1, 2. (a) Ngera el chebechiil a mo uchul a klou el deurreng er a eanged? (b) Ngera el ker a bo dosaod?

 NGBLECHOEL el usbechall a klou el taem el mengetmokl el kirel a merengel a chebechiil. Engdi tia el chebechiil el bo dosaod er ngii er chelechang a mla mo 2,000 el rak el longetmokl el kirel! Ngdi kmedung e a redil el mo bechiil a mo obengkel ngike el mo bechil. A klou el ongngak a mo mekekii a blil a King, e tirke el ngar er a eanged a mo mengitakl el klou a ngerir el kmo: “Doldanges er a Dios! Ele Rubak, el Dios er kid el Olab a Bek el Klisiich a King! Doldeu a rengud e bo lungil a rengud; dodengesii ele ng mocha belsechel a merengel a chebechielel a Ngelekel a Sib, e a mo bechil a mla kudmeklii el kirel.”​—Och. 19:6, 7.

² A Jesus Kristus a “Ngelekel a Sib” el losaod er ngii tia el bades. (Jn. 1:29) Me a chebechiielel a mo uchul a klou el deurreng er a eanged. Ngua ngerang a bilel er a chebechiil? Ngtecha ngike el mo bechil? Ngua ngera omengetmeklel ngika el redil el kirel a chebechiil? Ngoingerang e ngmo er ngii a chebechiil? Me alta e tia el chebechiil a mo uchul a deurreng er a eanged, engdi tirke el oba omelatk el mo kiei er a chutem el diak a ulebengelel, te dirrek el mo oldeu a rengrir  er tia el chebechiil? Ngkmal soad el mo medengei a nger er aika el ker. Me bo dolemolem el mesuub el kirel a Psalm 45.

3, 4. (a) Ngua ngerang a bilel a chad el mochu bechiil? Ngera liluut el dochelii a deuil a rengul? (b) Te rua techang a “redil ngelekir a re king,” me a “kuin” el dmeu a rengrir el obengkel a chad el mo bechiil?

³ Monguiu er a Psalm 45:8, 9. A Jesus Kristus el mochu bechiil a milii er a bilel er a chebechiil. Me a bilel a kmal ungil a bul e le ngchelilt er a meringelchad el kosui el ua mir, el ngii a ta er a klekedall el urrechomel er a chedaol el chilt el luluusbech a rechad er a Israel er a irechar.​—Exo. 30:23-25.

⁴ A kmal ungil ongngak el ngar er a blil a King el mochu bechiil a lmuut el dochelii a deuil a rengul sel lorael a temel a chebechiielel el olekedang. Me a “kuin” el ngii a omtechei er a diak lemoues el cheldebechelel a Dios, el uldimukl er ngii a “redil ngelekir a re king,” el tir a rechanghel, a obengkel el dmeu a rengrir. Tirke el ngar er a eanged a melekoi el kmo: “Doldeu a rengud e bo lungil a rengud; . . . ele ng mocha belsechel a merengel a chebechielel a Ngelekel a Sib.”

5. Ngtechang ngika el redil el mo bechiil?

⁵ Monguiu er a Psalm 45:10, 11. Kede medengei el kmo ngtecha ngike el chad el mo bechiil, engdi ngtecha ngike el redil el mo bechil? Ngikang a diak el mera el redil, e ngbai omtechei er a rokui el 144,000 el ngellitel el Kristiano. Me a Jesus a bdelul tia el ongdibel er a rengellitel. (Monguiu er a Efesus 5:23, 24.) Tirka el ngellitel a mo obengkel a Kristus el mengedereder er a Rengedel a Mesias el ngar er a eanged. (Lk. 12:32) Te dirrek el “oltirakl er a Ngelekel a Sib el mor a ikel le bor ngii.” (Och. 14:1-4) Me te mo “bechil a Ngelekel a Sib” e mo kiei er a eanged el obengkel.​—Och. 21:9; Jn. 14:2, 3.

6. Ngera uchul me a rengellitel a okedongall el “redil el ngelekel a king,” e ngera me ngkirir el ‘obes er a re chederir’?

⁶ A “bechil a king” a dirrek el okedongall el “redil el ngelekel a king.” (Psa. 45:13) Me ngtecha ngika el ta er a “king” el losaod er ngii a Psalm 45:13? Ng Jehovah. Ngmerodel er a rengellitel el Kristiano el mo “ngelekel.” (Rom 8:15-17) Me tirka el ngellitel a muklatk el kmo: “Mobes er a re chedam ma re chad er a blim.” Tir el mo bechiil el ngar er a eanged a uchul me ngkirir el di mo melatk ‘a ikel tekoi el ngar a eanged, el diak likel ngar a chutem.’​—Kol. 3:1-4.

7. (a) Ngmilekerang a Kristus er a longetmokl er ngike el mo bechil? (b) Ngua ngera uldesuel ngika el redil el mo er a bechil?

⁷ A Kristus a mla mo betok el dart el rak el longetmokl er a mo bechil. A apostol el Paulus a milluches el kmo, a Kristus a kmal mle betik a rengul “er a ikelesia me ng uldersii a klengar er ngii el kirel. Ng mle ua isei el milleakl er a ikelesia el mo chedaol el uldersel el mor a Dios el oeak a tekingel, er uriul er a longikiid er ngii er a ralm, me bo le sebechel el di ngii el odersii er ngii a ikelesia me le nguu el kot el klebokel, el klikiid el diak a telemellel, e diak a cheisech er ngii, e diak a mekngit ma lechub e ng di telkib el telemall er ngii.” (Efe. 5:25-27) A Paulus a dilu er a rengellitel el Kristiano el ngar er a Korinth el kmo: “Kom kmal mekreos er a renguk, el di ua ia rengul a Dios el kiriu. Ele kulemak er a delongeliu kemiu ma Kristus, me ng mo sebechek el odersemiu er ngii, el ua ia kmal klikiid el ekebil el mo omak er a chebechielel er a di tal chad.” (2 Ko. 11:2) A King el Jesus Kristus a omes er a mo bechil el kmal klebokel, e le omengull er ngii el mo er a Dios a klikiid e melemalt. E ngika el redil a kongei el orrenges er a mo bechil e omes er ngii el ua “mastang” er ngii.

8. Ngera uchul me a bades a mesaod er ngika el redil el mo bechiil el “kmal klebokel”?

⁸ Monguiu er a Psalm 45:13, 14a. Ngika el redil  a “belsiochel e kldmokl, el ua redil el mla kudmeklii el mo olsiuekl er a mo bechil.” A Ocholt 21:2 a dirrek el omekesiu er ngika el redil el mo er a beluu, el “Beches el Jerusalem.” E tia el beluu a dmiich “er a klebkellel a Dios” el di ua “mekreos el bad, el ua jasper, el mellomes el ua crystal.” (Och. 21:10, 11) A babier er a Ocholt a kmal ungil el mesaod a klebekelel a Beches el Jerusalem. (Och. 21:18-21) Me ngika el redil el mo bechiil a “kmal klebokel!” E tiaikid el chebechiil a di kirel el ketmekill er a eanged.

9. A redil te oba el mo er techang? E ua ngerang a bilel?

⁹ A redil el mo bechiil a lenguu el mo msang ngike el mo bechil el ngii a Mesias el King. Me a King a mla kutmeklii ngika el bechil er a “longikiid er ngii” el ousbech er a “ralm,” el ngii a Tekingel a Dios. Me ngii el redil a “diak a mekngit ma lechub e ng di telkib el telemall er ngii.” (Efe. 5:26, 27) Ngika el redil a dirrek el kirel mo ungil el oubail, el rredemelel tia el ileakl el chebechiil. Me ngmlo uaisei! A bilel a “chelaus er a kolt el rekodoll,” e ngii a dirrek el “bliull er a ungil a bedengel kemanget el bail e toba el mor a king.” Ng “mla nguu a beches el mengeldoech el linen el bo loubail er ngii” sel bo lebechil a Ngelekel a Sib, e “ngii el bail a ikel ungil el omerellir a re chedal a Dios.”​—Och. 19:8.

10. Ngoingerang e ngmo er ngii a chebechiielel a Ngelekel a Sib?

¹⁰ Monguiu er a Ocholt 19:7. Ngoingerang e ngmo er ngii a chebechiielel a Ngelekel a Sib? Me alta e a Ocholt 19:7 a mesaod el kmo, ngike el “mo bechil a mla kudmeklii el kirel,” engdi aike el oeakuriul el bades a diak losaod el kirel a chebechiil. Ngbai meskid a bleketakl el omesodel a ulebengelel a kloul ringel. (Och. 19:11-21) Me tiang belkul a kmo, tia el chebechiil a mo er ngii er a uchei er a bo lemesisiich er a mekemad a King? Ngdiak, e le aike el ulaoch el medung er a babier er a Ocholt, alta ngar er a blechebechel, engdi ngdiak el belkul el kmo ngmo tmaut el oltirakl aikaikid el blechebechel. Ngar er a Psalm 45 e a King el Jesus Kristus a lochetii a saider er ngii e mo mesisiich er a recherrouel, e sola e ngomuchel a chebechiielel.​—Psa. 45:3, 4.

11. Ngerang mo meruul a Kristus er a uchei er a bo lebechiil?

¹¹ Me a Biblia a ouchais a blechebechel aike el tekoi el mo duubech: A kot, e a “meraelchisel el prostitute,” el Kloul Babilon, el ngii aike el rokui el klsuul el klechelid, a mo nguemed. (Och. 17:1, 5, 16, 17; 19:1, 2) E sola e a Kristus a mo okngemedii a mekngit el beluulechad er a Satan er a taem er a Armakedon, el ngii a “mekemad el mor ngii er sel klou el Sils er a Dios el Olab a Bek el Klisiich.” (Och. 16:14-16; 19:19-21) E a ulebongel er ngii, e a King a mo churrengelii a mekemedil el mideklii a Satan me a remekngit el anghel er ngii er a diak a btil el deliobech, me ngmo diak el sebechir el omekcharm er a ngii di el chad. Me te di ua bla lemad.​—Och. 20:1-3.

12, 13. (a) Ngoingerang e ngomuchel a chebechiielel a Ngelekel a Sib? (b) Te rua techang er a eanged a mo dmeu a rengrir er tia el chebechiil?

¹² Tirke el ngellitel el kiei er a uriul el sils el tir a melemolem el blak a rengrir el mo lmuut er a kodall a mo mekiis e mo kiei er a eanged. Telkib el taem er a uriul er a lengemed a Kloul Babilon, e uchei er a Armakedon, e a Kristus a mo melai er tirke el medechel el ngellitel el Kristiano el mo obengkel el ngar er a eanged. (1 Th. 4:16, 17) E sola, e a uriul er a Armakedon e ngmo omuchel a chebechiielel a Ngelekel a Sib. Me tiang a mo uchul a kmal klou el deurreng! A Ocholt 19:9 a kmo: “Te ngeltengat tirkel mlor tir a okedong el mer a merengel a chebechielel a Ngelekel a Sib.” Me ngika el redil a kmal mo dmeu a rengul. Me a King me ngdirrek el kmal mo dmeu a rengul e le tirke el rokui el 144,000 el ngellitel el chedal a mla mo obengkel el ngar er a eanged. (Lk. 22:18, 28-30) Me nguaisei, engdi ngdiak di el tir a mo dmeu a rengrir e lemerekong.

¹³ Kede silubii er a uchei el kmo, tirke el ngar er a eanged a dirrek el mo mengitakl el kmo:  “Doldeu a rengud e bo lungil a rengud; dodengesii ele ng mocha belsechel a merengel a chebechielel a Ngelekel a Sib, e a mo bechil a mla kudmeklii el kirel.” (Och. 19:6, 7) E a rechedal a Jehovah el ngar er a chutem, te mo mekerang? Te mo teloi er tia el chebechiil?

14. Te rua techang a “re mekekerel redil” el losaod er tir a Psalm 45?

¹⁴ Monguiu er a Psalm 45:12, 14b, 15. A profet el Sekaria a ulemlaoch el kirel a uriul sils el kmo, a rechad er a kakerous el beluu a mo dmeu a rengrir el mesiou er a Jehovah el teloi er a rengellitel. Ngmilluches el kmo: “Seikid e a re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” (Sek. 8:23) Me a Psalm 45:12 a omekesiu er tirka el “truich el chad” el mo er a “re chad er a Tyre” me a lechub e te “merau” el chad. Te olab a sengk el omesterir a rengellitel, e dirrek el oureor me bo el sebechir el nguu a kengei me a ngeso er tir el mo mesiou er a Jehovah. Me sera 1935 el mei, e tirke el medechel el ngellitel a mla ngosuterir a rebetok el miliol el chad el mo “meruul a melemalt.” (Dan. 12:3) Tirka el “truich el chad” a blak a rengrir el olengeseu er a rengellitel e dirrek el mla mengikiid er tir er a klsuul el klechelid. Sei a uchul me a bades a omekesiu er tir el ua klikiid el “mekekerel redil.” Te mla tuib a rengrir el mo er a Jehovah e mla ochotii el kmo ngblak a rengrir el mesiungel a King el Jesus Kristus.

15. Te mekerang a “re mekekerel redil” e oureor el obengterir a rengellitel el dirk ngar er tia el chutem?

¹⁵ Tirke el ngellitel el dirk ngar er tia el chutem  a oba omereng el saul el kirir tirka el “mekekerel redil” el dmeu a rengrir el olengeseu er tir el omerk er a ‘Ebangkelio el kirel a Renged’ er a beluulechad el rokir. (Mt. 24:14) Me ngdiak di el klisichel a Dios me a “Redil el kldmokl el kirel mo bechiil” a kmo “Mei!” e le tirke el rongesii tia el okedong a dirrek el dmu el kmo, “Mei!” (Och. 22:17) Me tiang a belkul a kmo, a re ‘kuk bebil el sib’ er a Jesus me a lechub e te ngodech el sib a mla rongesterir a rengellitel el dmu el kmo “Mei!” me te mla mo teloi er tir el omekedong er a rokui el chad er a beluulechad el kmo “Mei!”​—Jn. 10:16.

16. A Jehovah ngmla mesterir a ngera el techall a rengodech el sib?

¹⁶ Tirke el ngellitel el dirk ngar er a chutem a kmal betik a rengrir er a rengodech el sib. Ngdirrek el dmeu a rengrir er a techall el Jehovah a mla mesterir a rengodech el sib me te mo oldeu a rengrir er tia el chebechiil. Me tia el Psalm a omlaoch el kmo, a “re mekekerel redil” a “mei el oba ungilreng.” Me a rengodech el sib, el tir a oba omelatk el mo kiei er a chutem el diak a ulebengelel, a mo dmeu a rengrir tir me a rokui el chedal a klou el telungalek er a Jehovah er a temel a chebechiielel a Ngelekel a Sib el mo er ngii er a eanged. A babier er a Ocholt a mesaod er a “kloul seked” el tir a mengull er a Jehovah el ngar er tia el chutem el ua le “dechor er medal a kingall ma medal a Ngelekel a Sib.” Te ngar er a chutem e mesiou er a Jehovah er a mekesekesel a kloul templo er ngii.​—Och. 7:9, 15.

17, 18. Ngmekerang a chebechiielel a Ngelekel a Sib e mo uchul a klungiolir tirke el mo kiei er a beches el beluulechad? E a Kristus ngmo demerir a rua techang?

¹⁷ Monguiu er a Psalm 45:16. A “re mekekerel redil” el olengeseu er a mo bechil a Kristus a lmuut el mo dmeu a rengrir sel lesa tia el chebechiil el mo uchul a klungiaol er a taem er a beches el beluulechad. A King el Jesus Kristus a mo olekiis er a ‘ruchelel’ el ngar er tia el chutem. Me ngii el mo olekiis er tirka el ‘uchelel’ er a kodall a uchul me te mo okedongall el ‘ngelekel el sechal.’ (Jn. 5:25-29; Heb. 11:35) Me a Kristus a mo melilt er a rebebil er tirka el ‘ngelekel el sechal’ e rulleterir el mo “merreder er a beluulchad.” Kede dirrek el oumerang el kmo, ngmo melilt er a rebebil er a reblak a rengrir el mechuodel er chelechang el mo “mengeteklel a beluu” er a chelsel a beches el beluulechad.​—Isa. 32:1.

¹⁸ Ngar er sel taem er a 1,000 el rak el omengederederel, e a Kristus a dirrek el mo demerir a relmuut el bebil. Ngoeak a ngera el rolel? Tirke el oumerang er a olubet el tengetengel a Jesus a mo kiei er tia el chutem el mo cherechar. (Jn. 3:16) Me a Kristus a mo ‘Demerir el mo Cherechar.’​—Isa. 9:6, 7.

19, 20. A tekoi el medung er a Psalm 45, ngerang rullii el mo er a rokui el mera el Kristiano er chelechang?

¹⁹ Monguiu er a Psalm 45:1, 17. A rokui el Kristiano a kirir el semeriar er aika el tekoi el duubech er a Psalm 45. A rengellitel el dirk ngar er tia el chutem a kmal dmeu a rengrir e le te medengei el kmo, ngdi kmedung e te mo obengterir a rudam er tir er a eanged, me ngika el mochu bechiil el Jesus Kristus. Me a rengodech el sib a kmal sorir el melemolem el olengesenges er ngika el King er tir. Te dirrek el oba omereng el saul er a techellir el oureor el olengeseu er tirke el ngellitel el dirk ngar er tia el chutem. Me a klengeltengat el mo er a klechad el okiu a Kristus me ngike el mo bechil a kuk ungil er a ngii di el tekoi el sebeched el lmatk.​—Och. 7:17; 21:1-4.

²⁰ Me chelecha el domes el beduluchei el kirel a otutel aika el ulaoch el kirel a Mesias el King, e kede kmal mo semeriar el ouchais el kirel a ngklel. Me dodengesii ngika el King el “diak a ulebengelel.”