1. Ngera uchul me a Jesus a kmal “mlo dmeu a rengul el klisichel a chedaol reng a uchul”? (Momes er a siasing er a uchelel a suobel.)

 KA MOLATK, oleko ke ulemes er a Jesus er sel taem el kmal “mlo dmeu a rengul el klisichel a chedaol reng a uchul.” Nglocha kmal mlo klou a klikm er ngii. E ngera uchul? Ngdirk ulderecheterir a 70 * el disaiplo er ngii el mo omerk er a ungil chais el kirel a Rengedel a Dios. Seikid el taem e te kmal mle betok a rechad el olab a klisiich me a dereder el uluuketui er a ungil chais, me ngmle semeriar el mo medengei el kmo ngmo uangerang a urerir tirka el disaiplo er ngii. Tirka el cheraro a mle uldimukl er tir a re sensei er a Llach me a re Farisi, el tir a mle mellomes a rengrir e dirrek el tilobed er a ngarbab el skuul. Me ngmle sorir a rechad a bo lomes er a Jesus el di ua chad er a kldaiksang, e dirrek el bo lomes er a redisaiplo er ngii el kmo, “te di chad el diak a skulir.” (Rel. 4:13; Mk. 6:3) Engdi sera luuturiul er tirka el disaiplo, e ngkmal mle imis el dmeu a rengrir. Te ulemerk er a klumech alta e te mlo chelebangel a ultok el mo lmuut er a taem el remekngit el anghel a mlo omekcharm er tir! Me ngera sel rirelleterir me ngsebechir el mo dmeu a rengrir e bekeu el meruul er a omesiungir?​—Monguiu er a Lukas 10:1, 17-21.

2. (a) Ngoeak a ngera el rolel e a redisaiplo er a Jesus a mle ua rengalek? (b) Ngerang a ngilsuterir a redisaiplo er a Jesus el mo medengei a dmolech el klemerang er a Biblia?

 ² A Jesus a dilu er a Jehovah el kmo: “Chedam, el Rubak ra eanged ma chutem, ak uldanges er kau, le ke milart a ikal tekoi rar mellomes a rengrir mar bekudasu, e ulecholt rar tolechoi; Chedam, nguaisei, le tia chodeuir a rengum el tekoi.” (Mt. 11:25, 26, BT) Ngera uchul me a Jesus a ulemekesiu er a redisaiplo er ngii er a retolechoi? Tirka el disaiplo er ngii a mle ngodech a blekerdelir er tirke el sensei er a Llach me a re Farisi el tilobed er a ngarbab el skuul e ulemdasu el kmo ngmellomes a rengrir. Tirka el disaiplo a bai mle ua rengalek el kilengei el mo mosisechakl e dirrek el milsuub el mo ngariou a rengrir. (Mt. 18:1-4) Me tir el mle ngariou a rengrir a uchul me a Jehovah a uluusbech er a chedaol reng er ngii el ngosuterir el mo medengei a dmolech el klemerang er a Biblia. Engdi tirke el mekedidai a rengrir el mengeteklel a klechelid er a Judea a mle meiko el kldidiul a rengrir a uchul me a dirrek el Satan a millemolem el mengeuid er tir.

3. Ngera kede mo mesaod er tia el suobel?

³ Tiaikid a uchul me a Jesus a kmal mle dmeu a rengul! Ngmle dmeu a rengul el mesa sel rolel er a Jehovah e ngmeketakl a klemerang er a Biblia el mo er a rengariou a rengrir el chad, el diak lultuil er a kmo te tilobed er a ngarbab el skuul me a lechub e ngdiak. Tiaikid el rolel a osisechakl a lekengei er ngii a Dios, e ngii el Dios a dirkak lemengodech. Ngmekerang e ochotii el kmo ngdirk kongei er tiaikid el rolel a osisechakl? Ngar tia el suobel e kede mo suubii sel rolel e a Jehovah a meketakl a klemerang er a Biblia el mo er a rengariou a rengrir el chad er chelechang.

4. Ngokiu a ngera el rolel e a simplified edition er a Watchtower a di ua sengk?

⁴ Ngar er aika el mereko el rak, e a cheldebechelel a Dios a mla lmuut el mo ungil el olisechakl el ousbech a beot e bleketakl el tekoi. Me bo dosaod a edei el rolel. A kot e ngmla mo er ngii a simplified edition er a Watchtower. * Tiang a sengk el mla ngosuterir a rebetok, el tir a meringel er tir el menguiu me a lechub e bo lodengei a belkul a tekoi el longuiu. A betok el telungalek a mla metik er ngii el kmo tiaikid el simplified edition a uchul me ngmla mo beot er a rengelekir el mo ungil el medengelii a omesodel a Watchtower, me te betok a mla meluches el mo er a Chelechad er a Ruungerachel el olecholt a omereng el saul er tir. A ta el odos a dilu el kmo ngmle medakt el onger er a temel a omesubel a Watchtower. Engdi chelechang e ngmla mo diak! Sera lebo er ngii a simplified edition, e ngmilluches el mereng a saul el kmo: “Ngmla mo diak kmedakt el onger, me ngmla mo sebechek el onger el betok el taem! Ak kmal mereng a sulel a Jehovah me kemiu el dirrek.”

5. Ngera uchul me ngkmal ungil a beches el oidel a New World Translation of the Holy Scriptures?

⁵ A ongerung, e ngar er ngii a beches el oidel a New World Translation of the Holy Scriptures el tekoi er a Merikel, el tilobed er sel annual meeting el mlo er ngii er a October 5, 2013. * A betok el bades er a chelsel a ousbech a di kesai el tekoi, e beot er kid el mo medengei a omesodel, engdi ngdirkak lemengodech a belkul. El ua tiang a Job 10:1 a uluusbech a 27 el tekoi er a uchei, e chelechang e ngdi ousbech a 19. E a Osisechakl 8:6 a uluusbech a 20 el tekoi er a uchei, e chelechang e ngdi ousbech a 13 el tekoi. E aika el eru el bades a kmal bleketakl a omesodel er tia el beches el oidel a Biblia. A ta el ngellitel el odam el mla blak a rengul el mesiou er a Jehovah el betok el rak a kmo: “Sera bo kmerek el menguiu er a  babier er a Job er tia el beches el Biblia, e a renguk ngketengek el mo medengelii tia el babier er a Job!” Me te ngar er ngii a rebetok el melekoi a osisiu el tekoi.

6. Ngua ngera uldesuem el kirel a bleketakl el omesodel a Mateus 24:45-47?

⁶ A ongedei, ka molatk aike el dirk ulebeketakl el omesodel a bebil el bades. El ua tiang, a beot e bleketakl el omesodel a “blak a rengul e mellomes a rengul el mesiou” a tilobed er a July 1, 2013, el Ongkerongel. (Mt. 24:​45-​47) Tia el suobel a mileketeklii el kmo a blak a rengul el mesiou a Chelechad er a Ruungerachel. Me “tirkel bebil er a re mesiou” a melutk er a rengellitel me a ‘rekuk bebil el sib’ el tir a di dul melai a kall el okiu a tekingel a Dios. (Jn. 10:​16) Me ngkmal dmeu a rengud el mesuub aika el klemerang el tekoi e dirrek el semeriar el olisechakl er a rechad el kirel. Me ngokiu a ngera el rolel e a Jehovah a mla ochotii el kmo ngkongei a beot e bleketakl el osisechakl?

7, 8. Ngera bebil el tekoi el ngar er a cheldecheduch er a Biblia el omtechei a lmuut el meklou el tekoi el mo duubech er a uriul?

⁷ A lsekum ke ta er tirke el mla mesiou er a Jehovah el betok el rak, e ke locha mla mesang a rolel e ngmla mengodech a omesodel a bebil el cheldecheduch er a Biblia el ngar er a babilenged. A uchei e kede mle blechoel el mesaod el kmo a bebil el cheldecheduch er a Biblia a di okesiu el kirel a lmuut el klou el tekoi el mo duubech er a ngar medad el klebesei. Me ngmla er ngii a ungil el uchul me kede milsaod a cheldecheduch er a Biblia el uaisei? Ochoi, el ua tiang, a Jesus a milsaod er a belkul a tekoi el dilubech el mo er a profet el Jona. (Monguiu er a Mateus 12:​39, 40.) A Jesus a milsaod er sel taem el Jona a mla er a chelsel a delel a klou el ngikel el kmo ngomtechei er sel taem el Jesus a ngar er a chelsel a debull.

⁸ Ngar er ngii a bebil el cheldecheduch er a Biblia el omtechei er a lmuut el klou el tekoi el mo duubech er a uriul. E a apostol el Paulus a milsaod a bebil er ngii. El ua tiang, a deleuill er a Abraham el obengkel a Hagar me a Sara a omtechei er a deleuill er a Jehovah el obengkel a renged er a Israel me a tedebechel a cheldebechelel a Dios el ngar er a eanged. (Gal. 4:​22-​26) Me ngdi osisiu, a chedaol Tento me a templo me a sils er a Tngakireng, me a ngarbab el prist me a lmuut el bebil er a Llach a di mle “okesiul a klungiaol el dirk merael mei.” (Heb. 9:​23-​25, 10:⁠1) Ngmo melisiich a klaumerang er kid sel dosuub el kirel aika el cheldecheduch me a dirrek el tekoi el omtechei er ngii. Me tiang belkul a kmo a rokui el chad me a tekoi el dilubech me a klalo el losaod a Biblia, a omtechei er a kmung techang me a lechub e ngkmung ngerang?

9. Ngmle ua ngerang a omesodel a cheldecheduch er a Biblia el kirel a Naboth er a uchei?

⁹ A uchei e a bebil el cheldecheduch el ngar er a babilenged a mle blechoel el mesaod el kmo a derta el chad me a tekoi el dilubech me a klalo a omtechei er a chad me a lechub e ngklalo. El ua tiang, a mekngit el kuin el Jesebel a dilung me lemad a Naboth me bo el sebechel el nguu a sersel a Naboth el msang a bechil el Ahab me lousers er ngii. (1 Ki. 21:​1-​16) Me sera 1932, e a Watchtower a milsaod el kmo a Ahab me a Jesebel a omtechei er a Satan me a cheldebechelel, e a Naboth a omtechei er a Jesus, e a kodellel a Naboth a omtechei er a kodellel a Jesus. Engdi sera 1961, e a babilenged el “Let Your Name Be Sanctified” a milsaod el kmo a Naboth a omtechei er a rengellitel e a Jesebel a omtechei er a Klsuul Klekristiano. Me a lmuut el tang, a odechelakl el mlo er a Naboth el lekiltmeklii a Jesebel, a omtechei er a odechelakl el mo er a rengellitel er a taem er a uriul sils. Me ngmle betok el rak el aika el omesodel a tekoi a millisiich a klaumerang er a rechedal a Dios. Me ngera uchul me chelechang e ngmla mo ngodech a omesoded er aika el tekoi?

10. (a) Ngokiu a ngera el rolel e a blak a rengul el mesiou a kerekikl sel losaod a bebil el cheldecheduch er a Biblia? (b) Me chelechang, e a babilenged ngblechoel el mesaod el kirel a ngera el tekoi?

 ¹⁰ Me ngar er aika el mereko el betok el rak, e a Jehovah a mla ngosuir a “blak a rengul e mellomes a rengul el mesiou” el mo kerekikl sel loltobed a suobel. El okiu a ngera el rolel? Chelechang e a blak a rengul el mesiou a kerekikl sel losaod a cheldecheduch er a Biblia, me ngdi sel lengar er ngii a ungil el uchul me te oumerang el kmo ngokesiu el kirel a ta er a tekoi, e te mo mesaod er ngii. Me a uchei e a bebil el omesodel a cheldecheduch er a Biblia me aike el tekoi el lomtechei er ngii a kmal mle meringel el domtab a belkul, e dolebedebek, e dirrek el doltaut er a klengar er kid. E sel klou a ultutelel el tekoi el dolatk er ngii a kmo a lsekum kede mo mengoit a temed el osiik er a tekoi el omtechei er ngii a cheldecheduch er a Biblia, e sel moktek me a otutel a suobel a mo remiid. Me chelechang e a babilenged a blechoel el beot a omesodel, e melisiich el kirel a klaumerang me a ducherreng, me a blakerreng el mo er a Dios, me a lmuut el bebil el ungil el blekeradel el sebeched el suub el okiu a cheldecheduch er a Biblia. *

11. Ngua ngera klemedengei er kid er a cheldecheduch el kirel a Naboth er chelechang, e mekerang a kerebai er ngii e ngosukid?

¹¹ Me chelechang e ngmla lmuut el mo beot e bleketakl a omesodel a cheldecheduch el kirel a Naboth. Ngika el chad a dimlak lemad e le ngii el ulemtechei er a Jesus me a lechub a rengellitel. Ngbai mlad e le ngii el tilbir el mo melemolem el blak a rengul el mo er a Dios. Me ngmillemolem el blak a rengul el olengesenges a Llechul a Jehovah el mo lmuut er a taem el blo lechelebangel a odechelakl er a mesisiich el merredelel a beluu. (Ule. 36:7; 1 Ki. 21:⁠3) Me ngmera el ungil el kerebai el kirir a rokui el mesiungel a Dios er chelechang el tir a outekangel a osisiu el rolel a odechelakl. (Monguiu er a 2 Timothy 3:​12.) Me a rokui el Kristiano a kmal sebechir el mo omtab a belkul, e melebedebek, e oltaut er tia el suobel me ngmo melisiich a klaumerang er tir.

12. (a) Ngdiak el kirel el mo ua ngerang a uldesued el bedul a cheldecheduch el ngar er a Biblia? (b) Ngera uchul me ngsebechel el mo bleketakl a dmolech el tekoi er a uldesued? (Momes er a footnote.)

¹² Me kid, ngsebeched el omdasu el kmo a  cheldecheduch er a Biblia a di suobel el kired el melai a klubeled er ngii e merekong? Ngdiak el uaisei. A babilenged er chelechang a blechoel el mesaod el kirel a rolel e ngsebechel a cheldecheduch er a Biblia el mo osisiu a belkul er a ta er a cheldecheduch. El ua tiang, a blakerreng er a Naboth er sel taem el lechilebangel a odechelakl el mo lmuut er a kodellel a omeklatk er kid er a blakerreng er a Kristus me a rengellitel. Engdi ngdirrek el omeklatk er kid er a blakerreng er a rebetok el ‘kuk bebil el sib.’ Me ngmera el sebeched el mesang el kmo a Jehovah a olisechakl er kid el okiu a beot el rolel. *

13. Ngera el okesiu er a Jesus a mla mo beot e bleketakl a omesodel?

¹³ A Jesus Kristus a ngike el Klou el Sensei el mla kiei er tia el chutem. Ngkmal mle soal el olisechakl el ousbech a okesiu. (Mt. 13:​34) A okesiu a kmal ungil e le ngsebechel el meketakl a belkul a dmolech el omesodel a tekoi el okiu a beot el rolel, el sebechel el remutech a rengud, e rullid me ngsebeched el mtab a belkul a tekoi. Me ngar er aika el mereko el betok el rak, e a babilenged a mesaod el kirel a okesiu er a Jesus el ngar er a beot e bleketakl el rolel. El ua tiang, ngar sel Ongkerongel er a July 1, 2008, e ngmla ngosukid el mo bleketakl a uldesued el kirel a okesiu er a Jesus el kirel a omkukel a blauang me a tane er a meringel me a dirrek el uuked. Me chelechang e kede mla mo medengei el kmo aika el okesiu a melutk el kirel a Rengedel a Dios, el ngii a mla ngosuterir a rebetok el chad el mo otngeklii tia el mekngit el beluulechad e mo disaiplo er a Kristus.

14. (a) Ngmle ua ngerang a omesoded er a okesiu el kirel a ungil el chad er a Samaria? (b) Ngua ngera klemedengei er kid er tia el okesiu er a Jesus er chelechang?

¹⁴ Kede mekerang e mo ungil el medengei a belkul a okesiu el lulsaod a Jesus? A bebil er aika el okesiu a ulaoch el ngar er ngii a lomtechei er ngii. E a kuk bebil a osisechakl el kired el oltaut er a klengar er kid. Engdi kede mekerang e mo medengei el kmo ngera el okesiu a ngar er ngii a lomtechei er ngii me a ngera er ngii a diak? Ngar er aika el mereko el betok el rak e a nger a mla obeketakl. El ua tiang, ka molatk er sel dimla omesoded er a okesiu er a Jesus el kirel a ungil a blekerdelel el chad er a Samaria. (Lk. 10:​30-​37) Ngar sel Watch Tower er a rak er a 1924, e kede milsaod er ngii el kmo, a chad er a Samaria a omtechei er a Jesus, e sel rael el oldengelengel el ngar er a Jerusalem el mo er a Jeriko a omtechei er a mekngit el blekerdelir a rechad el ulemuchel er a ultok el dilubech er a sers er a Eden. Me tirke el merechorech el chad a omtechei a meklou el siobai me a remerechorech a rengrir el chad er a siobai, e ngike el prist me ngike el Levait a omtechei er a Klsuul Klekristiano. Engdi chelechang e a babilenged a ousbech er tia el okesiu el omeklatk er a rokui el Kristiano el kmo ngkmal diak el kirir el mengetukel er a rechad. Me ngkmal kired el ngosuterir tirke el rokui el ousbech a ngeso, el ileakl el kired el ngosuterir el mo mesuub er a klemerang el kirel a Dios. Me ngkmal dmeu a rengud el mesang el kmo a Jehovah a mla meketeklii a klemerang el Tekingel.

15. Ngera kede mo mesaod er a ongingil el suobel?

¹⁵ Ngar er a ongingil el suobel e kede mo mesaod er a okesiu er a Jesus el kirir tirke el teruich el ekebil. (Mt. 25:​1-​13) Me a Jesus, ngmle soal a rulebengkel a bo lodengelii a ngera el belkul tia el okesiu er a taem er a uriul el sils? Tiang belkul a kmo a rokui el chad me a klalo me a tekoi el dilubech er tia el okesiu a omtechei er a chad me a lechub a lmuut el klou el tekoi el mo duubech er a ngar medad el klebesei? Me a lechub e ngmle soal a bo desuub a tekoi el ngii a sebeched el oltaut er a klengar er kid er a taem er a uriul el sils? Me bo dosaod.