OMESODEL A SUOBEL ER A MEDAL TIA EL BABIER | A ROLEL E NGMO DIAK A SEBEKRENG

A Sebekreng El Kirel A Udoud

A Paul el demerir a reteru el ngalek a dilu el kmo: “A uriul er a lengasech a cheral a klalo er a beluak e ngliluut el kmal mo meringel a cheral a kall e dirrek el mlo olengesonges. Aki blechobech el mengiil el betok el sikang, engdi ngbetok el taem el ki bong e ngdikea kall. Me a rechad a kmal mlo mesengaked e a rebebil a di merael el obengkangk er a rael. E a cheral aike el klalo el dousbech er a bek el sils a ngilasech el mo betok el miliol, e liluut el ngmasech el mo betok el biliol. Me tiang a mlo uchul e ngdikea belkul a udoud er tia el beluu. Me ngmlo diak a ududek er a bank e mlo diak a insurance me a pension er ngak.”

A Paul a mle medengei el kmo ngkirel el ousbech er a “llomeserreng ma utebengel a tekoi” me bo el sebechel ngii me a telungalek er ngii el suobel. (Osisechakl 3:21) Ngdmu el kmo: “Ngak a chad er a dengki, engdi ak kilengei el meruul a ngii di el ureor me bo lsebechek el korker a sesei el udoud. A rebebil a di meskak a kall me a lechub e ngklekedall er a blai. Me a lsekum te meskak a 4 el sob e a kuterau a 2 e ousbech a 2. Ngmlo er ngii a 40 el chermek el ngelekel a malk. Me sera bo lemeklou e a kulterau e liluut el mechar a 300. E a uriul e a kulterau a 50 er ngii el kirel a 2 el 110 el bond el bek el merikengko. Me ak uluusbech aika el merikengko el omekang er a telungalek er ngak me a rebebil el kemanget el taem.”

A Paul a dirrek el mle medengei el kmo ngmo uchul a klungioled sel dultuil a klaumerang er kid er a Dios. Ngmo ngosukid a lsekum kede olengesenges er Ngii. Me ngua lolekoi a Jesus el kmo: “Lak di le sebek a rengmiu . . . A Demmiu a medengei el kmo a ika cho mousbech.”​—Lukas 12:29-31.

Ngklengiterreng e le Satan a mla rulleterir a rechad el mo mechesang el osiik aike el lousbech el uchul me te di suebek a rengrir. Te dirrek el blak a rengrir el osiik a betok el tekoi el lomdasu el kmo te ousbech engdi a mera er ngii e ngdiak el lousbech. Me a rebetok a mo omals er tir e a uriul e te mo chuarm e le ngike el “meleng a udoud a sibil a lulleng a udoud er ngii.”​—Osisechakl 22:7.

 A rebebil a mo mekngit el melilt a tekoi. A Paul a kmo: “A rebetok a mengoit a telungalek er tir e mo er a ta er a beluu el mo mengereker. Me a rebebil er tir a mlo er a beluu el diak le rruul a babilengir me ngmo diak el sebechir el oureor. Me te mo chemiis er a rebulis e di mo bad er a tkul a rael. Ngdimlak lekengei me lomekrael er tir a Dios. Engdi ngak me a telungalek er ngak a dilak el ultuil er a Dios el kirel a ngeso.”

MOLTIRAKL ER A ULEKRAEL ER A JESUS

A Paul a dirrek el dilu el kmo: “A Jesus a kmo: ‘Lak el sebek a rengmiu el kirel a klukuk; a klukuk a ngar ngii a sebekreng er ngii. Ng diak a ultutelel el molechel a ikel kuk kirel a tal sils.’ Me ngbek el sils el kululuuch el mo er a Dios el kmo: ‘Beskemam a kelam el ikel kim ousbech er chelechal sils.’ Me ngmera el ullengeseu er kemam el ua ledilung a Jesus. Ngdimlak el sebecham el ngmai aike el kot el somam. A ta er a taem el kungiil el mo omechar a kall e ngdimlak kudengei el kmo ngera el kall a ngar er ngii. E sera kbong e ngdi yogurt a ngar er ngii. E ngak a diak el soak el kall a yogurt, engdi aikang a kall. Me aki milengang er sel kesus. Me ak mereng a sulel a Dios e le ngdimlak a ta el ki bo mechiuaiu el telungalek el di songerenger.” *

“Chelechang e ngdi ungilbesul a rokui er kemam. Engdi ngokiu a tekoi el dilubech e aki mla mo medengei el kmo a kot el ungil el kerul a sebekreng a sel dultuil a klaumerang er kid er a Dios. A Jehovah * a mo blechoel el ngosukid a lsekum kede melemolem el meruul a soal. Aki mla mo medengelii a mera el belkul a Psalm 34:8 el kmo: ‘Di le kau el osiik el kmo ng ua ngeral ungil a RUBAK! Ngeltengat ngikel chad el metik er osebechakl el ngar ingii el RUBAK!’ Tiaikid a uchul me ngkmal diak ki medakt el lmuut el mo chelebangel a meringel el mondai el kirel a udoud.

“Me aki mla mo medengei el kmo a chad a melemolem el ngar el diak el ureor me a udoud e ngbai kall a uchul. Aki kmal semeriar el mengiil er sel taem el bo lemotaut a telbilel a Dios el kmo: ‘Bo le betok a redechel a wheat er a beluu.’ Engdi chelechang e ngkirel el mo ‘ungilbesul er a rengmam a le ngar ngii a bilam ma kelam.’ A Biblia a melisiich er kemam el kmo: ‘Mongeroid a klengar er kemiu er a ngibes er a udoud. Bo lungil a rengmiu er a ngar ngii er kemiu; ele Dios a dilu el kmo, “Ng kmal diak bo kchitau ma ka bo kubes er kau.” Misei e ng sebeched el oumerang e melekoi el kmo, “A Rubak a olengeseu er ngak me ng diak bo kmedakt.”’” *

Me a bo deua omerellel a Paul me a telungalek er ngii e ngkmal kirel el mo mesisiich a klaumerang er kid. (Genesis 6:9, 10) A kerebil a Paul a osisecheklid er a klou a belkul el tekoi alta kede chelebangel a mondai el kirel a udoud er chelechang me a lechub e ngar medad el taem.

Engdi kede mekerang a lsekum e kede kuk chelebangel a sebekreng el kirel a telungalek er kid?

[Aike el Footnote]

[Blurb el ngar er a 5 el llel]

A Dios a tibir el kmo: “Ng kmal diak bo kchitau ma ka bo kubes er kau.”​—Hebru 13:5