OMESODEL A SUOBEL ER A MEDAL TIA EL BABIER | A KLENGAR ER A URIUL ER A KODALL​—TIANG NGSEBECHEL EL TEKOI?

A Omelatk el Kirir a Rulekoad​—Ngsebechem el Oumerang er Tiang?

Ngmera el mo er ngii a okiis el kirir a rulekoad? A apostol el Paulus a uluumerang er tia el tekoi. Ngmilluches el kmo: “Ma lsekum kede oumera er a Kristus el di kirel tial beluulchad e merekong, e kede kot el chebuul er a re chad el rokui. E ngdi mera er ngii a Dios a ulekisii a Kristus er a kodall el ochotii el kmo tirkel mla mad a dirrek el bo lokisterir er a kodall.” (1 Korinth 15:19, 20) Me a okiis a kmal mle ulterekokl er a rengul a Paulus. E le sel okisel a Jesus a rirellii el kmal mo oumerang er tia el tekoi. *​—Rellir 17:31.

Ngdirrek el sebeched el oumerang er a tekoi er a okiis e le Jehovah a Dios er a klemerang el “diak lomulak.” (Titus 1:2) A Jehovah a dirkak a ta el lomulak e kmal diak el sebechel el mo omulak. Me a omomdasu, e ngmeskid a omelatk el kirel a okiis e dirrek el ulechotii el kmo ngsebechel el olekiis er a rulekoad e diak bo lotutii tia el telbilel? Ngkmal klebelung el tekoi a bo domdasu el uaisei!

Ngera uchul me a Jehovah a mla kutmeklii a rolel a okiis? Ngsel bltkil a rengul. A Job a dilu el kmo: “A lsekum ng mad a chad, e ng sebechel lmuut el mo chad? . . . Cho bo momekedong, e ak mo onger er kau, ng mo ungil a rengum er ngak, el blebelem.” (Job 14:14, 15) A Job a kmal mle ulterekokl a rengul el kmo a Jehovah a semeriar el mo olekiis er ngii er a kodall. Me ngmla mengodech a uldesuel a Dios? A bades a kmo: “Ngak a RUBAK, me ng diak kmengodech.” (Malakai 3:6, 7) Me a Dios a dirk semeriar el mo olekiis er a rulekoad me lluut el mo mesisiich a bedengir e dmeu a rengrir. Me ngdi ua blekerdelel a betik a rengul el chedam el oureng me lluut el mekiis er a kodall a ngelekel. Engdi a klekakerous er ngii a kmo, a Dios a di sebechel el remuul a rokui el tekoi el soal.​—Psalm 135:6.

 A Jehovah a mo msang a klisichel a Ngelekel me ngmo oluut a deuil a rengrir tirke el chad el mla mad a rechederir. Me ngua ngera uldesuel a Jesus el kirel a okiis? A uchei er a bo lolekiis er a Lasarus e ngmiles a kngtil a rengrir a ruchedal me a resechelil me ng “lilangel.” (Johanes 11:35) A kuk ta er a taem e ngmiltik er a melakl dil er a beluu er a Nain el mla mad a di ta el ngelekel el sechal. Me ngkmal “mlo chubur me ng dilu er ngii el kmo, ‘Lak mlangel.’” E di mle mereched el okisii a ngelekel. (Lukas 7:13) Me ngbleketakl el kmo ngchetil a tekoi el kodall. Me ngulterekokl el kmal mo ungil a rengul er sel taem el bo lebeltii a klengiterreng er a beluulechad el mo deurreng!

Me kau, ke mla chormii a klengiterreng? Ke locha dirrek el omdasu el kmo a kodall a ulebengelel a rokui el tekoi. Engdi ngdiak leuaisei, e le Dios a mo ousbech er a Ngelekel el olekiis er a rulekoad. Me a Dios a kmal soal a obo mesa otutel tia el telbilel. Ngkmal soal el mesekau el lmuut el mo omechull er a rebetik er a rengum. Me ka di molatk er a taem el bo mkiei el mo cherechar el diak a ta el bo mchacheroid kau me a rebetik er a rengum el kodall a uchul!

A Lionel el dulsaod er ngii er a uchei a kmo: “Ngmlo er ngii a techellek el mesuub el kirel a okiis. Me a kot e ngkmal mle meringel er ngak el mo oumerang er tia el tekoi e dimlak kuumerang er a chad el milsaod el kirel tia el tekoi. Engdi ak ulemes er a Biblia e mlo medengei el kmo tiang a mera el tekoi! Me ak mera el semeriar el lmuut el mo mesang a demak el rubak.”

Me ngdiak el soam el mo medengei a lmuut el betok el kirel tia el tekoi? A Resioning er a Jehovah a kmal dmeu a rengrir el mo ochotii sel uchul me te oumerang er a okiis el ousbech er a Biblia er kau. *

[Aike el footnote]

[Blurb el ngar er a 8 el llel]

A kodall a kmal meringel el tekoi, engdi Dios a sebechel el sumecheklii