1. Kede mekerang e smisichii a klaumerang er kid er a Dios?

 A REBETOK el chad a melekoi el kmo te di oumerang aike el tekoi el sebechir el omes. Engdi a Biblia a kmo, “ng dirkak a chad el mesa Dios.” (Jn. 1:18) Me kede mekerang e ngosuterir chouaitirka el chad el mo oumerang er a Dios? E kede mekerang e smisichii a klaumerang er kid er a Jehovah el ngii a “diak le moues el Dios”? (Kol. 1:15) A kot e ngkired el mo medengei aike el osisechakl el mengeuid a klemerang el kirel a Dios. E dirrek el kired el mesuub el mo meduch el ousbech er a Biblia el meketeklii el kmo a chouaika el osisechakl a “omtok a meral tekoi el dodengei el kirel a Dios.”​—2 Ko. 10:4, 5.

2, 3. Ngera eru el osisechakl el mengeuid er a rechad me ngmo diak el sebechir el suubii a klemerang el kirel a Dios?

² Sel uldasu el kmo kede mla er a mongkii el mei a ta er aika el blulak el osisechakl el mengeuid er a rechad me ngdiak el suubii a klemerang el kirel a Dios. Tia el osisecheklir a rechad a omtok a tekoi el ngar er a Biblia e dirrek el rulleterir a rechad me ngmo diak a omeltkir. E tia el osisechakl a melisiich er a uldasu el kmo a klengar a di mle ngii el duubech. Me a lsekum tiang a klemerang, e ngmo ngdiak a moktek er a klengar er kid.

³ E a rebebil el leko te Kristiano a ousbech er a Biblia el olisechakl el kmo a rokui el tekoi el ngar er a melidiul me tia el chutem me a rokui el klengar el ngar er a chelsel a dilubech er a di kesai el telael el rak er a uchei. Te dmu el kmo a Dios a mileob a rokui el tekoi er a di chelsel a elolem el klebesei el 24 el sikang a klemengetel a ta er ngii el sils. A rechad el oumerang er tia el klsuul el osisechakl a oltngakl a mla obeketakl el tekoi er a science el ngii a omtok er a klaumerang er tir. Me alta e te oumerang er a Biblia, engdi tia el osisecheklir a rulleterir a rebebil me ngmo meringel er tir el oumerang er a Tekingel a Dios. E ngera uchul? E le tia el osisecheklir a rullii a Biblia el  mo ua lecheleuid e diak el tabesul a tekoi er a chelsel. A rechad el melisiich er tia el osisechakl a di ua omerellir a rebebil el kiliei er a taem er a rekot el Kristiano, el mle blak a rengrir el mengull er a Dios, engdi ng “diak lungil el medengei el kmo te mekera losiou er a Dios.” (Rom 10:2) Me kede mekerang e ousbech a Tekingel a Dios el ochotii el kmo aika el eru el mesisiich el klaumerang a cheleuid? * Ngmo sebeched el ngosuterir a lsekum e kede mo blak a rengud el mesuub a melemalt el omesodel a tekoi el ngar er a Biblia.

4. Ngerang a uchetemel a klaumerang er kid?

⁴ A Biblia a melisiich er kid el mo omes er a klemedengei el ua lemekreos el klalo. (Osi. 10:14) Me a Jehovah a soal a bo doumerang er ngii e le kede mla mes a olechotel a tekoi e mla ungil el omdasu er ngii, e diak di doltirakl a uldesuir a rechad me a siukang er a klechelid. (Monguiu er a Hebru 11:1.) A bo lemesisiich a klaumerang er kid e ngkired el mo ulterekokl a rengud el kmo ngmera el ngar er ngii a Jehovah. (Monguiu er a Hebru 11:6.) Ngdiak doumerang er ngii e le ngkmal soad el mo oumerang e le merekong, kede bai mla tiriter a olechotel a tekoi e mle ungil el omdasu er ngii.​—Heb. 5:14.

5. Ngerang a ta er a uchul e kede oumerang el kmo ngar er ngii a Dios?

⁵ A apostol el Paulus a mesaod er a uchul me ngsebeched el oumerang el kmo ngmera el ngar er ngii a Dios, alta ngdiak desang. Ngmilluches el kmo: “Ser a le bebii a beluulchad el mer chelechang, e a ikel diak el moues el blekerdelel a Dios el diak a ulebengelel el klisiich ma klechelid er ngii a mla moues el bleketakl; kede mes el ngar a ikel le bileob a Dios.” (Rom 1:20) Me ke mekerang e ngosuir a chad el diak loumerang el kmo ngar er ngii a Dios me bo loumerang aike el tekingel a Paulus? Ngsebechem el ouchais er ngii el kirel a bebil er aike el bleob el bo dosaod el olecholt er a klisichel me a llemesel a rengul a Dios.

6, 7. Ngera el eru el tekoi a ochotii a klisichel a Jehovah?

⁶ A klisichel a Jehovah a mocholt el oeak a eru el tekoi el omekerreu er kid, el ngii a eltel tia el beluulechad me a magnetic field. A eltel tia el beluulechad a uchul a eolt el douteliil e dirrek el omekerreu er kid. El mekerang? A meklou el bad el kmal bekerurt el merael el ngar er a melidiul a sebechel el mo uchul a klou el tellemall a lsekum ngsubechii er tia el beluulechad. Engdi tiang a diak el blechoel el duubech e le ngoumesingd er aike el bad a medul er sel taem el lesiseb er a eltel tia el beluulechad. Tiakid a uchul aike el klebokel el shooting star el suebek er a eanged sel leklebesei.

⁷ A magnetic field er tia el beluulechad a dirrek el omekerreu er kid. Sel kmal chelsel tia el chutem a ngar er ngii a omrechorech el iron er a chelsel el uchul a kmal mesisiich el magnetic field el meliuekl er a beluulechad e dirrek el mo soiseb er a melidiul. Tia el klekedall a omekerreu er kid er a mesisiich el kleldelel a sils me aike el obubuu el klekedall el tuobed er tia el sils el sebechel el tomellid. Me sel lobuu e ngmo uchul a radiation el mei er a beluulechad. Engdi tia el magnetic field a omekerreu er tia el beluulechad me ngdiak el sebechel a radiation el durur me bo lak a klengar er a chelsel. Ngbai sebechel tia el klekedall el timetmii tia el radiation me a lechub e nglmuut el olutii el mo er a melidiul. Me a urerel tia el diak el moues el klekedall a mocholt el oeak a klebokel el didech er a klebesei el sebeched el mes er eanged er aike el beluu el kmeed er a North pole me a South pole. Me ngkmal bleketakl el kmo a Jehovah a kmal “imis el klou” a klisichel.​—Monguiu er a Isaia 40:26.

8, 9. Ngmekerang e a rechad me a charm a melemolem el ngar? E tiang ochotii a ngerang el kirel a llemesel a rengul a Jehovah?

⁸ A llemesel a rengul a Jehovah a mocholt el  oeak a tekoi el bla leketmokl me bo el sebechel a klengar el melemolem er tia el chutem. Ka molatk er a rebetok el miliol el chad el kiei er a chelsel a beluu el oucheuatel. E tia el beluu a diak a rolel a losiseb a beches el ralm er a chelsel e diak a rolel a lechoit a komi er ngii. A lsekum e nguaisei, e tia el beluu a di mereched el mo kikiongel me ngmo diak el sebechir a rechad el kiei er ngii. Me ngoeak a bebil el rolel e a beluulechad a di ua tia el beluu, e le ngtelkael a ildisel a ralm er a chelsel e diak a rolel e dechoit a komi me ngdi melemolem el ngar er a chelsel. Me nguaisei, engdi a beluulechad a di blechoel el ngar er ngii aike el tekoi el usbechall me lolemolem el ngar a rechad me a charm. Tiang mekerang e mo uaisei? E le ngar er ngii a ileakl el rolel tia el beluulechad el lomekbeches a tekoi er a chelsel el dousbech me dolemolem el ngar.

⁹ Me bo dosaod a rolel a lomekdubech a oxygen tia el beluulechad me bo el sebechir a rechad me a charm el outeliil. A rebetok el biliol el chad me a charm a outeliil a oxygen e oltobed a carbon dioxide. Me alta e a rechad me a charm a melemolem el outeliil engdi ngdi blechoel el ngar er ngii a oxygen. Tiang mekerang e mo uaisei? Sel douteliil a oxygen e kede oltobed a carbon dioxide. Engdi a dellomel a ousbech a carbon dioxide, ralm, dichel a sils, me a nutrients el omekdubech a carbohydrates me a oxygen. Tia el omeruul el okedongall el photosynthesis a mo uchul e ngsebeched el melemolem el outeliil. Me a Jehovah a ulemeob a dellomel el lousbech el “omesterir a re bek el chad a klengar, ma telrir.” (Rel. 17:25) Tia kmal mengasireng el olechotel a llemesel a rengul!

10, 11. Kede mekerang e mesa llemesel a rengul a Jehovah er a blebelel el bangikoi me a chemaiong?

¹⁰ A llemesel a rengul a Jehovah a dirrek el mocholt el oeak a kakerous el blebelel el ngar er tia el chutem. A re scientist a omdasu el kmo ngar er ngii a kesengil e ng 2 el miliol el mo er a 100 el miliol el bedengel a klengar er tia el chutem. (Monguiu er a Psalm 104:24.) Kede mo mesuub el kirel a llemesel a rengul a Dios el okiu a bebil er aika el blebelel.

¹¹ El ua tiang, ngar er ngii a ta er a bedengel a bangikoi el brain er ngii a di ua klungel a medal a oluches. Me alta ngkmal kekerei a brain er ngii, engdi ngsebechel el suebek el 1,800 el mael el ngar er a Canada el mo er a Mexico el ousbech er a sils el omekrael er ngii. Engdi ngmekerang e sebechel el suebek el ousbech er a sils el omekrael er ngii a lsekum a sils a dirrek el merael el mo ngmelt? A Jehovah a milebii a brain er ngika el charm el mo sebechel el suebek er sel ulterekokl el rolel alta e a sils a mo ngmelt. Me chelechang e kuk molatk er a chemaiong. A derta er a chelsul a medal a ngar er ngii a 30,000 el lens er ngii. Me nguaisei, engdi a kekerei el brain er ngika el charm a sebechel el rullii el mo omes e medengei a rokui el mengitengtik er a bita er ngii el okiu aika el lens er a medal.

12, 13. Ngera uchul me ngkmal mechas a rengud er sel rolel a Jehovah er a lomeob a cells er a bedenged?

¹² Ngdirrek el kmal mechas a rengud er sel rolel a Jehovah er a lomeob aike el cell er a rokui el  di ngar el bleob. Ngar er ngii a bekord el 100 el triliol el cell er a bedenged. E ngar er a chelsel a derta er aika el mekekerei el cell e ngar er ngii a klekedall el okedongall el DNA. E tia el klekedall a oltekau a information el usbechall el mo omeob er a chad.

¹³ A DNA ngsebechel el oltekau a ua ngera el klungel el information? Ngsebeched el omekesiu er a DNA el mo er a compact disc (CD). A CD a sebechel el oltekau a rokui el information er a chelsel a dictionary. E tiang a mechas a rengud er ngii e le CD a di kekerei el klekedall. Engdi a 1 gram el DNA a sebechel el oltekau a kmal betok el information el di osisiu ngii me a 1 el triliol el CD! Me a di chimo el kekerei el oliich er a DNA a oltekau a information el usbechall el mo omeob er a rokui el chad el kiei er a beluulechad er chelechang! Tia el osisiu el klungel a DNA a dirrek el sebechel el oltekau a information el usbechall el mo omeob er a 2.5 el triliol a ildisir el chad!

14. Ngmo ua ngerang a uldesuem el kirel a Jehovah sel molatk a tekoi el bla lesuub a re scientist?

¹⁴ A King el David a milluches el kmo: “Ke miles a chiuesek er a le meruul el ulekedelad el chelderoder er a chelsel a delel a delak.” (Psa. 139:​15) Ngsebeched el mo medengelii a uchul me a David a mle soal el oldanges er a Jehovah sel lolatk er a rolel e ngulebeob. A re scientist a mla mo medengei a betok el mengasireng el tekoi el kirel a omebelel a chad. Me a chouaika el tekoi a rullid el mo kongei er a uldesuel ngika el milluches er a psalm el kirel a Jehovah el kmo: “Ak uldanges er kau ele ke rirellak el ileakl ngodech e mengasireng. Ng kmal mengasireng a urerem; ak ungil medengei.” (Psa. 139:14) Me a rokui el bleob el domes el meliuekl er kid a ochotii el kmo ngmera el ngar er ngii a Dios!

15, 16. (a) Ngmilekerang e a babilenged a mla ngosuterir a rechad el mo mesuub el kirel a blebelel a Jehovah? (b) Ngera ta er aike el “Was It Designed?” el suobel el kmal mle soam?

¹⁵ A Awake! el babier a mla mo betok el rak el olengeseu er a rechad el mo medengelii a Dios el oeak a omesodel a blebelel. El ua tiang, ngmla er ngii a ileakl el Awake! el tilobed er a September 2006 el dai er ngii a kmo “Is There a Creator?” Tia el babier a mileketmokl el mo olengeseu er a rechad el tir a oumerang el kmo kede mla er a mongkii el mei me a lmuut el bebil el cheleuid el osisechakl. A ta el odos a milluches er a babilengel el mo er sel obis er kid el ngar er a Merikel el mesaod er tia el Awake! el kmo: “Sel campaign el merous er tia el ileakl el babier a kmal mle ungil el merael. A ta el redil a ullengit el kirel a 20 er aika el babier. Ngolisechakl a tekoi er a science er a skuul me ngmle soal el mesterir a rengalek er a class er ngii aika el babier.” Me a ta er a odam a milluches el kmo: “Ak ulemuchel el oldingel a obliil er a uchei er a 1950 e millemolem el me lmuut er chelechang el kmedu el mo 75 a rekik, engdi ngkmal mle ileakl el soak el oldingel a obliil er chelecha el buil el merous er tia el ileakl el Awake!”

¹⁶ Sera 2008 el me lmuut er chelechang e ngar er a betok el Awake! e ngar er ngii a suobel el dai er ngii a kmo “Was It Designed?” Aika el mekekedeb el suobel a blechoel el mesaod a mengasireng el blebelel a Dios me sel rolel e a rechad a melasem el omeob a klalo el mo ua aike el blebelel. Sera 2010 e ngdirrek el tilobed a babier el Was Life Created? A klebokel el siasing er a chelsel a mileketmokl me bo doba omereng el saul el mo er a Jehovah el kirel a blebelel. Me a ker er a ulebengelel a derta el suobel a ngosuir a chad el mo ungil el omdasu a tekoi er a chelsel. Tia kmal ungil el babier el sebeched el ousbech er ngii sel domerk er a klumech.

17, 18. (a) Ngera ta er a ngerechelir a ruungalek? (b) Kom milekerang e ousbech a babier el mesaod er a blebelel a Dios er a temel a omengull el telungalek er kemiu?

¹⁷ Me kemiu el oungalek, kom mla mesuub er tia el babier kemiu me a rengelekiu er a temel a omengull el telungalek? Tiang a sebechel el melisiich er a klaumerang er tir er a Jehovah. Me a lsekum e ngar er ngii a rengelekiu el ngar er a high school, e tirke el olisechakl el kmo kede mla er a mongkii el mei a kmal sorir a rengelekiu a bo  loumerang el kmo ngdiak a Ulemeob. A rebetok el scientist, sensei er a skuul, show er a TV me a mubi a olisechakl el kmo sel uldasu el kmo kede mla er a mongkii el mei a mla obeketakl el klemerang. Engdi ngsebechiu el ngosuterir a rengelekiu el mo meduch el mesaod er a klaumerang er tir el ousbech er sel ta er a babier el The Origin of Life​—Five Questions Worth Asking, el mlotobed er a rak er a 2010. Tia el babier a di ua sel Was Life Created? el babier e le ngolengeseu er a rengeasek el mo omekeroul er a “sekutaberreng.” (Osi. 2:10, 11) Ngolisechakl er tir el mo merriter aike el tekoi el losuub er a skuul el kmo ngklemerang me a lechub e ngdiak.

¹⁸ A lebebil er a taem e ngtuobed a chais el kmo a re scientist a mla metik a fossil el meketeklii el kmo kede mla er a mongkii el mei. Me a lechub e ngtuobed a chais el kmo te mla metik a rolel e a klengar a sebechel el di ngii el duubech. Tia el babier el Origin of Life a ngosuterir a rengeasek me bo el sebechir el di tir el merriter el kmo a chouaika el chais ngklemerang me a lechub e ngdiak. Me kemiu el oungalek, mousbech aika el babier el melisiich er a klaumerang er a rengelekiu me bo el sebechir el mo bekeu el smodii a uchul me te oumerang el kmo ngar er ngii a Ulemeob.​—Monguiu er a 1 Petrus 3:15.

19. Ngera el techall a dobang?

¹⁹ Ngsebeched el mo medengei a betok el kirel a blekerdelel a Jehovah sel dosuub aike el babier el lebeskid a cheldebechelel el mesaod a blebelel. Me a chouaika el tekoi a rullid el mo soad el oldanges er a Jehovah el oba rengud el rokir. (Psa. 19:1, 2) Me ngkmal klou el techall a dobang el mo mengebkall er a Jehovah el Ngii a Ulemeob a rokui el tekoi e kmal rredemelel a ngmai a odanges!​—1 Ti. 1:17.