1, 2. Ngera el ileakl el techall a lobang a Resioning er a Jehovah? E uangerang a uldesuem el kirel?

 A RECHAD a mo melechesuar el kmo te chetengakl sel lenguu a nguked el kirel a ungil el tekoi el leriruul. El ua tiang, a rebebil a nguu a chetengakl sel lolengeseu el rullii a budech er a delongelel a eru el beluu. Engdi nglmuut el klou el chetengakl a lsekum kede modurech er a Dios el mo ngosuterir a rechad el mo budech a deleuill er tir me Ngii!

² Me kid el Sioning er a Jehovah a di ta el cheldebechel el oba tia el ileakl el techall. A Dios me a Kristus a omekrael er a urered el mo olengeseu er a rechad ‘me le sumech a delongelir tir me a Dios.’ (2 Ko. 5:20) Me a Jehovah a ousbech er kid el olengeseu er a rechad el mo kmeed er ngii el uchul me a rebetok el miliol el ngar er a kuk betok er a 235 el beluu a mla mo sechelil a Dios, e dirrek el oba omelatk el mo kiei el mo cherechar. (Tit. 2:11) Me ngblak a rengud el mengemedaol er tirke el sorir me “le nguu a ralm er a klengar el diak locheraol.” (Och. 22:17) Me kede “semeriar el meruul a ungil el tekoi” e le ngbetik a rengud er a tekoi el doruul el kirel a Jehovah, e dirrek el meruul er ngii el ngar er a tkurrebab el sebeched. (Tit. 2:14) Me chelechang e kede mo mesuub er a rolel e a blakerreng er kid a sebechel el ngosuterir a rechad el mo medengelii a Jehovah. E a ta er ngii a okiu a urered er a berkel a klumech.

3. Ngera uchul me ngulterekokl a rengud e le Jehovah el “mla tibir er a rengul el mo meruul” a soal?

³ A Isaia 9:7 a ouchais el kmo a Ngelekel a Dios a mo King e ngii a mo meruul a ungil el tekoi el kirel a klechad. Aika el tekoi a mo meketmokl e le Jehovah a “mla tibir er a rengul el mo meruul a ikal rokui.” Me a tekoi el ngar tia el bades a oterekokl a rengud el kmo a Jehovah a kmal soal a bo lesobel a klechad. Me ngkired el mo semeriar e blak a rengud el omerk er a klumech e le Jehovah el Dios a blak a rengul. Me  kau el ta er a kldemel a Dios er a ureor, ngblak a rengum el meruul aike el sebechem el ouchais er a ungil chais?​—1 Ko. 3:9.

4. Ngmilekerang a Jesus e ochotii a cherrungel el kerebai el mle blak a rengul er a omesiungel?

⁴ A Jesus a milecherei a kot el ungil el kerebai el millemolem el blak a rengul er a omesiungel. Me alta e a rebetok a ulemtok e mle sorir el omekoad er ngii, engdi ngmillemolem el blak a rengul el mo lmuut er a ulebongel er a klengar er ngii er tia el chutem. (Jn. 18:36, 37) Ngii el mle medengei el kmo ngmo chuarm e mo mad a uchul me ngliluut el mo blak a rengul el olengeseu er a rechad el mo medengelii a Jehovah.

5. Ngmekerang a Jesus e mo ua ngike el chad er a sers el ngar er a okesiu el kirel a kerrekar el fig?

⁵ Ngar er a rak er a 32, e a Jesus a milsaod er a okesiu el kirel a chad el dillemii a kerrekar el fig el dimlak bo lourodech. Me a uriul er a edei el rak e ngika el chad a dilu er a chad er a sersel el kmo mukelii, engdi ngika el chad er a sers a ullengit me lluut el mecherei e lolasem el meruul er ngii el mo ourodech. (Monguiu er a Lukas 13:6-9.) Sera ledelii tia el tekoi a Jesus e te dirk mle kesai el chad a mla mo disaiplo. Engdi a okesiu el ledillii a Jesus a ulechotii el kmo ngmle soal el lmuut el mo blak a rengul el omerk er a klumech er a uchei er a lemad. Me ngliluut el mo blak a rengul er a omesiungel er a beluu er a Judea me a Perea el bekord el elolem el buil. E sesei el klebesei er a uchei er a lemad e nglilangel e le ruumesingd el chad a dimlak lekengei er a klemechel.​—Mt. 13:15; Lk. 19:41.

6. Ngera uchul me ngkired el menglou er a omesiunged?

⁶ Ngkired el lmuut el mo blak a rengud el menglou er a omesiunged e le kede kmal kmedang er a ulebongel. (Monguiu er a Daniel 2:41-45.) Ngkmal klou el chetengakl el tekoi a bo de Sioning er a Jehovah! Kid a di ta el cheldebechel er a rechad el sebeched el ouchais er a rechad er a rolel e ngmo mesmechokl a mondai er a klechad. A ta el chad a dirk milluches er a simbung el kmo ngkmal diak dodengei el kmo ngera uchul me a mekngit el tekoi a duubech el mo er a rungil el chad. Engdi a Biblia a ouchais er a uchul. Me a leuaisei e ngerechelel a derta er kid el Kristiano el mo ouchais er a rechad el kirel. Me ngkired el mo ‘semeriar a rengud el mesiou’ er a Jehovah. (Rom 12:11) Me a Jehovah a mo omekngeltengat er a urered, me kid a dirrek el mo sebeched el ngosuterir a rechad el mo medengelii e mo betik a rengrir er ngii.

7, 8. Ngmekerang a omelenget el doruul e kobkellii a Jehovah?

⁷ A Paulus a uluutekangel a betok el mondai er sera lomerk er a klumech, el mlo ‘diak a cheliuiuel e diak a kelel.’ (2 Ko. 6:5) Me a rudam me a rudos er kid a dirrek el chelebangel a chouaika el tekoi el omesiungir a uchul. Me alta e a rebetok el pioneer a kirir el oureor engdi te nguu a omesiungir el mo kot el klou a ultutelel el ureor er a klengar er tir. Ka dirrek el molatk er a rebetok el missionari el meringel el oureor el olengeseu er a rechad er a ngodech el beluu. (Fil. 2:17) A lebebil er a taem e a remechuodel a mo kirir el olengeseu er a rechad er a ongdibel me ngmo diak a temir el omengur e mo kedeb a temir el mechiuaiu. A remechudelang me a resmecher el ngar er a chelsel a ongdibel a blak a rengrir el melasem el mo er a miting me a odingel. Ngkmal melisiich er kid sel domes er a rolel a omelenget el loruul er ngii tirka el mesiungel a Dios el kirel a omesiungir. Me a rechad el diak el Sioning a dirrek el medengei el kmo a omesiunged a klou a ultutelel er kid.

⁸ Ngar er a babier el mo er a simbung er a United Kingdom e a chad el diak el Sioning a milluches el kmo: ‘A rechad a mla mo diak loumerang a klechelid. Ngdiak kudengei el kmo a remengeteklel a klechelid te mekerang. Ngdiak bo ltobed el mo mengedecheduch er a rechad el ua lurruul er ngii a Kristus. Sel kumes e ngdi ta el klechelid el omekerreu er a rechad a Resioning er a  Jehovah, e le te mo tuobed e merael el mengedecheduch er a rechad el omerk er a klemerang el tekoi.’ A ruumesingd el chad er a beluulechad a di melatk er a di tir, engdi kid el kongei el melenget aike el ngar er ngii er kid e omerk er a klumech a uchul me kede mengebkall er a Jehovah el Dios.​—Rom 12:1.

9. Ngera sebechel el ngosukid el mo blak a rengud el meruul er a omesiunged?

⁹ Kede mo mekerang a lsekum sel blakerreng er kid er a omesiunged er a uchei a mechitechetong? Ngkmal kired el melatk a rokui el ungil el tekoi el longetmokl a Jehovah el okiu tia el ureor. (Monguiu er a Rom 10:13-15.) A di ta el rolel e te mo suobel a rechad a sel bo loumerang er a Jehovah e lomekedong er a ngklel. Engdi ngdiak el sebechir el meruul er tia el tekoi a lak dosisecheklterir. Me a klemedengei er kid er tia el tekoi a rullid el lmuut el mo blak a rengud el meruul a ungil el ureor e meruul aike el sebeched el omerk er a ungil chais el kirel a Rengedel a Dios.

10. Ngmekerang a ungil el omerelled e rulleterir a rechad el mo sorir el mo medengelii a Dios?

¹⁰ Ngdiak di el blakerreng er kid a sebechel el rulleterir a rechad el mo sorir el mo medengelii a Dios. A ongeru el tekoi el sebechel el ngosuterir a ungil el omerelled el Kristiano. A Paulus a mesaod er a uchul me a omerelled a dirrek el klou a ultutelel er a ledu el kmo: “Ng diak kimoruul olibesongel el mor a ngii di le chad, me ng diak a mo oltelechakl er kemam er a ngera er omesiungam.” (2 Ko. 6:3) A klikiid el cheldechedechad me a ungil el omerelled a sebechel el rulleterir a rechad el mo sorir el mengull er a Jehovah. (Tit. 2:10) Kede blechoel el orrenges el kmo a rechad a mo sorir a klemerang sel lomes er kid el oukerebai er a Kristus.

11. Ngera uchul me ngkired el melatk e meluluuch el kirel a omerelled me a uldesuir a rechad?

¹¹ A ungil el omerelled a sebechel el rulleterir a rechad el mo sorir a klemerang, me a mekngit  el omerelled a dirrek el sebechel el rulleterir a rechad el mo diak el sorir el mo medengelii a Jehovah. Me bo dekerekikl me sel dengar er a ureor, blid, me a lechub a skuul e lak doruul a tekoi el mo uchul e a rechad a mo diak el sorir el mo medengelii a Jehovah. A lsekum ngmo durengud el meruul a klengit e ngsebechel el mo uchul a telemellel a deleuill er kid me a Jehovah el diak a ulebengelel. (Heb. 10:26, 27) Tiang a kirel el rullid el mo melatk e meluluuch el kirel a omerelled me a uldesuir a rechad sel lomes er kid. Me chelecha el di lorael el mo mekngit a blekeradel er tia el beluulechad e nglmuut el mo bleketakl a ‘klekakerous er a chad el mesiou er a Dios ma chad el diak losiou er ngii.’ (Mal. 3:18) Me a ungil el omerelled el Kristiano a ta er a klou a ultutelel el rolel e kede ngosuterir a rechad el mo sorir el mo sechelil a Dios.

12-14. Ngera ngrullii er a rechad sel doutekangel a ultok? Mosaod a tekoi el dilubech.

¹² Ngar er a ongeru el babilengel a Paulus el mo er a Rekristiano er a Korinth e ngmilsaod el kmo ngmlukcharm, mlechelebed, e mlekelebus e le rechad el ulemtok er a omesiungel. (Monguiu er a 2 Korinth 6:4, 5.) Sel lomes er kid a rechad el outekangel a ultok e ngsebechir el mo kongei er a klemerang. Sesei el rak er a uchei, e a rebebil el ngar er a Angola a mlo sorir el olekngemed er a Resioning er a Jehovah er a belurir. Me te milengelebed er a 2 el Sioning me a 30 el chad el uldimukl er a redil me a rengalek el mle semeriar el mesuub el di mlo merael a rasech er a bedengir. Ngmle sorir a rechad a bo lemedakt el mengedecheduch er a Resioning er a Jehovah me te ullerrimel er tir el mo omes er tir er a longelebed er tirka el chad. Engdi uriul e a rebetok er tirka el chad a bai mlo olengit er a Resioning el mo mesuub a Biblia el obengterir! Me a ureor a millemolem me a rebetok el chad a mlo medengelii a klemerang, e a rudam er kid a mlukngeltengat.

¹³ Tia el tekoi el dilubech a ochotii el kmo a rechad sel lomes er kid el oba blekeu er a taem er a omelsemai, e ngsebechir el mo kongei er a klemerang. A blekeu el luleba Petrus me a rebebil el apostol a locha rirelleterir a rechad el mo sorir el mo sechelil a Dios. (Rel. 5:17-29) Me tirke el dedak el ngar er a skuul, ureor me a lechub a rechedad a sebechir el mo kongei er a klemerang sel lomes er kid el bekeu el outekangel a ultok.

¹⁴ Me ngdirk melemolem el ngar er ngii a rudam er kid el modechelakl. Chelechang, e te ngar er ngii a rebekord el 40 el odam er kid el kelebus er a beluu er a Armenia e le ngdiak lekengei el olab el mo er a bitang me a bitang, e dirk klou a techellir a lmuut el bebil el mo soiseb er a kelebus er sel beluu. Ngar er a beluu er a Eritrea, e a 55 el Sioning a kelebus el rebebil er tir a betok er a 60 a rekrir. Ngar er a South Korea, e a bekord el 700 el Sioning a ngar er a kelebus e le ngdiak lekengei el olab el mo er a bitang me a bitang. Ngmla mo 60 el rak el rudam er kid a mo soiseb er a kelebus er sel beluu. Ngkired el melemolem el meluluuch me a blakerreng er tirka el odam bo luchul a odanges el mo er a Dios e lengesuterir a rechad el mo kongei er a klemerang.​—Psa. 76:8-10.

15. Mosaod er a tekoi el dilubech el ochotii el kmo a omerelled el kmal honest a sebechel el mo uchul e a rechad a mo sorir a klemerang.

¹⁵ Kid el kmal honest a uchul me a rebebil a omes er kid e mo sorir el mo mesuub er a klemerang. (Monguiu er a 2 Korinth 6:4, 7.) A ta el odos a millecha udoud er a ticket machine er a bus e a sechelil a dmu er ngii el kmo ngdiak a belkul el lolecha olengil e le a omerollel a kmal di kedeb. Me ngika el odos a dilu el kmo a di lekedeb me a lechub e ngkemanget me ngdirk kirel el omechar er a omerollel. E a uriul e a sechelil a mlo kmerd er a bus. Me ngika el omekall er a bus a uleker er ngii el kmo, ‘Kau ke ta er a Resioning er a Jehovah?’ Me ngdilu el kmo ‘Choi, e ngera uchul me ke oker?’ ‘Ak ulerrenges er kau el mesaod el kirel a olengil a ticket er kau e medengei el kmo te kmal di mekesai el chad a kerekikl el omechar a ticket e dirrek el kmal honest  er a bek el taem, e a Resioning er a Jehovah a uaisei a blekerdelir.’ Sesei el buil er a uriul e a ta el chad a mlo mengedecheduch er ngika el odos er a miting e dmu el kmo, ‘Ke dirk medengelkak? Ngak ngike el chad el ulemekall er a bus e milengedecheduch er kau el kirel a olengim. Sera kumes a omerellem el kmal mle honest, e ak tilbir er a renguk el mo mesuub a Biblia el obengterir a Resioning er a Jehovah.’ Me a rechad sel lomes er kid el honest e te mo oumerang er a ungil chais el domerk er ngii.

16. Ngera mo duubech a lsekum e ngmo klou a rengud, oubltikerreng, e ungil a omerelled? Mosaod a omerellir a rebebil el mengeteklel a klsuul el klechelid.

¹⁶ A blekerdeled el klou a rengud, oubltikerreng, e ungil a omerelled a sebechel el rulleterir a rechad el mo sorir el mesuub el kirel a Jehovah, me a moktek er ngii me a dirrek el rechedal. A blekerdelir me a omerellir a remera el Kristiano a odengesii a Dios. A rebebil el mengeteklel a klechelid a meruul er tir el leko ngungil a blekerdelir me a omerellir, engdi te omulak er a rechedal a klechelid er tir e melai a udoud er tir. Me a rebebil er tir a ousbech aika el udoud el omechar a meringel a cheral el blirir me a mlirir. A ta er tir a rirellii a blil a cheremel el bilis el ngar er ngii a air condition er a chelsel! Tirkang a kmal diak loltirakl er a tekingel a Jesus el kmo morous el diak “locheraol.” (Mt. 10:8) Te bai di ua tirke el mekngit el prist er a Israel, el mle “uduudel a loleiuul a llach” e olisechakl a cheleuid el tekoi el kirel a Dios. (Mik. 3:11) Me a chebirukel el omerellir a diak el sebechel el ngosuterir a rechad el mo sechelil a Dios.

17, 18. (a) Ngmekerang a omerelled e mo kobkellii a Jehovah? (b) Ngera uchul me ngsoam el melemolem el meruul a ungil?

¹⁷ A rebebil a mo sorir el mo sechelil a Dios sel bo lodengei el kmo kede olisechakl er a klemerang e leues a ungil el omerelled el mo er a rechad. El ua tiang, a ta el pioneer a milengedecheduch er a mechas e ngdilu er ngii el kmo ngdiak el semeriar. Ngii el mechas a dilu el kmo sel taem er a lolngod er a chesimer e ngmla er a laidang el omtechei er a tama er a dengki er a umengel. Me ngii el chad a dilu el kmo, “Ngkmal diak el kirem el meruul el uaisei e le ke mo metemall.” Me ngmlo ngosuir el mtechir a tama er a dengki er ngii e merael. Me sera bo lodengei a ngelekel el sechal e ngkmal mlo mechas a rengul me ngulsiik er ngika el odam e mereng a sulel, e a uriul e ngkilengei el mo mesuub a Biblia.

¹⁸ Ngera uchul me ngsoam el melemolem el meruul a ungil? Nglocha soam el mo meruul el uaisei e le ke medengei el kmo a blakerreng er kau el kirel a omesiungem me a ungil el omeruul a mo kobkellii a Jehovah e ngosuterir a rechad el mo suobel. (Monguiu er a 1 Korinth 10:31-33.) Kede dirrek el blak a rengud el omerk er a klumech e meruul a ungil e le ngbetik a rengud er a Dios me a rechad. (Mt. 22:37-39) A lsekum kede mo semeriar el meruul a ungil e kede mo melechesuar a deurreng er chelechang, e dirrek el mo oba omelatk el mo kiei er sel taem el rokui el chad a dmeu a rengrir el mengull e oldanges er a Ulemeob el Jehovah.