A Dios a Omes er a Redil el Oba Omengull me a Klebkall

A JESUS er a lengar tia el chutem, e ngmle cherrungel el olecholt a blekerdelel a demal el ngar er a eanged me a rolel a loruul a tekoi. Ngdilu el kmo: “Ng diak a ngeral kuruul el oba di klisichek, ak bai di melekoi a ikel lulsisecheklak a Chedam el melekoi. . . . Ele kblechoel el meruul a ungil er a rengul.” (Johanes 8:28, 29; Kolose 1:15) Me sel domes a blekerdelel a Jesus el mo er a redil e ngngosukid el mo medengelii a osengel a Dios el kirir me aike el soal a loruul.

Ngoltirakl aike el llechukl er a Evangkelio, e a rebebil el chad er a omesuub a melekoi el kmo a osengel a Jesus el kirir a redil a kmal mle ngodech er a osengir a rechad er sel taem er a lemeluches a Evangkelio. Ngmekerang e uaisei? Aike el osisecheklel ngdirk sebechel mesterir a redil a klou el ilmokl er chelecha el sils?

Blekerdelel a Jesus el Mo er a Redil

◼ A Jesus a dimlak lomes er tir el ngar er a mekngit el rolel. Ngar er a osengir a rebebil el mengeteklel a klechelid er a Judea, e a resechal sel bo lekeed er a redil e ngdi mo uchul a ngibeserreng. A redil a lulemes er tir el kmo te uchul a ongetikaik, me ngdimlak el sebechir el mengedecheduch er a resechal el ngar er a buai me a lechub e bo letobed el diak a dekedekel a bderrir. Engdi a Jesus a milengelechel er a resechal el mo omtebechel a ngelbesel a rengrir e mo ungil a blekerdelir el mo er a redil er a bai lorrob er tir me lak longedecheduch er a rechad.​—Mateus 5:28.

A Jesus a dirrek el dilu el kmo: “A sechal el choitii a bechil e mo bechil a tar a redil a mla mor a laokreng el omtok er a di mla bechil.” (Markus 10:11, 12) Me nguleltngakl aike el mla er ngii el osisecheklir a rabbi el kilengei er a resechal el mo merort a chebechiielir alta ngdiak a ungil uchul. (Mateus 19:3, 9) Sel uldasu el kmo a chad a mo er a deleboes el omtok er a di mla bechil a dimlak lodengelii a ruumesingd el chad er a Judea. Tirke el rabbi a ullisechakl el kmo a bechiil el sechal a kmal diak el sebechel el mo er a deleboes el omtok er a bechil, ngdi ta el redil a sebechel meruul er tiang! A ta el babier el mesaod er a Biblia a kmo, “A Jesus a milengebkall er a redil er sera lebeketeklii el kmo a bechiil el sechal a di osisiu ngii me a bechiil el redil el kirel a tekoi er a llemalt.”

Aike el mo er ngii e le ngosisecheklel a uchul: Ngar er a ongdibel er a Resioning er a Jehovah, e a redil a mimokl el mengedecheduch er a resechal sel lengar er a miting. Te diak el medakt a kora ngodech el osengir a resechal, e le a Rekristiano el sechal a kerekikl me a ‘omerellir el mo er a re meklou el redil le ua omerellir el mor a derrir, me a omerellir el mor a re mekekerei el redil le ua omerellir el mor a ruchederir, e le klikiid a blekerdelir el bedul tir.’​—1 Timothy 5:2.

◼ A Jesus a uluusbech a temel el olisechakl er a redil. A Jesus a dimlak loltirakl a osisecheklir a rabbi el mlengemikr er a redil, e ngbai ullisechakl e millisiich er tir el mo olecholt a uldesuir. Me sera lebecherei a Maria me ledengchokl el orrenges er ngii, e ngmileketeklii el kmo a redil a diak di el kirel el meruul a ureor er a blai e lemerekong. (Lukas 10:38-​42) A Martha el chudelel a Maria a dirrek el ngilai a klungiolel er a osisecheklel a Jesus, e tiang a desang er aike el ungil el nger er ngii el mo er a Jesus er a uriul er a kodellel a Lasarus.​—Johanes 11:21-​27.

 A Jesus a mle semeriar er a uldesuir a redil. Sera lengar tia el chutem, e a ruumesingd el redil er a Judea a uluumerang el kmo nguchul a deurreng a lengar er ngii a ngelekir el sechal, e ungil a lsekum e ngprofet. A ta el redil er a lolekoi el kmo: “Ng meral ngeltengat ngikel redil el milechellau!” e a Jesus a uluusbech er tia el techall el mo ouchais er ngii el kirel a lmuut el ungil el tekoi. (Lukas 11:27, 28) Ngulechotii el kmo a blekongesenges el mo er a Dios a lmuut el klou a ultutelel er aike el lomdasu a rechad e ngngerechelel a redil.​—Johanes 8:32.

Aike el mo er ngii e le ngosisecheklel a uchul: A resensei el ngar er a ongdibel er a Rekristiano a kongei a nger er a redil sel letemel a miting er a ongdibel. Te olecholt a omengull el mo er a remeklou el redil e le te “olisechakl a ungil el omeruul” sel di el tir el tang me sel lobengterir a rebebil. (Titus 2:3) Te dirrek el ultuil er tir el mo omerk er a ungil chais er a Rengedel a Dios.​—Psalm 68:11; momes er a baks el “A Apostol el Paulus Ngmilerrob er a Redil Me Lak Longedecheduch?” el ngar er a 9 el llel.

◼ A Jesus a ulemekerreu er a redil. Ngar er a taem er a Biblia, e a rengalek el redil a dimlak el meklou a ultutelir el uai a rengalek el sechal. A babier el Talmud a ochotii tia el uldasu sel lolekoi el kmo: “Durengrir tirke el oungalek er a resechal, e te chebuul tirke el oungalek er a redil.” A rebebil er a ruungalek a ulemes er a redil el kmo te klou el ongesang, e le ngmo kirir el sikii a bechil e omelecha ngederel, e mo diak el sebechir el ultuil er ngii el kirel a ulekerreu sel bo lemechuodel.

A Jesus a ulechotii el kmo a klengar er a ngalek el redil a dirrek el klou a ultutelel el uai a sechal er sera lokisii a ngelekel a Jairus el redil er a kodall, me a sechal el ngelekel a melakl el dil er a Nain. (Markus 5:35, 41, 42; Lukas 7:11-​15) A uriul er a lomekungil er a redil el “mekngit el chelid a ulelsecher er ngii el truich ma eai el rak,” e a Jesus a ulemekedong er ngii el “ngelekel a Abraham,” el ngii a tekoi el dimlak el ngar er a oumesingd el babilengir a Rechijudea. (Lukas 13:10-​16) Tiang a ochotii el kmo ngulemes er ngika el redil el kmo ngklou a ultutelel el chad el oba klou el klaumerang.​—Lukas 19:9; Galatia 3:7.

Aike el mo er ngii e le ngosisecheklel a uchul: Ngar er ngii a omelekoi er a Asia el kmo: “A domekeroul er a ngalek el redil e ngua dolubs er a sersel a tonari er kid.” Tiang a belkul a kmo a domekeroul er a ngalek el redil e ngdiak bo luchul a klungiolel a telungalek er kid. A rebetik a rengrir el Kristiano el chedam a diak lebecherei tia el tekoi me lomekrael a uldesuir, e te bai omekerreu er a rengelekir el sechal me a redil. A Rekristiano el oungalek a kerekikl me a rokui el ngelekir a mo ungil a skulir me a klisichel a bedengir.

◼ A Jesus a uluumerang er a redil. Ngar er aike el kort er a Judea, e a tekingel a redil a di mle osisiu ngii me a tekingel a sibai. A Josephus, el chad el kiliei er a uriul er a Jesus a ulemeklatk el kmo: “Lak mkengei a ngii di el ngerang el mla er a redil, ngdiak el sebeched el oumerang er tir e le te redil.”

A Jesus a dimlak el uaisei a uldesuel, e ngbai kilengei er a redil el mo ouchais er a rebebil el kirel a okisel. (Mateus 28:1, 8-​10) Me alta tirka el blak a rengrir el redil a milsang a Rubak el mad e mo  medakl, engdi a rechapostol a mle meringel er tir a oumerang a tekingir. (Mateus 27:55, 56, 61; Lukas 24:10, 11) Me nguaisei, engdi ngii el mle kot el mo chemolt er a redil a ulechotii el kmo a Kristus a ulemes er tir el rredemelel a omerk er a klumech el di uai tirke el bebil er a disaiplo er ngii.​—Rellir 1:8, 14.

Aike el mo er ngii e le ngosisecheklel a uchul: Ngar er aike el ongdibel er a Resioning er a Jehovah, e a resechal el ngar er ngii a ngerechelir a olecholt a ungil el blekeradel el mo er a redil el oeak sel lomtab a tekoi lolekoi. E a Rekristiano el bechiil el sechal a olecholt a ‘omengull’ el mo er a rebecherir el oeak sel lekerekikl el orrenges er tir.​—1 Petrus 3:7; Genesis 21:12.

A Omellach er a Biblia a Mo Uchul a Deuil a Rengrir a Redil

A resechal sel loukerebai er a Kristus, e ngmo sebechir a redil el nguu a omengull me a ilmokl el ngii a mle telbilel a Dios el kirir er a kot el uchul. (Genesis 1:27, 28) A rebechiil el sechal el Kristiano a diak longetukel er a redil, e te bai mechei a omellach er a Biblia me ngomekrael er tir, e tiang a mo uchul a deuil a rengrir a rebecherir.​—Efesus 5:28, 29.

A Yelena er a lomuchel el mesuub a Biblia, e a bechil a kmal mle mekngit a omerellel el mo er ngii, e le ngmlukeroul er a mekngit el basio el mle sebechir a resechal el merechorech er a rebecherir e omekringel er tir. A Yelena a melekoi el kmo: “Aike el ksiluub er a Biblia a kmal silsichak, e le ak mlo medengei el kmo ngngar er ngii a chad el mle betik a rengul er ngak, e ulemes er ngak el kmo ngklou a ultutelek, e ulemekerreu er ngak. Ak dirrek el mlo medengei el kmo a lsekum a bechik a mo mesuub, e ngmo sebechel el mengodech a blekerdelel el bedul ngak.” A uriul e ngkmal mlo ungil a rengul a Yelena e le bechil a kilengei el mo mesuub er a Biblia e mlo metecholb el ta er a Resioning er a Jehovah. Ngliluut el melekoi el kmo: “A bechik a kmal mlo ungil el ocholt el kirel a ulserechakl el reng. Aki milsuub el kausubes er a delongelam.” Me ngngera ngmelekoi el kirel tiang? “A omellach er a Biblia a mera el ngilsukak el mo melechesuar a ulekerreu er a chelsel a chebechiielek.”​—Kolose 3:13, 18, 19.

Tia el blo lechelebangel er ngii a Yelena a diak el ileakl el tekoi. A rebetok el miliol el Kristiano el redil a dmeu a rengrir e le te dmak tir me a rebecherir el melasem el oltaut a omellach er a Biblia er a chelsel a chebechiielir. Te dirrek el metik a ongelaod, ilmokl, me a omengull sel lobengterir a rekldemir el Kristiano.​—Johanes 13:34, 35.

A resechal me a redil el Kristiano a medengei el kmo te ngar er a klengit e diak el cherrungel a uchul me te uldimukl er a blebelel a Dios el “mlo chederdall ra ngemed.” Me nguaisei, engdi ngoeak sel lolekeed er tir er a betik a rengul el Demerir el Jehovah el Dios, e ngngar er ngii a omeltkir el mo “mengubet ra blekeradel ra klsibai ra ngemed” e mo oldeu a rengrir er a “ilmokl er a klebkall rar ngelekel a Dios.” Tiang a mera el ungil el omelatk el kirir a resechal me a redil!​—Rom 8:20, 21, Beches el Testament.

[Baks el ngar er a 9 el llel]

A Apostol el Paulus Ngmilerrob er a Redil Me Lak Longedecheduch?

A apostol el Paulus a milluches el kmo: “Ngdiak le kirir a redil el morenges a ngerir er a chelsel a ikelesia.” (1 Korinth 14:34) Ngera mle belkul a tekingel? Ngmillekoi el kmo a redil a diak a ngera lodengei? Ngdiak. E le a Paulus a mle blechoel el mesaod a ungil el osisecheklir a redil. (2 Timothy 1:5; Titus 2:3-5) Ngar er a babilengel el mo er a rechad er a Korinth, e a Paulus a dimlak di longelechel er a redil e ngbai milengelechel er a rokui el uleba ngat er a omelekoi me a ulaoch el kmo, ngdiak el kirel morenges a ngerir sel sekum a ta er a chad el oumerang a mengedecheduch. (1 Korinth 14:26-​30, 33) Te mla er ngii a redil el kmal uluusemeriar el kirel tia el beches el klaumerang er tir me te mlo merrob er a chad el mengedecheduch e oker a ker, e tiang a mle siukang er sel beluu. Sei a uchul me a Paulus a millisiich er tir el mo ‘oker er a re becherir er a rekeblirir.’​—1 Korinth 14:35.

[Siasing el ngar er a 10 el llel]

A Jesus a kilengei er a Maria Magdalene el mo ouchais er a rechapostol el kirel a okisel