo: “Ele ngibes el mora udoud a risel a bek el mekngit; el losiik er ngii ar bebil rar chad, me te mla mecheuid ra kloumerang e mla ngma betok el mekloul ringel el di tir ruseterir.” (1 Timoteus 6:10) Ngoeak a tekoi el dilubech el mo er a Sonia, e ngsebechel el melechesuar el kmo aika el tekoi a klemerang.