1, 2. (a) Ngerang a ongeru el klou a belkul el llach el ledillii a Jesus? (b) Kede mo onger a ngera el ker?

 A TA er a Farisi a uleker er a Jesus el kmo: “Ng ngeral Llach a kot el ngarbab er ngii el rokui?” Me ngdilu el kmo: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” Kede milsaod er a belkul tia el tekoi er sel mlo merek el suobel. A Jesus a dirrek el dillii sel ongeru el klou a belkul el llach el kmo: “Bo le betik a rengum er a ngar bitar kau el ua le betik a rengum er kau.”​—Mt. 22:34-39.

² A Jesus a dilu el kmo ngkirel el mo betik a rengud er a rengar bita er kid. Engdi tirka te rua techang? Kede mekerang e otutii tia el tekingel a Jesus? Ngar er tia el suobel e kede mo onger aika el ker e mo mesang el kmo sel doubltikerreng el mo er a rengar bita er kid e ngmo dmeu a rengul a Jehovah e dirrek el mo uchul a klungiolir a rokui el chad.

3, 4. (a) Ngera el okesiu a ledillii a Jesus el ulechotii a belkul a doubltikerreng el mo er a rengar bita er kid? (b) Ngmilekera ngike el chad er a Samaria e ngosuir a chad el mlechelebed er a lorael er a rael? (Momes er a siasing er a uchelel a suobel.)

³ Kede locha mo omdasu el kmo, a rengar bita er kid a tirke el kiei el kmeed er kid. (Osi. 27:10) Engdi a ta er a chad a uleker er a Jesus el kmo: “Ng techa ngar bitar ngak?” Me ngulenger er ngii el ousbech er a okesiu el kirel a chad er a Samaria el omeketakl er a belkul a doubltikerreng el mo er a rechad. (Monguiu er a Lukas 10:29-37.) Ngdilu el kmo a ta el chad er a Judea a mirrael er a rael e a rechad a chillebedii el mo ocherur a kodall e ruchorech a kloklel e merael. A ta el prist me a ta el Levait el tir a kirir el oubltikerreng a mlo engelakl er ngii e dimlak lengesuir. Engdi a chad er a Samaria a ngilsuir, e seikid el taem e a rechad er a Judea me a rechad er a Samaria a mle kauketui.​—Jn. 4:9.

⁴ Ngike el chad er a Samaria a uliitel a cheluch me a bilong er aika el telemall er a bedengel me lemereched el mo mechubs. E sola e ngiluu el mo er a lengiil el blai e milsa ngike el oungerachel er ngii el blai a teblo el udoud. Me tiang a mle ududel a chad el oureor el eru el klebesei. (Mt. 20:2) Sel dolatk er a omerellel ngike el chad er a Samaria e kede mo medengei el kmo ngmera el uluubltikerreng el mo er a rengar er a bita er ngii. Me kid me ngsebeched el mo uai ngii a lsekum e kede chubechubechad e oubltikerreng el mo er a rechad.

5. Te milekerang a Resioning er a Jehovah e oubltikerreng el mo er a rengar bita er tir er a uriul er a Hurricane Sandy?

⁵ Kede kiei er a uriul sils e a ruumesingd el chad a diak el chubechubechad. A rebetok er tir a mekngit a omerellir, e sorir a uldikel, e diak loubltikerreng el mo er a rengar bita er tir. (2 Ti. 3:1-3) El ua tiang, sera October 2012, e a Hurricane Sandy a tilemellii a ta el basio er a beluu er a New York. Me a rebetok el chad a di mle mekerasem e dimlak a dengki er a blirir me a lmuut el bebil er a tekoi el lousbech. Me nguaisei, engdi a remerechorech a mirrechorech a kloklir tirka el chad el chilarm. Engdi a Resioning er a Jehovah a dimlak leuaisei. Te bai ngilsuterir a rudam er tir me a relmuut el bebil el kiei er sel basio e le remera el Kristiano a oubltikerreng el mo er a rengar bita er tir. Me ngera lmuut el bebil er a rolel e ngsebeched el oubltikerreng el mo er a rengar bita er kid?

6. Kede mekerang e ousbech er a Biblia el olengeseu er a rengar bita er kid?

⁶ Molengeseu el ousbech er a Biblia. Sel domerk er a klumech e kede mengelaod er a rengar bita er kid el ousbech a Bades. (Rom 15:4) Kede dirrek el oubltikerreng el mo er tir el okiu sel dousbech er a Biblia el ouchais er tir el kirel a Rengedel a Dios. (Mt. 24:14) Ngkmal ileakl el techall a dobang el mo mesterir a rechad a omelatk el okiu a tekingel a Jehovah el Dios.​—Rom 15:13.

7. Ngera ta er a uleklatk el ledillii a Jesus e ngera mo duubech sel dotireklii?

⁷ “Moruul el mor a re chad a ikel somiu a loruul el ekor kemiu.” A Jesus a dillii tia el uleklatk e dilechelii el kmo, “tiaikid a lolekoi er ngii a Llach er a Moses ma osisecheklir a re profet.” (Mt. 7:12) A “Llach” a melutk aike el babier er a Genesis el mo er a Duteronomi, e a “re profet” a melutk aike el babier er a reprofet el llechukl el tekoi er a Hebru. A Jehovah a milsterir a rechedal a “Llach” me a “re profet” e le ngmle betik a rengul er tir e dirrek el mle soal a bo lekaubltikerreng er a delongelir. Me chelechang e a Jehovah a dirrek el soal a doubltikerreng el mo er a rengar bita er kid. Ngar er a babier er a Isaia e a Jehovah a dilu el kmo: “Di moruul a melemalt, e lak mongebirukel . . . Ng ngeltengat ngikel chad el oltaut er tial tekoi.” (Isa. 56:1, 2) Ngmo dmeu a rengud sel doubltikerreng el mo er a rechad e doruul el mo er tir aike el soad a loruul el me er kid.

8. Ngera uchul me ngkired el mo betik a rengud er a recherroued, e sel doruul el uaisei e ngera sebechel el mo duubech?

⁸ Bo lebetik a rengmiu er a recherrouiu. Sera lengar er a chutem a Jesus, e a rebebil a ullisechakl  er a rechad el kmo ngkirir el ouketui er a recherrouir. Engdi a Jesus a dilu er tir el kmo: “Bo le betik a rengmiu er a re cherrouiu e moluluuch el kirir a ruldechelakl er kemiu, me bo mngelekel a Demmiu el ngar a eanged.” (Mt. 5:43-45) A Paulus a dirrek el milsaod er a osisiu el tekoi er a ledu el kmo: “A lesengerenger a cherrouem, e mokelii; ma le meched a rengul e mungelmii.” (Rom 12:20; Osi. 25:21) A doltirakl er a Llach er a Moses, e a chad a mle kirel el olengeseu er a recherrouel me a dirrek el chermir. (Exo. 23:4, 5) Me tirke el uleltirakl er sel llach a locha mlo ungil a delongelir tir me tirke el mle cherrouir. Me kid el Kristiano, a lsekum kede oubltikerreng el mo er a rechad el ouketui er kid e nglocha mo ngodechii a uldesuir el me er kid. A rebebil er tir a dirrek el sebechir el mo mesiou er a Jehovah.

9. Ngerang dilu Jesus el kirel a delongeled kid me a rudam er kid?

⁹ “Bo le blak a rengmiu el omudech a delongeliu kemiu ma rokui el chad.” (Heb. 12:14) A lsekum ngkired el meruul a budech er a delongeled kid me a rokui el chad, e ngdirrek el kired el meruul a budech el obengterir a rudam er kid. A Jesus a dilu el kmo: “Me sel bochu er olengetongel el mo oldars er a tengetengem el mor a Dios, e a lsekum ke lotkii odam er kau el ngar ngii a mekngit er a rengul el kirem, e ke mechere tengetengem er medal a olengetongel, e mereched el mo rullii a delongelem kau ma odam er kau, e sola e lmuut kung el mo oldars er a tengetengem el mor a Dios.” (Mt. 5:23, 24) Me sel lebo er ngii a mondai er kid me a ta er a odam er kid, e ngsebeched el ochotii a bltikerreng el oeak sel demereched el meruul a budech er a delongeled. E sel doruul el uaisei e ngmo odeuir a rengul a Jehovah.

10. Ngera uchul me ngdiak el kired el oukerrekeriil er a rechad?

¹⁰ Lak moukerrekeriil er a rechad. A Jesus a ullisechakl el kmo, ngdiak el kired el oukerrekeriil er a rechad el kirel a cheleuid el tekoi el loruul er a ledu el kmo: “Lak moukerrekeriil er a re chad, me lak bo loukerrekeriil er kemiu a Dios.” Ngdilechelii el kmo: “Ngera uchul me komes er a chieb er a medal a tar a chad e diak mkerekikl er a kerrekar el ngar a medam? Ke mekera e di bekeu el dmu er a tar a chad el kmo, ‘Msall e knguu a chieb er a medam,’ a le ngar ngii a kerrekar el ngar a medam? Ke cheblad el chad! A kot e mnguu a kerrekar el ngar a medam me bo le bleketakl osengem e molai ku er a chieb er a medal a tar a chad.” (Mt. 7:​1-5) Me ngbleketakl el kmo, ngdiak el kired el di omdidm a kngterir a rebebil e le kid me ngdirrek el betok a kngtid.

11, 12. Ngerang a kmal klou a ultutelel el rolel e kede oubltikerreng el mo er a rengar bita er kid?

¹¹ Ngbetok a rolel e ngsebeched el oubltikerreng el mo er a rengar bita er kid. Engdi a Jesus a ullisechakl el kmo, sel kot el ungil el rolel a sel douchais er tir el kirel a ungil el chais el kirel a Rengedel a Dios. (Lk. 8:1) Ngdilu er a rultirakl er ngii el kmo: “Morael el mor a bek el bedengir a re chad er ker me ker e moruul er tir el mo obengkek.” (Mt. 28:19, 20) Me sel doruul el uaisei, e kede olengeseu er a rechad me bo lak lorael er sel meteu el rael el mo er a tellemall e bo lomuchel el merael er a obutek el rael el mo er a klengar. (Mt. 7:13, 14) Kede medengei el kmo a Jehovah a dmeu a rengul el mesekid el meruul er tia el ureor.

¹² A Jesus a ngilsuterir a rechad el mo medengei el kmo te chebuul a lak lousbech er a Jehovah. (Mt. 5:3) Me kede oukerebai er a Jesus sel douchais er a rechad el kirel a “Ebangkelio er a Dios.” (Rom 1:1) Kede olisechakl er tir el kmo ngolubet el tengetengel a Jesus a uchul me ngsebechel el mo ungil a delongelir tir me a Dios e nguu a kengei er ngii. (2 Ko. 5:18, 19) Me a urered er a berkel a klumech a kmal klou a ultutelel el rolel e kede oubltikerreng el mo er a rengar bita er kid.

13. Ngmo ua ngera uldesuem sel molisechakl er a rechad el kirel a Jehovah?

¹³ Sel dungil mengetmokl er kid er a uchei er a deluut el mo oldingel er tirke el semeriar me tirke el dosuub er a Biblia el obengterir, e ngmo sebeched el olisechakl er tir el mo olengesenges er a Jehovah. A rebebil er tir a kirir el melodech a betok el tekoi er a klengar er tir. (1 Ko. 6:9-11) Me ngkmal mo dmeu a rengud sel domes er a rolel e a Jehovah a olengeseu er tirke el “kirir el mo nguu a diak a ullebengelel klengar” el mo sechelil. (Rel. 13:48, BT) A rechad el dimlak a omeltkir er a uchei er a losuub er a Biblia a mo diak el sebek a rengrir e bai mo dmeu a rengrir e mo ultuil a klaumerang er tir er a Jehovah. Me tia el ureor a meskid a ileakl el techall el mo oubltikerreng el mo er a rengar bita er kid.

14. Ngera omesodel a 1 Korinth 13:4-8 el kirel a bltikerreng?

¹⁴ A lsekum a omerelled el mo er a rengar bita er kid a oltirakl er a tekingel a Paulus e ngmo dmeu a rengud e dirrek el mo mekesai a mondai er kid. Me a tekingel a Paulus el medung er a 1 Korinth 13:4-8 a osisecheklid el kirel a lmuut el bebil er a rolel a doubltikerreng el mo er a rengar bita er kid el ua lebetik a rengud er kid.​—Monguiu.

15. (a) Ngera uchul me ngkired el mo klou a rengud e bekokuii? (b) Ngera uchul me ngdiak el kired el mechechei me a lechub e lemekedidai a rengud?

¹⁵ “A bltikerreng a klou a rengul e bekokuii.” A Jehovah a klou a rengul e bekokuii el mo er a rokui el chad alta te diak lemecherrungel. Me ngdirrek el kirel el mo uaisei a omerelled el mo er a rechad sel loruul a cheleuid el tekoi me a lechub e sel lemekngit a blekerdelir el me er kid. A Biblia a kmo, a bltikerreng a “diak le mechechei.” A rebebil er a rudam er kid a locha ngar er ngii er tir a bebil el tekoi me a lechub e te olab a ngerachel er a ongdibel e kid a diak. Engdi a lsekum ngmera el betik a rengud er a rudam er kid e ngmo diak demechechei er tir. Ngdirrek el diak el kirel el mo kedidai a rengud me a lechub e dousimang er kid. A Biblia a ouchais el kmo, a Jehovah a chetil tirke el oba “kedidai el uldasu ma kldidairreng.”​—Osi. 21:4.

16, 17. A doltirakl er a 1 Korinth 13:5, 6 e ngkirel ua ngera omerelled el mo er a rengar bita er kid?

¹⁶ A bltikerreng a “diak le debsochel,” ngbai rullid me ngmo ungil a omerelled el mo er a rechad. Me a lsekum ngbetik a rengud er a rengar bita er kid e ngmo diak domulak er tir, e dorechorech a kloklir me a lechub e doruul a ngii di el ngerang el mo er tir el tomellii a rengul a Jehovah. Ngdirrek el mo diak di dolatk er a di kid e le bltikerreng a “diak le bechelechelingaol.” Kede bai mo blechoel el meruul aike el mo uchul a klungiolir a rechad.​—Fil. 2:4.

¹⁷ A bltikerreng a “diak le bekongesengasech a rengul, e diak longemekl.” Me a lsekum a chad a meruul a mekngit el me er kid, e ngdiak di lemereched el ngmasech a rengud. Ngdiak el kired el  lmatk aike el rokui el mekngit el tekoi el loruul a rechad el me er kid el ua doluches a rekord er kid. (1 Th. 5:​15) Me a lsekum kede mengemekl, e a ngesechel a rengud a sebechel el mo ua melilial el ngau el tomellid e dirrek el tomelleterir a rechad. (Lev. 19:​18) Ngbai kired el ousubes er a rechad e obes a tekoi el lurruul. A bltikerreng a “diak loldeu er a rengul er a chebirukel el tekoi.” Me ngdiak luchul a deuil a rengud a bo domes er a chad el ouketui er kid el chuarm er a chelebirukel el omeruul.​—Monguiu er a Osisechakl 24:17, 18.

18. Ngera kede suubii el kirel a bltikerreng er a 1 Korinth 13:7, 8?

¹⁸ A Paulus a milluches el kmo, a bltikerreng a “outekangel el diak le toched er a rokui el tekoi.” Me sel lebetik a rengud er a rengar bita er kid, e kede mo ousubes er tir sel letemellii a rengud. Ngdirrek el dilu el kmo a bltikerreng a “oumera rokui el tekoi.” Kede oumera aike el tekoi el donguiu er a Biblia e dmeu a rengud el mo mosisechakl er a cheldebechelel a Jehovah. A bltikerreng a “melatk e mengiil el diak louedikel a rengul.” Ngmesisiich a omeltked e le kede oumera aike el telbilel a Jehovah. E a bltkil a rengud el mo er a rechad a uchul me kede ouchais er a rechad el kirel a omeltked. (1 Pe. 3:15) Sel dechelebangel a meringel el blekeradel, e kede meluluuch e melatk el kmo a rokui el tekoi a di mo ungilbesul. Ngmo lmuut er a taem el chad a meruul a mekngit el me er kid me a lechub e bo lomtok er kid, e kede outekangel e le bltikerreng a “klou a rengul el diak le mesim er a rokui el tekoi.” A Paulus a dirrek el dilu el kmo: “A bltikerreng a diak bo le ngemed.” Me tirke el olengesenges er a Jehovah a mo oubltikerreng el mo er a rengar bita er tir el mo cherechar.

19, 20. Ngera el bades a ochotii el kmo ngkired el melemolem el oubltikerreng el mo er a rengar bita er kid?

¹⁹ A lsekum kede melemolem el oltirakl a omellach er a Biblia, e kede mo blechoel el betik a rengud er a rengar er bita er kid el ua lebetik a rengud er kid. (Mt. 22:39) A Jehovah me a Jesus a mengerechir er kid el meruul er tiang. Ngkmal kirel el mo betik a rengud er a rokui el chad el diak el di el rechad er a beluad e lemerekong. Me sel bo el meringel er kid el oubltikerreng el mo er a rechad e ngsebeched el meluluuch el mo er a Jehovah el olengit er a chedaol klisichel. Ngulterekokl a rengud el kmo a doruul el uaisei e a Jehovah a mo dmeu a rengul e mo ngosukid.​—Lk. 11:13.

²⁰ A llach el kmo ngkirel el mo betik a rengud er a rengar bita er kid a kmal klou a ultutelel a uchul me ngokedongall el “llechul a Rengedel a Dios.” (Jak. 2:8) Ngar er a Llach er a Moses e a Jehovah a milsterir a rechedal a kmal betok el llach el ullisechakl er tir el mo betik a rengrir er a rengar bita er tir. Me a uriul e a Jehovah a ulemekrael er a Paulus el mo meluches el kmo: “A ikal rokui, ma lmuut el bebil a di mo modekdak er sel tal llach el kmo, ‘Bo le betik a rengum er a chad el ngar bitar kau.’”​—Rom 13:8-10.

21, 22. Ngera uchul me ngkirel el mo betik a rengud er a Dios me a rengar bita er kid?

²¹ A Jesus a ngilsukid el mo medengei el kmo te rua techang a ngar bita er kid er a ledu el kmo, a Demal a “meruul er a sils er ngii me ng dmiich el mor a re chad el di osisiu a re mekngit ma re ungil, e oltengel er a chull el mor a re meruul a ungil ma re meruul a mekngit.” (Mt. 5:43-45) Me ngulsisecheklid el mo oubltikerreng el mo er a rokui el ungil me a remekngit el chad. Me ngua dulsaod er a uchei, e a klou a ultutelel el rolel el doubltikerreng el mo er a rengar bita er kid a sel dosisecheklterir el kirel a Jehovah me a Rengedel. Me a lsekum te mo oltaut a tekoi el losuub e ngsebechir el mo sechelil a Dios e mo mukngeltengat.

²² Me kede mla smaod a betok el uchul me ngkirel el mo betik a rengud er a Jehovah el oba rengud el rokir, me a klengar er kid el rokir, me a uldesued el rokir. Kede dirrek el mla suub a betok el rolel e ngsebeched el oubltikerreng el mo er a rengar bita er kid. Me sel bo lebetik a rengud er a Jehovah me a rengar bita er kid e kede olengesenges aike el eru el meklou a belkul el llach. E a ngaruchei e kede mo odeuir a rengul a betik a rengul el Demad el ngar er a eanged el Jehovah.