Ngua Ngera el Blekeradel a Meringel el Chelebuul?

A MERINGEL el chelebuul me a klengerenger a sebechel el mo uchul a kodellir a rechad. Tiang a belkul a kmo ngmo klou a ngelsengesel a kall me a ralm me a cheluch el lousbech el meruul a kall, e dirrek el mo diak a ungil el omderungel er a rechad me a ungil el rolel a ukeruul me a skuul. Tia el omeruul a kmal klou a bla letemellii er a klengar er a rebetok el biliol el chad, el ildisir a osisiu er a ildisir a rechad er a beluu er a Merikel. Me nguaisei, engdi a ruumesingd er a rechad er a Ngebard er a beluu er a Europe me a dirrek el Diluches er a beluu er a Merikel a dirkak a ta el bo lecheremii a meringel el chelebuul. Me chelechang e ngsebeched el mo mesaod el kirir a rebebil er tirka el mechebuul.

A Mbarushimana a kiei er a Rwanda el ta er a beluu er a Africa ngii me a bechil me a reteim el ngelekel. Ngike el ongelolem el ngelekel a mlad er a rakt el malaria. Ngmelekoi el kmo: “A demak a mle kirel el omii er a chetemel er a delongelam el telolem el ochad. Me sel kuk mlo blingelek a kmal mle kekerei me ngdimlak el sebechek el kiei er ngii ngak me a telungalek er ngak, me aki millukl el mo kiei er a chelsel a beluu. Ngak me a bechik a uluureor el mengetakl a bek el mui er ngii a bad me a chelechol. A blimam a dimlak a mado er ngii, e kemam melai a ralm el ki mousbech er a blil a bulis. Ngdi ta el ki momengur er a chelsel a ta el sils, e a lsekum e ngdiak a ureor el sel sils e ngdiak ki momengur el ta el sils. Ngkmal mekngit a renguk el lorrenges er a rengelekek el lmangel el lolengit a kall, me ak blechoel el merael el mo cheroid er a blai.”

A Victor me a Carmen a oureor el meruul a oeacher e olterau. Te kiei er a beluu el ngar er a mesechesechel a beluu er a Bolivia tir me a reteim el ngelekir. Te meleng er a chimo el delemerab el ngar er a kmal mechut e telerruud e chemars a chedoel e diak a dengki er ngii el blai. A skuul el lebo er ngii a rengelekir a kmal meseked, me a Victor a mle kirel el meruul er a tebelel a ngelekel el redil me bo el sebechel el mo er a skuul. Te dirrek el kirir el merael el elolem el mael el mo omngar a idungel el lousbech el meruul a kelir, e melengoes a imelir el ralm. A Carmen a melekoi el kmo: “Ngdiak a benjo er kemam, me ngkiram el mo er a omoachel a lsekum e ngsomam el ousbech er a benjo, e ngii el omoachel a dirrek el ki mousbech er ngii el melecholb e mengoit a komi er a chelsel. Me a rengelekam a di blechoel el mo smecher.”

A Francisco me a Ilídia a kiei er a beluu el ngar er a ikrel a mats er a Mozambique. Te mla er ngii a reteim el ngelekir, e a ta er tir mlad er a rakt el malaria e le osbitar a dimlak el lekengei el omkar er ngii. Tirka el obekel a ngar er ngii a kekerei el sersir er a beras me a chemutii el di sebechel el omekeroul a kelir el kirel a edei el buil. A Francisco a kmo: “A lebebil er a taem e ngmo diak a chull me a lechub e a remerechorech a ruchorech a dellemelam, misei a uchul e ngmo kirek el oureor el omouch e melektuk a bambuu el mo klekedellel a blai e olterau. Aki dirrek el merael el eru el sikang el mo omngar. E ngak me a  bechik a melai a eru el ulechull el idungel me bo el sebechel a chimo el ulechull el ki mousbech er ngii el ta el sandei el meruul a kelam, e sel tang a ki molterau er ngii.”

A rebetok el chad a omdasu el kmo ngngar er ngii a kmal mekngit el tekoi el uchul me ngkmal klou a chelebuul er a beluulechad el rullii a 1 er a chelsir a 7 el chad el kiei el klengar er tir a di ua blekerdelel a klengar er a Mbarushimana, Victor me a dirrek el Francisco, e a rebetok el biliol a kuk kiei el kmal dmeu a rengrir er a ungilbesul el klengar el diak a ngesonges er tir. A rebebil a mla melasem el mesmechokl er tia el tekoi. Me a ongingil el suobel a mo mesaod el kirel a meringel el urerir me a omeltkir el melasem el mesmechokl er tia el mondai.

 [Siasing el ngar er a 3 el llel]

Carmen me a reteru el ngelekel el melai a ralm er a omoachel