A Dios Ngmera el Omekerreu er a Redil?

“A klengit a ulemuchel er a redil, e ngii a uchul me kede rokui el mo mad.”—ECCLESIASTICUS, SECOND CENTURY B.C.E.

“Kau a luluusbech er kau a diabelong el mengetikaik er a rechad: kau a mle kot el mo menga er a rdechel a blul el kerrekar: kau a mle kot el mo tomellii a llechul a Dios . . . Kau a rirellii ngike el kot el sechal el mo er a klengit.”​—TERTULLIAN, ON THE APPAREL OF WOMEN, SECOND CENTURY C.E.

AIKA el tekoi er a irechar a dimlak lemengai er a Biblia. A rechad a mla mo betok el dart el rak el ousbech aika el tekoi el mesaod el kmo ngdi ungil a dongetukel er a redil. Chelecha el sils, e a rebebil el mesisiich a uldesuir el chad a dirk ousbech aika el tekoi el mla er a babier er a klechelid el omeklemalt a mekngit el omerellir el mo er a redil, e oltelechakl el kmo a redil a uchul a mondai er a klechad. Ngmera el mle moktek er a Dios el kirir a resechal el ouketui e omekcharm er a redil? Ngerang melekoi a Biblia? Ka me bo desang.

◼ A redil te mla medebeakl er a Dios?

Ngdiak. Ngbai ngike el “bersoech er a rechuodel, el ngklel a Diabelong,” a mla “medebeakl” er a Dios. (Ocholt 12:9; Genesis 3:14) A Dios er sera ledu el kmo a Adam a mo ‘merreder’ er a bechil, e ngdimlak el bsang a sechal a kengei el mo ousibai er a redil. (Genesis 3:16) Ngbai ulemlaoch el kirel aike el mekngit el tekoi el mo duubech e le ngkngterir a uchul.

Me a mekngit el omeruul el mo er a redil a mo er ngii e le rechad el ngar er a klengit a uchul, engdi tiang a diak el moktek er a Dios. A Biblia a diak lolisiich er a uldasu el kmo a redil a kirir el chederedall er a resechal me bo el sebechir el kokedir a blsel a klengit.​—Rom 5:12.

◼ A Dios ngulemeob er a redil el kuk ngariou er a sechal?

Ngdiak. A Genesis 1:27 a kmo: “Mitia Dios a milebii a chad, el rirellii a chad el okesiul a Dios. Ng milebii a sechal ma redil.” Me sera uchelel, e a resechal me a redil a ulebeob el sebechir el olecholt a blekerdelel a Dios. Me alta e a Adam me a Eva a mle kakerous a uldesuir me a bedengir, engdi te ngilai a osisiu el ngerachel e uleldeu a rengrir er a osisiu el llemeltir er a medal a Ulemeob er tir.​—Genesis 1:28-​31.

Uchei er a lomeob er a Eva, e a Dios a dilu el kmo: “Ak mo rullii a ungil kldemel [a Adam] el mo olengeseu er ngii.” (Genesis 2:18) A tekoi el “kldemel” ngbelkul a kmo a redil a ngariou er a sechal? Ngdiak, e le tia el tekoi er a Hebru a dirrek el belkul a kmo “ngelsuil” a sechal. Ka molatk er a urerel a toktang er a botk me a nurs el omsa chad a kar el omekoad a ringel. Ngsebechel a ta er tir el di ngii el tang el oureor? Me alta ngike el toktang a di ngii el tang a omotk er a chad, engdi  tiang belkul a kmo ngkuk klou a ultutelel er ngike el nurs? Ngdiak! Me nguaisei, a Dios a ulemeob er a sechal me a redil el mo dmak el oureor, el diak el kaisichai.​—Genesis 2:24.

◼ Ngera olecholt el kmo a Dios a omekerreu er a redil?

A Dios a miles aike el bo loruul a rengar er a klengit el chad a uchul me ngdi mle uchelel e ngulechotii el kmo ngmo omekerreu er a redil. Me a losaod er a Llach er a Moses, el mlo er ngii er a rak er a 1513 er a uchei er a taem er a Kristus, e a chad er a omeluches el Laure Aynard, a millekoi el ngar er a babilengel el La Bible au féminin (A Biblia el Ngar er a Osengel a Redil) el kmo: “A oumesingd el taem, e a Llach sel losaod el kirel a redil, e ngmesebechakl er ngii.”

El ua tiang, a Llach a millekoi el kmo ngkired el mengebkall e mengull er a demad me a delad. (Exodus 20:12; 21:15, 17) Ngdirrek el millekoi el kmo ngkirel el mocholt a ungil el uldasu el mo er tirke el dioll. (Exodus 21:22) Me aika el llechul a Dios a milsterir a redil a klou el llemeltir el diak el uai a llechul a betok el beluu er chelechang. Nguaisei, engdi ngngar er ngii a lmuut el betok el tekoi el olecholt er a ulekerreuil a Dios el kirir a redil.

A Llach el Olecholt er a Osengel a Dios el Kirir a Redil

A Llach el Jehovah el Dios a milsang a renged er a Israel a ngilsuterir a resechal me a redil el mo mesisiich a bedengir, e mo klikiid a blekerdelir, e mo er ngii a kmes el deleuill er tir me a Jehovah. E a lsekum e te melemolem el orrenges e olengesenges, e tia el renged a “mor bab er a bek el beluu er a beluulchad.” (Duteronomi 28:1, 2) Ngera mle deruchellir a redil er cheungel a Llach? Ka momtab aikang.

1. Ngmla er ngii a ilmeklir. A irechar, e a redil er a Israel a uleldeu a rengrir er a klou el ilmeklir el diak el uai a redil er a kuk bebil er a renged. Me alta sechal a bdelul a delengchokl, engdi a redil el uleba mui el klaumerang er a bechil a mle sebechel el ‘mesa chutem, e mecherar el mo sers er a bilong.’ E a lsekum e ngmeduch el meruul a mamed, e ngdirrek el sebechel el di ngii el orrurt er a siobai er ngii. (Osisechakl 31:11, 16-​19) Me ngngar cheungel a Llach er a Moses, e a redil a lulemes er tir el kmo ngmla er ngii a ultutelir me a llemeltir.

 Ngar er a Israel er a irechar, e ngmle sebechir a redil el mo er ngii a deleuill er tir me a Dios. A Biblia a mesaod er a Hana el milluluuch el mo er a Dios el kirel a ileakl el ongtil e dirrek el rirellii a telbilel el di mle ngii me a Dios a medengelii. (1 Samuel 1:11, 24-​28) A kuk ta er a redil el mla er a mats er a Sunem a ulsiik a ulekrael er a profet el Elisa sel temel a Ulengull el Sils. (2 King 4:22-​25) Me a redil el ua Debora me a Hulda, a luluusbech er tir a Dios el mo omtechei er ngii. E a rengarbab el chad me a reprist a kilengei el osiik a ulekrael er tir.​—Mengeteklel a Israel 4:4-8; 2 King 22:14-​16, 20.

2. Ngmle sebechir el ngmai a skulir. A redil a mle chedal a Llach er a telbiil me ngmle sebechir el orrenges er a omengiuel a Llach, e tiang a milsterir a techall el mesuub a tekoi. (Duteronomi 31:12; Nehemia 8:2, 8) Te dirrek el ngilai a osisechakl me bo el sebechir el teloi a bebil el tekoi er a omengull. El ua tiang, a rebebil el redil a “milsiou” er a tento, e a rekuk bebil a mle teloi er a rechad er a chelitakl.​—Exodus 38:8; 1 Kronika 25:5, 6.

A rebetok el redil a mla er ngii a klemedengei er tir el mo orrurt a ungil el siobai. (Osisechakl 31:24) A rechedil er a Israel a mla er ngii a techellir el olisechakl er a rengelekir el sechal, el ngii a mle tekoi el kuk mle ngodech er a siukang er a bebil er a renged, el di mle chedam a sebechel el olisechakl er a rengelekel el sechal. (Osisechakl 31:1) Me tiang a ochotii el kmo a redil er a Israel er a irechar a mla er ngii a skulir.

3. Ngmlocholt a omengull el mo er tir. A Teruich el Llach a bleketakl el kmo: “Ke mo mengull er a demam ma delam.” (Exodus 20:12) Ngar er a osisecheklel a mellomes a rengul el King el Salomon, e kede menguiu el kmo: “Rungalek, morrenges a lolisechakl er kau a demam, e bo le blak a rengum er a ikel le dung a delam.”​—Osisechakl 1:8.

A Llach a dirrek el mla er ngii a komakai el omesodel a omerellir a rediak el bechiil el chad el kmo ngkirir el olecholt a omengull el mo er a redil. (Levitikus 18:6, 9; Duteronomi 22:25, 26) A ungil bechiil el sechal a mle kirel el melatk aike el sebechel me a diak el sebechel a bechil el meruul.​—Levitikus 18:19.

4. Ngmlukerreu a llemeltir. Ngar er a Tekingel, e a Jehovah a ochotii el kmo ng “demerir a re diak a demerir e osebecheklir a re melakl dil.” Ngulemekerreu er tirke el diak a rebecherir me a lechub a redemerir el mesebechakl a llemeltir. (Psalm  68:5; Duteronomi 10:17, 18) Me sera bo lemekngit a omerellel a ta el chad el mo er a melakl el dil el mle blsel, e a Jehovah a rirellii a mengasireng el tekoi e ulsebelii ngika el dil me ngdimlak bo el merur.​—2 King 4:1-7.

Uchei er a lesiseb er a Beluu er a Nglat a rechad er a Israel, e a Selofehad a mlad el dimlak a ngelekel el sechal. Me a reteim el ngelekel el redil a ullengit er a Moses me lebesterir a ‘kloklir’ el ngar er a Beluu er a Nglat. A Jehovah a milsterir a lmuut el betok er aike el lullengit. Ngdilu er a Moses el kmo: “Ng kirem el mesterir a kloklir el teloi er a re chedal a demerir. A ikel kloklel a demerir a moiuid el mor tir.” Seikid el taem el mei, e a redil er a Israel a mle sebechir el oudiukes a kloklir a redemerir e dirrek el sebechir el oliuul el mo er a rengelekir.​—Ulecherangel 27:1-8.

Cheleuid el Omesodel a Osengel a Dios el Kirir a Redil

Ngar cheungel a Llach er a Moses, e a redil a uleldeu a rengrir er a ungil el deruchall me a llemeltir a mlukerreu. Engdi sera bekord el edei el dart el rak er a uchei er a Kristus, e a klechelid er a Judea a mlo omuchel el oltirakl er a siukang er a Rechigrik el lulemes er a redil el kmo te diak a ultutelir.​—Momes er a baks el “Omengetukel el Mo er a Redil el Ngar er Aike el Babier er a Irechar.”

El ua tiang, a chad er a Grik el Hesiod (bekord el euid el dart el rak er a uchei er a Kristus) a millekoi el kmo a redil a uchul a rokui el mondai er a klechad. Ngar er a babilengel el Theogony, e ngmilsaod el kirir a “redil el kmo te blechoel el uchul a telemellir me a kodellir a resechal a lsekum e te kiei el obengterir.” Tia el uldasu a mlo merael a chisel er a klechelid er a Judea er a bekord el 100 el rak er a uchei er a Kristus. A babier el Talmud, el mlechudel er a bekord el 100 el rak er a uriul er a Kristus a ulemeklatk er a resechal el kmo: “Lak msal mengedecheduch er a redil, e le ngchoitikikau el mo er a klengit.”

Ngar er aika el mereko el betok el dart el rak, e tia el ultelechakl el kirir a redil a kmal mle klou a telemellel er sel deruchellir er a delongelir a Rechijudea. Sel taem er a Jesus, e ngdi mle sebechir el mo er a Kort er a Redil. Te di mle resechal a ngar er ngii a llemeltir el mesuub a tekoi er a klechelid, e dirrek el mle kakerous a basio er a resechal me a redil er a chelsel a blil a ongdibel. A babier el Talmud a melekoi a tekingel a ta el Rabbi el kmo: “A ngii di el chad el olisechakl er a Torah [a Llach] el mo er a ngelekel el redil a olisechakl er ngii a mekngit el tekoi.” Me a remengeteklel a klechelid er a Judea a mle cheleuid a omesodir er a osengel a Dios me te rirelleterir a resechal el mo ouketui er a redil.

A Jesus er a lengar tia el chutem, e ngmiles a chouaika el mesisiich el omengetukel el mileketmokl el okiu a siukang. (Mateus 15:6, 9; 26:7-​11) A chouaika el osisechakl ngmla er ngii a lerellii er a omerellel el mo er a redil? Ngera sebeched el suubii er a blekerdelel me a omerellel? A mera el Klekristiano ngmla mesterir a redil a ongelaod? A ongingil el suobel a mo onger aika el ker.

[Baks el ngar er a 7 el llel]

Omengetukel el Mo er a Redil el Ngar er Aike el Babier er a Irechar

Ngulemuchel er a taem er a Jesus, e a rechad er omeluches el uai a Philo er a Alexandria a ulemuchel el ousbech a osisechakl er a Rechigrik el lmuut el mesaod er a cheldecheduch er a Genesis. A Philo a milsaod el kmo a Eva a rirebet er a klengit er a durs me ngmildebeakl el mo “diak a llemeltel e mo chederedall er a sechal.” A chouaisei el kltui el kirir a redil a uleberk er a klechelid er a Judea me a dirrek el babilengir a Remengeteklel a Ikelesia.

Ngar er a Midrash Rabba, el babier er a Judea el milluches er a 100 el rak er a uriul er a Kristus, e a ta er a rabbi a milsaod er a uchul me a redil a kirel el delekedek a bdelul el kmo: “Ngii a di uai a chad el mla rullii a mekngit me ngmerur el meues er a rechad.” A chad el mesuub a klechelid el Tertullian, el babilengel a mle meklou a ultutelel er a uchelel seikid el taem, a ullisechakl el kmo a redil a kirir el merael el “uai a Eva el ngar er a klengiterreng e ouuchel a rengrir.” A chouaika el osisechakl el diak el mengai er a Biblia a uchul a klou el omengetukel el kirir a redil.

[Siasing el ngar er a 5 el llel]

A Eva a ulebeob el ngelsuil e kldemel a Adam

[Siasing el ngar er a 6 el llel]

A redil er a Israel er a irechar a mle teloi a tekoi er a siobai