OMESODEL A SUOBEL ER A MEDAL TIA EL BABIER | A ROLEL E NGMO DIAK A SEBEKRENG

A Sebekreng A Di Iliuekl Er Kid!

“Ak mlo omechar a kall e di miltik a cookies el 10,000 el taem el chachisois a cheral er sel di mla cheral! E a bo lekukuk e ngdiak a ta el kall er a stoang.”​—Paul, Zimbabwe.

“A bechik a silebedak el kmo ngmerolung e le ngmla mo chetil el bechik. Ak mekerang e mo sebechek el outekangel? A rengelekek te mo mekerang?”​—Janet, United States.

“Sel krengesii a debusech e ak mo mertak e mengiil sel lobuu a dub. Me ngmo chuib a betok el sikang e ngak a dirk omritel.”​—Alona, Israel.

Kid a kiei er a beluulechad el mui er a sebekreng me a ringel. (2 Timothy 3:1) Te betok a chelebangel a mondai er a udoud me a telemellel a telungalek me a mekemad me a bekoiueiuul el rakt me a meklou el telemellel a beluu. A rebebil a dirrek el suebek a rengrir el kmo: ‘Ngak ak mla mo kasinoma?’ ‘Ngmo ua ngera klengar er a rengelekek er a ngar medad?’

Ngdiak el rokui el sebekreng a mekngit. A ngalek a mo suebek a rengul er a uchei er a lolai a test, me a chad er a chelitakl a suebek a rengul er a uchei er a longitakl me a chad el mo er a interview a dirrek el suebek a rengul. A sebekreng er kid a dirrek el rullid me kede mo oleiub er kid er a kdekudel el tekoi. Engdi a lsekum ngdi blechoel el suebek a rengud e ngklou a letemellii er kid. A ta er a omesuub el ble leteloi er ngii a 68,000 el chad a ulechotii el kmo a chad el di suebek a rengul a di mereched el mad. Seikid a uchul me a Jesus a dilu el kmo: “A le sebek a rengmiu, me kemiu a di diak el sebechiu el komengetii a telkib er a klengar er kemiu.” Ngdirrek el dilu el kmo: “Lak el sebek a rengmiu.” (Mateus 6:25, 27) Engdi ngmekerang e mo diak el sebek a rengud?

Ngmo diak el sebek a rengud a lsekum kede mo ungil el melilt a tekoi, e melisiich er a klaumerang er kid er a Dios, e dirrek el mo oba omelatk el kirel a ngar medad el klebesei. Me bo desa rolel e aika el tekoi a ngilsuir a Paul me a Janet me a Alona el mo diak di lsebek a rengrir.