OMESODEL A SUOBEL ER A MEDAL TIA EL BABIER | A SCIENCE NGMLA RULLII A BIBLIA EL MO DIAK A BELKUL?

A Science Ngerang Rullii er a Klengar er Kau?

A re scientist a kerekikl el merriter er a rokui el tekoi el melasem el mo medengei el kmo ngerruul er a ngerang e mekerang a loureor. Me te omes a kakerous el tekoi e meruul a experiment e le ngsorir el mo medengei a rokui el tekoi el kirel. Tiang a kmal meringel el ureor e rulleterir el mo seselk a rengrir a lebebil er a taem. Ngblak a rengrir el omes a tekoi e meruul a experiment el mo melai a sandei me a lechub e ngbetok el buil me a rak. A lebebil er a taem e ngmo diak lsebechir el metik a ungil el omesodel a tekoi, engdi betok el taem e a tekoi el leruul a mo uchul a klungioled. Me bo dosaod a bebil er aika el tekoi.

A ta el kombalii er a Europe a mla rullii a beches el klekedall el uchul me a rechad a sebechir el melim er a kikiongel el ralm e diak bo lsecher. Me a chouaika el klekedall a bla lousbech er a temel a meklou el tellemall er a beluu, el ua Haiti er a lemetemall er a desiu er a rak er a 2010.

Ngar er a melidiul e ngar er ngii a betok el satellite el dmak e rullii a Global Positioning System (GPS). Tiang a mileketmokl el kirel a klsoldau, engdi ngdirrek el ngosuterir a rumekall a mlai me a skoki me a diall me tirke el merael a kemanget el omerael me a remelisebekl er a chereomel. Ngkmal ungil tekoi tia el bla lerellii a re scientist e le ngmocha beot er kid el mo er aike el basio el soad el mo er ngii.

Me kau, ke ousbech a cell phone me a computer me a lechub a Internet? Ngmla mo mesisiich a bedengem e le kau el ousbech a beches el bedengel a kar? Ke merael el ngar er a skoki a lebebil er a taem? A lsekum nguaisei, e ke dirrek el ngmai a klungiolem er aike el betok el tekoi el science a mla kutmokl el mo uchul a klungiolir a rechad.

A TELKELEL A TEKOI ER A SCIENCE

A re scientist a sorir el menglou er a klemedengei er tir, me ngblak a rengrir el merriter aike el tekoi el ngii a kmal cheroid me a dirrek el kmal mekekerei. Tirke el nuclear physicist a blak a rengrir el mesuub er sel rolel a loureor a atom, e tirke el astrophysicist a melasem el mesuub a tekoi er a kmal irechar me bo el sebechir el medengelii a uchelel a melidiul. Me a rebebil el scientist a omdasu el kmo a lsekum te kmal mo dmolech el mesuub aika el tekoi, el uldimukl er aike el diak el sebechir el mes e remutech e ngmo sebechir el metik er a Dios.

A rebebil el merael a chisir el scientist me a rechad er a philosophy a kuk ngodech a uldesuir. Me a ta er a meluches a babier er a science el Amir D. Aczel a dilu el kmo, tirkang a “melasem el ousbech a tekoi er a science el olecholt el kmo ngdiak a Dios.” El ua tiang, a ta er a merael a chisel el physicist a dmu el kmo “ngkmal diak el sebeched el metik a olechotel el kmo ngar er ngii a Dios el omekrael a rokui el tekoi, me tiang a meskid a ungil el uchul me kede oumerang el kmo ngdiak a Dios.” E a rekuk bebil a melekoi el kmo a urerel a Dios  el losaod er ngii a Biblia a di ua “letekoi er a olai” e “blulak el tekoi.” *

Me nguaisei, engdi ngmo duubech a ker el kmo: A re scientist te mla mo cherrungel el medengelii a beluulechad me a melidiul, me ngdi blechoel el melemalt a uldesuir? Ngdiak leuaisei. A science a kmal mla meleketek, engdi a rebetok el scientist a medengei el kmo ngdirk betok a tekoi el dirkak bo dodengei me a diak el sebeched el mo medengei. A Steven Weinberg el physicist e dirrek el ngiluu a nguked el Nobel a kmo: “Ngkmal diak el sebeched el mo medengei a rokui el tekoi.” E a brobesong el Martin Rees, el Astronomer Royal er a Great Britain a milluches el kmo: “Nglocha ngar er ngii a tekoi el kmal diak el sebechir a rechad el mo medengei.” A mera er ngii a klemerang el kirel a kot el kekerei el cell el mo lmuut er tia el imis el klou el melidiul a kmal dirkak bo el sebechel a science el mo cherrungel el smodii. El ua tiang:

● Tirke el biologist a dirkak bo el cherrungel el medengelii a rolel e ngoureor a di ngar el cell. Ngdirkak bo lodengelii a rolel e ngoltobed a klisiich, e lomeob a protein, e mekerang e sebechel el obii el mo betok.

● A gravity a ngar er ngii a lerellii er kid er a bek el taem. Me nguaisei, engdi ngtekoi el dirkak bo lungil el medengelii tirke el physicist. Ngdiak lungil el medengei el kmo ngmekerang e sebechel a gravity el kursau el mei er a chutem sel mridekekl, me a lechub e ngmekerang e sebechel el mtebechelii a buil me ngmelemolem el meliuekl er a beluulechad.

● Tirke el cosmologist el mesuub el kmo a melidiul ngerruul er a ngerang, a omdasu el kmo ngbekord el 95% er ngii a kmal diak el sebechel el meues el ousbech a klekedall er a science. Me te omii er ngii el mo eru el bliongel el dark matter me a dark energy. Engdi ngdiak lodengei el kmo aikang ngera el klekedall.

Ngar er ngii a lmuut el bebil er a tekoi el diak lodengei a re scientist. Ngera uchul me tiang a klou a ultutelel el bo dodengelii? A merael a chisel el chad el meluches el kirel a science a kmo: “A tekoi el diak dodengei a lmuut el betok er aike el dodengei. Ngak a omdasu el kmo a omesubel a science a kirel el rullid el mo mechas a rengud me ngmo soad el mesuub a lmuut el betok, er a bai di domdasu el kmo kede mla mo ungil el medengei.”

A lsekum ngdirk rrau a rengum e omdasu el kmo a science a di kmedu el rullii a Biblia me a klaumerang er a Dios el mo diak a belkul, e molatk el kmo: A remellomes a rengrir el scientist a di sebechir el ngmai a kesai el klemedengei er tir er a beluulechad me a melidiul, me a leuaisei e ngmelemalt el tekoi a lsekum kede oltngakl a tekoi el diak el sebechel a science el smodii? Nglocha diak. Molatk er a tekoi el meldung er a Encyclopedia Britannica er a uriul er a losaod el kirel a reksi er a astronomy, el kmo: “A uriul er a bekord el 4,000 el rak el omesubel a astronomy, e kede dirk ua osengir a rechad er a Babilon el rrau a rengud sel domes er a melidiul.”

A Resioning er a Jehovah a mengull a uldesuir a rechad el kirel a lolilt a tekoi. Te dirrek el melasem el oltirakl er a ulekrael er a Biblia el kmo: “Mochotii a delemedemekerreng er kemiu el mor a rokuil chad.” (Filipi 4:5) Ngokiu tiaikid el rolel e aki olengit er kau me bo morriter er a rolel e a science me a Biblia a diak el ketouch a omesodel er a tekoi.

[Footnote]

 [Siasing el ngar er a 5 el llel]

 A Tekoi el Ngar er a Biblia el Mla Moterekokl el Oeak a Science

A Biblia a diak losaod el kmo ngii a babier er a science. Me nguaisei, engdi tirke el milluches er ngii a liluches a melemalt el omesodel a tekoi el lesemeriar er ngii a re scientist er chelechang. Me aikakid a bebil er ngii.

A taem er a lobeob a beluulechad me a melidiul

A re scientist a omdasu el kmo a beluulechad a mlo er ngii er a bekord el 4 el biliol el rak er a uchei, e a melidiul a mlo er ngii er a bekord el 13 el mo er a 14 el biliol el rak er a uchei. Me a Biblia a diak losaod er a taem er a lobeob a melidiul. Engdi ngdirrek el diak lolekoi el kmo ngulebeob el di kesai el telael el rak er a uchei. Sel kot el bades er a Biblia a di melekoi el kirel a taem er a “lomuchel a Dios el omeob er a beluulchad ma bek el tekoi el ngar a melidiul.” (Genesis 1:1) Tia el bades a mesterir a techellir a re scientist el mo ousbech a tekoi er a science el mo medengelii a taem el lulebeob a beluulechad.

A omengetmeklel a chutem el kirir a rechad

A kot el bliongel er a Genesis a ousbech er a tekoi el “sils” el mesaod er a temel a omengetmeklel a chutem el kirel a klengar. Me a ulebongel el tekoi el losaod er ngii aika el bades, a taem el lulebeob a rechad. A Biblia a diak louchais er a klemengetel aike el elolem el “sils” el luluusbech a Dios el omeob. Me a re scientist a ngar er ngii a techellir el mesuub e mo medengei a klemengetel aika el sils. E kid a medengei el kmo aika el “sils” a lmuut el mekemanget er a di 24 el sikang.

A beluulechad ngdechor er a ngerang?

A Biblia a mesaod el kmo a beluulechad a dechor “er a bechachau el melidiul.” (Job 26:7) Ngdiak a ta el losaod el kmo ngdechor er a ongelngelel a giant me a lechub e ngulkel a elefant el ngar er a bebul a uel, el ua losaod a betok el cheldecheduch er a irechar. A Biblia a bai milsterir a techellir a re scientist el mo merriter er tia el tekoi. Me a cherengel a taem e a Nicolaus Copernicus me a Johannes Kepler a milsaod er a rolel e a planet a merael el meliuekl er a sils. Me a uriul e a Isaac Newton a ulechotii a rolel e a gravity a oldak e omekrael a rokui el klekedall er a melidiul.

A ulekrael el merrob a rakt me a secher

A babier er a Levitikus a mesaod a ulekrael el mlo er a rechad er a Israel el kirel a rolel a lorrob a bekoiueiuul el rakt, el uldimukl er a klungel a ultutelel a longeroid er tir er a resmecher. E a llach el medung er a Duteronomi 23:12, 13 a milengelechel er tir el mo tuong er a ikrel a kiamp e melakl a decherir. Me nguaisei, engdi ngdirk bekord el 200 el rak er a mla me mong e a re scientist me a retoktang a mlo medengelii a klungel a ultutelel tia el tekoi.

Aika el bades el dirk dulsaod a milluches er a irechar. Me te milekerang tirke el milluches e mo medengei aika el tekoi alta e tirke el kot el mellomes a rengrir el chad er sel taem a kmal dimlak lodengei? Ngike el oubabier er a Biblia a onger el kmo: “Ng ua eanged el ngar bab er bebul a chutem, me ng ua isei e a rolek ma uldesuek a kuk ngar bab er a roliu ma uldesuiu.”​—Isaia 55:9.