1-3. (a) Ngera uldesuir a rebebil el kirel aike el tekoi el lurruul me a lechub aike el dimlak leruul? Ngera ngrullii er kid aike el tekoi el durruul er a uchei? (b) Ngera sebeched el suubii er a kerebil a Paulus?

 A RECHAD sel bo louuchel a rengrir e te blechoel el ousbech er a tekoi el “ulekum.” Kid el rokui a sebeched el mo melatk el uaisei. Engdi a rebebil a blechoel el ouuchel a rengrir er aike el tekoi el lurruul me a lechub aike el dimlak leruul. Kau nguaisei a uldesuem el kirel a tekoi el mrirellii?

² A rebebil er a rechad a mla remuul a kmal oberaod el klengit, e a rekuk bebil a diak lodengei el kmo a tekoi lullilt el mo meruul ngmle ungil me a lechub e ngdiak. Te dirrek el ngar er ngii a rebebil el diak lolatk el kirel aike el lurruul er a uchei, me a rekuk bebil a blechoel el ouuchel a rengrir el kirel aike el lurruul e omdasu el kmo, ‘Ulekum me ngbai dimlak kuruul el uaisei!’ (Psa. 51:3) Ngua ngera uldesuem? Kau ngsoam el mo er sel tkurrebab el sebechem el mesiou er a Dios e diak mouuchel er a rengum el kirel aike el cheleuid el murruul er a uchei? Ngngar er ngii a kerebai el ngar er a Biblia el kirel a chad el mle sebechel el meruul uaisei? Ochoi, ng apostol el Paulus.

³ A Paulus a riruul a cheleuid el tekoi engdi ngdirrek el mle ungil el melilt a tekoi. Nguluuchel a rengul er aike el lurruul, engdi ngdirrek el milsuub el mo blak a rengul er a omesiungel el mo er a Dios. Ka me bo desa el kmo ngera sebeched el suubii er a kerebil.

4. A apostol el Paulus nguluuchel a rengul er a ngerang?

⁴ A Paulus er a lengeasek el Farisee, e ngmirruul a tekoi el blo louuchel a rengul er ngii er a uriul. El uai tiang, ngkmal mle meringel el oldechelakl er a redisaiplo er a Kristus. A Biblia a melekoi el kmo a uriul er a lemad a Stefanus, “e a Saulus [el uriul e ngmlo okedongall el Paulus] a millasem el olekngemed er a Ikelesia me ng mirrael obliil el mengurs er a ruumerang el sechal ma redil el mo olsiseb  er tir er a kelebus.” (Rel. 8:3) A ta el chad er a omesuub er a Biblia el Albert Barnes a millekoi el kmo sel tekoi el “olekngemed” a belkul a kmo a Saulus a mle meringel el oldechelakl er a ongdibel er a Rekristiano el di uai a “tebelik el charm.” A Saulus a mle blak a rengul el chad er a Judea e uluumerang el kmo a Dios a mle soal a bo lolekngemed er a ongdibel er a Rekristiano. Sei a uchul me ng “di ulemekdakt er a rubengkel a Rubak er a kdekudel el kodall. . . . El di osisiu a le sechal ma le redil.”​—Rel. 9:1, 2; 22:4. *

5. Ngera rirellii a Saulus me ngmlo diak loldechelakl er a redisaiplo er a Jesus e bai mlo omuchel el omerk er a klumech el kirel?

⁵ A Saulus a mle soal el mo er a Damaskus er a uriul, e oltobed er a Rekristiano er a rekeblirir, e mengurs er tir el mo er a ngarbab el kort er a Rechijudea me bo lobals. Engdi a Jesus, el ngii a Bdelul a ongdibel er a Rekristiano a tirrebengii. (Efe. 5:23) Me a Saulus er a lengar er a omerollel el mo er a Damaskus, e a Jesus a mle duum er medal me ngmlo meiko er a llomes el mla er a eanged. A uriul e a Jesus a ulderchii el mo er a Damaskus me longiil el kirel a lmuut el bebil er a tekoi el mle kirel mo meruul. Kede medengei el kmo ngera dilubech er a uriul er isei.​—Rel. 9:3-22.

6, 7. Ngerang a ochotii el kmo a Paulus a mle medengei el kmo aike el lurruul a kmal mle cheleuid el tekoi?

⁶ A Paulus er a bo lodengei el kmo ngmle cheleuid, e ngmlo diak loldechelakl er a redisaiplo er a Kristus e bai ulemuchel el omerk er a klumech el kirel. Me nguaisei, engdi ngdimlak lobes aike el tekoi el lurruul. A uriul e ngmilluches el kirel el kmo: “Kom rirenges a chisel a blekerdelek er ser a le blak a renguk el oltirakl er a klechelid er a re chad er a Judea, el mle meringel el oldechelakl er a ikelesia er a Dios e mlor a ikel sebechek el melemall er ngii.” (Gal. 1:13) Ngliluut el mesaod aike el lurruul er a uchei el ngar er a babilengel el mo er a Timothy me a rechad er a Korinth me a Filipi. (Monguiu er a 1 Korinth 15:9; Fil. 3:6; 1 Ti. 1:13) A Paulus a mle merur engdi ngdimlak lomart aike el tekoi el lurruul. Ngmle medengei el kmo aike el lurruul a kmal mle cheleuid el tekoi.​—Rel. 26:9-11.

⁷ A ta el chad er a omesuub er a Biblia el ngklel a Frederic W. Farrar a milluches el kmo sel dolatk el kirel a meringel el odelecheklel a Paulus el mo er a Rekristiano, e ngmo sebeched el medengelii sel klou el klengiterreng el blo lolechesuar me a dirrek el mekngit el omelekingir a rechad el mo er ngii. A Paulus er a loldingel aike el kakerous el ongdibel, e tirke el odam el mle ketengir el mo medengelii a locha millekoi el kmo: ‘Kau ia Paulus. Kau ngike el mle meringel el oldechelakl er kemam!’​—Rel. 9:21.

8. Ngmle ua ngerang a uldesuel a Paulus el kirel a klechubechub me a bltikerreng el lullecholt er ngii a Jehovah me a Jesus? Ngera kede suubii er a kerebil a Paulus?

⁸ A Paulus a mlo medengei el kmo ngmle sebechel el mesiou el ua apostol e le Dios a ullecholt er a klou el blekokeuii el mo er ngii. Ngar er aike el 14 el babilengel e ngmelekoi el kirel a blekerdelel a Dios el chubechub el 90 el taem. (Monguiu er a 1 Korinth 15:10.) Nguleba klou el omereng el saul e le Dios a ullecholt a klechubechub el mo er ngii, me ngkmal mle blak a rengul er a omesiungel el kuk ngaruchei er tirke el bebil er a rechapostol. Ngera kede suubii er a kerebil? A lsekum e kede oumerang er a tengetengel a Jesus, e ouchais a kngtid, e mo diak doruul a cheleuid el tekoi, e a Jehovah a kongei el mo ousubes el mo lmuut er a meklou el klengit. Me a lsekum e ke omdasu el kmo a kngtim a kmal diak el sebechel el musubes el oeak a olubet el tengetengel a Kristus, e ngungil a omolatk er a kerebil a Paulus. (Monguiu er a 1 Timothy 1:15, 16.)  Me alta nguleldechelakl er a Jesus, engdi ngmilluches el kmo a Jesus a mle betik a rengul er ngii e mlad el kirel. (Rel. 9:5; Gal. 2:20) Ngmlo medengei el kmo alta ngmle cheleuid a tekoi el lurruul er a uchei engdi ngmle kirel el mo blak a rengul er a urerel a Dios. Kau ke meruul er tiang er chelechang?

9, 10. (a) Ngera uchul me kede mo ouuchel a rengud? (b) Ngera uchul me ngdiak lungil a di dolatk el kirel a tekoi el durruul?

⁹ Kau ngngar er ngii a obla mruul el mouuchel a rengum er ngii er chelechang? Ke oureng ulekum me kuluusbech a temem me a klisichem el bai meruul a meklou a ultutelel el tekoi? Ke rirellii a tekoi el mlo uchul a telemellir a rebebil? Me a lechub e nglocha ngar er ngii a kmung ngerang el moureng ulekum me ke rirellii el ngar er a kuk ngodech el rolel. Ngera sebechem el meruul er ngii a lsekum e ke omdasu el uaisei?

¹⁰ A rebebil er a rechad a blechoel el di melatk a tekoi er a bek el taem! Ngmo mekngit a rengrir e suebek a rengrir e le te blechoel el melatk el kirel aike el tekoi el lurruul. A omomdasu e ngsebechem el sumechokl a ngii di el mondai a lsekum e ke di melatk er ngii? Ngdiak! Ka di molatk er a chad el omtok er a mesisiich el berius. Alta ngblak a rengul el di mengikai, engdi ngdi ngar er a osisiu el basio. Me a leuaisei e ngdiak el kirem el mo suebek a rengum, e ngbai kirem el osiik a rolel e sumecheklii tia el mondai. Ngungil a molengit a klausubes er a chad el mtilemellii a rengul, e molasem el meruul er a budech er a delongeliu. Me sel omolatk er a uchul e ke mirruul er sel tekoi, e ngrullau el mo diak mluut el meruul er ngii. A lebebil er a taem, e ngkirem el outekangel aike el tekoi el mo er ngii el cheleuid el omerellem a uchul. Engdi ngdiak a ngera el lerellii er kau a lsekum e ke di melatk er ngii. E le a omoruul el uaisei e ngbai di rullii el mo meringel er kau a mesiou er a Dios el mo er sel tkurrebab el sebechem.

11. (a) Ngera kired el meruul a lsoad a Jehovah a lolecholt a klechubechub me a bltikerreng el mei er kid? (b) A doltirakl er a Biblia, e ngera kired el meruul me lak di el mekngit a ukltked er a cheleuid el omerelled?

 ¹¹ A rebebil a melatk el kmo a cheleuid el tekoi el lurruul a kmal oberaod me a lechub e ngkmal betok me ngdiak el rredemelel a klechubechub er a Dios. Me nguaisei, engdi a ngii di el cheleuid el tekoi el lurruul er a ngar er a mong, me tir a di sebechir el ouchais aike el cheleuid el lurruul, e melodech a blekerdelir, e olengit er a Dios el kirel a klausubes. (Rel. 3:19) A Jehovah a sebechel el olecholt a klechubechub me a bltikerreng el mo er tir, el di uai a lullecholt el mo er a rebebil. Ngmo ousubes er a ngii di el chad el ngariou a rengul, e melemalt a omerellel, e dirrek el ouuchel a rengul er a kngtil. El uai tiang, a Dios a uluusubes er a Job, el ngii a kmal uluuchel a rengul er aike el lurruul. (Job 42:6) A Biblia a ouchais er kid aike el kired el meruul me lak di el mekngit a ukltked er aike el cheleuid el omerelled e bo el chelellakl a rengud. Ngmelekoi el kmo: “Ngikel omart a kngtil a diak bo lungilbesul a klengar er ngii, e ngdi ngikel ocholt a kngtil e choridii er ngii, a mo nguu a klechubechub er a Dios.” (Osi. 28:13; Jak. 5:14-16) Me ngkired el ouchais a kngtid el mo er a Dios, e meluluuch el olengit a klausubes, e mo er sel tkurrebab el sebeched el ochotii el kmo kede ouuchel a rengud er aike el durruul. (2 Ko. 7:10, 11) E seikid e a Jehovah, el ngike el “mereched el ousubes,” a mo olecholt a klechubechub el mei er kid.​—Isa. 55:7.

12. (a) Ngmekerang a doltirakl er a ungil kerebil a David sel lemekngit a ukltked? (b) Ngera uchul me a Biblia a melekoi el kmo a Jehovah a uluuchel er a rengul? (Momes er a baks.)

¹² A nglunguuch a mesisiich el rolel e a Dios a ngosukid. Ngar er a Psalm, e a David a ulechotii a klaumerang er ngii e le a Jehovah a ulenger a nglunguchel. (Monguiu er a Psalm 32:1-5.) A uchei er a louchais a kngtil el mo er a Dios, e a mekngit el ukltkel a mlo uchul e ngdi suebek a rengul, e smecher, e dirrek el mechitechut a rengul. Engdi a uriul er a louchais a kngtil el mo er a Dios e lemusubes, e ngmlo ungil a rengul. A Jehovah a ulenger er a nglunguchel, e ngilsuir me bo lungil a rengul e lolemolem el meruul a melemalt el tekoi. Me ngdi osisiu, a lsekum e ke melatk el kirel aike el cheleuid el murruul, e moluluuch el mo er a Jehovah el kirel a klausubes e bo er sel tkurrebab el sebechem el mo melodech a blekerdelem. E moumerang el kmo a Jehovah a mla rongesii a nglunguchem e mla ousubes er kau.​—Psa. 86:5.

MOLATK ER A NGAR MEDAD EL TAEM

13, 14. (a) Ngera kired el melatk er ngii er chelechang? (b) Ngera el ker a sebechel el ngosukid el merriter aike el doruul er chelechang?

¹³ Ngklemerang el kmo ngsebeched el mesuub a betok er aike el durruul er a ngar er a mong, engdi ngdiak el kired el di blechoel el melatk er ngii. Ngbai kired el melatk er chelechang me a ngar medad el taem. Ngungil a di el kau el oker el kmo: ‘Sel lorael a taem el mong, e  ak mo ouuchel a renguk er aika el tekoi el kulilt er chelechang? Ak mo oureng ulekum e ngmle ngodech a rolel a kuruul a tekoi? Ngblak a renguk el mesiou er a Dios me lak lebo er ngii a kuuchel a renguk er ngii er a ngar medak el klebesei?’

¹⁴ A klou el ringel a kmal kmedang me ngungil a di el kau el oker el kmo: ‘Ngsebechek el remuul a lmuut el betok el ngar er a omesiungek el mo er a Dios? Ngsebechek el pioneer? Ngera me ngdiak el sebechek el mo ministerial servant? Ak meruul aike el rokui el sebechek el mo melodech a blekerdelek? Ngak ak ta er tirke el chad el Jehovah a soal a bo lekiei er a beches el beluulechad?’ Me lak di molatk el kirel aike el dirkak mruul e bai molatk el kirel aike el moruul er chelechang. Bo leblak a rengum er a omesiungem el mo er a Jehovah, e molilt a tekoi er chelechang el diak bo mouuchel a rengum er ngii er a uriul.​—2 Ti. 2:15.

LAK MOUUCHEL A RENGUM ER A OMESIUNGEM EL MO ER A DIOS

15, 16. (a) Ngera el tekoi a bla lrruul a rebetok el chad me bo el sebechir el msang a Jehovah aike el kot el ungil er tir? (b) Ngera me ngdiak el kired el ouuchel a rengud er aike el tekoi el durruul el kirel a Dios?

¹⁵ Kau ke mla remuul a tekoi er a klengar er kau me bo el sebechem el mesiou er a Jehovah el mui el taem? Alta ke chilitii a ungil el ureor me a lechub e ngsiobai me bo el sebechem el mo blak a rengum el mesiou er a Jehovah. Me a lechub e ke millilt el diak bo bechiil me a lechub e ke mo oungalek me bo el sebechem el mesiou el ngar er a Bethel, me a lechub e ke oureor el omekedechor a blil a ongdibel, me a lechub e ke oldingel a ongdibel me a lechub e ke missionari. Kau ke mo ouuchel a rengum er aika el omelilt er chelecha el morael el mo chuodel? Omomdasu aike el tekoi el murruul ngdimlak a ultutelel me a lechub e ke mirruul er a mekngit el taem? Ngkmal diak!

¹⁶ Ke millilt aika el tekoi e le kau el kmal mle betik a rengum er a Jehovah e mle soam el ngosuterir a rebebil el mo mesiou er ngii. Lak momdasu el kmo a klengar er kau a locha lmuut el mo ungil omko ngmle ngodech a rolel a moruul a tekoi. Ngsebechel el mo dmeu a rengum el kirel aike el omelilt er kau, e le ke ngileltii sel kot el ungil rolel a omosiou er a Jehovah el oltirakl er a blekerdelel a klengar er kau. A Jehovah a diak bo lobes aike el rokui el murruul el kirel. Sel bo mnguu a “meral klengar,” el diak a ulebengelel el cherrungel el klengar, e ngmo meskau a klengeltengat el kuk ungil er aike el sebechem el lmatk!​—1 Ti. 6:19; Psa. 145:16.

17, 18. (a) Ngera ngmirruul er ngii a Paulus me lak di louuchel a rengul? (b) Ke mekerang e mo oltirakl er a kerebil a Paulus?

¹⁷ Ngera ngmirruul er ngii a Paulus me lak bo louuchel a rengul er a uriul? Ngmlo diak lolatk el kirel aike el lurruul er a uchei e bai mle blak a rengul el oureor el kirel a omeksullel. (Monguiu er a Filipi 3:13, 14.) Ngdimlak lolemolem el melatk aike el mekngit el lurruul er a lengar er a klechelid er a Rechijudea, e ngbai mlo er sel tkurrebab el sebechel el melemolem el blak a rengul, me bo lenguu a sengk er a diak a ulebengelel el klengar.

¹⁸ Ngera sebeched el suub er a tekingel a Paulus? Ngkired el melatk el kirel aike el sebeched el meruul er chelechang me bo dengai a klengeltengat er a ngar medad el taem, er a bai di dolatk el kirel aike el durruul er a uchei el diak a ta er ngii el sebeched el ngmodech. Me alta ngdiak el sebeched el obes aike el durruul, engdi ngdiak a ultutelel a di lemekngit a ukltked el kirel. Ngsebeched el mo diak dolatk el kirel aike el durruul er a uchei, e bai msang a Dios aike el kot el ungil er kid er chelechang, e melatk el kirel aike el ungil tekoi el mo er ngii er a ngar medad el taem!