Abraham​—A Chad El Mle Ngariou A Rengul

A Abraham a dengchokl er a cheungel a tento er ngii el olengull e le ngkmal mekeald. Ngomes el bedul cheroid, e tilab a osengel er a retedei el chad el mle oldingel er tia el basio el lekiei er ngii. * Me ngdi mle mereched el mo olsiuekl er tir, el oltuchakl er tir el mo er a blil me lomengur e lolengull el telkib. Ngmle soal el lomesterir “a bebil er a kall,” me ngmlo mengetmokl el kirel a blengur er tir me ngngilai a blauang, bata, milk, me a ungil el odoim el mo mesterir. Me tia el ungil el omerellel a Abraham, a dimlak di lolecholt er a ungil el blekeradel, e ngdirrek el olechotel a kmo ngkmal mle ngariou a rengul el chad.​—Genesis 18:1-8.

NGERANG A KLENGARIOURRENG? A klengariourreng a ngodech er a kldidairreng. A ngariou a rengul el chad a omes er a rechad el kuk ngarbab er ngii. (Filipi 2:3) Ngkerekikl el lorrenges a uldesuir a rebebil, e dirrek el kongei el mo meruul aike el ngariou el ureor el kirir.

NGMILEKERANG ER A LOLECHOLT ER A KLENGARIOURRENG A ABRAHAM? A Abraham a mle dmeu a rengul el mesiou er a rebebil. El ua meldung er a uchei, sera leseterir tirka el chad el merema oldingel, e ngdi mle mereched el mengetmokl aike el lousbech. Me a bechil el Sara a ulerreched el meruul a kelir. Engdi ngsebeched el mesang el kmo ngtechang a dirrek el mirruul a betok el ureor: A Abraham a rirurt el osiueklterir tirka el chad, e ngii a ulemesterir a kelir, e ngii a rirurt el mo ngiltii a charm el bo lomekoad er ngii, e dirrek el ngii a kiltmokl aike el rokui el luluusbech. Ngika el ngariou a rengul el chad a dimlak lomekngerachel er a remesiungel er aika el tekoi, e ngbai kilengei el mo meruul aika el ngariou el ureor. Ngdimlak a ta el lomdasu el kmo ngngarbab el chad me ngdiak el kirel el mesiou er a rebebil.

A Abraham a ulerrenges a uldesuir a rechad el ngar er a cheungel a chederedellel. A Biblia a ouchais a di kesai el cheldecheduch er a delongelel a Abraham me a Sara. Me nguaisei, engdi ngngar  er ngii a eru el taem el Abraham a ulerrenges a uldesuel a Sara, e kilengei el mo oltaut. (Genesis 16:2; 21:8-​14) Ngmla er ngii a ta el taem el uldesuel a Sara a “kmal uldkelii a rengul a Abraham.” Engdi sel taem er a longedecheduch er ngii a Jehovah, el sbedii el kmo ngmle ungil a uldesuel a Sara, e a Abraham a uleba klengariourreng e kilengei el mo oltaut er a uldesuel a bechil.

NGERANG A KLUBELED EL DENGAI ER TIANG? A lsekum e ngmera el ngariou a rengud, e ngmo dmeu a rengud el mesiou er a rebebil. Kede ulterekokl el mo dmeu a rengud sel doruul aike el sebeched el ngosuterir el mo ungilbesul a klengar er tir.

Ngdirrek el sebeched el lolecholt er a klengariourreng el oeak a omerelled er sel taem el loltobed a uldesuir a rechad. Ngungil a dekengei el orrenges a uldesuir a rebebil, e lak doltngakl e le ngii el dimlak el uldesued. (Osisechakl 15:22) Chouaitia el ungil el blekeradel a kmal ungil el kirir a rechad el olab a deruchall. A John el ngii a tebechelel a bebil er a ureor er a Bethel a kmo: “Ak mla metik er ngii el kmo a ungil el tebechelel a ureor a rulleterir a rechad el mo sebechir el beot er tir el ouchais a uldesuir.” Ngliluut el dochelii el kmo: “A chad a ousbech er a klengariourreng me bo el sebechel el mesang el kmo a chad el oureor el ngar er a cheungel a dirrek el ngar er ngii a ungil rolel a loruul a tekoi. Me nguaisei, engdi ngdiak a ngii di el chad el mo lmuut er a tebechelel a ureor el sebechel el di medengei a kot el ungil el rolel a doruul a tekoi.”

A doukerebai er a Abraham el oeak sel dorrenges a uldesuir a rebebil e doruul a ngariou el ureor el kirir, e kede nguu a kengei er a Jehovah. E le “a Dios chomtok rar kididai a rengrir, e omsterir a grazia ar ngariou a rengrir.”​—1 Petrus 5:5.

[Footnote]